Siñansa Basa Riba Berdad Cu Ta Agrada Dios

PA HENDE cu ta biba riba tera por sa kico ta e siñansanan cu ta basa riba berdad y cu ta agrada Dios, Dios tin cu revela su pensamentonan na ser humano. Y e tin cu haci e revelacion ei disponibel na tur hende, sino con hende por sa ki clase di doctrina, adoracion y comportacion e ta aproba? Dios a duna e informacion ei? Si ta asina, den ki forma?

Un hende cu ta biba apenas un par di decada lo por alcansa tur hende personalmente y sirbi como un medio di comunicacion di Dios? No. Pero un registro permanente si por. Pesei, lo no ta apropiado pa e revelacion di parti di Dios ta disponibel den forma di un buki? Un di e bukinan di antiguedad cu segun su mes afirmacion ta inspira pa Dios ta Bijbel. Un di su escritornan a bisa: “Tur Scritura ta inspira pa Dios y ta util pa siñansa, pa reprendemento, pa coreccion, pa educa den husticia.” (2 Timoteo 3:16) Laga nos analisa Bijbel un rato y mira si e ta e fuente di siñansa cu ta basa riba berdad.

Con Bieu E Ta?

Di tur e bukinan principal di religion, Bijbel ta un di esnan di mas bieu. Su prome partinan a wordo skirbi rond di 3.500 aña pasa, y el a ser completa na aña 98 di nos era. Aunke cu mas o menos 40 homber a tuma un periodo di 1.600 aña pa skirbie, Bijbel ta un coleccion di buki cu ta na harmonia cu otro. Esei ta e caso pasobra su berdadero Autor ta Dios.

Bijbel ta e buki mas ampliamente distribui y mas traduci den henter historia. Tur aña rond di 60 miyon ehemplar di Bijbel completo of porcionnan di dje ta ser distribui. A traduci Bijbel completo of partinan di dje den mas cu 2.300 idioma y dialecto. Mas cu 90 porshento di humanidad tin acceso na Bijbel, of por lo menos parti di dje, den nan idioma nativo. E buki aki a crusa frontera  nacional, y a supera division racial y barera etnico.

Con E Ta Hinca den Otro?

Si bo tin un Bijbel, ta bon pa bo habrie pa bo mira con e ta hinca den otro. * Na prome luga, wak e contenido. Mayoria Bijbel tin un na cuminsamento cu ta menciona nomber di cada buki y number di pagina unda bo por hay’e. Lo bo mira cu en realidad Bijbel ta un coleccion grandi di buki individual, y cada un cu un nomber unico. E prome buki ta Genesis y e ultimo ta Revelacion, of Apocalipsis, y e bukinan ta parti den dos seccion. E prome 39 bukinan ta ser yama e Scritura Hebreo ya cu mayoria di nan a ser skirbi na Hebreo. E ultimo 27 bukinan a ser skirbi na Griego y ta forma e Scritura Griego. Algun hende ta yama e dos seccionnan aki Testament Bieu y Testament Nobo.

Pa bo por busca mas facil den Bijbel, e bukinan ta dividi den capitulo y versiculo. Ora e revista aki menciona un texto, direct tras di e nomber di e buki di Bijbel tin un number cu ta indica e capitulo di e buki ei. E siguiente number ta indica e versiculo. Por ehempel, “2 Timoteo 3:16” ta nifica e di dos carta na Timoteo, capitulo 3, versiculo 16. Wak si bo por haya e texto ei den Bijbel.

Bo no ta kere cu e miho manera pa bo conoce Bijbel ta door di les’e regularmente? Algun persona a haya cu ta mas facil pa lesa e Scritura Griego prome, cuminsando cu e buki di Mateo. Door di lesa tres pa cinco capitulo pa dia, bo por lesa henter e Bijbel den un aña. Pero con bo por ta sigur cu loke bo ta lesa den Bijbel ta realmente inspira pa Dios?

Bo Por Confia Bijbel?

