Nan Ta Pone Nan Mes Disponibel

“BO PUEBLO lo pone su mes disponibel.” (Salmo 110:3) E palabranan ei tin un nificacion special pa e 46 studiantenan di e di 118 klas di e Scol Biblico di Galad di Watchtower. Con nan a prepara nan mes pa asisti na e scol aki cu ta entrena futuro misioneronan pa satisface e necesidadnan spiritual di hende den paisnan stranhero? Mike cu Stacie, miembronan di e di 118 klas, a splica: “Nos decision pa hiba un bida simpel a yuda nos limita cosnan cu por a distrae nos y mantene asuntonan spiritual como nos punto di enfoke. Nos tawata determina pa no laga nos exito den e mundo comercial pusha nos metanan spiritual un banda.” Mescos cu Mike cu Stacie, e otro studiantenan di e klas aki boluntariamente a pone nan mes disponibel y awor nan ta sirbi como proclamadonan di Reino na cuater continente.

Diasabra, 12 di maart 2005, un publico di 6.843 persona cu claramente tawata contento, a scucha e programa di graduacion. Theodore Jaracz, miembro di e Cuerpo Gobernante di Testigonan di Yehova, a fungi como presidente di e reunion. Despues di a duna un caluroso bonbini na e invitadonan, cu a bin for di 28 pais, el a enfoca atencion riba e balor di educacion biblico. Citando palabranan di William Lyon Phelps, un educado Mericano, Ruman Jaracz a declara: “Nos por considera tur hende cu tin un conocemento profundo di Bijbel como personanan berdaderamente educa.” Pa util cu educacion di mundo por ta, educacion biblico ta superior. E ta yuda hende gana conocemento di Dios, locual ta hiba na bida eterno. (Huan 17:3) Ruman Jaracz a elogia e graduadonan pa e echo cu nan tawata dispuesto pa tin un participacion mas grandi den e programa mundial di educacion biblico cu ta tumando luga den mas cu 98.000 congregacion di Testigonan di Yehova rond mundo.

Animacion Oportuno pa e Graduadonan

Despues di e palabranan di introduccion di e presidente, William Samuelson a papia riba e tema “Con Bo Por Ta Mescos Cu un Palo Berde di Oleifi den e Cas di Dios”, basa riba Salmo 52:8. El a mustra cu Bijbel ta uza palo di oleifi figurativamente como un simbolo di productividad, beyesa y dignidad. (Yeremias 11:16) Comparando e studiantenan cu palo di oleifi, e orado a bisa: “Yehova lo considera boso como personanan bunita y digno segun cu boso ta cumpli fielmente cu boso trabou di predica e Reino den boso asignacion como misionero.” Mescos cu e palo di oleifi tin mester di hopi raiz pa sobrevivi durante secura, asina  tambe e studiantenan tin cu fortifica nan raiznan spiritual pa nan por soporta indiferencia, oposicion of otro pruebanan cu nan lo por confronta den nan sirbishi den estranheria.—Mateo 13:21; Colosensenan 2:6, 7.

John E. Barr, un di e tres miembronan di Cuerpo Gobernante cu a participa den e programa, a papia riba e tema “Boso Ta e Salo di Tera.” (Mateo 5:13) El a señala cu mescos cu salo literal ta conserva cuminda pa e no daña of putri, asina e predicacion di e misioneronan tocante e Reino di Dios lo tin e efecto di salba bida di esnan cu scucha, protehando nan di daño of putrimento moral y spiritual. Anto cu un tono bondadoso Ruman Barr a urgi e graduadonan pa “tene pas” cu otro hende. (Marco 9:50) “Cultiva e fruta di spirito, y haci sigur cu boso conducta y abla semper ta agradabel y cu consideracion”, e orado a conseha.

Wallace Liverance, un di e instructornan di Galad, a presenta e tema: “Keda den e Barco den Awa Hundo.” Mescos cu un barco cu ta nabega den awa hundo por move den e direccion corecto, asina un comprondemento di “e profundidadnan di Dios”—berdadnan relaciona cu Dios su proposito y con lo e ser efectua—por yuda un persona haci progreso spiritual. (1 Corintionan 2:10) Djis keda den awa seco of cu no ta hundo den e sentido spiritual door di ta satisfecho cu “e principionan elemental di e palabra di Dios” ta stroba nos di progresa y por asta aumenta e chens cu nos lo “naufraga encuanto [nos] fe.” (Hebreonan 5:12, 13; 1 Timoteo 1:19) “Laga e ‘profundidad di e rikesanan, tanto di e sabiduria como di e conocemento di Dios’ sostene boso den boso asignacion como misionero”, Ruman Liverance a conclui.—Romanonan 11:33.

