Pregunta di Lector

E palabra “kisas” uza na Sofonias 2:3 ta nifica cu sirbidonan di Dios no por ta sigur cu nan ta haya bida eterno?

E texto aki ta bisa: “Busca SEÑOR, boso tur humildenan di tera cu a cumpli cu Su ordenansanan; busca husticia; busca humildad. Kisas boso lo wordo scondi riba e dia di e rabia di SEÑOR.” Dicon e versiculo aki ta bisa “kisas”?

Pa compronde con Yehova lo trata cu su sirbidonan fiel na Armagedon, ta bon pa corda kico Bijbel ta siña tocante loke Dios lo haci pa esnan cu muri prome cu e tempo di huicio ei. Tin di nan ta haya un resureccion pa bida inmortal como criaturanan spiritual den shelo, mientras cu otronan lo ser resusita riba tera cu e speransa di biba pa semper den Paradijs. (Huan 5:28, 29; 1 Corintionan 15:53, 54) Si Yehova ta corda y ta recompensa su sirbidonan leal cu muri prome cu Armagedon, siguramente lo e trata den mesun manera cu su sirbidonan cu ta na bida riba e dia di su rabia.

E palabranan inspira di apostel Pedro tambe ta un animacion pa nos. El a skirbi: “[Dios] a warda Noe, un predicado di husticia, sano y salvo cu shete otro ora el a trece un diluvio riba un mundo di hende malbado; y reduciendo e stadnan Sodoma y Gomora na shinishi el a condena nan, ... y el a libra husto Lot ... Yehova sa con pa libra hende deboto na dje for di prueba, pero pa reserva hende inhusto pa e dia di huicio pa ser corta.” (2 Pedro 2:5-9, NW) Aunke den pasado Yehova a trece destruccion riba e malbadonan, el a preserva tanto Noe como Lot, kendenan a sirbie fielmente. Asina tambe Yehova lo libra hende deboto na dje ora cu e trece destruccion riba e malbadonan na Armagedon. “Un multitud grandi” di hende husto lo sobrevivi.—Revelacion 7:9, 14.

Pues, ta parce cu na Sofonias 2:3 Bijbel no ta uza “kisas” debi na cierto duda den Dios su habilidad di preserva na bida esnan cu tin su aprobacion. E “kisas” cu un persona lo wordo scondi riba e dia di e rabia di Yehova ta conta solamente ora e cuminsa busca husticia y humildad. Pa e ser preserva na bida ta depende di si e ta sigui busca humildad y husticia.—Sofonias 2:3.

[Plachi na pagina 31]

“Yehova sa con pa libra hende deboto na dje for di prueba”