‘Mi Yudansa Ta Bin for di Yehova’

Soltero Pero Contento den Yehova Su Sirbishi

UN HENDE mohe cristian na Spaña a bisa: “Aunke nos no ta casa, e gran mayoria di nos ta masha felis.” Pa ki motibo nan ta sinti nan felis? “Nos ta contento di ta liber di hopi ansiedad pa nos por sirbi nos Dios, Yehova, mas plenamente.”

E sintimentonan ei ta cuadra cu loke e Palabra di Dios ta remarca tocante solteria. Ora apostel Pablo a papia di asuntonan cu tin di aber cu matrimonio, bou di inspiracion el a duna e siguiente punto di bista: “Mi ta bisa e solteronan y e biudanan, cu ta bon pa nan, si nan keda manera ami.” Pablo mes no tawata casa. Pero pa ki motibo el a recomenda hende pa keda soltero? El a mustra cu e persona casa ta dividi, mientras cu e homber of mohe cu no ta casa ta “ocupa su mes cu e cosnan di Señor.” (1 Corintionan 7:8, 32-34) E factor principal cu ta haci un persona soltero felis y contento ta e echo cu e por sirbi Yehova.

Soltero cu un Proposito Noble

Den culturanan cu ta duna hopi importancia na matrimonio y criamento di famia, e comentarionan di Pablo por zona straño. Sinembargo, Hesucristo—kende no tawata casa, pero toch felis y contento—a menciona un proposito noble pa cristiannan cu ta soltero. El a bisa: “Tin eunuco cu a haci nan mes eunuco pa causa di e reino di shelo. Esun cu por acepta esaki, lag’e acept’e.”—Mateo 19:12.

Na harmonia cu e palabranan ei, hopi hende a haya cu e echo cu nan ta soltero ta permiti nan sirbi Dios sin e distraicionnan cu e bida casa sa trece cu ne. (1 Corintionan 7:35) Miles di cristian ta adorando Yehova felismente sin un casa, y nan ta haya goso den yuda otro hende activamente. *

Hopi cristian cu no ta casa ta realisa cu no ta hende casa so ta felis y cu no ta tur hende cu no ta casa ta infelis. Pa tanto hende soltero como hende casa sa tin momentonan di felicidad y tambe di tristesa. En realidad, Bijbel ta masha realista ora e bisa cu matrimonio riba su mes ta trece “tribulacion.”—1 Corintionan 7:28.

Soltero pa Motibo di Circunstancia

Hopi hende ta soltero no pasobra nan kier sino pa motibo di circunstancia. Kisas nan ta desea e calor, e compañerismo y e cariño cu ta existi den un matrimonio si, pero asuntonan financiero of otro motibonan por pone cu algun di nan no por casa aworaki. Varios cristian—di cua hopi ta nos kerida ruman mohenan spiritual—a keda soltero pasobra nan ta determina pa obedece e conseho di  Bijbel pa casa solamente “den Señor.” (1 Corintionan 7:39) Nan kier keda leal na Yehova, pesei nan ta limita nan buscamento di un partner entre su sirbidonan dedica y batisa.

Tin biaha, algun di nan ta sinti un soledad. Un cristian soltera cu a admiti cu e ta sinti su mes asina a bisa despues: “Nos conoce Yehova su lei y nos no kier desagrad’e di ningun manera. Talbes nos ta desea di tin e compañerismo di un casa, pero maske cuanto hende den e mundo aki purba ‘fix’ un casamento pa nos, nos ta para firme. Nos no kier ta den compania mes di homber of mohe cu no ta creyente.” Un cristian cu ta aplica conseho di Bijbel y cu ta pega na normanan moral halto pa asina agrada Yehova, apesar di cualkier angustia emocional cu esei por trece cu ne, ta digno di elogio.

Dios Ta Duna Yudansa

Yehova ta leal na esnan cu ta mustra nan lealtad na dje den asuntonan manera nenga di casa cu personanan cu no ta sirbie. Rei David a papia di su mes experencia ora el a bisa: “Cu hende leal, lo bo [Yehova] actua cu lealtad.” (Salmo 18:25, NW) Ademas Dios ta priminti hende cu ta obedec’e fielmente: “Nunca lo mi no bandona bo, y nunca lo mi no laga bo desampara.” (Hebreonan 13:5) Nos por imita Yehova door di constantemente elogia cristiannan soltero di tur edad cu ta pega fielmente na e Palabra di Dios. Tambe nos por pidi Yehova fortalece nan pa nan por enfrenta nan retonan.—Huesnan 11:30-40.

Hopi cristian soltero ta haya cu door di participa plenamente den e obra di educacion biblico, nan bida tin un proposito. Tuma por ehempel Patricia, un soltera di 30 y pico aña, kende ta un pionero of evangelisado di tempo completo. E ta bisa: “Aunke mi bida como soltera a pone mi pasa den hopi prueba, el a duna mi chens di bira un pionero regular. Como un persona soltera, mi programa ta mas flexibel, locual ta duna mi mas tempo pa studia. Tambe mi a siña depende mas y mas riba Yehova, specialmente ora mi ta pasa den temponan dificil.”

E punto di bista ei ta basa riba e promesa alentador di Bijbel: “Pone bo bida den man di SEÑOR, confia den dje: lo e actua.” (Salmo 37:5, BPK) En berdad, tur fiel adorado di Yehova, sea casa of soltero, por haya consuelo y fortalesa den e palabranan inspira: ‘Mi yudansa ta bin for di Yehova.’—Salmo 121:2.

[Nota]

[Comentario na pagina 9]

“Esun cu no ta casa ta ocupa su mes cu e cosnan di Señor, con e por agrada Señor.”—1 CORINTIONAN 7:32

[Cuadro na pagina 8]

LOKE BO POR HACI PA BENEFICIA DI BO SOLTERIA

Hesus, kende no a casa nunca, a declara: “Mi cuminda ta pa haci e boluntad di esun cu a manda mi, y pa cumpli cu su trabou.” —Huan 4:34.

Felipe su cuater yiu mohenan cu no tawata casa a tene nan mes ocupa como “profeta.” —Echonan 21:8, 9.

Ruman mohenan cristian soltera cu ta declara e mensahe di Reino ta parti di un ‘ehersito grandi cu ta anuncia e bon nobo.’ —Salmo 68:11, NW.