Ki Ora Tin Motibo pa Bo Ta Rabia?

NA ECLESIASTES 7:9 Bijbel ta declara: “Rabia ta biba den pecho di hende bobo.” E versiculo aki ta mustra cu nos no mester ta mucho lihe pa rabia ora un hende peca contra nos; mas bien, nos mester pordona.

Sinembargo, nos mester compronde for di Eclesiastes 7:9 cu nos no mester laga nada ni ningun hende pone nos rabia, cu nos mester pordona tur pica maske con serio of con frecuente nan ta y no purba di haci nada tocante nan? Acaso nos no tin nodi precupa cu nos ta peca cu palabra of accion contra un otro hende pensando cu ta e otro persona ei mester pordona nos? Claro cu no.

Yehova Dios ta e personificacion di amor y e esencia di misericordia y gran pasenshi. Pero den Bijbel tin hopi ehempel den cua hende a proboca Yehova na rabia. Ora e pica tawata serio, el a tuma accion contra e pecadonan. Ban analisa un par di ehempel.

Pica Contra Yehova

E relato na 1 Reinan 15:30 ta papia di e picanan di Jeroboam “cu el a haci Israel comete, pa motibo di su probocacion cu cua el a proboca e SEÑOR Dios di Israel na rabia.” Na 2 Cronicanan 28:25, Bijbel ta bisa di Rei Acaz di Huda: “El a traha luganan halto pa kima sencia na otro diosnan, y a proboca SEÑOR, e Dios di su tatanan, na rabia.” Nos por haya un otro ehempel na Huesnan 2:11-14: “Israel a haci maldad den bista di SEÑOR y a sirbi e Baalnan ..., asina nan a proboca SEÑOR na rabia. ... Y e rabia di SEÑOR a kima contra Israel, y el a entrega nan den man di sakeadonan.”

Tin mas cosnan cu a proboca Yehova na rabia y cu a exigi medida drastico. Por ehempel, na Exodo 22:18-20, nos ta lesa: “No permiti pa un hacido di bruha keda na bida. Ken cu tene relacion sexual cu un bestia mester wordo mata sigur. Esun cu ofrece sacrificio na cualkier dios, si no ta solamente na SEÑOR, mester wordo destrui completamente.”

Yehova no a pordona continuamente e picanan grandi cu antiguo Israel a comete ora nan a sigui proboc’e na rabia y no a mustra berdadero arepentimento. Esnan cu a viola su lei y cu no a echt arepenti y dal paso pa mustra cu nan a bira bek pa obedece Yehova, a haya nan ta paga cu nan bida. Esaki a tuma luga na un escala nacional na aña 607 prome cu nos era na man di e Babilonionan, y un biaha mas na aña 70 di nos era na man di e Romanonan.

Si, Yehova ta sinti su mes proboca na rabia of indigna pa motibo di e mal cosnan cu hende ta bisa of haci, y asta e ta destrui malechornan cu no arepenti y cu a comete pica grave. Pero esaki ta pone Yehova den e categoria di esnan cu Eclesiastes 7:9 ta papia di dje? Di ningun manera. E ta hustifica ora e ta sinti su mes proboca door di pica serio y semper su huicionan ta husto. Bijbel ta bisa di Yehova: “Su obra ta perfecto, pasobra tur su camindanan ta husto; un Dios di fieldad y sin inhusticia, husto y recto e ta.”—Deuteronomio 32:4.

Pica Serio Contra Otro Hende

Bou di e Lei cu Dios a duna antiguo Israel, tawatin consecuencianan serio pa pica grave cometi contra otro hende. Por ehempel, si  un ladron a drenta den un cas anochi y e doño di cas a mat’e, e doño di cas no tawatin culpa di sanger. E tawata un victima inocente di un crimen serio. Pesei Bijbel ta bisa relaciona cu esaki: “Si nan cohe un ladron ora cu e ta kibra drenta, y nan dal e, y e muri, [e doño di cas] lo no tin culpa di sanger pa su motibo.”—Exodo 22:2.

