Nos Por Wanta Cualkier Prueba!

BO TA confrontando un prueba actualmente? Bo ta sinti bo hopi desanima y ta sinti cu bo no por trata cu ne? De bes en cuando bo tin asta miedo cu bo problema ta asina excepcional cu no tin solucion p’e? Si esei ta e caso, cobra animo! Bijbel ta sigura nos cu cualkier prueba cu nos por haya nos cu ne, Dios por yuda nos trata cu nan cu exito.

Bijbel ta reconoce cu sirbidonan di Dios lo ‘haya nan mes den diferente pruebanan.’ (Santiago 1:2) Tuma nota di e palabra “diferente” (na Griego, poi·kí·los). Di acuerdo cu e manera cu hende tawata uz’e den pasado, e palabra original ta nifica “hopi y varia” of “multicolor” y e ta enfatisa “e variedad di e pruebanan.” Pues, e “diferente pruebanan” na moda di papia ta pruebanan cu ta bini na hopi color. Apesar di esei, Yehova ta sostene nos di tal manera cu nos por wanta cada un di nan. Dicon nos por ta sigur di esei?

“E Bondad Inmereci di Dios Expresa den Varios Manera”

Apostel Pedro a skirbi cu cristiannan ta wordo “afligi pa medio di varios prueba.” (1 Pedro 1:6) Mas despues den su carta inspira, el a declara cu “e bondad inmereci di Dios” ta ser “expresa den varios manera.” (1 Pedro 4:10, NW) E frase “den varios manera” ta contene un forma di e mesun palabra Griego original. Comentando riba e expresion aki, un experto di Bijbel a bisa: “Esaki ta un pensamento increibel ... Pa papia di e gracia [of, bondad inmereci] di Dios como poikilos ta nifica cu no tin ningun color of tipo di situacion cu hende ta hay’e aden, cu e gracia di Dios no por trata cu ne y vence.” Mas aleu el a bisa: “No tin ningun posibel combinacion di circunstancia, ningun posibel crisis, emergencia of necesidad urgente cu e gracia di Dios no por haya un caminda pa pasa door di dje, y cu e gracia di Dios no por trata cu ne cu exito y vence. No tin nada den bida cu e gracia di Dios no por deal cu ne. E palabra expresivo aki, poikilos, claramente ta laga nos corda riba e gracia multicolor di Dios cu realmente ta suficiente pa yuda nos wanta tur cos.”

Dios Su Bondad Inmereci Ta Yuda Nos Wanta Prueba

Segun Pedro, un di e maneranan cu Dios ta expresa su bondad inmereci ta mediante e varios personanan cu ta forma e congregacion cristian. (1 Pedro 4:11) Cada sirbido di Dios tin donnan of habilidadnan spiritual cu lo por sirbi como un fuente di animacion pa esnan cu ta haya nan confronta cu prueba. (Romanonan 12:6-8) Por ehempel, algun miembro di e congregacion ta sobresali como bon instructor di Bijbel. Nan palabranan cu ta refleha discernimento ta stimula y motiva otronan pa persevera. (Nehemias 8:1-4, 8, 12) Otro rumannan ta haci bishita di pastoreo riba un base regular serca esnan cu tin mester di yudansa y consuelo. E bishitanan ei ta ocasionnan pa anima, pa ‘curasha curason.’ (Colosensenan 2:2) Ora superintendentenan ta haci tal bishitanan fortalecedor di fe, nan ta comparti un don of regalo spiritual. (Huan  21:16) Tin tambe rumannan cu ta conoci pa nan cariño, compasion y ternura den nan trato cu compañeronan di fe cu ta tristo pa motibo di prueba. (Echonan 4:36; Romanonan 12:10; Colosensenan 3:10) E empatia y yudansa activo di e rumannan homber y mohe amoroso ei ta un expresion of “color” significativo di Dios su bondad inmereci.—Proverbionan 12:25; 17:17.

E “Dios di Tur Consuelo”

Mas cu tur cos, Yehova ta duna consuelo. E ta e “Dios di tur consuelo, kende ta consola nos den tur nos afliccion.” (2 Corintionan 1:3, 4) E maneranan principal cu Yehova ta contesta nos oracionnan pa yudansa ta mediante e sabiduria cu nos ta haya den su Palabra inspira y e fortalesa cu su spirito santo ta duna. (Isaias 30:18, 21; Lucas 11:13; Huan 14:16) E promesa inspira cu Pablo a skirbi por ta un animacion pa nos. El a bisa: “Dios ta fiel, kende lo no permiti pa boso wordo tenta mas cu boso por soporta, ma hunto cu e tentacion e lo provee salida tambe, pa boso por soporta.”—1 Corintionan 10:13.

Si, sin importa e “color” of e tipo di prueba cu nos haya nos cu ne, semper tin un “color” of expresion di Dios su bondad inmereci cu ta coresponde cu ne y cu por yuda nos want’e y venc’e. (Santiago 1:17) Yehova su apoyo oportuno y apropiado cu e ta percura pa su sirbidonan—sin importa con varia nan tentacion- of desafionan por ta—ta djis un evidencia di “e sabiduria masha varia di Dios.” (Efesionan 3:10, NW) Bo no ta di acuerdo cu esei?

[Plachinan na pagina 31]

Yehova ta yuda nos wanta nos pruebanan