Yehova Ta “Esun Cu Ta Recompensa Esnan Cu Ta Busc’e”

“Esun cu bin serca Dios mester kere cu e ta, y cu e ta Esun cu ta recompensa esnan cu ta busc’e.”—HEBREONAN 11:6.

1, 2. Dicon algun sirbido di Yehova lo por ta lucha cu sintimentonan negativo?

“MI TA un Testigo di Yehova pa casi 30 aña, pero nunca mi a sinti mi digno di ser yama asina”, Barbara a admiti. * “Maske mi a traha pionero y tawatin hopi otro privilegio di sirbishi, ningun di e cosnan ei no ta parce suficiente pa laga mi kere den mi curason cu mi ta digno di ser yama un Testigo.” Keith a expresa mesun pensamento. El a bisa: “Sa tin biaha cu mi ta sinti cu mi no ta digno pasobra Yehova su sirbidonan tin hopi motibo pa ta felis, pero ami no tawata felis. Esaki a laga mi sinti mi culpabel, locual a empeora e situacion.”

² Hopi sirbido fiel di Yehova, tanto di antes como di awor, a lucha cu sintimentonan similar. Esei a yega di pasa cu bo tambe? Kisas bo ta sinti cu bo ta hoga den hopi problema, mientras cu bo compañeronan den fe ta parce di ta disfruta di bida, desprecupa y felis. Como resultado, lo bo por sinti cu bo no tin Yehova su aprobacion ni ta merece su atencion. No sea mucho pura pa saca e conclusion ei. Bijbel ta sigura nos: “[Yehova] no a desprecia, ni a aborece e afliccion di esun cu ta afligi; tampoco e no a sconde su cara p’e; ma ora cu el a sclama na dje pa yudansa, el a  tende.” (Salmo 22:24) E palabranan profetico ei tocante e Mesias ta mustra cu Yehova no solamente ta tende su sirbidonan fiel sino tambe ta recompensa nan.

3. Dicon nos no ta liber di e presionnan di e sistema di cosnan aki?

³ Ningun hende no ta liber di e presionnan di e sistema di cosnan aki, ni sikiera e pueblo di Yehova. Nos ta biba den un mundo goberna pa Yehova su enemigo principal, Satanas e Diabel. (2 Corintionan 4:4; 1 Huan 5:19) En bes di haya proteccion milagroso, Yehova su sirbidonan de echo ta e blanco principal di Satanas su atake. (Job 1:7-12; Revelacion 2:10) Pesei te na Dios su tempo stipula nos tin cu ‘persevera den tribulacion’ y keda “dedica na oracion”, cu e confiansa cu Yehova ta percura pa nos. (Romanonan 12:12) Nos no mester laga e presionnan di mundo pone nos pensa cu nos Dios, Yehova, no ta stima nos!

Ehempelnan di Pasado di Perseverancia

4. Menciona algun ehempel di sirbidonan fiel di Yehova cu a soporta situacionnan angustioso.

⁴ Hopi sirbido di Yehova di pasado tawatin cu soporta situacionnan angustioso. Ana, por ehempel, a sufri di “amargura di alma” pasobra e no tawatin yiu, un condicion cu el a considera mescos cu ser lubida door di Dios. (1 Samuel 1:9-11) Ora cu e Reina asesino, Jezabel, tawata persigui Elias, Elias a haya miedo y a resa na Yehova: “Ta basta; awor, o SEÑOR, tuma mi bida, pasobra mi no ta miho cu mi tatanan.” (1 Reinan 19:4) Anto apostel Pablo lo mester tawata hopi angustia pa su imperfeccion ora cu el a admiti: “Ora mi ta desea di haci loke ta bon, maldad ta presente den mi.” Anto el a agrega: “Hende miserabel cu mi ta!”—Romanonan 7:21-24.

5. (a) Con Dios a recompensa Ana, Elias y Pablo? (b) Ki consuelo nos por saca for di e Palabra di Dios si nos ta lucha cu emocionnan negativo?

