“E Homber Prudente Ta Wak Bon Unda E Ta Bai”

UN PERSONA prudente ta bon den maneha asunto y resolve problema, e ta inteligente, di sano huicio y bon observado, huicioso y sabi. E no ta un persona engañoso ni manipulado. Proverbionan 13:16 ta declara: “Tur hende prudente ta trata cu conocemento.” Si, prudencia ta un caracteristica deseabel.

Con nos por desplega prudencia den nos bida diario? Con e decisionnan cu nos ta tuma, e manera cu nos ta trata otro hende y e manera cu nos ta reacciona riba varios situacion ta demostra cu nos tin e cualidad di prudencia? Ki recompensanan hende prudente ta haya? Ki calamidadnan nan ta evita? Rei Salomon di Israel di antiguedad ta duna contesta practico riba e preguntanan aki, manera nos por lesa na Proverbionan 14:12-25. *

Scohe Bo Rumbo na un Manera Sabi

Definitivamente nos mester tin e capasidad di distingui loke ta bon for di loke ta malo pa nos tuma decisionnan sabi y pa nos tin exito den bida. Sinembargo, Bijbel ta spierta: “Tin un caminda cu ta parce bon den bista di hende, ma su fin ta e caminda di morto.” (Proverbionan 14:12) Pues anto, nos tin cu siña distingui loke ta realmente bon for di loke ta parce bon. E expresion “e caminda di morto” den e texto na e idioma original ta bisa “e camindanan di morto” y ta indica cu tin hopi di e tipo di camindanan engañoso ei. Considera algun situacion cu nos mester ta conciente di dje y cu nos tin cu evita.

Por lo general e hendenan rico y famoso di mundo ta ser considera como hende respetabel cu ta merece admiracion. Nan exitonan riba tereno social y financiero por laga parce cu nan manera di actua ta bon. Pero kico di e metodonan cu hopi di e personanan ei ta uza pa gana rikesa of fama? Nan camindanan ta semper recto y di bon moral? Tambe tin algun hende cu ta desplega un celo admirabel pa nan creencianan religioso. Pero nan sinseridad realmente ta duna prueba cu nan creencianan ta corecto?—Romanonan 10:2, 3.

Un caminda por parce bon tambe debi cu nos ta gaña nos mes. Si nos ta tuma decision basa riba loke nos personalmente ta haya ta bon, nos ta depende eigenlijk riba nos curason cu ta un guia traicionero y engañoso. (Yeremias 17:9) Un consenshi cu nos no a entrena ni educa por pone nos pensa cu e caminda robes ta e caminda bon. Kico anto lo yuda nos scohe e caminda corecto?

Estudio personal diligente di e berdadnan mas profundo di e Palabra di Dios ta indespensabel pa nos por haya un “mente entrena pa discerni loke ta bon y loke ta malo.” Ademas, nos tin cu train nos mente of capasidad di discerni door di pone na “practica” principionan di Bijbel. (Hebreonan 5:14) Nos mester tene cuidou pa nos no laga loke ta djis parce bon pone nos desvia for di ‘e caminda smal cu ta hiba na bida.’—Mateo 7:13, 14.

 Ora e “Curason Por Tin Dolor”

Nos por ta felis ora cu nos no tin pas mental? Harimento y diberticion ta alivia dolor profundo? Ta prudente pa purba vence depresion door di uza alcohol, droga of door di hiba un bida inmoral y cu diferente partner? E contesta ta no. E rei sabi a bisa: “Den harimento curason por tin dolor.”—Proverbionan 14:13a.

Harimento por sconde e dolor, pero e no ta kit’e. Bijbel ta bisa cu “tin un tempo stipula pa tur cos.” Si, tin “un tempo pa yora y un tempo pa hari, un tempo pa tene rou y un tempo pa balia.” (Eclesiastes 3:1, 4) Ora depresion ta persisti, nos tin cu dal paso pa venc’e, y busca “conseho sabi” si ta necesario. (Proverbionan 24:6) * Harimento y diberticion tin relativamente poco balor. Salomon a spierta contra formanan inapropiado di diberticion y exceso den entretenimento. El a bisa: “Goso por caba na pena.”—Proverbionan 14:13b.

Con e Persona sin Fe y e Persona Bon Ta Ser Satisface?

E rei di Israel a sigui bisa: “Esun di curason sin fe lo satisface su mes cu e resultadonan di su propio caminda; pero e homber bon, cu e resultadonan di su manera di trata.” (Proverbionan 14:14, NW) Con hende sin fe y hende bon ta ser satisface cu e resultadonan di nan manera di trata?

