Bijbel Por Yuda Bo Haya Goso

AUNKE Bijbel no ta un buki di medicina, e ta papia si di e efecto cu emocionnan—sea positivo of negativo—por tin riba un persona su salud mental y fisico. Bijbel ta bisa: “Un curason contento ta un bon remedi, ma un spirito abati ta seca weso.” Un otro caminda e ta declara: “Si bo desmaya den e dia di angustia, bo forsa ta keda limita.” (Proverbionan 17:22; 24:10) Sintimento di desanimacion por caba cu nos energia, locual ta haci nos sinti nos suak y vulnerable sin ni un deseo pa cambia of busca yudansa.

Desanimacion por afecta un persona den sentido spiritual tambe. Hende cu ta sinti nan indigno hopi bes ta haya cu nunca nan no por tin un bon relacion cu Dios ni haya su aprobacion. Simone, menciona den e articulo anterior, a duda cu e tawata “e clase di persona cu Dios lo a aproba.” Sinembargo, ora nos analisa Bijbel, e Palabra di Dios, nos ta ripara con Dios ta faborece personanan cu ta haci esfuerso pa agrad’e.

Dios Ta Echt Interesa den Hende

Bijbel ta bisa nos cu Yehova “ta serca di e hende di curason kibra, y ta salba esnan di spirito abati.” Dios no ta ‘desprecia un curason kibra’, pero e ta priminti “pa rebiba spirito di e hende kibra y pa rebiba curason di e humilde.”—Salmo 34:18; 51:17; Isaias 57:15.

Na un ocasion Hesus, e Yiu di Dios, a haya ta necesario pa hala atencion di su disipelnan riba e echo cu Dios ta busca loke ta bon den Su sirbidonan. Pa ilustra esei, el a conta cu Dios ta ripara ora un mofi cai na tera—algo cu mayoria hende lo considera di poco importancia. Tambe el a resalta cu  Dios conoce e mas minimo detaye di hende, asta e cantidad di drachi di cabei riba nan cabes. Hesus a conclui su ilustracion bisando: “No tene miedo; boso bal mas cu un cantidad di mofi.” (Mateo 10:29-31) * Hesus a indica cu maske kico un hende por pensa di su mes, si e tin fe, e tin hopi balor den bista di Dios. De echo, apostel Pedro ta corda nos cu “Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.”—Echonan 10:34, 35.

Mantene un Punto di Bista Balansa

E Palabra di Dios ta urgi nos pa keda balansa den e manera cu nos ta mira nos mes. Apostel Pablo a skirbi bou di inspiracion: “Door di e gracia duna na mi, mi ta bisa cada un di boso pa no pensa mas halto di su mes cu e mester pensa; ma pa mas bien pensa di su mes cu sano huicio, di acuerdo cu e midi di fe cu Dios a duna bo.”—Romanonan 12:3.

Claro cu nos lo no kier pensa asina halto di nos mes te cu nos ta kere cu nos ta masha cos; ni nos no kier bai na e otro extremo y pensa cu nos no ta bal nada. Mas bien, nos meta mester ta pa cultiva un punto di bista rasonabel di nos mes, uno cu ta tene cuenta cu tanto nos puntonan fuerte como nos limitacionnan. Un señora cristian a expres’e den e forma aki: “Mi no ta dje mal hende ei, pero mi no ta un pan di Dios tampoco. Mi tin mi cosnan bon y mi cosnan menos bon, mescos cu tur otro hende.”

Claro cu no ta facil pa haya e punto di bista balansa ei. Kisas nos tin cu haci bastante esfuerso pa elimina un punto di bista sumamente negativo di nos mes cu den transcurso di añanan a cria raiz fuerte den nos. No obstante, cu yudansa di Dios nos por cambia nos personalidad y tambe nos perspectiva den bida. En realidad, ta esei ta loke e Palabra di Dios ta impulsa nos pa haci. E ta bisa nos: “Pone un banda e hende bieu cu ta wordo corumpi conforme e pasionnan engañoso, y ... wordo renoba den e spirito di boso mente, y ... bisti e hende nobo, cu a wordo crea segun Dios den husticia y santidad berdadero.”—Efesionan 4:22-24.

Door di haci esfuerso pa cambia ‘e spirito di nos mente’, esta, e inclinacion dominante di nos mente, nos por cambia nos personalidad for di uno cu ta hopi negativo pa uno positivo. Lena, menciona den e articulo anterior, a bin realisa cu mientras e no a elimina e pensamento cu ningun hende no por stim’e ni yud’e, nada lo no por a cambia e sintimentonan ei. Ki conseho practico haya den Bijbel a yuda Lena, Simone y otro personanan haci e cambio ei?

