“Trece Bon Nobo di Felicidad”

“Ki bunita riba e seronan ta e pianan di esun cu ... ta trece bon nobo di felicidad.”—ISAIAS 52:7.

1, 2. (a) Ki cosnan teribel ta sosode tur dia? (b) Con hopi hende ta reacciona riba e echo cu constantemente nan ta tende mal noticia?

AWENDIA, rond mundo hende ta sinti cu nan ta ser inunda pa mal noticia. Nan ta sende radio y ta informenan spantoso tocante malesanan mortal cu ta menasa e tera nan ta tende. Nan ta bira wak noticia na television y ta imagennan teribel di muchanan hambra cu ta sclama pa yudansa nan ta mira. Nan ta coi un corant y ta tocante bomnan cu a explota y destrui hopi edificio, matando cantidad di hende inocente nan ta lesa.

² Si, tur dia cosnan teribel ta sosode. Definitivamente e esena di e mundo aki ta cambiando, pero pa mas piyo. (1 Corintionan 7:31, NW) Un revista noticiero di West Europa a comenta cu tin biaha ta parce como si fuera mundo completo ta “a punto di caba na candela.” Pesei no ta straño cu mas y mas hende ta sinti nan hopi angustia! Na Merca nan a haci un sondeo tocante noticia cu ta pasa na television, anto e palabranan di un persona cu a participa den e sondeo ei, sin duda ta refleha e sintimento di miyones di hende. E persona a bisa: ‘Ora mi caba di wak noticia, mi ta keda tur deprimi. Ta mal noticia so ta pasa. E ta laga bo sinti hopi impotente.’

Noticia Cu Tur Hende Tin Cu Tende

3. (a) Ki bon noticia Bijbel ta proclama? (b) Dicon bo ta haya cu e bon noticia di e Reino ta balioso?

³ Nos por haya miho noticia den un mundo scur asina? Si, nos por! Ta un gran consuelo pa sa cu Bijbel ta proclama bon noticia. Ta e noticia cu e Reino di Dios lo pone fin na malesa, hamber, crimen, guera y tur sorto di opresion. (Salmo 46:9; 72:12) Esei no ta un noticia cu tur hende tin cu tende? Testigonan di Yehova sigur ta kere cu si. Ta pesei nan ta conoci tur caminda pa nan esfuerso continuo pa comparti e evangelio of bon noticia di e Reino di Dios cu hende di tur nacion.—Mateo 24:14.

4. Ki aspectonan di nos sirbishi nos lo considera den e articulo aki y esun siguiente?

⁴ Pero kico nos por haci pa nos por sigui participa na un manera significativo y cu ta duna satisfaccion den e predicacion di e bon noticia aki, asta caminda tin menos reaccion positivo? (Lucas 8:15) Un consideracion cortico di tres aspecto importante di nos trabou di predica sin duda lo yuda nos. Nos por analisa (1) nos motivacion, esta, pakico nos ta predica; (2) nos mensahe, esta, kico nos ta predica; y (3) nos metodonan, esta, con nos ta predica. Door di percura pa nos motivacion keda puro, pa nos mensahe ta bon cla y cu nos metodonan ta efectivo, nos lo duna un variedad grandi di hende e oportunidad di tende e miho noticia cu tin—e bon nobo di e Reino di Dios. *

 Pakico Nos Ta Predica e Bon Nobo

5. (a) Kico ta nos motivacion principal pa participa den e ministerio? (b) Dicon nos por bisa cu nos obediencia na e mandamento biblico pa predica ta un expresion di amor pa Dios?

