E Palabra di Yehova Ta Bibo

Puntonan Sobresaliente di e Buki di Segundo Reinan

E BUKI biblico di Segundo Reinan ta un continuacion di e buki di Prome Reinan. E ta un relato tocante 29 rei—12 di e reino di nort di Israel y 17 di e reino di sur di Huda. Segundo Reinan ta conta tambe di e actividadnan di e profetanan Elias, Eliseo y Isaias. Aunke e relato no ta exactamente den un orden cronologico, e ta yega te den e tempo di e destruccion di Samaria y Herusalem. En total, Segundo Reinan ta cubri un periodo di 340 aña—for di 920 te 580 prome cu nos era, ora profeta Yeremias a caba di skirbi e buki aki.

Ki balor Segundo Reinan tin pa nos? Kico e ta siña nos tocante Yehova y su trato cu hende? Ki les nos por saca for di e accionnan di e reinan, e profetanan y otro personanan menciona den e buki? Laga nos mira kico nos por siña for di Segundo Reinan.

ELISEO A SIGUI ELIAS

(2 Reinan 1:1–8:29)

Rei Ocozias di Israel a sufri un caida den su cas y a bira malo. El a ricibi un notificacion di profeta Elias cu e lo a muri. En berdad Ocozias a muri y su ruman Joram a bira Rei. Mientrastanto, Josafat a bira Rei di Huda. Elias a ser hiba den un warwaru, y su asistent, Eliseo, a siguie como profeta. Durante e mas o menos 60 añanan di Eliseo su ministerio cu a sigui, el a haci hopi milager.—Mira e cuadro “Milagernan di Eliseo.”

Ora un rei Moabita a rebela contra Israel, Joram, Josafat y e rei di Edom a sali pa bai bringa contra dje. Pa motibo di e fieldad di Josafat, nan a obtene e victoria. Despues, e rei di Siria a plania un atake di sorpresa contra Israel. Sinembargo, Eliseo a pone e plan fracasa. E rei di Siria a bira furioso y a manda “cabai, garoshi y un ehersito grandi” pa captura Eliseo. (2 Reinan 6:14) Eliseo a haci dos milager y a manda e Sirionan bek na pas. Cu tempo, e Rei Sirio Ben-adad a sitia Samaria. Esaki a resulta den un hamber severo, pero Eliseo a profetisa cu lo a bini un fin na e hamber.

Poco tempo despues Eliseo a bai Damasco. Rei Ben-adad, cu tawata malo e tempo ei, a manda Hazael puntr’e si e lo a recupera di su enfermedad. Eliseo a pronostica cu e Rei lo a muri y cu Hazael lo a bin goberna na su luga. E siguiente dia mes, Hazael a sofoca e Rei bou di un ‘clechi muha’ y a tuma e reinado. (2 Reinan 8:15) Na Huda, Joram, yiu di Josafat a bira rei, y despues di dje a sigui su yiu Ocozias.—Mira e cuadro “Reinan di Huda y di Israel.”

Contesta Riba Pregunta Biblico:

2:9—Pakico Eliseo a pidi ‘un porcion dobel di Elias su spirito’? Pa Eliseo por a cumpli cu e responsabilidad como profeta pa Israel, e tawatin mester di e mesun spirito cu Elias a demostra, esta, e spirito di curashi y balentia. Realisando esaki, Eliseo a pidi un porcion dobel di e spirito di Elias. Elias a nombra Eliseo como su susesor y Eliseo tawata su asistent pa  seis aña, di manera cu Eliseo a mira Elias como su tata spiritual; Eliseo tawata manera e primogenito spiritual di Elias. (1 Reinan 19:19-21; 2 Reinan 2:12) Pesei, mescos cu un yiu primogenito a ricibi dos parti di e herencia di su tata, Eliseo a pidi y a ricibi dos parti di e herencia spiritual di Elias.

2:11—Ora Elias ‘a subi bai den e warwaru’, ta cua “shelo” el a bai? No tawata trata aki di e universo fisico ni di e luga spiritual caminda Dios y su yiunan angelical ta biba. (Deuteronomio 4:19; Salmo 11:4; Mateo 6:9; 18:10) E “shelo” na cua Elias a subi tawata e atmosfera di tera. (Salmo 78:26; Mateo 6:26) Aparentemente, pasando door di e atmosfera, e garoshi di candela a transferi Elias na un otro parti di tera, caminda el a sigui biba pa un tempo. De echo, añanan despues, Elias a skirbi un carta na Joram, Rei di Huda.—2 Cronicanan 21:1, 12-15.

