Yehova A Conta “Asta e Drachinan di Cabei Riba Boso Cabes”

“Ni un [mofi] lo no cai na suela si no ta e boluntad di boso Tata. Y asta e drachinan di cabei riba boso cabes, tur ta conta.”—MATEO 10:29, 30.

1, 2. (a) Dicon Job a sinti cu Dios a bandon’e? (b) Job su expresionnan a nifica cu el a bira contra Yehova? Splica.

“MI TA sclama na bo pa yudansa, ma bo no ta contesta mi; mi ta lanta para y bo no ta paga atencion na mi. Bo a bira cruel pa mi; cu e poder di bo man bo ta persigui mi.” E homber cu a papia e palabranan ei tawata den gran angustia, y no por tawata otro! El a perde su fuente di entrada, un desaster remarcabel a kita bida di su yiunan y awor un malesa debilitador a afligie. E homber aki tawata Job, y su experencia horibel ta skirbi den Bijbel pa nos beneficio.—Job 30:20, 21.

² E palabranan di Job por duna e impresion cu el a bira contra Dios, pero esei no tawata e caso. Job simplemente a expresa e angustia cu e tawata sinti den su curason. (Job 6:2, 3) E no tawata sa cu ta Satanas tawata e causa di su pruebanan, pesei eroneamente el a conclui cu Dios a bandon’e. Na dado momento Job asta a bisa Yehova: “Pakico bo ta sconde bo cara, y ta considera mi bo enemigo?” *—Job 13:24.

3. Ora nos ta confronta situacionnan hopi dificil, kico lo por bin na nos mente?

³ Awe, un parti grandi di Yehova su pueblo ta sufri dificultadnan continuo debi na guera, conmocionnan politico of social, desasternan natural, biehes, malesa, pobresa extremo y prohibicionnan gubernamental. Probablemente bo tambe ta pasando den un of otro prueba. Kisas tin ora bo tambe ta pensa cu Yehova ta sconde su cara pa bo. Bo ta bon na haltura di e palabranan di Huan 3:16: “Dios a stima mundo asina tanto, cu el a duna su Yiu unigenito.” Pero toch, ora bo ta sufri y no ta mira un alivio na caminda, kisas bo ta puntra bo mes: ‘Dios realmente ta stima ami? E ta mira kico ami ta pasando aden? E ta interesa den ami como persona?’

4. Ki situacion continuo Pablo tawatin cu soporta, y den ki maneranan un situacion asina lo por afecta nos?

⁴ Considera loke a pasa cu apostel Pablo. El a skirbi: “A wordo duna na mi un sumpiña den carni, un mensahero di Satanas pa bofta mi.” Anto el a agrega: “Mi a roga Señor tres biaha pa esaki por kita for di mi.” Yehova a tende su ruego. No obstante, el a laga Pablo sa cu lo e no interveni mediante un solucion milagroso. Mas bien, Pablo tawatin cu depende riba e poder di Dios pa yud’e trata cu su “sumpiña den carni.” * (2 Corintionan 12:7-9) Mescos cu Pablo, kisas bo ta pasando door di un cierto prueba continuo. Podise bo ta puntra bo mes: ‘E echo cu Yehova aparentemente no a haci nada cu mi prueba ta nifica cu e no sa di mi situacion of cu e no ta interesa den mi?’ E contesta ta rotundamente cu no! Loke Hesus a bisa su apostelnan un  poco despues cu el a scohe nan ta enfatisa Yehova su interes profundo den cada un di su fiel sirbidonan. Laga nos wak con Hesus su palabranan por anima nos awe.

Dicon “No Tene Miedo”?

5, 6. (a) Con Hesus a yuda e apostelnan pa nan no tene miedo di loke lo a sosode den futuro? (b) Con Pablo a mustra confiansa den Yehova su interes den dje?

⁵ E apostelnan a ricibi poder extraordinario serca Hesus, incluso “autoridad riba spiritonan impuro, pa saca nan afo, y pa cura tur sorto di enfermedad y tur sorto di malesa.” Sinembargo, esaki no a nifica cu nan bida lo ta sin prueba y dificultad. Al contrario, Hesus a describi en detaye algun di e cosnan cu lo a pasa cu nan. Pero el a urgi nan: “No tene miedo di esnan cu ta mata e curpa, ma cu no por mata e alma; ma mas bien tene miedo di Esun cu por destrui tanto alma como curpa den fierno [“Gehena”, NW].”—Mateo 10:1, 16-22, 28.

