“Sigui Duna Prueba di Loke Boso Mes Ta”

“Sigui pone boso mes na prueba pa mira si boso ta den e fe, sigui duna prueba di loke boso mes ta.”—2 CORINTIONAN 13:5, NW.

1, 2. (a) Con duda tocante nos creencianan por afecta nos? (b) Ki situacion den Corinto di prome siglo kisas a pone cu algun hende no tawata sa sigur den cua caminda nan tin cu cana?

UN HOMBER biahando den un area pafo di stad ta yega na un punto cu e caminda ta parti na dos. Siendo den duda cua caminda lo hib’e na su destinacion, e ta puntra e hendenan cu ta pasa eibanda con pa yega pero nan ta dun’e informacion contradictorio. Confundi, e no por sigui cu su biahe. Si nos tin duda tocante nos creencianan, esei por tin e mesun efecto riba nos. E duda ei por stroba nos di tuma decision, pasobra e ta pone cu nos no sa sigur ta cua caminda nos tin cu sigui.

² Den prome siglo, a surgi un situacion cu lo por tawatin un efecto asina riba algun hende den e congregacion cristian di Corinto, Grecia. “Super-apostelnan” tawata cuestiona e autoridad di apostel Pablo, bisando: “Su cartanan ta duro y fuerte, ma su presencia personal no ta impresiona, y su manera di papia ta despreciabel.” (2 Corintionan 10:7-12; 11:5, 6) Tal punto di bista kisas a pone cu algun hende den e congregacion di Corinto no tawata sa sigur con nan tin cu cana.

3, 4. Dicon Pablo su conseho na e Corintionan mester interesa nos?

³ Pablo a funda e congregacion na Corinto durante su bishita einan na aña 50 di nos era. El a keda na Corinto “un aña y seis luna y tawata siña nan e palabra di Dios.” De echo, “hopi di e Corintionan, ora nan a tende, a kere y a wordo batisa.” (Echonan 18:5-11) Pablo tawata hopi interesa den e bienestar spiritual di su rumannan den fe na Corinto. Ademas, e Corintionan a skirbi Pablo pa pidie conseho riba cierto asuntonan. (1 Corintionan 7:1) Pues el a duna nan excelente conseho.

⁴ Pablo a skirbi: “Samina boso mes pa wak si boso ta den e fe; samina boso mes!” Of segun Traduccion di Mundo Nobo: “Sigui pone boso mes na prueba pa mira si boso ta den e fe, sigui duna prueba di loke boso mes ta.” (2 Corintionan 13:5) Door di aplica e conseho aki e rumannan ei na Corinto lo no a duda den cua caminda nan tin cu cana. E conseho ei por proteha nos di duda awe. Pues anto, con nos por sigui Pablo su conseho? Con nos por samina nos mes pa wak si nos ta den e fe? Y kico duna prueba di loke nos mes ta, ta encera?

“Samina Boso Mes pa Wak si Boso Ta den e Fe”

5, 6. Ki spiel nos tin pa samina nos mes aden pa wak si nos ta den e fe, y dicon esaki ta e spiel ideal?

⁵ Hende por lo general ta samina nan mes den un spiel. Den e caso aki, Bijbel no ta pidi nos samina tur e creencianan cu nos a acepta, sino mas bien pa nos samina nos mes individualmente. Nos tin un spiel perfecto pa samina nos mes aden. Un cantica cu e salmista David a compone ta declara: “E lei di SEÑOR ta perfecto, e ta restaura alma; e testimonio di SEÑOR ta fiel, e ta haci hende simpel bira sabi. E preceptonan di SEÑOR ta  corecto, nan ta alegra curason; e mandamentonan di SEÑOR ta puro, nan ta ilumina wowo.” (Salmo 19:7, 8) Bijbel ta contene Yehova su leinan perfecto y preceptonan corecto, su testimonio confiabel y mandamentonan puro. E mensahe cu nos ta haya den Bijbel ta e spiel ideal pa nos samina nos mes aden.