5:15, 16—Pakico Eliseo no a acepta e regalo di Naaman? Eliseo a nenga e regalo pasobra el a reconoce cu no ta cu su poder el a haci e milager di cura Naaman, sino cu poder di Yehova. Eliseo no a pensa mes pa saca probecho di e funcion den cua Dios a nombr’e. Adoradonan berdadero djawe no ta busca manera pa saca probecho personal for di nan sirbishi na Yehova. Nan ta tuma e siguiente spiertamento di Hesus na pecho: “Pornada boso a ricibi, pornada boso mester duna.”—Mateo 10:8.

5:18, 19—Ta pordon Naaman tawata pidi pa motibo cu e tawatin cu participa den un acto religioso? Aparentemente e rei Sirio tawata bieu y suak y e tawatin cu tene na man di Naaman pa e no cai. Ora e rei a buig abou pa adora Rimon, Naaman tambe a buig. Pero Naaman no a buig abou pa rindi adoracion sino djis pa wanta e curpa di e rei. Naaman a pidi Yehova pordon’e pa e echo cu el a cumpli cu e deber civil aki. Eliseo a kere Naaman, pesei el a bis’e: “Bai na pas.”

Les pa Nos:

1:13, 14. Un hende por salba su bida door di siña a base di e cosnan cu e ta observa y door di actua cu humildad.

2:2, 4, 6. Aunke Eliseo tawata asistent di Elias pa un seis aña asina, el a insisti pa no bai laga Elias. Ki un ehempel magnifico di lealtad y amistad!—Proverbionan 18:24.

2:23, 24. E motibo principal cu e muchanan a haci bofon di Eliseo ta pasobra aparentemente e tawata pelon y tawatin e pañanan oficial di Elias bisti. Nan a reconoce Eliseo como representante di Yehova y simplemente no kier a mir’e banda di nan. Nan a bis’e pa e “subi”, esta, pa e sigui subi bai Bet-el of ser tuma ariba mescos cu Elias. Aparentemente e muchanan a refleha e actitud hostil di nan mayornan. Ta masha importante pa mayornan siña nan yiunan respeta Dios su representantenan!

3:14, 18, 24. Yehova su palabra ta cumpli semper.

3:22. E refleho di e lus di mainta tempran a crea e impresion cu e awa tawata cora manera sanger, talbes pa motibo cu e suela den e roinan resien traha tawata contene klei cora. Yehova por opta pa uza fenomenonan natural pa cumpli cu su propositonan.

 4:8-11. Un mohe na Sunem cu a reconoce cu Eliseo tawata “un homber santo di Dios” a extende hospitalidad na dje. Nos no mester haci mescos pa adoradonan fiel di Yehova?

5:3. E hobensita Israelita tawatin fe cu Dios por haci milager. Tambe e tawatin e curashi pa papia tocante su fe. Hobennan, boso ta haci esfuerso pa fortifica boso fe den e promesanan di Dios y boso tin e curashi pa papia tocante e berdad cu boso maestronan y compañeronan di scol?

5:9-19. E ehempel di Naaman ta mustra cu un persona orguyoso por siña bira humilde, no ta berdad?—1 Pedro 5:5.

5:20-27. Gehazi a paga caro pa su mentira! Ora nos pensa bon riba e dolor di curason y tragedia cu hibamento di un bida dobel por trece cu ne, nos ta evita e tipo di accionnan ei.

ISRAEL Y HUDA A BAI DEN EXILIO

(2 Reinan 9:1–25:30)

Jehu a ser ungi como rei di Israel. Mesora el a cuminsa un campaña pa caba cu e cas di Acab. Como un homber competente, Jehu a ‘elimina adoracion di Baal for di Israel.’  (2 Reinan 10:28) Ora Atalia, mama di Ocozias, a haya sa cu Jehu a mata su yiu, “[Atalia] a lanta y a destrui henter e desendencia di rei” di Huda y a tuma e trono. (2 Reinan 11:1) Ta solamente Joas, yiu homber chikito di Ocozias, a scapa y despues cu nan a scond’e seis aña, el a ser nombra rei di Huda. Siguiendo e instruccionnan di Joiada e sacerdote, Joas a sigui haci loke ta corecto den bista di Yehova.

