Unda Bo Por Haya Siñansa Basa Riba Berdad?

UN HOMBER na Tibet ta drei un wiel di oracion (un cilinder chikito cu ta contene oracionnan skirbi). Segun e, cada bes cu e wiel dal un buelta su oracionnan ta ser ripiti. Den un cas grandi na India tin un cuarto chikito aparta pa haci puja; esei ta un forma di adoracion cu por encera ofrenda di sencia, flor y otro cosnan na imagennan di varios dios y diosa. Miles di kilometer leu na Italia, un señora den un misa yen di adorno ta hinca rudia dilanti un imagen di Maria, mama di Hesus, y ta resa cu un rosario den su man.

Kisas bo mes a mira cuanto influencia religion tin riba bida di hende. E buki The World’s Religions—Understanding the Living Faiths ta bisa cu “religion ... tawata y te ainda ta e sanger vital di sosiedadnan rond mundo.” Den e buki God—A Brief History, e autor John Bowker ta remarca: “Nunca a yega di existi un sosiedad humano den cua Dios no a hunga ningun papel; por lo general e ta esun cu ta crea y dirigi cosnan. Esei ta conta asta pa e sosiedadnan cu ta scohe concientemente pa no kere den Dios.”

Si bo wak bon berdad, religion a influencia bida di miyones di hende. Esei no ta un indicacion fuerte cu hende tin un necesidad y hamber spiritual? Den su buki The Undiscovered Self e famoso psicologo dr. Carl G. Jung ta papia di hende su necesidad pa adora un poder superior y e ta bisa cu “bo por mira manifestacion di esaki den henter historia humano.”

 Toch, hopi hende ta bisa cu nan no ta kere den Dios ni no tin interes den religion. Algun cu ta duda of nenga cu Dios ta existi ta basa nan mes principalmente riba e echo cu e religionnan cu nan conoce no a satisface nan necesidad spiritual. Pero casi tur hende, asta ateistanan, ta desplega un of otro forma di debocion na e principionan cu nan ta kere aden, como si fuera esei ta nan religion.

Durante e miles di añanan di historia humano, den nan afan pa satisface nan necesidad spiritual hende a purba hopi forma di adoracion. Esei a resulta den un variedad enorme di punto di bista religioso na tur parti di mundo. Por ehempel, aunke casi tur religion ta promove creencia den un poder superior, cada un tin su mes concepto di ken of kico e ta. Mayoria religion ta enfatisa tambe e importancia di salbacion of liberacion. Pero cada un tin su propio version di kico e salbacion ei ta y con hende por hay’e. En bista di tanto creencia asina, con nos por identifica siñansa basa riba berdad cu ta agrada Dios?