Bo ta spera cu un buki inspira pa Dios cu ta dirigi na tur hende lo mester contene conseho duradero encuanto bida, no ta berdad? Bijbel ta refleha un comprondemento di naturalesa humano cu ta aplica na tur generacion di humanidad, y su principionan ta mes practico awe cu dia nan a ser declara pa prome biaha. Bo por mira esaki facilmente den un discurso famoso cu Hesucristo, Fundador di cristianismo, a yega di duna. E ta registra na Mateo capitulo 5 pa 7. E speech aki, conoci como e Sermon Riba Sero, ta mustra nos no solamente con pa haya berdadero felicidad sino tambe con pa resolve desacuerdo, con pa haci oracion, con pa mira necesidad material y hopi mas. Den e discurso aki, y atrabes di e otro paginanan di Bijbel, e Scritura ta bisa nos bon cla kico nos mester haci y kico nos mester evita pa por agrada Dios y mehora nos situacion den bida.

Un otro motibo pakico nos por pone nos confiansa den Bijbel ta cu ora ta trata di asuntonan cientifico, loke e buki di antiguedad aki ta bisa ta exacto. Por ehempel, den un tempo cu mayoria hende tawata kere cu tera ta plat, Bijbel a papia di “e circulo di tera.” * (Isaias 40:22) Y mas cu 3.000 aña prome cu e famoso cientifico Sir Isaac Newton a splica cu ta gravedad ta wanta e planetanan den espacio bashi, Bijbel a bisa poeticamente cu “tera ta colga riba nada.” (Job 26:7) Considera tambe e descripcion poetico aki di e ciclo di awa riba tera, registra un 3.000 aña pasa: “Tur riu ta core bai lama, toch lama no ta yena. Na e luga for di unda riunan ta bin, aya nan ta bolbe bai.” (Eclesiastes 1:7) Si, e Creador di universo ta tambe Autor di Bijbel.

E exactitud historico di Bijbel ta cuadra cu e echo cu e ta inspira pa Dios. E susesonan cu Bijbel ta relata no ta simplemente mito. Nan  tin di aber cu fecha-, hende y luganan spesifico. Por ehempel, Lucas 3:1 ta duna detayenan spesifico referiendo na “e di diessinco aña di e reinado di Tiberio Cesar, tempo cu Poncio Pilato tawata gobernado di Hudea, y Herodes tawata tetrarca [gobernado] di Galilea.”

Aunke e historiadonan di pasado casi semper a informa solamente di e exitonan y meritonan di gobernantenan, e escritornan di Bijbel si tawata honesto; nan a admiti asta nan mes erornan francamente. Por ehempel, Rei David di Israel a confesa: “Mi a peca gravemente cu loke mi a haci ... Mi a actua masha bobo mes.” E confesion franco ei ta documenta den Bijbel. (2 Samuel 24:10) Y e escritor di Bijbel Moises mes a registra un incidente den cua e no a demostra confiansa den e Dios berdadero.—Numbernan 20:12.

Tin mas prueba cu Bijbel ta inspira pa Dios. Esei ta su profecianan cu a ser cumpli, esta, historia skirbi di antemano. Algun di esakinan ta profecianan relaciona cu Hesucristo. Por ehempel, mas cu 700 aña prome cu Hesus a nace, e Scritura Hebreo a profetisa cu exactitud cu Esun Priminti aki lo a nace “na Betlehem di Hudea.”—Mateo 2:1-6; Mikeas 5:2.

Considera un otro ehempel. Na 2 Timoteo 3:1-5, Bijbel ta declara: “Den e ultimo dianan temponan trabahoso lo bin. Pasobra hende lo ta stimado di nan mes, stimado di placa, gabado, arogante, blasfemado, desobedecido na mayornan, ingrato, impio, sin amor, ireconsiliabel, cu mala lenga, sin dominio propio, grosero, odiado di loke ta bon, traido, imprudente, soberbe, mas bien stimado di placer cu stimado di Dios; cu tin aparencia di ta religioso berdad, ma cu ta nenga su poder.” Esaki no ta un descripcion di e actitud di hende en general awe? E palabranan aki a ser skirbi na aña 65 di nos era, mas cu 1.900 aña pasa!

Kico Bijbel Ta Siña Nos?

