Trabou Bendicion of Maldicion?

“Pa loke ta un hende, no tin nada mas miho cu e ... mira e bon pa motibo di su trabou duro.”—Eclesiastes 2:24, NW.

“MI TA keda na werki.” Asina 1 di cada 3 trahado a contesta den un encuesta resien con nan ta sinti hopi biaha na fin di un dia di trabou. Esaki no ta sorprende nos ya cu ta trata di hendenan den un ambiente di stress; nan ta traha mas largo y ta bai cas cu mas trabou, y tur esei cu hefenan cu rara bes tin un palabra di aprecio pa nan.

E binida di fabricanan di produccion en masa a pone hopi trahado sinti como si fuera nan ta simplemente e djentenan di wiel di un mashin inmenso y impersonal. Hopi bes nan trabou ta caba cu nan inspiracion y creatividad, loke di mes ta afecta nan actitud pa cu trabou. Esei facilmente ta demotiva nan pa mustra un interes personal den nan trabou. Tambe nan ta perde e gana di alcansa calidad halto den nan trabou. Tur esei por pone un persona cuminsa traha cu mala gana y haya rabia mes riba su trabou.

 Analisa Nos Actitud

Ta berdad cu no ta semper nos por cambia nos circunstancianan. Sinembargo, bo no ta di acuerdo cu loke si nos por cambia ta nos actitud? Si bo ripara cu bo a adopta un actitud un poco negativo pa cu trabou, lo ta bon pa bo considera Dios su punto di bista y su principionan relaciona cu e topico aki. (Eclesiastes 5:18) Hopi hende a descubri cu door di considera esakinan nan a haya un cierto grado di felicidad y satisfaccion den nan trabou.

Dios ta e Trahador Supremo. Dios ta un trahado. Podise bo no a yega di pensa riba Dios den e manera aki, pero ta asina e ta introduci su mes pa prome bes den Bijbel. E relato di Genesis ta habri cu Yehova su creacion di shelo y tera. (Genesis 1:1) Pensa riba e gran variedad di papel cu Dios a asumi ora cu el a cuminsa crea—diseñado, organisado, ingeniero, artista, specialista di material, promotor di proyecto, kimico, biologo, experto di bida animal, programmeur, linguista, djis pa menciona algun.—Proverbionan 8:12, 22-31.

Con e calidad di Dios su trabou tawata? Bijbel ta bisa cu e tawata “bon”, “masha bon.” (Genesis 1:4, 31) Si, creacion “ta conta di e gloria di Dios”, y nos tambe lo mester alab’e!—Salmo 19:1; 148:1.

Sinembargo, Dios su trabou no a caba cu creacion di e shelonan fisico, e tera y e prome pareha humano. Yehova su Yiu, Hesucristo, a bisa: “Mi Tata ta traha te awor.” (Huan 5:17) Si, Yehova ta sigui traha pa percura pa su criaturanan, pa sostene su creacion y pa salba su adoradonan fiel. (Nehemias 9:6; Salmo 36:6; 145:15, 16) E ta asta uza hende, “Dios su colaboradonan”, pa yud’e realisa cierto tareanan.—1 Corintionan 3:9.

Trabou por ta un bendicion. Pero Bijbel no ta bisa cu trabou ta un maldicion? Genesis 3:17-19 por parce di ta duna e idea cu Dios a castiga Adam cu Eva pa nan rebelion door di pone e carga di trabou riba nan. Ora Dios a condena e dos prome hendenan ei, el a bisa Adam: “Cu sodo di bo frenta lo bo come pan, te ora bo bolbe na tera.” Acaso esei a condena tur trabou?

No. Mas bien, debi na Adam cu Eva su infieldad, extension di e Paradijs di Eden lo no a tuma luga na e tempo ei mas. E tera a bin cai bou di Dios su maldicion. Pa un persona por a obtene e necesidadnan di bida for di suela e mester a traha duro cu sodo di su frenta.—Romanonan 8:20, 21.