⁵ Laga nos considera e prome aspecto—nos motivacion. Pakico nos ta predica e bon nobo? Pa e mesun motibo cu Hesus a hacie. El a bisa: “Mi ta stima e Tata.” (Huan 14:31; Salmo 40:8) Amor pa Dios ta loke principalmente ta motiva nos. (Mateo 22:37, 38) Bijbel ta liga amor pa Dios cu e ministerio, pasobra e ta declara: “Esaki ta e amor di Dios, cu nos ta warda su mandamentonan.” (1 Huan 5:3; Huan 14:21) Acaso un di Dios su mandamentonan ta pa ‘bai y haci disipel’? (Mateo 28:19) Si. Ta berdad cu ta Hesus a papia e palabranan ei, pero en realidad, nan a origina di Yehova. Con asina? Hesus a splica: “Ami no ta haci nada di mi mes, ma . . . mi ta papia e cosnan aki manera e Tata a siña mi.” (Huan 8:28; Mateo 17:5) Pues, door di cumpli cu e mandamento pa predica, nos ta mustra Yehova cu nos ta stim’e.

6. Den ki maneranan amor pa Dios ta motiva nos pa predica?

⁶ Ademas, amor pa Yehova ta motiva nos pa predica pasobra nos kier contraresta e mentiranan cu Satanas ta fomenta contra Yehova. (2 Corintionan 4:4) Satanas a pone na duda si Dios su gobernacion ta husto. (Genesis 3:1-5) Como Testigonan di Yehova, nos ta anhela di por yuda desenmascara Satanas su calumnianan y santifica Dios su nomber dilanti di humanidad. (Isaias 43:10-12) Tambe nos ta participa den e ministerio pasobra nos a siña conoce Yehova su cualidadnan y camindanan. Nos ta sinti un intimidad cu ne y tambe nos tin e deseo fuerte di conta otro hende tocante nos Dios. De echo, Yehova su bondad y su camindanan husto ta duna nos asina tanto goso cu nos no por stop di papia tocante dje. (Salmo 145:7-12) Nos ta sinti nos motiva pa proclama su alabansa y papia tocante su “obranan magnifico” na hende cu kier scucha.—1 Pedro 2:9, BPK; Isaias 43:21.

7. Fuera di amor pa Dios, pa ki otro motibo importante nos ta participa den e trabou di predica?

⁷ Tin un otro motibo importante pa sigui participa den e ministerio: Sinseramente nos kier trece alivio pa personanan aplasta pa e avalancha constante di mal noticia y pa esnan cu ta sufri pa un of otro motibo. Den e trabou di duna alivio aki, nos ta haci esfuerso pa imita Hesus. Por ehempel, wak e relato cu tin na Marco capitulo 6.

8. Kico e relato na Marco capitulo 6 ta mustra tocante Hesus su sintimento pa hende?

⁸ E apostelnan a regresa for di un campaña di predicacion y a conta Hesus tur loke nan a haci y siña hende. Hesus a ripara cu e apostelnan tawata cansa, y el a bisa nan pa ban “sosega un rato.” Pues nan a subi den un boto y a bai na un luga trankil. Pero e hendenan a sigui nan, coriendo canto di costa, y poco despues a alcansa nan. Kico Hesus a haci? Bijbel ta bisa: “El a mira un multitud grandi, y el a sinti compasion pa nan, pasobra nan tawata manera carne sin wardado; y el a cuminsa siña nan hopi cos.” (Marco 6:31-34) Apesar cu Hesus tawata cansa, compasion a motiv’e pa sigui comparti e bon nobo cu e hendenan. Pues  ta bisto cu Hesus realmente a sinti pa e hendenan aki.

9. Kico nos ta siña for di e relato na Marco capitulo 6 encuanto e motivacion corecto pa predica?

⁹ Kico nos ta siña for di e relato aki? Como cristian, nos ta sinti un obligacion pa predica e bon nobo y haci disipel. Nos ta reconoce nos responsabilidad di proclama e bon nobo, ya cu Dios ta desea pa ‘tur clase di hende wordo salba.’ (1 Timoteo 2:4) Sinembargo, nos ta cumpli cu nos ministerio no solamente debi na un sentido di deber sino tambe debi na compasion. Ora cu nos ta sinti compasion pa hende, mescos cu Hesus a sinti, nos curason lo motiva nos pa haci tur loke nos por pa sigui comparti e bon nobo cu nan. (Mateo 22:39) Si nos tin tal motibonan excelente pa participa den e ministerio, esei lo motiva nos pa predica e bon nobo sin stop.