⁶ Relaciona cu e mensahe inspira ei di Dios, apostel Pablo a bisa: “E palabra di Dios ta bibo y activo y mas skerpi cu cualkier spada di dos filo, y ta penetra te na e division di alma y spirito, y di scarnir y tuti, y ta capas pa husga e pensamentonan y intencionnan di curason.” (Hebreonan 4:12) Si, Dios su palabra por samina nos curason, loke nos ta realmente di paden. Con nos por haci aplicacion personal di e mensahe skerpi y poderoso aki? E salmista ta declara bon cla con nos por aplica Dios su palabra pa samina nos curason. El a canta: “Bendiciona ta e hende ... [kende] su delicia ta den e lei di SEÑOR, y den su lei e ta medita di dia y anochi.” (Salmo 1:1, 2) Nos ta haya ‘e lei di Yehova’ den Dios su Palabra skirbi, Bijbel. Nos mester tin delicia den lesa e Palabra di Yehova. De echo nos tin cu aparta tempo pa medita riba dje. Segun cu nos ta haci esaki, nos tin cu samina nos mes a base di loke tin skirbi den dje.

7. Cua ta e manera principal pa samina nos mes pa wak si nos ta den e fe?

⁷ Pues, e manera principal pa samina si nos ta den e fe ta door di lesa y medita riba e Palabra di Dios y mira te na ki grado nos conducta ta na harmonia cu loke nos ta siña. Nos por ta contento cu nos tin hopi yudansa pa compronde e Palabra di Dios.

8. Con e publicacionnan di “e esclabo fiel y prudente” por yuda nos samina nos mes pa wak si nos ta den e fe?

⁸ Yehova a percura siñansa y instruccion mediante e publicacionnan di “e esclabo fiel y prudente”, cu ta splica e Scritura. (Mateo 24:45) Por ehempel, considera e cuadro titula “Pregunta pa Medita Ariba” na final di mayoria capitulo di e buki Hala Serca Yehova. * E rasgo ei di e buki aki ta duna nos oportunidadnan excelente pa medita riba un base personal. Nos revistanan, E Toren di Vigilancia y Spierta!, ta trata tambe varios topico cu ta yuda nos samina nos mes pa wak si nos ta den e fe. Relaciona cu e articulonan basa riba e buki di Proverbionan cu a sali den edicionnan resien di E Toren di Vigilancia, un señora cristian a bisa: “Mi ta haya e articulonan aki hopi practico. Nan ta yuda mi samina mi mes pa wak si mi manera di papia, mi conducta y actitud realmente ta na harmonia cu Yehova su normanan husto.”

9, 10. Ki provisionnan di Yehova ta yuda nos sigui samina nos mes pa wak si nos ta den e fe?

⁹ Nos ta haya tambe un abundancia di guia y animacion na reunionnan di congregacion, asambleanan y congresonan. E cosnan aki ta cai bou di e provisionnan spiritual cu Dios ta percura pa esnan cu Isaias a profetisa di dje bisando: “Lo sosode den e ultimo dianan cu e sero di e cas di SEÑOR lo wordo estableci como e sero principal, y lo wordo halsa mas halto cu e seritonan; y tur nacion lo basha bai na dje. Y hopi pueblo lo bin bisa: ‘Ban, laga nos subi bai na e sero di SEÑOR, . . . pa e siña nos tocante di su camindanan, y pa nos cana den su bereanan.’” (Isaias 2:2, 3) Un cos ta sigur, ta un bendicion di por tin tal instruccion tocante e camindanan di Yehova.

¹⁰ Un otro manera pa samina nos mes ta mediante e conseho cu nos ta haya di personanan cu tin e debido cualidadnan spiritual, entre otro, e ancianonan cristian. Bijbel ta bisa relaciona cu nan: “Rumannan, aunke un homber dal un paso robes prome cu e realisa esei, boso cu tin cualidadnan spiritual, trata na reahusta e homber ei cu un spirito di suavidad,  vigilando bo mes, pa miedo cu bo mes tambe no ser tenta.” (Galationan 6:1, NW) Nos por ta masha gradicido pa e provision aki cu t’ei pa reahusta nos!

