Bo Ta Fiel den Tur Cos?

“Esun cu ta fiel den un cos masha chikito, ta fiel tambe den hopi.”—LUCAS 16:10.

1. Cua ta un di e maneranan cu Yehova ta fiel?

SEGUN cu un dia ta pasa, bo a yega di tuma nota di loke ta sosode cu e sombra di un palo? Wel, e sombra constantemente ta cambia di tamaño y direccion! Esfuerso- y promesanan humano hopi bes ta mesun instabil cu sombra. Di otro banda, Yehova Dios no ta cambia segun tempo ta pasa. Disipel Santiago a referi na Yehova como “e Tata di lusnan, serca kende no tin variacion ni sombra di cambio.” (Santiago 1:17) Yehova ta constante y confiabel, asta den e detayenan di mas chikito. E ta “un Dios di fieldad.”—Deuteronomio 32:4.

2. (a) Pakico nos tin cu samina nos mes pa determina si nos ta fiel? (b) Ki preguntanan tocante fieldad nos lo considera?

² Con Dios ta considera e confiabilidad di su adoradonan? Dios tin e mesun punto di bista cu David, kende a bisa di nan: “Mi wowonan lo ta riba e fielnan di e tera, pa nan por biba serca mi; esun cu ta cana den e caminda di perfeccion lo sirbi mi.” (Salmo 101:6) Si, Yehova tin delicia den e fieldad di su sirbidonan. Cu bon motibo anto apostel Pablo a skirbi: “Ta wordo rekeri di mayordomo cu cada un ta wordo haya fiel.” (1 Corintionan 4:2) Kico fieldad ta encera? Den ki areanan di bida nos mester actua cu fieldad? Kico ta e bendicionnan di “cana den e caminda di perfeccion”, es decir, di un manera integro?

Loke Ta Nifica Ser Fiel

3. Kico ta determina si nos ta fiel?

³ Hebreonan 3:5 ta declara: “Moises tawata fiel.” Kico a haci profeta Moises fiel? Ora di construi y lanta e tabernakel,  Moises a haci “conforme tur loke SEÑOR a orden’e, asina el a haci.” (Exodo 40:16) Como adorado di Yehova, nos ta demostra fieldad door di sirbie obedientemente. Esaki sigur ta encera cu nos ta keda leal na Yehova ora cu nos ta confronta pruebanan dificil of severo. Sinembargo, nos exito den trata cu pruebanan grandi no ta e unico factor cu ta determina nos fieldad. Hesus a declara: “Esun cu ta fiel den un cos masha chikito, ta fiel tambe den hopi; y esun cu ta inhusto den un cos masha chikito, ta inhusto tambe den hopi.” (Lucas 16:10) Nos mester keda fiel asta den asuntonan cu por parce chikito.

4, 5. Kico nos fieldad den “cos masha chikito” ta revela?

⁴ Ser obediente tur dia den “cos masha chikito” ta importante pa dos motibo. Na prome luga, e ta revela kico nos ta pensa di Yehova su soberania. Pensa un rato riba e test di lealtad cu a ser poni dilanti di e prome pareha humano, Adam cu Eva. Loke Dios a rekeri di nan no tawata un peso pa nan. Nan tawatin acceso na tur sorto di fruta den e hofi di Eden, ta un palo so nan no tawatin mag di come di dje, “e palo di conocemento di bon y malo.” (Genesis 2:16, 17) Nan fieldad den obedece e mandamento simpel ei lo a demostra cu e prome pareha humano tawata na fabor di Yehova su gobernacion. Ora nos ta sigui Yehova su instruccionnan den nos bida di tur dia, nos ta mustra cu nos ta na fabor di Yehova su soberania.

⁵ Na di dos luga, nos conducta den “cos masha chikito” tin un influencia riba e manera cu nos lo reacciona “tambe den hopi”, es decir, ora nos ta confronta cuestionnan mas grandi den bida. Relaciona cu esaki, considera loke a sosode cu Daniel y su tres fiel compañeronan Hebreo, Ananias, Misael y Azarias. Nan a ser hiba den exilio na Babilonia na aña 617 prome cu nos era. Mientras cu nan tawata hopi jong ainda, probablemente teenager, e cuater mucha hombernan aki a haya nan den e corte real di Rei Nabucodonosor. Tawatin “ordo pa nan haya un provision diario di e miho cuminda di Rei y di e biña cu Rei tawata bebe, y tambe pa nan haya un educacion di tres aña, na fin di cual nan mester a drenta e sirbishi personal di Rei.”—Daniel 1:3-5.