Despues di Jehu, tur e reinan cu a goberna Israel a haci loke ta malo den bista di Yehova. Eliseo a muri un morto natural den e tempo di e nieto di Jehu. E di cuater rei di Huda cu a sigui Joas tawata Acaz, y e “no a haci bon den bista di SEÑOR.” (2 Reinan 16:1, 2) Sinembargo, su yiu Ezekias, a resulta di ta un Rei cu “a tene duro na SEÑOR.” (2 Reinan 17:20; 18:6) Na aña 740 prome cu nos era, tempo cu Ezekias tawata Rei di Huda y Oseas tawata goberna Israel, e Rei di Asiria Salmanasar “a captura Samaria y a hiba Israel den exilio na Asiria.” (2 Reinan 17:6) Despues di esei, nan a trece stranheronan den e teritorio di Israel, y e religion samaritano a cuminsa existi.

Di e shete reinan cu a sigui Ezekias na Huda, ta solamente Yosias a tuma medida pa elimina adoracion falso for di e tera. Finalmente na aña 607 prome cu nos era, e Babilonionan a captura Herusalem y “Huda a wordo hiba den exilio for di su tera.”—2 Reinan 25:21.

Contesta Riba Pregunta Biblico:

13:20, 21—E milager aki ta apoya veneracion di relikia religioso? No. Bijbel no ta mustra cu e wesonan di Eliseo a yega di ser venera. Ta e poder di Dios a haci e milager aki posibel, manera tawata e caso cu tur e milagernan cu Eliseo a efectua tempo cu e tawata na bida.

15:1-6—Pakico Yehova a dal Azarias (Uzias, 15:6, nota na pia di pagina di e Traduccion di Mundo Nobo) cu lepra? “Ma ora cu [Uzias] a bira fuerte, su curason a bira asina orguyoso cu ... el a bira infiel na SEÑOR su Dios, pasobra el a drenta e tempel di SEÑOR pa kima sencia riba e altar di sencia.” Ora e sacerdotenan a “opone Rei Uzias” y a bis’e pa e “sali for di e santuario”, el a bira furioso contra e sacerdotenan y lepra a dal e.—2 Cronicanan 26:16-20.

18:19-21, 25—Ezekias a sera un aliansa cu Egipto? No. E acusacion di Rabsakes tawata falso; e pretencion cu el a bin cu “aprobacion di SEÑOR” tambe tawata falso. E fiel Rei Ezekias a confia solamente den Yehova.

Les pa Nos:

9:7, 26. E huicio pisa contra e cas di Acab ta mustra cu Yehova ta odia adoracion falso y dramamento di sanger inocente.

9:20. E reputacion di Jehu como un hende cu tawata core garoshi cu gran velosidad a mustra cu cuanto celo el a cumpli cu su encargo. Abo ta conoci como un proclamado celoso di Reino?—2 Timoteo 4:2.

9:36, 37; 10:17; 13:18, 19, 25; 14:25; 19:20, 32-36; 20:16, 17; 24:13. Nos por tin e confiansa cu ‘e palabra cu ta sali for di e boca di Yehova semper tin exito.’—Isaias 55:10, 11.

10:15. Mescos cu Jonadab a acepta di henter su curason e invitacion di Jehu pa subi serca dje den e garoshi, asina e “multitud grandi” ta apoya Hesucristo, e Jehu moderno, y su siguidonan ungi, di buena gana.—Revelacion 7:9.

10:30, 31. Aunke Jehu su registro no tawata sin mancha, Yehova a mustra aprecio pa tur loke el a haci. En berdad, ‘Dios no ta inhusto pa lubida nos trabou.’—Hebreonan 6:10.

13:14-19. Siendo cu Joas, nieto di Jehu, no a haci tur su esfuerso, sino a dal e suela cu flecha solamente tres biaha, su exito den derota e Sirionan tawata limita. Yehova ta spera di nos pa nos haci su trabou asigna cu henter nos curason y cu celo.

20:2-6. Yehova ta ‘Esun cu ta scucha oracion.’—Salmo 65:2.

 24:3, 4. Pa motibo di culpa di sanger di Manases, Yehova “no kier a pordona” Huda. Dios ta respeta sanger di hende inocente. Nos por tin e confiansa cu Yehova lo venga sanger inocente door di destrui esnan cu ta culpabel di a drama sanger inocente.—Salmo 37:9-11; 145:20.