11. Kico samina pa wak si nos ta den e fe ta encera?

¹¹ Nos publicacionnan, reunionnan cristian, hombernan nombra, tur esakinan ta provisionnan maraviyoso di Yehova. Pues manera nos a menciona anteriormente, pa samina pa wak si nos ta den e fe, nos tin cu haci un examinacion propio. Pesei ora nos ta lesa nos publicacionnan of ta scucha conseho biblico, nos tin cu puntra nos mes: ‘Esaki ta describi loke mi ta? Ami ta haci esaki? Mi ta pega na e totalidad di creencianan cristian?’ Nos actitud pa cu e informacion cu nos ta ricibi mediante e provisionnan aki tin un influencia riba nos condicion spiritual tambe. Bijbel ta bisa: “Un hende cu no ta spiritual no ta acepta e cosnan di e spirito di Dios; pasobra nan ta locura p’e . . . Ma esun cu ta spiritual ta husga [of, “samina”, NW] tur cos.” (1 Corintionan 2:14, 15) Acaso nos lo no mester haci esfuerso pa mantene un punto di bista positivo y spiritual di loke nos ta lesa den nos buki-, revista- y otro publicacionnan y di loke nos ta tende na nos reunionnan y for di e ancianonan?

“Sigui Duna Prueba di Loke Boso Mes Ta”

12. Kico duna prueba di loke nos mes ta, ta encera?

¹² Duna prueba di loke nos ta, ta encera cu nos ta evalua nos mes. Si, pasobra nos por ta den e berdad, pero te na ki grado nos ta biba na harmonia cu e berdad? Nos tin cu evalua nos mes pa wak si nos ta duna prueba di madures y di berdadero aprecio pa provisionnan spiritual.

13. Segun Hebreonan 5:14, kico ta sirbi como prueba di nos madures?

¹³ Ki prueba of evidencia di madures cristian nos por busca manera pa wak den nos mes? Apostel Pablo a skirbi: “Cuminda solido ta pa hende madura, kendenan, pa motibo di practica, tin nan mente entrena pa discerni loke ta bon y loke ta malo.” (Hebreonan 5:14) Nos ta duna prueba di madures door di entrena nos mente su capasidad di discerni of distingui. Mescos cu pa un atleta por sobresali den su deporte e mester entrena prome cierto musculonan di su curpa door di uza nan bes tras bes, asina nos mester entrena nos mente su capasidad di distingui door di uz’e ora di aplica principionan biblico.

14, 15. Dicon nos mester haci esfuerso diligente pa studia e cosnan mas profundo di e Palabra di Dios?

¹⁴ Pero prome cu nos por entrena nos mente su capasidad di distingui, nos tin cu haya conocemento. Pa haci esaki, estudio personal diligente ta esencial. Ora cu regularmente nos ta haci estudio personal—specialmente di e cosnan profundo di e Palabra di Dios—nos capasidad di distingui ta bira miho. Atrabes di añanan, E Toren di Vigilancia a trata hopi topico profundo. Con nos ta reacciona ora nos topa articulonan cu ta trata berdadnan mas profundo? Nos tin e tendencia di evita nan djis pasobra nan tin “algun  cosnan cu ta dificil pa compronde”? (2 Pedro 3:16) Al contrario, nos ta haci extra esfuerso pa compronde loke ta ser bisa.—Efesionan 3:18.

¹⁵ Kico si nos ta haya estudio personal dificil pa haci? Ta masha importante pa nos haci esfuerso pa siña gust’e. * (1 Pedro 2:2) Si nos kier crece na madures ta necesario pa nos siña saca nutricion for di cuminda solido, e berdadnan mas profundo di e Palabra di Dios. Si nos no haci esei, nos capasidad di distingui lo keda limita. Sinembargo, duna prueba di madures ta encera mas cu haya un mente entrena pa distingui. Nos mester aplica den nos bida diario e conocemento cu nos ta haya mediante estudio personal diligente.

16, 17. Ki conseho disipel Santiago a duna tocante bira “cumplidonan di e palabra”?

¹⁶ Nos ta haya prueba di loke nos mes ta tambe den nos expresionnan di aprecio pa e berdad, esta, nos obranan di fe. Uzando un ilustracion impactante pa describi con nos mester samina nos mes, disipel Santiago a bisa: “Sea cumplidonan di e palabra y no solamente tendedonan cu ta gaña nan mes. Pasobra si un hende ta tendedo di e palabra y no cumplido, e ta manera un hende cu ta wak su cara natural den spiel; pasobra unabes cu el a wak su mes y a bai, el a lubida mesora con e tawata. Ma esun cu fiha su bista riba e lei perfecto, e lei di libertad, y ta permanece den dje, sin bira un tendedo lubidado, sino un cumplido berdadero, e hende aki lo ta bendiciona den loke e ta haci.”—Santiago 1:22-25.