Nos Mensahe—E Bon Nobo di e Reino di Dios

10, 11. (a) Con Isaias ta describi e mensahe cu nos ta predica? (b) Con Hesus a trece bon nobo di algo miho, y con Dios su sirbidonan den tempo moderno a sigui Hesus su ehempel?

¹⁰ Kico di e di dos aspecto di nos sirbishi, esta, nos mensahe? Kico nos ta predica? Profeta Isaias a duna e bunita descripcion aki di e mensahe cu nos ta anuncia: “Ki bunita riba e seronan ta e pianan di esun cu ta trece bon nobo, cu ta anuncia pas y ta trece bon nobo di felicidad, cu ta anuncia salbacion y cu ta bisa Sion: ‘Bo Dios ta reina!’”—Isaias 52:7.

¹¹ E expresion clave den e texto aki, “bo Dios ta reina”, ta recorda nos di e mensahe cu nos tin cu proclama, esta, e bon nobo di e Reino di Dios. (Marco 13:10) Tuma nota tambe cu e versiculo aki ta revela e tono positivo di nos mensahe. Isaias ta uza palabranan manera “salbacion”, “bon nobo”, “pas” y “felicidad.” Siglonan despues di Isaias, den e prome siglo di nos era, Hesucristo a cumpli cu e profecia aki den un manera sobresaliente. El a pone un bon ehempel door di anuncia cu celo e noticia felis di algo miho, e benidero Reino di Dios. (Lucas 4:43) Den tempo moderno, specialmente for di aña 1919, Testigonan di Yehova a sigui Hesus su ehempel door di proclama cu celo e bon nobo di Dios su Reino estableci y e bendicionnan cu esaki lo trece.

12. Ki efecto e bon nobo di e Reino tin riba esnan cu acept’e?

¹² Ki efecto e bon nobo di e Reino tin riba hende cu acept’e? Awe, mescos cu den tempo di Hesus, e bon nobo ta duna speransa y consuelo. (Romanonan 12:12; 15:4) E ta duna hende di curason honrado speransa, pasobra nan ta siña cu tin motibonan solido pa kere cu un miho tempo ta spera nan. (Mateo 6:9, 10; 2 Pedro 3:13) E speransa ei ta un gran yudansa pa hende temeroso di Dios por mantene un punto di bista optimista. E salmista  ta declara cu nan “lo no tin miedo di mal noticia.”—Salmo 112:1, 7.

Un Mensahe Cu Lo “Verband Hende di Curason Kibra”

13. Con profeta Isaias ta describi e bendicionnan inmediato cu esnan cu acepta e bon nobo ta ricibi?

¹³ Ademas e bon nobo cu nos ta predica ta trece alivio y bendicion inmediato pa esnan cu scuch’e. Con asina? Profeta Isaias a indica algun di e bendicionnan ora el a predeci: “E spirito di Señor Soberano Yehova ta riba mi, pa motibo cu Yehova a ungi mi pa anuncia bon nobo na mansonan. El a manda mi pa verband hende di curason kibra, pa proclama libertad na esnan hiba preso y pa habri hancho wowo di asta prizoneronan; pa proclama e aña di bon boluntad di parti di Yehova y e dia di vengansa di parti di nos Dios; pa consola tur esnan cu ta verdriet.”—Isaias 61:1, 2, NW; Lucas 4:16-21.

14. (a) Kico e expresion “verband hende di curason kibra” ta indica tocante e mensahe di Reino? (b) Con nos ta refleha Yehova su precupacion y interes pa hende di curason kibra?