Un persona sin fe no ta precupa cu e asunto di rindi cuenta na Dios. Pesei pa un hende sin fe no ta importante pa haci loke ta bon den bista di Yehova. (1 Pedro 4:3-5) Un persona asina ta satisfecho cu e resultadonan di su estilo di bida materialista. (Salmo 144:11-15a, NW) Di otro banda, e persona bon ta interesa den haci loke ta corecto den bista di Dios. Den tur loke e haci, e ta pega na e normanan husto di Dios. Un persona asina ta satisfecho cu e resultadonan pasobra Yehova ta su Dios y e ta haya un goso incomparabel di sirbi e Haltisimo.—Salmo 144:15b.

No “Kere Tur Cos”

Salomon a mustra e contraste entre e manera di actua di hende simpel, esta hende sin experencia, y hende prudente. El a bisa: “E hende simpel ta kere tur cos, ma e homber prudente ta wak bon unda e ta bai.” (Proverbionan  14:15) E persona prudente no ta kere tur cos pa loco. En bes di kere tur cos cu e tende of djis acepta e opinion di otro hende, e ta wak bon ki paso e ta dal. Despues di haya tur e echonan, e ta actua cu conocemento.

Tuma por ehempel e pregunta: “Ta existi un Dios?” E persona sin experencia ta inclina na acepta loke ta popular of loke personanan prominente ta kere. Di otro banda, esun prudente ta tuma su tempo pa analisa e echonan. E ta reflexiona riba textonan biblico manera Romanonan 1:20 y Hebreonan 3:4. Den asuntonan spiritual, un persona prudente no ta djis acepta e palabra di lidernan religioso. E ta ‘pone na prueba e spiritonan [of, “expresionnan inspira”, NW] pa mira si nan ta bin di Dios.’—1 Huan 4:1

Ta masha sabi anto pa haci caso di e conseho pa no “kere tur cos”! Vooral e personanan confia cu e responsabilidad di conseha otro hende den e congregacion cristian tin cu tuma esaki na pecho. E consehero mester tin un bista completo di loke a sosode. E mester scucha bon y obtene e echonan di tur banda pa e no duna mal conseho of duna conseho basa riba un solo punto di bista di loke a sosode.—Proverbionan 18:13; 29:20.

E Hende cu Capasidad di Pensa Ta Ser Odia

E rei di Israel a hala atencion na un otro diferencia entre hende sabi y hende bobo. El a bisa: “Un hende sabi ta cauteloso, y ta aparta su mes for di maldad, ma e bobo ta arogante y sin cuidou. Un hende cu ta rabia lihe ta haci co’i bobo, y un hende cu mal intencion ta wordo odia.”—Proverbionan 14:16, 17.

E persona sabi tin miedo di e consecuencianan di sigui un caminda robes. Pesei e ta cauteloso y ta aprecia cualkier conseho cu ta yud’e evita maldad. E hende bobo no tin e miedo ei. Teniendo confiansa den su mes, e ta ignora cu arogancia e conseho di otro hende. Como cu un persona asina hopi biaha ta rabia lihe, e ta actua na un manera bobo.

E expresion traduci “cu mal intencion”, na e idioma original tin dos nificacion. Den un sentido positivo, e por indica discernimento, discrecion of comprondemento. (Proverbionan 1:4; 2:11; 3:21) Of den un sentido negativo, e frase por referi na ideanan malbado of pensamento malicioso.—Salmo 37:7; Proverbionan 12:2; 24:8.

Si e expresion original ta referi na un “hende cu mal intencion”, no ta dificil pa mira dicon un persona asina ta wordo odia. Pero si e ta referi na e sentido positivo, dicon hende lo odia un persona cu tin e capasidad di pensa? Wel, acaso no ta berdad cu hende cu no tin e cualidad di discernimento sa odia e persona cu si tin e? Por ehempel, mundo ta odia hende cu ta uza nan facultad mental y cu ta scohe pa ‘no ta parti di mundo.’ (Huan 15:19) Hobennan cristian cu ta uza nan capasidad di pensa y ta resisti e presion insaludabel di nan pareunan pa asina evita mal comportacion ta ser chercha. Echo ta cu e mundo cu ta bou di control di Satanas ta odia adoradonan berdadero.—1 Huan 5:19.

“E Malbadonan Lo Buig”

Hende prudente ta distinto for di hende sin experencia den un otro manera mas. “E simpelnan ta hereda locura, ma e prudentenan ta corona cu conocemento.” (Proverbionan 14:18) Hende sin experencia ta scohe loke ta locura como cu nan no tin discernimento. Esaki ta bira nan manera di biba. Di otro banda, conocemento ta dorna hende prudente mescos cu un corona ta honra un rei.