Pero en bes di presenta trabou como un maldicion, Bijbel ta mustra cu e ta un bendicion cu nos mester aprecia. Manera a keda menciona ariba, Dios mes ta un persona trahado. Siendo cu Yehova a crea hende den su imagen, el a duna nan e habilidad y e autoridad di maneha su creacion terenal. (Genesis 1:26, 28; 2:15) Hende a haya e asignacion di trabou ei prome cu Dios a declara e palabranan cu tin para skirbi na Genesis 3:19. Si trabou tawata un maldicion y un cos malo, Yehova nunca lo no a anima hende pa traha. Noe cu su famia tawatin hopi trabou di haci prome y despues di e Dilubio. Den e era cristian, e disipelnan di Hesus tambe a haya e conseho fuerte pa traha.—1 Tesalonicensenan 4:11.

Apesar di esaki, nos tur sa cu awendia trabou por ta un peso. Stress, peliger, monotonia, decepcion, competencia, engaño y inhusticia ta djis algun di e ‘matanan di sumpiña y bringamosa’ liga cu trabou. Pero trabou riba su mes no ta un maldicion. Na Eclesiastes 3:13, Bijbel ta describi trabou y su fruta como un regalo di Dios.—Wak e cuadro “Con pa Deal cu Stress di Trabou.”

Bo por glorifica Dios cu bo trabou. Semper hende a elogia calidad y excelencia na trabou. Calidad ta un di e aspectonan importante pa nos tin un punto di bista biblico di trabou. Dios mes ta haci su trabou cu excelencia. El a  duna nos talentonan y capasidad, y e kier pa nos uza nan pa un bon meta. Por ehempel, durante construccion di e tabernakel den antiguo Israel, Yehova a duna hende manera Bezaleel y Oholiab hopi sabiduria, comprondemento y conocemento. Esei a capasita nan pa cumpli cu cierto tareanan artistico y practico. (Exodo 31:1-11) Esaki ta mustra cu Dios tawatin un interes special den e funcion, artesania, diseño y otro detayenan di nan trabou.

Esaki tin implicacionnan profundo riba e manera cu nos ta mira nos habilidadnan personal y custumbernan di trabou. E ta yuda nos mira e cosnan ei den un sentido como regalo di Dios, cu nos no mester considera como di poco importancia. Pesei Bijbel ta conseha cristiannan pa haci nan trabou como si fuera ta Dios mes lo evalua nan trabou: “Tur loke boso haci, haci boso trabou di curason, como pa SEÑOR y no pa hende.” (Colosensenan 3:23) Bijbel  ta manda sirbidonan di Dios pa presta bon na trabou, y di e manera ei nan ta haci e mensahe cristian mas atractivo pa coleganan y otro hende.—Wak e cuadro “Aplica Principionan Biblico na Trabou.”

En bista di e echo cu nos trabou por glorifica Dios, ta bon pa nos puntra nos mes ki clase di diligencia y calidad nos ta hinca den nos trabou. Dios lo keda contento cu nos prestacion? Nos ta completamente satisfecho cu e manera cu nos ta cumpli cu nos tareanan asigna? Si no ta asina, nos tin cos pa drecha.—Proverbionan 10:4; 22:29.

Balansa trabou cu nos relacion cu Dios. Aunke traha duro ta algo digno di elogio, tin un otro factor clave cu por yuda nos haya satisfaccion den trabou y den bida. Esei ta di duna atencion na nos relacion cu Dios. Rei Salomon, kende a traha duro y a disfruta di tur e rikesanan y comodidadnan cu bida tawatin di ofrece, a yega na e conclusion aki: “Teme Dios y warda su mandamentonan, pasobra esaki ta aplicabel na cada persona.”—Eclesiastes 12:13.

Ta bisto anto cu nos tin cu tene cuenta cu Dios su boluntad den tur loke nos ta haci. Nos  ta traha na harmonia cu su boluntad, of kisas nos ta traha contra dje? Nos ta haci esfuerso pa agrada Dios, of nos ta djis purba agrada nos mes? Si nos no ta haci e boluntad di Dios, cu tempo nos lo sufri e dolor di desesperacion, soledad y un bashi den bida.