 Principionan di Bijbel Cu Ta Promove Goso

“Tira bo carga riba SEÑOR, y e lo sostene bo.” (Salmo 55:22) E cos di mas importante cu por yuda nos haya berdadero goso ta oracion. Simone a bisa: “Ki ora cu mi sinti mi desanima, mi ta acudi na Yehova y pidie su yudansa. Nunca mi no a haya mi den un situacion den cua mi no a sinti su forsa y su guia.” Ora e salmista ta anima nos pa tira nos carga riba Yehova, den un sentido e ta recordando nos cu Yehova no solamente ta interesa den nos sino cu tambe e ta mira nos como individuonan cu ta merece su yudansa y sosten. Riba e anochi di e Pasco Hudiu di aña 33 di nos era, Hesus su disipelnan a keda tristo ora el a bisa nan cu pronto e lo a bandona nan. Hesus a anima nan pa resa na e Tata, y despues el a agrega: “Pidi, y boso lo ricibi, pa boso goso por ta completo.”—Huan 16:23, 24.

“Tin mas felicidad den duna cu tin den ricibi.” (Echonan 20:35, NW) Manera Hesus a siña su disipelnan, dunamento ta e clave pa haya berdadero goso den bida. Ora nos ta aplica e berdad biblico aki, e ta yuda nos enfoca riba e necesidadnan di otro hende en bes di riba nos mes limitacionnan. Ora nos yuda otro hende y mira con gradicido nan ta keda, nos ta sinti nos mes miho. Lena tawata combenci cu ora e ta comparti e bon nobo di Bijbel regularmente cu su prohimo, esei ta yud’e den dos manera. E di: “Na prome luga, e ta duna mi e clase di felicidad y satisfaccion cu Hesus a papia di dje. Na di dos luga, mi ta ricibi hopi reaccion positivo di otro hende, locual ta yuda mi haya goso.” Door di duna generosamente di nos mes, e palabranan di Proverbionan 11:25 lo cumpli riba nos: “E hende generoso lo prospera, y esun cu duna di bebe tambe lo haya di bebe.”

“Tur e dianan di esun cu ta afligi ta malo, ma esun di curason contento semper tin fiesta.” (Proverbionan 15:15) Ta keda na cada un di nos con nos ta mira nos mes y nos circunstancianan. Nos por ta manera esun cu ta mira tur cos den forma negativo y ta sinti su mes afligi, of nos por scohe pa pensa den forma positivo, sinti nos ‘contento di curason’ y ser gososo como si fuera nos ta na un fiesta. Simone a bisa: “Mi ta purba di keda mas positivo posibel. Mi ta mantene mi mes ocupa den estudio personal y den sirbishi, y mi ta persevera den oracion. Tambe mi ta purba rondona mi mes cu hende positivo, y mi ta purba yuda otro hende.” Tal actitud di curason ta hiba na berdadero goso, net manera Bijbel ta anima nos: “Sea contento den SEÑOR y regociha, boso, hustonan, y grita di alegria, boso tur cu ta recto di curason.”—Salmo 32:11.

“Un amigo ta stima tur ora bai, y un ruman ta naci pa tempo di adversidad.” (Proverbionan 17:17) Ora nos ta expresa kico nos ta sinti na un amigo stima of un consehero  di confiansa, esei por yuda nos trata cu sintimentonan negativo y core cu esakinan prome cu nan caba cu nos. Si nos papia cu otro hende, esei por yuda nos mira cosnan for di un angulo balansa y positivo. Simone a admiti: “E echo cu mi por desahoga mi mes ta yuda mi hopi. Bo tin cu conta un hende con bo ta sinti. Hopi bes esei ta tur loke ta necesario.” Door di haci esaki, lo bo mira cu loke e siguiente proverbio ta bisa ta un gran berdad: “Ansha den curason di hende ta hacie abati, ma un bon palabra ta hacie contento.”—Proverbionan 12:25.

Loke Bo Por Haci

Nos a considera apenas un par di e cantidad di principionan maraviyoso y practico di Bijbel cu por yuda nos vence sintimentonan negativo y haya berdadero goso. Si bo ta un hende cu ta luchando cu e sintimento cu bo no ta sirbi pa nada, nos ta anima bo pa bo analisa Bijbel, e Palabra di Dios, mas miho. Siña desaroya un sintimento realistico y saludabel tocante bo mes y tocante bo relacion cu Dios. Nos ta spera sinseramente cu e guia ei di e Palabra di Dios lo yuda bo haya berdadero goso den tur loke bo ta haci.

[Nota]

[Plachi na pagina 7]

Un bida na harmonia cu principionan di Bijbel ta promove goso