Bo Ta Luchando cu Bo Sintimentonan?

PA GRAN parti di Lena su bida, el a lucha cu sintimentonan negativo tocante su mes. El a bisa: “Añanan di abuso sexual den mi infancia a caba cu casi tur mi balor propio. Mi a sinti mi mes completamente inutil.” Simone tambe ta wak bek riba su hubentud y ta bisa: “Den fondo di mi curason mi a sinti un bashi y mi tawatin e pensamento cu mi no ta bal nada.” Aparentemente, awe tin hopi hende ta cana rond sumamente infelis pa motibo di e sintimentonan ei. Un servicio di guia profesional pa teenager via telefon ta bisa cu casi mitar di e hobennan cu ta yama ta expresa “sintimentonan persistente di falta di autoestima.”

Segun algun experto, e sintimento di inutilidad ta surgi ora otro hende pone un persona sinti cu e no ta bal nada. Un estado mental asina por desaroya ora e persona ei tin cu soporta zundramento constante, hopi comentario skerpi y critica fuerte of maltrato severo. Sea cual sea e motibo, e consecuencianan por  ta debilitador y asta devastador. Un estudio medico resien a revela cu personanan cu tin sintimentonan negativo tocante nan mes tin e tendencia di desconfia tanto nan mes como otro hende, y door di esei, sin cu nan sa, nan ta haci daño na nan amistadnan y nan bon relacion cu otro hende. E informe riba e estudio ta bisa cu “den un sentido nan ‘ta crea’ net e situacionnan cu nan tin mas miedo di dje.”

Hende cu ta sinti asina hopi bes ta victima di loke Bijbel ta yama nan “precupacionnan.” (Salmo 94:19) Nan ta sinti cu casi nada cu nan haci no ta bon. Ora algo bai robes, nan ta cla pa culpa nan mes. Aunke otro hende ta elogia nan pa nan logronan, den fondo di nan curason nan ta sinti cu nan ta un gañado cu tardi of tempran lo keda desenmascara. Cu e pensamento cu nan no ta digno di ta felis, hopi ta cai den un comportacion di autodestruccion cu nan ta sinti nan mes incapas pa corigi. Lena, menciona anteriormente, a desaroya un problema serio cu comemento pa motibo di su falta di respet propio y e ta admiti: “Mi no a sinti mi capas pa cambia nada.”

E hendenan cu ta lucha cu e “precupacionnan” aki ta destina pa sinti nan mes asina pa resto di nan bida? Por haci algo pa combati e sintimentonan ei? Bijbel ta contene principionan y conseho practico cu a yuda hopi hende vence den e lucha. Cua ta algun di e principionan aki, y con nan a yuda e personanan aki haya goso den bida? E siguiente articulo lo splica esei.