Steven Berglas a sugeri pa ehecutivonan agota ‘busca un causa noble cu ta yena nan cu entusiasmo y hacie un parti di nan bida.’ No tin un causa mas digno cu sirbi Esun cu a duna nos e talentonan y capasidad pa haci trabou significativo. Trabou cu ta agrada nos Creador lo no laga nos insatisfecho. Pa Hesus, e trabou cu Yehova a asign’e tawata mes nutritivo, satisfaciente y refrescante cu cuminda. (Huan 4:34; 5:36) Anto corda cu Dios, e Trahador Supremo, ta invita nos pa bira su “colaboradonan.”—1 Corintionan 3:9.

Adora Dios y crece den nos relacion cu ne ta prepara nos pa trabou y responsabilidad cu ta duna satisfaccion. Siendo cu hopi biaha caminda nos ta traha ta yen di presion, conflicto y exigencia, nos fe profundo y spiritualidad por duna nos e fortalesa tan necesario segun cu nos ta sigui haci esfuerso pa ta miho trahado of dunado di trabou. Di otro banda, e realidadnan di bida den e mundo malbado aki por alerta nos den ki aspectonan nos tin cu crece den fe.—1 Corintionan 16:13, 14.

E Dia Cu Trabou Lo Ta un Bendicion

E hendenan cu ta trahando duro aworaki pa sirbi Dios por anticipa e tempo cu lo e restaura Paradijs y henter e tera lo ta yen di trabou cu ta bale la pena. Isaias, un profeta di Yehova, a papia tocante e futuro bida ei: “Nan lo traha cas y biba den nan; tambe nan lo planta cunucunan di wendruif y come nan fruta. Nan lo no traha cas pa otro hende biba aden, ni planta pa otro hende come . . . Mi scohinan lo disfruta di e obra di nan mannan pa hopi tempo.”—Isaias 65:21-23.

Ki un gran bendicion trabou lo ta e ora ei! Door di siña kico ta Dios su boluntad pa bo y traha na harmonia cu esei, bo por ta entre esnan bendiciona pa Yehova y semper ‘mira e bon cu tin den tur bo trabou duro.’—Eclesiastes 3:13.

[Comentario na pagina 8]

Dios ta e Trahador Supremo: Genesis 1:1, 4, 31; Huan 5:17

[Comentario na pagina 8]

Trabou por ta un bendicion: Genesis 1:28; 2:15; 1 Tesalonicensenan 4:11

[Comentario na pagina 8]

Bo por glorifica Dios cu bo trabou: Exodo 31:1-11; Colosensenan 3:23

[Comentario na pagina 8]

Balansa trabou cu nos relacion cu Dios: Eclesiastes 12:13; 1 Corintionan 3:9

[Cuadro/Plachi na pagina 6]

CON PA DEAL CU STRESS DI TRABOU

Profesionalnan medico a clasifica stress di trabou como un riesgo di bo profesion. E por causa ulcera y depresion y por asta hiba na suicidio. Japonesnan tin un palabra p’e—karoshi, “morto debi na exceso di trabou.”

Varios factor liga cu trabou por causa stress. Nan ta, entre otro, un cambio di orario of di condicion di trabou, problema cu superiornan, un cambio di responsabilidad of di e clase di trabou, baha cu pension y retiro. Tin hende ta purba combati of scapa di e stress ei door di cambia trabou of ambiente. Otronan ta purba domin’e, pero e ta manifesta su mes den otro area di bida, principalmente den famia. Tin hende ta asta sufri emocionalmente, y ta bira deprimi y desespera.

