“E Spada di Yehova y di Gideon!”

NAN a bin na boshi, mescos cu tiracochi, y a comberti terenonan fertil den desierto. Tawata den e periodo cu huesnan a goberna Israel, y e Israelitanan tawata desespera. Pa shete aña largo, asina cu simiña sembra a cuminsa spruit, tropanan di Madianita, Amalekita y yiu hombernan di oriente riba camel tawata baha riba e tera pa plunder e. E bandidonan aki tawata plama en busca di tereno cu yerba, y a caba cu tur loke tawata berde. Pero e pueblo di Israel no tawatin ni burico ni toro ni carne. Madian su regimen di teror tawata asina fuerte cu e Israelitanan cu tawata masha pober no tawatin otro opcion sino di warda nan cosnan den sero-, cueba- y sitionan dificil pa alcansa.

Kico a pone nan pasa den e preta ei? Israel apostata tawata adora dios falso. Yehova, na su turno, a laga nan cai den man di opresornan. Ora e yiunan di Israel no por a soporta mas, nan a acudi na Yehova pa yudansa. Yehova a scucha? Kico e experencia di Israel por siña nos?—Huesnan 6:1-6.

Un Cunukero Cauteloso of un “Guerero Balente”?

Normalmente e cunukeronan Israelita tawata bati trigo cu uzo di un buey y un wiel di garoshi den un luga habri, exponi na biento, di manera cu e biento por a supla e bagas y separ’e for di e grano. Pero en bista di e menasa di parti di e bandidonan cu tawata determina pa caba cu tur loke e tera a produci, e proceso di bienta trigo lo a bira mucho bisto. Scondi pa e Madianitanan, Gideon tawata bati trigo den un baki-di-pers-wendruif—probablemente un buraco grandi coba den baranca. (Huesnan 6:11) Bou di e circunstancianan ei, Gideon a improvisa un ke otro y cu tur probabilidad tawata bati e trigo cu un palo na cantidadnan chikito.

Imagina Gideon su asombro ora e angel di Yehova a aparece na dje y a bis’e: “SEÑOR ta cu bo, o guerero balente.” (Huesnan 6:12) Como un homber cu tawata bati trigo scondi scondi den un baki-di-pers-wendruif, Gideon sigur lo no a sinti cu e tawata balente of cu curashi. Pero e palabranan ei ta indica cu Dios si tawatin e confiansa cu Gideon por tawata un lider balente den Israel. Toch, Gideon mes mester a combence su mes di esei.

Ora Yehova a duna Gideon e encargo pa “libra Israel for di man di Madian”, Gideon a declara cu modestia: “O SEÑOR, con lo mi libra Israel? Mira, mi famia ta esun di mas menos den Manases, y ami ta esun di mas chikito den e cas di mi tata.” Cu masha cuidou Gideon a pidi un señal pa garantis’e cu Dios lo a yud’e derota e Madianitanan, y Yehova tawata dispuesto pa cumpli cu Gideon su deseo rasonabel pa haya un garantia. Pues Gideon a presenta un regalo di cuminda na e angel cu a bishit’e, y candela a sali for di un baranca y kima e ofrenda. Despues cu Yehova a calma Gideon su sintimentonan di miedo, Gideon a traha un altar na e sitio ei.—Huesnan 6:12-24.

“Laga Baal Defende Su Mes”

Israel su problema di mas grandi no tawata e opresion di Madian. Tawata mas bien sclabitud na adoracion di Baal. Yehova ta “un Dios yalurs”, y un hende no por sirbi Dios di un forma aceptabel mientras e ta adora otro dios. (Exodo 34:14) Pesei, Yehova a manda Gideon destrui e altar cu su tata a traha pa Baal y tumba e palo sagrado. Cu yudansa di dies sirbido Gideon a actua anochi, y no den dia, pasobra e tawatin miedo di e reaccion di su tata y di otro hende.