Balioso pa Nos

E buki di Segundo Reinan ta describi Yehova como Cumplidor di promesa. E exilio di residentenan di e dos reinonan, prome di Israel y despues di Huda, ta hala nos atencion seriamente riba con e huicio profetico registra na Deuteronomio 28:15–29:28 a cumpli. Segundo Reinan ta describi Eliseo como un profeta cu gran celo pa e nomber di Yehova y pa adoracion berdadero. E ta pinta Ezekias y Yosias como reinan humilde cu a respeta e Lei di Dios.

Ora nos refleha riba e actitud y accionnan di e rei-, profeta- y otro personanan na cua Segundo Reinan ta referi, nos no ta siña lesnan balioso den kico nos tin cu busca cu empeño y kico nos tin cu evita? (Romanonan 15:4; 1 Corintionan 10:11) Si, “e palabra di Dios ta bibo y activo.”—Hebreonan 4:12.

[Cuadro/Plachi na pagina 10]

E MILAGERNAN DI ELISEO

1. E awanan di Riu Yordan a dividi.—2 Reinan 2:14

2. E suministro di awa di mal calidad na Yerico a bira saludabel.—2 Reinan 2:19-22

3. Beer a ataca hobennan delincuente.—2 Reinan 2:23, 24

4. E tropanan a haya awa.—2 Reinan 3:16-26

5. Un biuda a ricibi azeta cu e por a uza como alimento.—2 Reinan 4:1-7

6. Un señora Sunamita steril a consebi un yiu.—2 Reinan 4:8-17

7. Un mucha a ser lanta for di morto.—2 Reinan 4:18-37

8. Un stoba venenoso a bira bon pa come.—2 Reinan 4:38-41

9. Shen homber a ser alimenta cu 20 pan.—2 Reinan 4:42-44

10. Naaman a ser cura di su lepra.—2 Reinan 5:1-14

11. Gehazi a haya e lepra di Naaman.—2 Reinan 5:24-27

12. A pone un cabes di hacha drif.—2 Reinan 6:5-7

13. Un sirbido a mira garoshi cu angel.—2 Reinan 6:15-17

14. E ehersito Sirio a wordo ciega.—2 Reinan 6:18

15. E ehersito Sirio a haya nan bista bek.—2 Reinan 6:19-23

16. Un homber morto a bolbe haya bida.—2 Reinan 13:20, 21

[Tabel/Plachi na pagina 12]

REINAN DI HUDA Y DI ISRAEL

Saul/David/Salomon: 1117/1077/1037 prome cu nos era *

REINO DI HUDA FECHA (P.E.C.) REINO DI ISRAEL

Roboam ․․․․․․ 997 ․․․․․․ Jeroboam

Abias/Asa ․․․․ 980/978 ․․․․

․․ 976/975/952 ․․ Nadab/Baasa/Ela

․․ 951/951/951 ․․ Zimri/Omri/Tibni

․․․․․․ 940 ․․․․․․ Acab

Josafat ․․․․․․ 937 ․․․․․․

․․․․ 920/917 ․․․․ Ocozias/Joram

Joram ․․․․․․ 913 ․․․․․․

Ocozias ․․․․․․ 906 ․․․․․․

(Atalia) ․․․․․․ 905 ․․․․․․ Jehu

Joas ․․․․․․ 898 ․․․․․․

․․․․ 876/859 ․․․․ Joacaz/Joas

Amasias ․․․․․․ 858 ․․․․․․

․․․․․․ 844 ․․․․․․ Jeroboam II

Azarias (Uzias) ․․․․․․ 829 ․․․․․․

․․ 803/791/791 ․․ Zacarias/Salum/Manahem

․․․․ 780/778 ․․․․ Pecaia/Peca

Jotam/Acaz ․․․․ 777/762 ․․․․

․․․․․․ 758 ․․․․․․ Oseas

Ezekias ․․․․․․ 746 ․․․․․․

․․․․․․ 740 ․․․․․․ Samaria captura

Manases/Amon/Yosias ․․ 716/661/659 ․․

Joacaz/Joakim ․․․․ 628/628 ․․․․

Joakin/Zedekias ․․․․ 618/617 ․․․․

Herusalem destrui ․․․․․․ 607 ․․․․․․

[Nota]

[Plachi na pagina 8, 9]

Naaman a humilia su mes y a ser cura cu e poder di Yehova

[Plachi na pagina 8, 9]

Kico a sosode cu Elias ora el a ‘subi bai den e warwaru’?