¹⁴ Segun e profecia aki, door di predica e bon nobo Hesus lo a “verband hende di curason kibra.” Isaias a uza un descripcion hopi expresivo! Segun un diccionario di Bijbel, e palabra Hebreo traduci “verband” “hopi bes ta ser uza relaciona cu ‘mara’ un verband, y pues, tin di aber cu uza remedi pa trata esnan herida y cura nan.” Un verpleegster bondadoso kisas ta mara un verband, of compres, rond di e parti herida di e curpa di un victima pa asina dun’e sosten. Den mesun manera, ora publicadonan bondadoso ta predica e mensahe di Reino nan ta duna sosten na tur hende cu reacciona faborabel y cu ta sufri den un manera of otro. Anto door di duna sosten na esnan den necesidad, nan ta refleha Yehova su precupacion y interes. (Ezekiel 34:15, 16) E salmista a declara relaciona cu Dios: “E ta cura esnan di curason kibra, y ta mara nan heridanan.”—Salmo 147:3.

Con e Mensahe di Reino Ta Haci un Diferencia

15, 16. Cua experencianan di bida real ta ilustra con e mensahe di Reino ta duna sosten y fortalesa na hende den necesidad?

¹⁵ Tin cantidad di ehempel di bida real cu ta ilustra con e mensahe di Reino en berdad ta sostene y fortalece hende di curason kibra. Tuma por ehempel Oreanna, un señora di edad avansa na Sur America, cu a perde tur smak den bida. Un Testigo di Yehova a cuminsa bishita Oreanna y tawata lesa p’e for di Bijbel y e publicacion Mi buki di relato bíblico. * Na principio, e señora deprimi tawata scucha e lesamento drumi na cama cu su wowonan sera, mientras cu de bes en cuando e tawata dal un suspiro. Pero no a tarda mucho cu el a cuminsa haci un esfuerso pa lanta sinta riba su cama durante e lesamento. Poco tempo despues, e tawata sinta warda riba su maestra di Bijbel den stul den sala. Despues, e señora a cuminsa asisti na reunionnan cristian na e Salon di Reino. Encurasha door di loke el a siña na e reunionnan ei, el a cuminsa ofrece literatura biblico na ken cu pasa banda di su cas. Anto na edad di 93 aña, Oreanna a batisa como un Testigo di Yehova. E mensahe di Reino a renoba su gana di biba.—Proverbionan 15:30; 16:24.

¹⁶ E mensahe di Reino ta duna sosten crucial asta na personanan cu sa cu nan bida ta serca di yega su fin debi na malesa. Tuma por ehempel Maria di West Europa. E tawata sufri di un malesa mortal y a perde tur speransa. E tawata hopi deprimi ora Testigonan di Yehova a bin den contacto cu ne. Sinembargo, ora el a siña tocante e propositonan di Dios, su bida a bolbe haya sentido. El a batisa y a bira masha activo den e trabou di predica. Durante e ultimo dos añanan di su bida, su wowonan tawata briya yen di speransa y goso. Maria a muri cu un speransa firme den  e resureccion.—Romanonan 8:38, 39.

17. (a) Con e mensahe di Reino ta haci un diferencia den bida di esnan cu acept’e? (b) Den ki maneranan abo personalmente a experencia cu Yehova ta “lanta tur cu ta abati”?

¹⁷ Informenan asina ta duna testimonio di e diferencia cu e mensahe di Reino por haci den bida di hende cu ta anhela berdadnan biblico. Personanan cu ta verdriet pa e morto di un ser keri, ta haya forsa atrobe ora nan siña tocante e speransa di resureccion. (1 Tesalonicensenan 4:13) Hendenan cu ta biba den pobresa y cu ta lucha pa alimenta nan famia, ta haya un dignidad nobo y curashi ora nan siña cu Yehova nunca lo no bandona nan si nan ta fiel na dje. (Salmo 37:28) Cu Yehova su yudansa, hopi hende aplasta pa depresion pocopoco ta desaroya e fortalesa necesario pa trata cu nan malesa y den algun caso asta ta logra vence e malesa ei. (Salmo 40:1, 2) Aworaki en berdad Yehova “ta lanta tur cu ta abati” pa medio di e poder cu su Palabra ta suministra. (Salmo 145:14) Door di observa con e bon nobo di e Reino ta trece consuelo pa hende di curason kibra den nos teritorio y den e congregacion cristian, nos ta ser recorda bes tras bes cu nos tin e miho noticia disponibel awe!—Salmo 51:17.