Mark Noumair, un otro instructor di Galad, a papia riba e tema “Lo Bo Sirbi Digno di Bo Herencia?” Pa mas cu 60 aña, e Scol Biblico di Galad di Watchtower a adkiri credibilidad y un excelente reputacion debi na e ‘monton di bon testimonio’ cu e graduadonan di e scol a duna. (Genesis 31:48) E herencia aki di Galad a pasa over pa e studiantenan di e di 118 klas. Ruman Noumair a anima e studiantenan pa imita e antiguo Tekoitanan di tempo di Nehemias y coopera humildemente cu e congregacion local y cu otro misionero. Nan a haya e spiertamento pa evita e actitud di e “noblenan” orguyoso cu Nehemias a papia di dje y mas bien sea dispuesto pa traha trankil den background.—Nehemias 3:5.

Experencia- y Entrevistanan Instructivo

E siguiente parti riba programa tawata titula “E Palabra di Dios A Sigui Plama.” (Echonan 6:7) Bou di guia di e instructor di Galad Lawrence Bowen, e studiantenan a tene demostracion di experencianan cu nan tawatin den sirbishi di veld durante e scol. E experencianan a demostra cu e studiantenan a proclama e Palabra di Dios cu celo y cu Yehova a bendiciona nan esfuersonan ricamente.

Richard Ashe a tene varios entrevista cu miembronan di e famia di Betel cu a traha estrechamente cu e scol. Nan comentarionan a duna un bista mas profundo di e manera cu e famia di Betel ta coopera pa yuda studiantenan di Galad saca e maximo probecho di nan educacion na e scol. Despues Geoffrey Jackson a papia cu algun exgraduado di Galad. Nan a hala atencion na e cantidad di oportunidadnan cu bida di misionero ta ofrece pa trece alabansa y honor na Yehova. Un di e exgraduadonan a remarca: “Hende ta observa tur cos cu bo ta haci como misionero. Nan ta scucha, nan ta wak y nan ta corda.” Pesei e studiantenan a haya e animacion pa percura pa nan ta un bon ehempel na tur momento. E conseho practico aki sin duda lo resulta masha balioso pa e misioneronan den e dianan benidero.

Stephen Lett, miembro di e Cuerpo Gobernante, a duna e discurso di conclusion, titula “Bai Como Cargadonan di ‘Awa Bibo.’” (Huan 7:38) El a bisa cu durante e ultimo cinco lunanan, e studiantenan a beneficia masha hopi mes door di ‘bebe’ profundamente di  Dios su Palabra di e berdad. Pero kico e misioneronan nobo lo haci cu e informacion cu nan a ricibi? Ruman Lett a urgi e graduadonan pa comparti e awanan spiritual aki generosamente pa asina otro hende por haya “un fuente di awa cu ta brota pa bida eterno” den nan mes. (Huan 4:14) E orado a agrega: “No lubida nunca di duna Yehova, ‘e fuente di awa bibo’, e honor y gloria cu e ta merece. Tene pasenshi ora boso ta siña e hendenan cu a sali for di Babilonia e Grandi cu ta ser asota pa secura.” (Yeremias 2:13) Ruman Lett a conclui cu un animacion na e graduadonan pa nan imita cu entusiasmo e spirito y e bruid y sigui bisa: “‘Bin.’ Y laga esun cu tin sed, bin; laga esun cu kier, tuma e awa di bida pornada.”—Revelacion 22:17.

Na final di e programa, Ruman Jaracz a menciona e saludonan cu nan a ricibi for di varios pais. Despues un miembro di e klas cu a gradua a lesa un carta di gradicimento.

Abo por pone bo mes disponibel pa sirbi caminda tin mas necesidad? Si ta asina, sigui tras di metanan spiritual, mescos cu e studiantenan cu a gradua aki a haci. Cosecha e goso y satisfaccion cu un persona ta haya ora cu e ofrece su mes boluntariamente y cu goso pa traha den Dios su sirbishi, sea como misionero den un pais stranhero of como un predicado mas serca di cas.

[Plachi na pagina 13]

ESTADISTICANAN DI E KLAS

Cantidad di pais representa: 8

Cantidad di pais na cua a asigna nan: 19

Cantidad di studiante: 46

Promedio di edad: 33,0

Promedio di aña den e berdad: 16,5

Promedio di aña den sirbishi di tempo completo: 12,9

[Plachi na pagina 15]

E di 118 Klas di Graduadonan di e Scol Biblico di Galad di Watchtower

Den e lista akibou, e reinan ta numera di dilanti bai patras, y e nombernan ta bai di robes pa drechi den cada rei.

(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.