¹⁷ Santiago tawata kiermen: ‘Wak bo mes den e spiel di e palabra di Dios, y evalua bo mes. Persisti den haci esaki y samina bo mes a base di loke bo ta haya den e palabra di Dios. Anto no lubida umbes kico bo a mira. Haci e coreccionnan necesario.’ Tin biaha por ta dificil pa sigui e conseho aki.

18. Dicon ta dificil pa sigui e conseho di Santiago?

¹⁸ Tuma por ehempel e rekisito pa participa den e trabou di predica e Reino. “Cu curason hende ta kere pa haya husticia, y cu boca e ta confesa [“haci declaracion publico”, NW] pa haya salbacion.” (Romanonan 10:10) Pa nos haci declaracion publico cu nos boca pa haya salbacion, nos mester haci varios ahuste. Mayoria di nos no ta haya e trabou di predica facil pa haci. Pa nos predica cu entusiasmo y duna e trabou e luga cu e merece den nos bida nos tin cu haci asta mas cambio y sacrificio. (Mateo 6:33) Pero unabes nos bira hacidonan di e trabou aki cu Dios a duna nos, nos ta felis debi na e alabansa cu e ta trece pa Yehova. Pues anto, nos ta proclamadonan entusiasma di e Reino?

19. Nos obranan di fe mester encera kico?

¹⁹ Te con leu nos obranan di fe mester bai?  Pablo a declara: “E cosnan cu boso a siña y a ricibi y a tende y a mira den mi, practica e cosnan aki; y e Dios di pas lo ta cu boso.” (Filipensenan 4:9) Nos ta duna prueba di loke nos ta door di practica loke nos a siña, acepta, tende y mira, pues, tur loke dedicacion cristian y ser disipel di Cristo ta encera. Yehova ta instrui nos mediante profeta Isaias: “Esaki ta e caminda, cana den dje.”—Isaias 30:21.

20. Ki tipo di personanan ta un bendicion grandi pa e congregacion?

²⁰ Hende homber y hende mohe cu ta studia e Palabra di Dios diligentemente, cu ta predica e bon nobo cu entusiasmo, cu ta mantene nan integridad intachabel y cu ta apoyadonan leal di e Reino ta un bendicion grandi pa e congregacion. Nan presencia ta agrega stabilidad na e congregacion cu nan ta asocia cu ne. Nan ta hopi util, specialmente pasobra tin asina tanto hende nobo pa percura p’e. Ora nos ta tuma na pecho Pablo su conseho pa ‘sigui samina nos mes of pone nos mes na prueba pa mira si nos ta den e fe, sigui duna prueba di loke nos mes ta’, nos tambe lo tin un bon influencia riba otro hende.

Haya Delicia den Haci e Boluntad di Dios

21, 22. Con nos por tin delicia den haci e boluntad di Dios?

²¹ Rei David di Israel di antiguedad a canta: “Pa haci bo boluntad, o mi Dios, ta un delicia pa mi; bo lei ta den mi curason.” (Salmo 40:8) Pa David tawata un delicia di por haci e boluntad di Dios. Dicon? Pasobra Yehova su lei tawata den David su curason. David no a duda den cua caminda e tawatin cu cana.

²² Ora e lei di Dios ta den nos curason, nos lo no tin duda cua caminda nos tin cu sigui. Haci e boluntad di Dios ta un delicia pa nos. Di tur manera anto, laga nos “haci tur esfuerso” segun cu nos ta sirbi Yehova di curason.—Lucas 13:24.

[Nota]

Bo Ta Corda?

• Con nos por samina nos mes pa wak si nos ta den e fe?

• Kico duna prueba di loke nos mes ta, ta encera?

• Ki prueba nos por duna di madures cristian?

• Con nos obranan di fe ta yuda nos evalua loke nos ta?

[Preguntanan di Estudio]

[Plachi na pagina 23]

Bo sa cua ta e manera principal pa samina bo mes pa wak si bo ta den e fe?

[Plachi na pagina 24]

Nos ta duna prueba di nos madures cristian door di haci uzo di nos capasidad di distingui

[Plachinan na pagina 25]

Nos ta duna prueba di loke nos ta door di ‘no bira tendedo lubidado, sino cumplido di e palabra’