6. Ki prueba Daniel y su tres compañeronan Hebreo a confronta den e corte real di Babilonia?

⁶ Sinembargo, e provisionnan di e Rei di Babilonia a presenta un problema pa e cuater hobennan Hebreo. E miho cuminda di Rei probablemente a inclui cuminda prohibi pa e Lei di Moises. (Deuteronomio 14:3-20) E Babilonionan kisas no a laga e bestianan mata sangra na e manera apropiado, y si nan a come di e carni ei nan lo a viola Dios su lei. (Deuteronomio 12:23-25) Podise tambe e Babilonionan, segun nan custumber religioso, a ofrece e cuminda na idolo prome cu nan a come na mesa hunto.

7. Kico e obediencia di Daniel y su tres amigonan a demostra?

⁷ Pa e cas real di Rei di Babilonia, restriccionnan relaciona cu cuminda no tawata un problema grandi. Sinembargo, Daniel y su amigonan tawata dicidido den nan curason pa no contamina nan mes door di come cuminda prohibi den e Lei cu Dios a duna Israel. Esaki tawata un cuestion cu a encera nan lealtad y fieldad na Dios. Pesei nan a pidi pa come berdura y bebe awa, y nan a haya permit pa haci esei. (Daniel 1:9-14) Pa algun hende awe, e loke e cuater hobennan ei a haci por parce insignificante. Sinembargo, nan obediencia na Dios a demostra unda nan ta para relaciona cu e cuestion di Yehova su soberania.

8. (a) Ki prueba crucial di lealtad e tres Hebreonan a confronta? (b) Kico tawata e resultado di e prueba, y esaki ta un bon ehempel di kico?

⁸ Door di demostra di ta fiel den loke lo por a parce menos importante a prepara Daniel su tres amigonan pa trata cu un prueba mas grandi. Bai na capitulo 3 di e buki  biblico di Daniel, y lesa pa bo mes con e tres Hebreonan a confronta pena di morto pasobra nan a nenga di adora e imagen di oro cu Rei Nabucodonosor a lanta. Ora a hiba nan dilanti di Rei, nan a declara nan determinacion cu confiansa: “Si t’asina, nos Dios, kende nos ta sirbi, por libra nos for di e forno di candela cayente-cayente, y e lo libra nos for di bo man, o Rei. Ma asta si e no haci esei, sea sigur, o Rei, cu nos no ta bai sirbi bo diosnan, ni adora e imagen di oro cu bo a lanta.” (Daniel 3:17, 18) Yehova a libra nan? E guardianan cu a tira e hombernan hoben den e forno di candela a muri, pero e tres fiel Hebreonan a sali afo bibo, e cayente di e forno no a kima ni un drachi di cabei na nan curpa! Nan patronchi bon estableci di fieldad a yuda prepara nan pa ta fiel durante e prueba crucial ei. Esaki no ta un bon ehempel cu ta mustra con importante ta pa nos ta fiel den cos chikito?

Fieldad Relaciona cu “Rikesa Inhusto”

9. Kico ta e contexto di Hesus su palabranan na Lucas 16:10?

⁹ Prome cu Hesus a declara e principio cu un persona cu ta fiel den cosnan aparentemente chikito ta fiel tambe den asuntonan importante, el a conseha su oyentenan: “Gana amigo pa boso mes pa medio di e rikesa di inhusticia, pa ora esei faya, nan ricibi boso den e habitacionnan eterno.” Ta despues di e declaracion ei el a bisa pa ta fiel den cos masha chikito. Y Hesus a sigui bisa: “Si boso anto no tawata fiel den e uzo di rikesa inhusto, ken lo confia boso cu e berdadero rikesa? ... Ningun sirbido no por sirbi dos shon; pasobra of e lo odia esun y stima e otro, of e lo ta leal na esun y desprecia e otro. Boso no por sirbi Dios y rikesa.”—Lucas 16:9-13.