⁶ Pa Hesus yuda su apostelnan compronde dicon nan no mester tene miedo, el a conta nan dos comparacion. El a bisa nan: “Dos mofi [pa mas exacto, “parha di Jonchi”, NW] no ta wordo bendi pa un cen? Y ni un di nan lo no cai na suela si no ta e boluntad di boso Tata. Y asta e drachinan di cabei riba boso cabes, tur ta conta. Pesei, no tene miedo; boso bal mas cu un cantidad di mofi.” (Mateo 10:29-31) Tuma nota cu Hesus a conecta e echo cu nos no mester tene miedo ora nos ta confronta situacion dificil, cu tene confiansa cu Yehova ta interesa den nos personalmente. Apostel Pablo evidentemente tawatin e confiansa ei. El a skirbi: “Si Dios ta pa nos, ken por ta contra nos? Esun cu no a spar ni su mes Yiu, ma a entreg’e pa nos tur, lo e no duna nos tur-tur cos tambe hunto cu ne?” (Romanonan 8:31, 32) No ta importa ki dificultadnan bo ta confronta, bo tambe por tin sigur cu Yehova ta interesa den bo personalmente tanten cu bo ta leal na dje. Yehova su interes den bo ta bira asta mas bisto si nos analisa Hesus su conseho na su apostelnan.

E Balor di un Mofi

7, 8. (a) Con hende a mira mofi den tempo di Hesus? (b) Dicon evidentemente Mateo 10:29 ta uza un forma di e palabra Griego pa “mofi” cu ta nifica “mofi chikito”?

⁷ Hesus su comparacionnan ta duna masha bon descripcion di Yehova su interes den cada un di Su sirbidonan. Tuma como prome ehempel e asunto di e mofinan. Den tempo di Hesus, hende a uza mofi pa cuminda, pero como cu nan a forma un menasa pa cosecha, a considera nan por lo general como un pest. Mofi tawata asina abundante  y barata cu bo por a cumpra dos mofi pa un moneda cu a bal menos cu dies cen di nos placa djawe. Cu dos moneda lo bo a haya no cuater, sino cinco mofi; e paharito extra bo tawata haya como ñapa, como si fuera e no a bal nada!—Lucas 12:6.

⁸ Pensa tambe riba e tamaño di e paharito comun aki. Compara cu hopi otro parha, asta un mofi adulto ta basta chikito. Sinembargo, e palabra Griego traduci “mofi” na Mateo 10:29 ta referi spesificamente na mofi chikito. Hesus evidentemente tawata kier pa su apostelnan imagina nan mes un paharito masha chikito y insignificante.

9. Ki berdad poderoso Hesus su comparacion di mofi ta establece?

⁹ Hesus su comparacion di mofi ta establece un berdad poderoso: Loke ta parce sin balor den bista di hende ta importante pa Yehova Dios. Hesus a enfatisa e berdad aki mas aleu door di agrega cu un mofi chikito lo no a “cai na suela” sin cu Yehova ripara. * E les ta masha cla. Si Yehova Dios ta tuma nota di e paharito di mas chikito y insignificante, cuanto mas lo e ta interesa den e situacion di un hende cu a scohe pa sirbie!

10. Kico ta e importancia di e declaracion: “Asta e drachinan di cabei riba boso cabes, tur ta conta”?

¹⁰ Fuera di su comparacion tocante mofi, Hesus a bisa: “Asta e drachinan di cabei riba boso cabes, tur ta conta.” (Mateo 10:30) E declaracion breve pero profundo aki ta amplia e punto di Hesus su comparacion tocante mofi. Pensa un rato: Un cabes humano normalmente tin rond di 100.000 drachi di cabei. Por lo general, un drachi di cabei ta parce mescos cu e otro, y ningun drachi aparentemente ta merece nos atencion special. Sinembargo, Yehova Dios ta tuma nota y ta conta cada drachi. Siendo cu esaki ta e caso, lo tin cualkier detaye di nos bida cu Yehova no sa di dje? Yehova sigur ta compronde e composicion unico di cada un di su sirbidonan. De echo, e “ta wak curason.”—1 Samuel 16:7.

11. Con David a expresa su confiansa den Yehova su interes den dje personalmente?

¹¹ David, kende a experencia hopi dificultad, tawatin e confiansa cu Yehova a tuma nota di dje. El a skirbi: “O SEÑOR, bo a samina mi y bo conoce mi. Bo sa ki ora mi ta sinta y ki ora mi ta lanta; bo ta compronde mi pensamentonan djaleu.” (Salmo 139:1, 2) Bo tambe por tin sigur cu Yehova conoce bo personalmente. (Yeremias 17:10) No sea lihe pa asumi cu bo ta mucho insignificante pa Yehova su wowonan—cu ta mira tur cos—tuma nota di bo.