Cristiannan ta bon ekipa pa deal cu stress causa door di trabou. Bijbel ta duna masha hopi principio fundamental cu por sostene nos atrabes di tempo dificil. Esakinan por tin un efecto positivo riba nos bienestar spiritual y emocional. Por ehempel, Hesus a bisa: “No precupa boso mes pa e dia di mañan; pasobra e dia di mañan lo percura pa su mes. Cada dia tin suficiente problema di su mes.” E animacion den e texto aki ta pa consentra riba e problemanan di awe, no esnan di mañan. Asina nos ta evita di exagera nos problemanan, locual lo solamente aumenta e stress cu nos ta sinti.—Mateo 6:25-34.

Ta masha importante pa cristiannan depende riba Dios su forsa y no riba nan propio forsa. Ora nos ta sinti cu nos no por mas cu e situacion, Dios por duna nos pas y goso den nos curason y tambe e sabiduria pa trata cu cualkier situacion dificil. Apostel Pablo a skirbi: “Sea fuerte den Señor, y den e forsa di su poder.”—Efesionan 6:10; Filipensenan 4:7.

Por ultimo, asta circunstancianan yen di tension por hiba na resultadonan positivo. Pruebanan por pone nos acudi na Yehova, busca su guia y confia den dje. Tambe nan por pone nos sigui cultiva un personalidad cristian y e habilidad di persevera bou di presion. Pablo a conseha: “Laga nos hubila mientras cu nos ta den tribulacion, siendo cu nos sa cu tribulacion ta produci perseverancia; perseverancia, na su turno, un condicion aproba; e condicion aproba, na su turno, speransa.”—Romanonan 5:3, 4, NW.

Pues, asta stress por bira e chispa pa stimula crecemento spiritual en bes di un fuente di desesperacion y tristesa.

[Cuadro/Plachi na pagina 7]

APLICA PRINCIPIONAN BIBLICO NA TRABOU

Un cristian su actitud y comportacion na trabou por atrae colega y otro hende na e mensahe di Bijbel. Den Pablo su carta na Tito, el a conseha personanan den un situacion similar na esun di empleado pa nan “ta sumiso na nan [supervisornan] den tur cos, pa ta complaciente, pa no pusta boca, pa no horta ..., ma pa mustra tur buena fe, pa nan por dorna e doctrina di Dios nos Salbador den tur cos.”—Tito 2:9, 10.

Por ehempel, considera loke un comerciante a skirbi den un carta pa e sede mundial di Testigonan di Yehova: “Mi ta skirbi pa pidi boso permit pa haya Testigonan di Yehova na trabou. Mi kier tuma nan pasobra mi sa sigur cu nan ta honesto, sinsero y digno di confiansa, y cu nan lo no horta mi. E unico hendenan cu realmente mi ta confia ta Testigonan di Yehova. Por fabor yuda mi.”

Kyle ta un cristian cu ta traha como recepcionista na un scol priva. Debi na un mal comprondemento, un colega a zundr’e cu palabra malo dilanti di algun alumno. Kyle a bisa: “Mi mester a tene cuidou pa mi no trece reproche riba e nomber di Yehova.” Durante e siguiente cinco dianan, Kyle a keda pensa con e por a aplica principionan biblico. Un di nan ta na Romanonan 12:18: “Si ta posibel, asina leu cu ta depende di boso, sea na pas cu tur hende.” El a manda un E-mail pa su colega y a pidie despensa pa e tension cu tin entre nan. Kyle a invita e colega pa keda despues di trabou pa nan por a papia y resolve e asunto. Ora nan a haci esei, Kyle su colega a bira mas amigabel y el a reconoce cu Kyle su manera di aborda e asunto tawata sabi. El a bisa Kyle: “Esaki mester tin algo di aber cu bo religion”, y el a duna Kyle un abraso caluroso ora nan a bisa otro ayo. Kico tawata Kyle su conclusion? “Cos no por bai robes nunca si nos aplica principionan di Bijbel.”

[Plachinan na pagina 4, 5]

Hopi trahado ta sinti cu nan ta manera djente di wiel di un mashin impersonal

[Reconocemento]

Japan Information Center, Consulate General of Japan in NY

[Reconocemento pa Potret na pagina 8]

Planeta Tera: potret di NASA