Un hende mohe cu wordo viola sexualmente por sinti su mes sumamente indigna, ya cu esaki ta un crimen grave den bista di Dios. Bou di e Lei di Moises, un homber cu a viola un hende mohe mester a muri “mescos cu ... un homber cu ta lanta contra su prohimo y ta mat’e.” (Deuteronomio 22:25, 26) Aunke nos no ta bou di e Lei ei mas, e ta yuda nos compronde hopi bon kico Yehova ta pensa di violacion sexual, e ta mir’e como un crimen horendo.

Den nos tempo tambe violacion sexual ta un crimen serio y e castigonan pa esaki ta severo. E victima tin tur derecho pa haci un denuncia na polis. Den e manera aki, e autoridadnan encarga por castiga e violado. Y si e victima ta menor di edad, e mayornan por haci e denuncia.

Pica Menor

Sinembargo, no ta tur pica mester di intervencion di autoridadnan. Pesei, nos no mester sinti nos indigna mucho lihe pa e fayonan relativamente chikito cu otro hende ta  haci pero nos mester pordona. Cuanto biaha nos mester pordona? Apostel Pedro a puntra Hesus: “Señor, cuanto bes mi ruman lo peca contra mi, y ami mester pordon’e? Te shete bes?” Hesus a contest’e: “Mi ta bisa bo, no te shete bes, sino te setenta bes shete.”—Mateo 18:21, 22.

Di otro banda, cada un di nos tin cu sigui traha riba nos personalidad cristian pa purba evita di peca contra otro hende. Por ehempel, den bo trato cu bo prohimo, bo tin tendencia di ta sin heful, indiscreto of asta arogante? E sistema di trata ei por ofende otro hende. En bes di culpa e victima pa motibo cu el a rabia y pensa cu ta e ta esun cu tin cu pordona, e persona cu a faya tin cu realisa cu ta e a pone e persona sinti su mes ofendi. Prome cu tur cos, ta e causante di e problema tin cu trata na controla su accionnan y su abla pa e no peca contra otro hende. E esfuerso aki lo reduci e cantidad di biahanan cu nos ta ofende otro hende. Bijbel ta recorda nos: “Tin hende ta papia sin pensa, manera hinca di spada, ma lenga di hende sabi ta trece curamento.” (Proverbionan 12:18) Ora nos hurt un otro persona, asta ora no tawata nos intencion, nos tin cu pidi despensa; esei sin duda lo yuda remedia e situacion.

E Palabra di Dios ta mustra cu nos mester “busca e cosnan cu ta trece pas y edificacion di otro.” (Romanonan 14:19) Ora nos ta mustra tacto y consideracion, nos ta aplicando e proverbio: “Un palabra papia na ora apropia ta manera un apel di oro den montura di plata.” (Proverbionan 25:11) Esei sigur ta laga un impresion agradabel y placentero atras! Un papia suave y cu tacto por asta cambia e actitud rigido di otro hende: “Un lenga suave ta kibra weso.”—Proverbionan 25:15.

Pesei, e Palabra di Dios ta conseha nos: “Laga boso palabranan ta semper cu gracia, sasona cu salo, pa boso por sa con boso mester contesta cada persona.” (Colosensenan 4:6) “Sasona cu salo” ta nifica cu nos ta expresa nos mes na un manera agradabel, y esei ta reduci e posibilidad di peca contra otro hende. Cu palabra y accion cristiannan mester haci esfuerso pa aplica e conseho di Bijbel: “Busca pas y siguie.”—1 Pedro 3:11.

Pues anto, nos tin cu compronde for di Eclesiastes 7:9 cu nos mester evita di sinti nos indigna ora otro hende comete pica relativamente menor contra nos. Esakinan por ta debi na imperfeccion humano y asta por ta pa malo, pero no ta pica serio. Ma ora un pica ta serio, ta di compronde cu e victima por sinti su mes rabia y cu e por dicidi di tuma e medidanan apropiado.—Mateo 18:15-17.

[Plachi na pagina 14]

Yehova a laga e Romanonan destrui e Israelitanan cu no a repenti na aña 70 di nos era

[Plachi na pagina 15]

“Un palabra papia na ora apropia ta manera un apel di oro”