E rei sabi a bisa: “E malbadonan lo buig pa e bonnan, y e impionan lo buig na e portanan di hende husto.” (Proverbionan 14:19) Cu otro palabra, hende bon na final di cuenta lo triunfa riba hende malbado. Considera con e pueblo di Dios awe ta aumenta na cantidad y ta gosa di un estilo di bida superior. Algun opositor cu mira con e bendicionnan aki ta ser drama riba e sirbidonan di Yehova, lo sinti nan mes obliga na “buig” pa Yehova su mohe  celestial simbolico, representa riba tera pa e resto ungi cu spirito. Pa mas tarda, na Armagedon e opositornan ei lo haya nan obliga ta reconoce cu e parti terenal di Dios su organisacion realmente ta representa e parti celestial.—Isaias 60:1, 14; Galationan 6:16; Revelacion 16:14, 16.

Tene “Misericordia di e Pobernan”

Salomon a comenta riba e naturalesa humano, bisando: “E pober ta wordo odia asta door di su biciña, ma e rico tin hopi amigo.” (Proverbionan 14:20) Ki cierto esaki ta di hende imperfecto! Debi na nan inclinacion egoista, nan tin e tendencia di faborece hende rico riba hende pober. Aunke e persona rico tin hopi amigo, nan ta mesun pasahero cu su rikesa. Pues anto, nos no mester evita di uza placa of labiamento pa haya amigo?

Pero kico si ora nos analisa nos mes honestamente, nos ripara cu nos ta labia hende rico y ta menosprecia hende pober? Nos tin cu realisa cu Bijbel ta condena mustramento di tal faboritismo. E ta bisa: “Esun cu desprecia su prohimo ta haci pica, ma esun cu tin misericordia di e pobernan ta felis.”—Proverbionan 14:21.

Nos mester mustra consideracion na hende den circunstancianan dificil. (Santiago 1:27) Con nos por haci esaki? Door di duna nan “e bienesnan di mundo” pa sostene bida, y esei por ta entre otro, placa, cuminda, alohamento, paña y atencion personal. (1 Huan 3:17) Felis ta esun cu ta mustra fabor na hende asina, ya cu “ta mas bendiciona pa duna cu pa ricibi.”—Echonan 20:35.

Con Ta Bai cu Hende Prudente y cu Hende Bobo?

E principio “loke un hende sembra, esaki tambe e lo cosecha” ta aplica tanto pa e persona prudente como pa esun bobo. (Galationan 6:7) Esun prudente ta haci loke ta bon; e bobo ta plania maldad. E rei sabi a puntra: “Esnan cu ta plania maldad no ta cana dual?” E contesta ta si. “Ma lo tin misericordia y berdad pa esnan cu ta plania bondad.” (Proverbionan 14:22) Hende cu ta haci bon ta gosa di e bondad di otro hende y tambe di Dios su misericordia.

Salomon a conecta exito cu trabou duro y fracaso cu djis papia hopi sin traha. El a bisa: “Den tur trabou tin ganashi, ma djis papia cu boca so ta conduci na pobresa.” (Proverbionan 14:23) E principio aki sigur ta aplica na nos actividadnan spiritual. Ora nos ta traha duro den e ministerio cristian, nos ta cosecha e recompensanan di a introduci na hopi hende e berdad cu ta salba bida cu tin den e Palabra di Dios. Si nos cumpli fielmente cu cualkier asignacion teocratico cu nos ricibi, esei ta hiba na goso y satisfaccion.

Proverbionan 14:24 ta bisa: “Corona di e sabinan ta nan rikesa, ma bobedad di e bobonan ta locura.” Esaki lo por kiermen cu e sabiduria cu hende sabi ta haci esfuerso pa alcansa ta un pocesion mes balioso cu rikesa, y e ta dorna nan mescos cu un corona. Di otro banda, e bobonan ta gana bobedad so. Segun un buki di consulta, e proverbio aki lo por kiermen tambe cu “rikesa ta un adorno pa esnan cu uz’e bon ... [mientras cu] bobonan tin solamente nan locura.” En todo caso, bida di hende sabi ta bai mas miho cu esun di hende bobo.

E rei di Israel a bisa: “Un testigo berdadero ta salba bidanan, ma esun cu papia mentira ta traicionero.” (Proverbionan 14:25) Aunke esaki sigur ta berdad den un contexto hudicial, considera su aplicacion den nos ministerio. Nos trabou di predica e Reino y haci disipel ta encera duna testimonio di e berdad di e Palabra di Dios. E testimonio ei ta libra personanan di bon curason for di religion falso y ta salba bida. Door di paga bon tino constantemente na nos mes y na nos siñansa, nos lo salba tanto nos mes como esnan cu tende nos. (1 Timoteo 4:16) Segun cu nos ta sigui haci esaki, laga nos ta alerta pa desplega prudencia den tur aspecto di bida.

[Nota]

[Plachi na pagina 18]

Estudio diligente di berdadnan mas profundo ta indespensabel pa nos por distingui bon for di malo

[Plachi na pagina 18]

Un estilo di bida materialista ta duna berdadero satisfaccion?