10. Con nos por demostra fieldad den nos uzo di “rikesa inhusto”?

¹⁰ Segun e contexto, e aplicacion original di Hesus su palabranan na Lucas 16:10 tin di aber cu e uzo di “rikesa inhusto”, esta, nos recursonan of pocesionnan material. Nan ta ser yama inhusto pasobra rikesa material—specialmente placa—ta bou di control di hende pecaminoso. Ademas, e deseo pa haya rikesa por hiba na actonan inhusto. Nos ta demostra fieldad door di eherce sabiduria den e manera cu nos ta uza nos pocesionnan material. En bes di uza nan pa propositonan egoista, nos kier uza nan pa adelanto di interesnan di Reino y pa yuda hende den necesidad. Door di ta fiel den e manera aki, nos ta gana amistad cu Yehova Dios y Hesucristo, esnan cu ta doño di “e habitacionnan eterno.” Nan lo ricibi nos den e luganan aki door di duna nos bida eterno sea den shelo of den Paradijs riba tera.

11. Pakico nos no mester keda sin splica doñonan di cas cu nos ta acepta contribucion pa e obra mundial cu Testigonan di Yehova ta efectua?

¹¹ Ademas, pensa ta ki oportunidad nos ta duna hende cu nos ta laga Bijbel of literatura biblico cu ne ora nos ta proclama e mensahe di Reino y ta splica nan cu nos ta acepta contribucion pa e obra mundial cu e pueblo di Yehova ta efectua. Acaso nos no ta dunando nan un chens di haci bon uzo di nan recursonan material? Aunke e aplicacion original di Lucas 16:10 ta relaciona cu e uzo di recursonan material, e principio cu tin den dje ta aplica tambe den otro area di bida.

Honrades Ta Realmente Importante

12, 13. Den ki area di bida nos por demostra honrades?

¹² Apostel Pablo a skirbi: “Nos ta sigur cu nos tin un bon consenshi, cu deseo pa comporta nos mes den tur cos na un manera honorabel [“honradamente”, NW].” (Hebreonan 13:18) “Tur cos” sigur ta inclui tur asunto cu ta encera maneho di placa. Nos ta paga nos debenan y nos belasting umbes y honradamente. Dicon? Nos ta haci esei debi na nos consenshi y principalmente debi na amor pa Dios y den obediencia na su instruccionnan. (Romanonan 13:5, 6) Con nos ta reacciona  ora nos haya algo cu no ta pertenece na nos? Nos ta trata na debolb’e na su doño legitimo. Esaki ta resulta den un excelente testimonio ora nos splica ta kico a motiva nos pa debolbe e persona su pocesion!

¹³ Ser fiel y honrado den tur cos ta inclui ser honrado na nos luga di empleo. Honrades den nos custumbernan di trabou ta hala atencion na e clase di Dios cu nos ta representa. Nos no ta “horta” tempo door di haci co’i floho. Mas bien nos ta traha duro, manera ta pa Yehova. (Efesionan 4:28; Colosensenan 3:23) Segun calculo den un pais Europeo, un tercera parti di e empleadonan cu ta pidi AO (arbeidsongeschikt) ta haci esei di un manera fraudulento. Berdadero sirbidonan di Dios no ta bin cu excuse pa evita di bai traha. Tin biaha Testigonan di Yehova ta haya promocion pasobra nan doño di trabou ta observa nan honrades y trabou duro.—Proverbionan 10:4.

Fieldad den Nos Ministerio Cristian

14, 15. Menciona algun manera cu nos por demostra cu nos ta fiel den e ministerio cristian.

¹⁴ Con nos ta demostra fieldad den e ministerio cu a ser confia na nos? Bijbel ta bisa: “Laga nos ofrece continuamente un sacrificio di alabansa na Dios, esta, e fruta di lipnan cu ta duna gradicimento [“haci declaracion publico”, NW] na su nomber.” (Hebreonan 13:15) E manera principal di demostra fieldad den sirbishi di veld ta door di participa den dje cu regularidad. Pakico nos lo mester laga un luna pasa sin duna testimonio tocante Yehova y su propositonan? Tambe participacion regular den e trabou di predica ta yuda nos mehora nos habilidadnan y nos efectividad.

