Pregunta di Lector

Deuteronomio 14:21 ta bisa: “No come nada cu muri di su mes.” Acaso esaki ta contradeci Levitico 11:40 cu ta bisa: “Esun cu come un pida di su cadaver mester laba su pañanan y keda impuro te ora nochi sera”?

E dos versiculonan aki no ta contradeci otro. E texto di Deuteronomio 14:21 ta ripiti e prohibicion di come un bestia cu un hende a haya morto, kisas uno cu otro bestia a habraca. (Exodo 22:31; Levitico 22:8) E texto di Levitico 11:40 ta splica kico un Israelita lo por a haci den caso cu el a viola e prohibicion ei, kisas accidentalmente.

E echo cu e Lei a prohibi un cos no a nifica cu nunca hende lo a ignora e prohibicion. Por ehempel, tawatin lei cu a prohibi hortamento, matamento, dunamento di testimonio falso, etcetera. Pero alabes tawatin castigo pa esnan cu a kibra e leinan ei cu Dios a duna. E castigo a duna forsa na e leinan y a mustra con serio nan tawata.

Un persona cu a faya contra e prohibicion di come e carni di un bestia cu nan a haya morto lo tawata impuro den bista di Yehova y e mester a sigui e procedura corecto pa purifica su mes. Si e no a purifica su mes corectamente, lo e tawatin cu “carga su culpa.”—Levitico 17:15, 16.