Segun cu bo ta lesa e mensahe di Bijbel, lo bo por mira cu Bijbel ta un fuente di sabiduria superior. E ta duna contesta satisfactorio riba preguntanan manera: Ken Dios ta? Diabel ta existi di berdad? Ken Hesucristo ta? Pakico tin sufrimento? Kico ta sosode cu nos ora nos muri? E contestanan cu kisas otro hende ta duna bo ta depende di loke nan ta kere y practica, y cada ken lo tin su propio version. Pero Bijbel ta revela e berdad tocante e temanan aki y hopi otro topico mas. Ademas, pa loke ta conducta y actitud pa cu otro hende y autoridadnan superior, e guia di Bijbel ta incomparabel. *

Kico Bijbel ta revela tocante e proposito di Dios pa tera y pa humanidad? E ta priminti: “Aki poco tempo e malbado lo no t’ei mas . . . Ma e humildenan lo hereda e tera, y lo deleita nan mes den pas abundante.” (Salmo 37:10, 11) “Dios mes lo ta meimei di nan [humanidad], y e lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.” (Revelacion 21:3, 4) “E hustonan lo hereda e tera, y lo biba den dje pa semper.”—Salmo 37:29.

Tambe Bijbel ta profetisa cu guera, crimen, violencia y maldad lo caba pronto. Lo no tin enfermedad, ni biehes ni morto mas. Bida eterno den un paradijs riba tera lo bira realidad. Ki un futuro maraviyoso! Y tur esaki ta demostra cuanto Dios ta stima humanidad!

Kico Lo Bo Haci?

Bijbel ta un regalo maraviyoso di e Creador. Kico bo tin cu haci cu ne? Un homber cu tin un background hindu tawata combenci cu pa un revelacion di Dios beneficia henter humanidad, e tin cu bai bek te na  cuminsamento di civilisacion. Ora el a realisa cu tin cierto parti di Bijbel cu ta mas bieu cu e Vedanan (scrituranan hindu) di mas antiguo, el a dicidi di lesa Bijbel y analisa su contenido. * Un profesor di universidad na Merca tambe a bin realisa cu e tin cu lesa e buki mas ampliamente distribui aki na mundo prome cu e forma un opinion tocante dje.

Ora bo lesa Bijbel y aplica su siñansanan, bo ta haya hopi bendicion. Bijbel ta declara: “Bendiciona ta e hende . . . [kende] su delicia ta den e lei di SEÑOR, y den su lei e ta medita di dia y anochi. Y e lo ta manera un palo, planta canto di coridanan di awa, cu ta duna su fruta na su tempo, y su blachi no ta marchita; y tur loke cu e haci ta prospera.” * (Salmo 1:1-3) Segun cu bo ta studia Bijbel y medita riba loke e ta bisa, bo ta bira felis pasobra di e forma ei bo ta satisface bo necesidad spiritual. (Mateo 5:3) Bijbel lo mustra bo con bo por hiba un bida productivo y con bo por logra supera bo problemanan. Si, “obediencia na [e leinan di Dios describi den Bijbel] ta trece gran recompensa cu ne.” (Salmo 19:11) Ademas, ora bo pone confiansa den Dios su promesanan lo bo haya bendicion awor y un speransa briyante pa futuro.

Bijbel ta haci un apelacion fuerte na nos: “Mescos cu yiunan resien naci, anhela na e lechi puro di e palabra.” (1 Pedro 2:2) Un baby ta depende di alimento y ta insisti pa e haya esei. Mescos tambe, nos realmente ta depende di e conocemento di Dios. Pues, ‘crea un anhelo’, of un deseo fuerte, pa su Palabra. Bijbel ta un buki di siñansa di Dios cu ta basa riba berdad. Pone e meta pa studi’e regularmente. Testigonan di Yehova den bo comunidad gustosamente lo yuda bo saca e maximo probecho for di bo estudio. Nos ta invita bo calurosamente pa tuma contacto cu nan. Of bo por skirbi e editornan di e revista aki.

[Nota]

[Plachi na pagina 7]

‘Crea un anhelo’ pa e Palabra di Dios. Studia Bijbel regularmente

[Reconocemento pa Potret na pagina 5]

Potret di NASA