“Pone Mi Lagrimanan den Bo Butishi”

12. Con bin nos sa cu Yehova ta completamente na haltura di e dificultadnan cu su pueblo ta sufri?

¹² Yehova no solamente conoce su sirbidonan individualmente sino tambe ta completamente na haltura di e dificultadnan cu cada un di nan ta pasa aden. Por ehempel, ora cu Egipto tawata oprimi e Israelitanan como catibo, Yehova a bisa Moises: “Siguramente mi a mira e afliccion di mi  pueblo cu ta na Egipto, y a tende nan sclamacion pa motibo di nan capatasnan, pasobra mi ta conciente di nan sufrimentonan.” (Exodo 3:7) Ta ki un gran consuelo pa realisa cu ora nos ta soporta un prueba, Yehova ta mira loke ta pasando y ta tende nos sclamacion! E sigur no ta indiferente pa cu nos sufrimento.

13. Kico ta mustra cu Yehova realmente ta sinti pa su sirbidonan?

¹³ Ademas, Yehova su interes den personanan cu a forma un amistad cu ne ta bisto na su sintimentonan pa e Israelitanan. Aunke hopi biaha nan sufrimento tawata e resultado di nan propio actitud cabesura, Isaias a skirbi tocante Yehova: “Den tur nan afliccion e tawata afligi.” (Isaias 63:9) Como un fiel sirbido di Yehova, bo por tin sigur anto cu ora bo ta sufri, Yehova ta sufri. Esaki no ta motiva bo pa enfrenta dificultad y sufrimento sin miedo y sigui haci bo best pa sirbi Yehova?—1 Pedro 5:6, 7.

14. Den ki circunstancia David a compone Salmo 56?

¹⁴ Rei David su conviccion cu Yehova tawata interesa den dje y a sinti p’e ta bisto den Salmo 56, un salmo cu David a compone ora cu e tawata hui pa Rei Saul cu kier a mat’e. David a hui bai Gat, pero ora cu e Filisteonan a reconoc’e e tawatin miedo cu nan lo a captur’e. El a skirbi: “Mi enemigonan ta trapa riba mi henter dia, pasobra hopi ta esnan cu den nan orguyo ta bringa contra mi.” Debi na su situacion peligroso, David a acudi na Yehova. El a bisa: “Henter dia nan ta troce mi palabranan; tur nan pensamentonan ta contra mi, pa haci mi daño.”—Salmo 56:2, 5.

15. (a) Kico David tawata kiermen ora el a pidi Yehova pone su lagrimanan den un butishi of den un buki? (b) Di kico nos por ta sigur ora nos ta soportando un situacion cu ta pone nos fe na prueba?

¹⁵ Anto manera ta para na Salmo 56:8, David a haci e declaracion fasinante aki: “Bo a nota tur e biahanan cu mi a cana dual; pone mi lagrimanan den bo butishi; nan no ta den bo buki?” Ki un descripcion conmovedor di Yehova su cuido tierno! Ora nos ta bou di tension, kisas nos ta sclama na Yehova cu lagrima. Asta e homber perfecto Hesus a haci esei. (Hebreonan 5:7) David tawata combenci cu Yehova a observ’e y lo a corda su agonia, como si fuera Dios a conserva su lagrimanan den un butishi of a skirbi nan den un buki. Podise abo ta sinti cu bo lagrimanan lo yena gran parti di e butishi ei of hopi pagina di un buki asina. Si esei ta e caso, bo por cobra animo. Bijbel ta sigura nos: “SEÑOR ta serca di e hende di curason kibra, y ta salba esnan di spirito abati.”—Salmo 34:18.

Bira un Compañero Intimo di Dios

16, 17. (a) Con nos por sa cu Yehova no ta indiferente pa cu e problemanan cu su pueblo ta confronta? (b) Kico Yehova ta haci pa hende por tin un amistad intimo cu ne?

¹⁶ E echo cu Yehova a conta ‘asta e drachinan di cabei riba nos cabes’ ta duna nos un idea di e clase di Dios observado y amoroso cu nos tin e privilegio di adora. Aunke nos lo tin cu warda te den e mundo nobo priminti pa tur dolor y sufrimento disparce, Yehova ta haciendo algo maraviyoso pa su pueblo for di awor. David a skirbi: “E comunion intimo di SEÑOR ta cu esnan cu ta tem’e, y e lo haci nan conoce su aliansa.”—Salmo 25:14.