⁵ Nos sa naturalmente cu nan tur, Ana, Elias y Pablo, a persevera den Yehova su sirbishi, y El a recompensa nan ricamente. (1 Samuel 1:20; 2:21; 1 Reinan 19:5-18; 2 Timoteo 4:8) Apesar di esei, nan a lucha cu tur tipo di emocion humano, incluso tristesa, desesperacion y miedo. Pues nos no mester keda sorprendi si de bes en cuando nos tin sintimentonan negativo. Pero kico bo por haci ora cu precupacionnan di bida ta pone bo puntra bo mes si realmente Yehova ta stima bo? Bo por saca consuelo for di e Palabra di Dios. Por ehempel, den e articulo anterior, nos a considera Hesus su declaracion cu Yehova a conta “asta e drachinan di cabei riba boso cabes.” (Mateo 10:30) E palabranan alentador ei ta indica cu Yehova ta profundamente interesa den cada un di su sirbidonan. Corda tambe riba Hesus su comparacion di mofi. Si ni sikiera un di e paharitonan chikito ei ta cai na suela sin cu Yehova ripara, pakico lo e sera wowo pa bo situacion penoso?

6. Con Bijbel por ta un fuente di consuelo pa esnan cu ta lucha cu sintimentonan negativo?

⁶ Realmente ta posibel cu nos como hende imperfecto ta precioso den bista di e Creador todopoderoso, Yehova Dios? Si! De echo, tin varios parti den Bijbel cu ta sigura nos di esaki. Door di medita riba e partinan aki di Bijbel nos por ripiti e palabranan di e salmista cu a declara: “Den e multitud di mi precupacionnan den mi, bo consuelonan ta alegra mi alma.” (Salmo 94:19) Laga nos considera algun di e declaracionnan consolador aki di e Palabra di Dios cu lo yuda nos compronde mas plenamente cu nos ta di gran balor pa Dios y cu lo e recompensa nos segun cu nos ta sigui haci su boluntad.

Yehova Su “Propiedad Special”

7. Ki profecia alentador Yehova a duna mediante Malakias na e nacion corupto?

⁷ Un situacion deplorabel a existi entre e Hudiunan durante siglo 5 prome cu nos era. E sacerdotenan tawata acepta bestia inapropiado y ofrece esakinan como  sacrificio riba Yehova su altar. Huesnan tawata haci distincion di persona. Hacimento di bruha, gañamento, fraude y adulterio tawata reina tur caminda. (Malakias 1:8; 2:9; 3:5) Malakias a pronuncia un profecia asombroso na e nacion aki cu tawata abiertamente corupto. Yehova cu tempo lo a trece su pueblo bek na un condicion aproba. Nos ta lesa: “‘Nan lo ta di mi’, e SEÑOR di ehersitonan ta bisa, ‘riba e dia cu mi ta prepara mi mes propiedad, y lo mi spar nan manera un homber ta spar su mes yiu homber cu ta sirbie.’”—Malakias 3:17.

8. Dicon nos por aplica e principio di Malakias 3:17 na e multitud grandi?

⁸ Malakias su profecia tin un cumplimento den nos tempo moderno en conexion cu cristiannan ungi cu spirito, kendenan ta forma un nacion spiritual di 144.000 persona. E nacion ei en berdad ta Yehova su “mes propiedad”, of “pueblo peculiar.” (1 Pedro 2:9) Malakias su profecia por ta un animacion tambe pa e “multitud grandi” cu ta “para dilanti di e trono y dilanti di e Lamchi, bisti na paña blanco.” (Revelacion 7:4, 9) Esakinan ta bira un tou hunto cu e unginan, bou di un Wardador, Hesucristo.—Huan 10:16.

9. Dicon Yehova su pueblo ta “un propiedad special” p’e?

⁹ Con Yehova ta considera hende cu ta scohe pa sirbie? Manera nos a nota na Malakias 3:17, e ta considera nan mescos cu un tata amoroso ta considera su yiu. Anto tuma nota di e palabranan caluroso cu e ta describi su pueblo cu ne: “mi mes propiedad.” Otro traduccionnan ta traduci e frase ei “un propiedad special”, “mi pocesion mas balioso” y “mi hoyanan.” Dicon Yehova lo considera esnan cu ta sirbie como algo asina special? Un motibo ta cu e ta un Dios gradicido. (Hebreonan 6:10) E ta hala serca di esnan cu ta sirbie di curason y e ta considera nan special.