 Su miedo no tawata infunda, pasobra si e adoradonan local di Baal a descubri e “sacrilegio” aki, nan lo a exigi su bida. Pero cu un logica irefutabel Joas, tata di Gideon, a rasona cu e pueblo cu si Baal tawata Dios, lo e por a defende su mes. Cu esei, Joas a yama su yiu aptamente Jerobaal, cu ta nifica “Laga Baal Defende Su Mes Contra Dje.”—Huesnan 6:25-32.

Semper Dios ta bendiciona su sirbidonan cu ta defende adoracion berdadero cu curashi. Ora e Madianitanan y nan aliadonan a invadi e teritorio di Israel un biaha mas, ‘e spirito di SEÑOR a bin riba Gideon.’ (Huesnan 6:34) Bou di direccion di Dios su spirito, of forsa activo, Gideon a forma un ehersito for di e tribunan di Manases, Aser, Zabulon y Neftali.—Huesnan 6:35.

Prepara pa Accion

Aunke Gideon tawatin un ehersito di 32.000 homber awor, el a pidi Dios un señal. Si serena a cai riba un pida lana di carne riba e plenchi-di-bati-maishi mientras cu e suela mes a keda seco, esei lo a indica cu Dios lo a salba Israel pa medio di dje. Yehova a haci e milager aki. Pero Gideon tawata kier un confirmacion. El a pidi awor pa laga serena cai riba e suela mientras cu e pida lana di carne mes mester a keda seco. Atrobe Yehova a cumpli. Acaso Gideon tawata demasiado desconfia? Aparentemente cu no pasobra Yehova a cumpli cu su peticion pa dun’e un garantia. (Huesnan 6:36-40) Nos no ta spera e milagernan ei awe. Loke si nos por ricibi ta Yehova su guia y garantia for di su Palabra.

Na un dado momento Dios a bisa Gideon cu su ehersito ta mucho grandi. Si e Israelitanan a derota nan enemigonan cu un ehersito grandi asina, nan lo tawata capas di broma cu ta nan a libra nan mes. Pero ta Yehova mester a ricibi merito pa e benidero victoria. Kico tawata e solucion? Gideon mester a aplica un provision di e Lei di Moises door di invita esnan cu tawatin miedo pa nan retira. Cu esei, 22.000 di su hombernan a bai, lagando solamente 10.000.—Deuteronomio 20:8; Huesnan 7:2, 3.

For di e punto di bista di Dios, ainda tawatin mucho homber. Dios a bisa Gideon pa laga nan bai caminda tawatin awa. E historiado Hudiu Yosefo ta bisa cu Dios a laga Gideon su tropanan cana bai na un riu den e calor di dia. Sea cual sea e situacion, Gideon a observa con e hombernan tawata bebe awa. Apenas 300 di nan a hinca un man den e awa y trece esaki na nan boca mientras nan tawata vigila un posibel atake enemigo. Solamente e 300 hombernan cu a vigila lo a bai cu Gideon. (Huesnan 7:4-8) Pone bo mes na nan luga. Siendo cu e ehersito enemigo tawata consisti di 135.000 homber, lo bo mester a conclui sigur cu ta cu e poder di Yehova so lo bo por a logra victoria, y no cu bo mes poder!

Dios a invita Gideon pa bai e campamento Madianita hunto cu un asistent pa explora esaki. Ora nan tawata einan, Gideon a tende un homber conta un compañero kico el a soña cu ne y mesora su compañero a deduci for di e soño cu Dios a determina pa entrega Madian den man di Gideon. Esei ta precis loke Gideon  mester a tende. E tawata sigur cu Yehova lo a duna tanto e como su 300 hombernan victoria riba e Madianitanan.—Huesnan 7:9-15.

Strategia di Bataya

Gideon a dividi e 300 hombernan den tres grupo di 100. El a duna cada homber un cacho y un canica grandi bashi. Den e canica tawatin un flambeu scondi. E prome ordo di Gideon tawata esaki: ‘Wak mi y haci mescos cu mi. Ora mi supla e cacho, boso tambe supla esun di boso y grita “e spada di Yehova y di Gideon!”’—Huesnan 7:16-18, 20, NW.