¹⁵ Un otro manera excelente pa demostra fieldad den sirbishi di veld ta door di aplica e sugerencianan cu nos ta haya den E Toren di Vigilancia y Nos Ministerio di Reino. Ora nos prepara y uza e presentacionnan sugeri of otro presentacionnan cu ta realistico, nos no ta ripara cu nos ministerio ta mas productivo? Ora nos topa un persona cu mustra interes den e mensahe di Reino, nos ta lihe pa sigui cultiva e interes di e persona? Y kico di estudionan di Bijbel cu kisas nos a cuminsa cu hende interesa? Nos ta confiabel y fiel den conduci e estudionan di Bijbel cu regularidad? Si nos demostra di ta fiel den e ministerio, esei por hiba na bida pa nos y pa esnan cu ta scucha nos.—1 Timoteo 4:15, 16.

Keda Separa di Mundo

16, 17. Den ki maneranan nos por demostra cu nos ta separa di mundo?

¹⁶ Den oracion na Dios, Hesus a bisa di su siguidonan: “Mi a duna nan bo palabra; y mundo a odia nan, pasobra nan no ta di  mundo, mescos cu ami no ta di mundo. Mi no ta pidi bo pa saca nan for di mundo, ma pa bo warda nan di e malbado. Nan no ta di mundo, mescos cu ami no ta di mundo.” (Huan 17:14-16) Kisas nos ta firme y dicidido pa keda separa di mundo riba cuestionnan grandi, manera neutralidad, custumber- y dianan di fiesta religioso y inmoralidad. Pero kico di cosnan mas chikito? Lo por ta asina cu sin cu nos a realisa mes, nos ta ser influencia door di e maneranan di mundo? Por ehempel, si nos no ta cuidadoso, facilmente nos manera di bisti por bira inapropiado y demostra falta di dignidad. Fieldad ta encera ser “decente y modera” den e asunto di bistimento y areglo personal. (1 Timoteo 2:9, 10) De echo, “nos no ta duna motibo di ofensa den nada, pa e ministerio no wordo desacredita, ma den tur cos nos ta recomenda nos mes como sirbidonan di Dios.”—2 Corintionan 6:3, 4.

¹⁷ Motiva pa e deseo di honra Yehova, nos ta bisti den un manera cu ta refleha dignidad ora nos ta bai reunionnan di congregacion. Mescos ta e caso ora nos ta reuni na gran cantidad na nos asamblea- y congresonan. Nos paña di bisti mester ta practico y presentabel. Esaki ta sirbi como un testimonio pa otro hende cu ta observa nos. Asta e angelnan ta tuma nota di nos actividad, mescos cu nan a tuma nota di e actividad di Pablo y di su compañeronan cristian. (1 Corintionan 4:9) En realidad, semper nos mester ta apropiadamente bisti. Pa algun hende, fieldad den scohemento di paña di bisti por parce un asunto chikito, pero den bista di Dios e ta importante.

Bendicionnan pa Fieldad

18, 19. Fieldad ta resulta den ki bendicionnan?

¹⁸ Bijbel ta yama cristiannan berdadero “mayordomonan excelente di e bondad inmereci di Dios expresa den varios manera.” Como tal, nan ta ‘depende di e forsa cu Dios ta suministra.’ (1 Pedro 4:10, 11, NW) Ademas, como mayordomo, nos a ser confia cu loke no ta pertenece na nos personalmente, esta, expresionnan di Dios su bondad inmereci di cua uno ta e ministerio. Demostrando cu nos ta mayordomonan excelente, nos ta depende riba e forsa cu Dios ta suministra, “e poder mas aya di loke ta normal.” (2 Corintionan 4:7, NW) Esaki ta un excelente entrenamento pa yuda nos confronta cualkier prueba cu por presenta den futuro!

¹⁹ E salmista a canta: “Stima SEÑOR, boso tur, su santonan! SEÑOR ta preserva e fielnan.” (Salmo 31:23) Laga nos ta determina pa demostra di ta fiel, cu e pleno confiansa cu Yehova ta “Salbador di tur clase di hende, specialmente di esnan fiel.”—1 Timoteo 4:10, NW.

Bo Ta Corda?

• Pakico nos mester ta “fiel den un cos masha chikito”?

• Con nos por demostra di ta fiel

pa loke ta honrades?

den e ministerio?

den keda separa di mundo?

[Preguntanan di Estudio]

[Plachinan na pagina 26]

Fiel den cos masha chikito, fiel tambe den hopi

[Plachi na pagina 29]

‘Comporta boso mes honradamente den tur cos’

[Plachi na pagina 29]

Un excelente manera pa demostra fieldad ta door di prepara bon pa sirbishi di veld

[Plachi na pagina 30]

Sea modera den bistimento y areglo personal