‘Mi Oracion na Dios pa Nan’

18. E echo cu e Hudiunan a rechasa e bon nobo tawatin ki efecto riba Pablo, y dicon?

¹⁸ Aunke nos mensahe ta contene e miho noticia, hopi hende ta rechas’e. Con esaki lo por afecta nos? Den e mesun manera cu el a afecta apostel Pablo. Pablo a predica hopi biaha na hende Hudiu, pero mayoria di nan a rechasa e mensahe di salbacion. Nan rechaso a afecta Pablo profundamente. El a admiti: “Mi tin gran tristesa y un dolor continuo den mi curason.” (Romanonan 9:2) Pablo a sinti compasion pa e Hudiunan cu el a predica na dje. E echo cu nan a rechasa e bon nobo a hacie tristo.

19. (a) Dicon ta di compronde cu tin biaha nos por sinti nos descurasha? (b) Kico a yuda Pablo sigui den su trabou di predica?

¹⁹ Nos tambe ta predica e bon nobo motiva pa compasion. Pues ta di compronde cu nos por sinti nos descurasha ora cu hopi hende ta rechasa e mensahe di Reino. Nos reaccion ta demostra cu nos ta realmente interesa den e bienestar spiritual di e hendenan cu nos ta predica na dje. Sinembargo, ta bon pa nos corda riba e ehempel di apostel Pablo. Kico a yud’e sigui den su trabou di predica? Aunke e echo cu e Hudiunan a rechasa e bon nobo a causa Pablo tristesa y dolor, e no a perde interes den tur Hudiu, pensando cu nan tawata  caso perdi. E tawatin e speransa cu algun Hudiu ainda lo a acepta Cristo. Pues, relaciona cu su sintimento pa cu Hudiunan individual, Pablo a skirbi: “E deseo di mi curason y mi oracion na Dios pa Israel ta pa salbacion.”—Romanonan 10:1.

20, 21. (a) Relaciona cu nos ministerio, con nos por imita Pablo su ehempel? (b) Ki aspecto di nos ministerio nos lo considera den e siguiente articulo?

²⁰ Tuma nota di dos cos cu Pablo a enfatisa. E deseo di su curason tawata pa algun hende haya salbacion, y el a haci oracion na Dios tocante esaki. Awe, nos ta sigui Pablo su ehempel. Nos ta mantene un deseo sinsero pa localisa ken cu lo por tin e disposicion corecto pa cu e bon nobo. Nos ta sigui pidi Yehova den oracion pa nos por haya e personanan ei di manera cu nos por yuda nan sigui e caminda cu lo hiba na nan salbacion.—Proverbionan 11:30; Ezekiel 33:11; Huan 6:44.

²¹ Sinembargo, pa alcansa mas tanto hende posibel cu e mensahe di Reino, nos tin cu presta atencion no solamente na pakico y kico nos ta predica sino tambe con nos ta predica. Den e siguiente articulo nos lo trata e topico aki.

[Nota]

Kico Bo A Siña?

• Pa ki motibonan nos ta participa den e ministerio?

• Kico ta e mensahe principal cu nos ta predica?

• Ki bendicion hende cu acepta e mensahe di Reino ta experencia?

• Kico lo yuda nos sigui den nos ministerio?

[Preguntanan di Estudio]

[Plachi na pagina 18]

E mensahe di Reino ta duna fortalesa na hende di curason kibra

[Plachi na pagina 20]

Oracion ta yuda nos persevera den nos ministerio