E 300 guereronan Israelita a move keto keto bai te na rand di e campamento enemigo. Tawata rond di dies or di anochi—un poco despues di cambiamento di warda. Parce cu esaki tawata e ora adecuado pa actua pasobra lo a dura un rato prome cu e wowonan di e guardianan nobo por a ahusta na e scuridad.

Awor si e Madianitanan a keda morto spanta! E kibramento di 300 canica, e suplamento di 300 cacho y e gritamento di 300 homber a kibra diripiente e trankilidad di anochi. Asombra, specialmente door di e grito “e spada di Yehova y di Gideon!”, e Madianitanan mes tambe a cuminsa grita, locual a haci e conmocion mas grandi ainda. Den e caos tawata imposibel pa nan distingui amigo for di enemigo. E 300 hombernan a para keto den nan posicion asigna mientras Dios a pone e enemigonan uza nan mes spada pa mata otro. Henter e ehersito cu tawata den e campamento a sali na careda, pero no tawatin scapatorio. Gideon a laga persigui esnan cu a logra hui pa caba cu nan y tambe e poconan cu a keda atras pa asina elimina e menasa Madianita. Porfin e dominio largo y cruel aki a yega na su fin.—Huesnan 7:19-25; 8:10-12, 28.

Asta despues di e victoria aki, Gideon a keda un homber modesto. Ora e Efrateonan, kendenan aparentemente a sinti nan ofendi door cu nan no a ser convoca pa e bataya, a purba pleita cu ne, el a reacciona suavemente. Su contesta suave a kita nan rabia y calma nan spirito.—Huesnan 8:1-3; Proverbionan 15:1.

Awor cu pas a ser estableci, e Israelitanan a haci un yamamento riba Gideon pa e bira nan rei. Esei lo tawata un tentacion pa Gideon, pero el a rechasa. E no a perde for di bista ta ken a gana e victoria riba Madian. El a declara: “Ami lo no goberna riba boso, ni mi yiu homber lo no goberna riba boso; SEÑOR lo goberna riba boso.”—Huesnan 8:23.

Sinembargo, como un homber imperfecto, no ta tur ora Gideon a eherce sano huicio. Pa un motibo cu no ta ser menciona, el a traha un efod cu e botin di guera y exhibi esaki den e stad. E registro ta bisa cu henter Israel a cuminsa “prostitui nan mes” cu e efod. Nan a ador’e, y el a bira un trampa asta pa Gideon y su famia. Toch, Gideon no a bira echt un adorado di dios falso pasobra e Scritura ta consider’e un homber cu tawatin fe den Yehova.—Huesnan 8:27; Hebreonan 11:32-34.

Ki Les Nos Por Saca?

E relato di Gideon ta siña nos un les di tanto spiertamento como animacion. E ta spierta nos cu si Yehova kita su spirito y bendicion for di nos pa motibo di desobediencia, nos condicion spiritual lo bira mescos cu esun di e residentenan pober di un tera riba cua tiracochi ta caba cu tur loke ta berde. Nos ta bibando den un tempo critico y no mester lubida nunca cu “ta e bendicion di SEÑOR ta haci rico, y e no ta agrega tristesa na dje.” (Proverbionan 10:22) Nos tin e bendicion di Dios pasobra nos ta “sirbie cu henter [nos] curason y cu un alma boluntario.” Di otro manera, lo e rechasa nos.—1 Cronicanan 28:9.

Nos por haya animacion for di e relato tocante Gideon, pasobra e ta demostra cu Yehova por libra su pueblo for di cualkier menasa, asta pa medio di esnan cu ta parce debil of indefenso. E echo cu Gideon y su 300 hombernan por a derota 135.000 Madianita ta duna prueba di Dios su poder sin limite. Kisas nos por haya nos mes den un preta grandi y den cua nos enemigonan ta hopi mas tanto cu nos. Pero, e relato biblico tocante Gideon ta anima nos pa confia den Yehova, kende lo bendiciona y libra tur persona cu ta eherce fe den Dje.