¹⁷ ‘Comunion intimo cu Yehova.’ Wel, e idea so ta parce increibel pa hende imperfecto! Sinembargo, Yehova ta invita esnan cu ta tem’e pa nan ta huespet den su tabernakel of tent. (Salmo 15:1-5) Y kico Yehova ta haci pa su huespetnan? E ta laga nan conoce su aliansa, segun David. Yehova ta confia nan cu su “conseho secreto” door di revela esei pa medio di e profetanan di manera cu nan lo por sa kico su propositonan ta y kico nan tin cu haci pa biba na harmonia cu nan.—Amos 3:7.

18. Con nos por sa cu Yehova kier pa nos tin un amistad intimo cu ne?

 ¹⁸ En berdad ta alentador pa sa cu nos como hende imperfecto por bira compañero intimo di e Haltisimo, Yehova Dios. De echo, e ta urgi nos pa haci net esei. Bijbel ta bisa: “Hala serca Dios y e lo hala serca boso.” (Santiago 4:8) Yehova kier pa nos tin un amistad intimo cu ne. En realidad el a dal paso caba pa haci un amistad asina posibel. E sacrificio di rescate di Hesus a habri e caminda pa nos por tin un amistad cu Dios Todopoderoso. Bijbel ta declara: “Nos ta stima, pasobra el a stima nos prome.”—1 Huan 4:19.

19. Con perseverancia ta fortalece nos amistad cu Yehova?

¹⁹ E amistad intimo ei ta bira mas fuerte ora cu nos ta persevera bou di circunstancianan dificil. Disipel Santiago a skirbi: “Laga perseverancia tin su resultado perfecto [of, “completo”, NW], pa boso por ta perfecto y completo, sin falta di nada.” (Santiago 1:4) Ki “resultado” nos ta logra door di persevera bou di sufrimento? Corda Pablo su “sumpiña den carni.” Kico perseverancia a logra den su caso? Pablo a bisa lo siguiente tocante su pruebanan: “Pesei, gustosamente lo mi prefera di gaba den mi debilidadnan, pa e poder di Cristo por biba den mi. Pesei, pa causa di Cristo mi tin placer den debilidad, den insulto, den sufrimento, den persecucion, den problema; pasobra ora mi ta debil, e ora ei mi ta fuerte.” (2 Corintionan 12:9, 10) Pablo su experencia tawata cu Yehova lo suministra e poder cu e tawatin mester—si ta necesario, “e poder mas aya di loke ta normal”—di manera cu lo e por a persevera. Esei na su turno a hala Pablo mas serca di Cristo y di Yehova Dios.—2 Corintionan 4:7, NW; Filipensenan 4:11-13, NW.

20. Con nos por ta sigur cu Yehova lo sostene y consola nos ora nos ta confronta sufrimento?

²⁰ Podise Yehova a permiti bo pruebanan sigui. Si ta asina, tuma na pecho su promesa na hende cu ta tem’e: “Nunca lo mi no bandona bo, y nunca lo mi no laga bo desampara.” (Hebreonan 13:5) Abo por experencia tal sosten y consuelo. Yehova a conta ‘asta e drachinan di cabei riba bo cabes.’ E ta mira bo perseverancia. E ta sinti bo dolor. E ta realmente interesa den bo. Anto nunca lo e no ‘lubida bo trabou y e amor cu bo a mustra pa su nomber.’—Hebreonan 6:10.

[Nota]

Bo Ta Corda?

• Ki factornan por pone un persona sinti cu Dios a bandon’e?

• Ki les nos ta siña for di Hesus su comparacion di mofi y di esun cu nos drachinan di cabei ta conta?

• Kico kiermen cu Yehova ta pone bo lagrimanan den su “butishi” of den su “buki”?

• Con nos por tin ‘comunion intimo cu Yehova’?

[Preguntanan di Estudio]

[Plachi na pagina 22]

Dicon Yehova no a kita Pablo su “sumpiña den carni”?

[Plachi na pagina 23]

Kico nos por siña for di Hesus su comparacion di mofi?

[Reconocemento]

© J. Heidecker/VIREO

[Plachi na pagina 25]

Door di lesa Bijbel regularmente, nos por haya e siguransa cu Dios ta interesa den nos personalmente