10. Con Yehova ta proteha su pueblo?

¹⁰ Bo tin un cos di balor cu bo ta considera un propiedad special? Bo no ta haci esfuerso pa proteh’e? Yehova ta haci mescos cu su “propiedad special.” Ta berdad cu e no ta proteha su pueblo di tur e pruebanan y tragedianan di bida. (Eclesiastes 9:11, NW) Pero Yehova por y ta proteha su sirbidonan fiel den sentido spiritual. E ta duna nan e fortalesa cu nan mester pa soporta cualkier prueba. (1 Corintionan 10:13) Pesei Moises a bisa Dios su pueblo di pasado, e Israelitanan: “Sea fuerte y tene curashi ... SEÑOR bo Dios ta Esun cu ta bai cu bo. E lo no faya bo ni bandona bo.” (Deuteronomio 31:6) Yehova ta trata na un manera recompensador cu su pueblo. P’e, nan ta “un propiedad special.”

Yehova “Esun Cu Ta Recompensa”

11, 12. Con aprecio pa Yehova den su papel di Esun cu ta recompensa nos, lo yuda nos lucha contra sintimentonan di duda?

¹¹ Un otro evidencia cu Yehova su sirbidonan ta balioso p’e ta cu e ta recompensa nan. El a bisa e Israelitanan: “‘Pone mi na prueba awor den esaki’, e SEÑOR di ehersitonan ta bisa, ‘si mi lo no habri pa boso e bentananan di shelo, y basha asina tanto bendicion, cu boso lo no tin suficiente luga pa conten’e.’” (Malakias 3:10) Claro cu Yehova, cu tempo, lo recompensa su sirbidonan cu bida eterno. (Huan 5:24; Revelacion 21:4) E recompensa sumamente balioso aki ta revela con grandi  Yehova su amor y generosidad ta. Tambe esei ta mustra cu Yehova realmente ta balora esnan cu ta scohe pa sirbie. Si nos siña mira Yehova como un persona cu generosamente ta recompensa nos, esei por yuda nos combati cualkier duda tocante nos posicion dilanti Dios. De echo, Yehova ta urgi nos pa mir’e como Esun cu ta recompensa! Pablo a skirbi: “Esun cu bin serca Dios mester kere cu e ta, y cu e ta Esun cu ta recompensa esnan cu ta busc’e.”—Hebreonan 11:6.

¹² Claro cu nos ta sirbi Yehova pasobra nos stim’e, no djis pasobra e ta priminti di recompensa nos. Sinembargo, no ta incorecto ni egoista pa carga den nos curason e speransa di un recompensa. (Colosensenan 3:23, 24) Yehova ta tuma e iniciativa y ta recompensa esnan cu ta busc’e cu empeño, debi na su amor pa nan y e gran balor cu nan tin p’e.

13. Dicon e provision di e rescate ta e evidencia di mas grandi di Yehova su amor pa nos?

¹³ E indicacion mas grandi di e balor potencial cu humanidad tin den bista di Yehova ta e provision di e rescate. Apostel Huan a skirbi: “Dios a stima mundo asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.” (Huan 3:16) Provision di e sacrificio di rescate di Hesucristo ta contradeci e idea cu den bista di Yehova nos ta inutil of no ta digno di ser stima. De echo, si Yehova a paga un prijs asina halto pa nos—ofreciendo su Yiu unigenito—sigur e mester stima nos masha hopi mes.

14. Kico ta mustra con Pablo a considera e rescate?

¹⁴ Pues, si sintimentonan negativo mester lanta den bo, medita riba e rescate. Si, mira e regalo aki como un regalo personal for di Yehova. Esei ta loke apostel Pablo a haci. Corda cu el a bisa: “Hende miserabel cu mi ta!” Pero despues el a sigui bisa: “Mi ta duna gradicimento na Dios door di Hesucristo, nos Señor”, kende, segun Pablo, “a stima mi, y a entrega su mes pa mi.” (Romanonan 7:24, 25; Galationan 2:20) Ora Pablo a bisa esaki, e no tawata egoista. Simplemente e tawatin e confiansa cu Yehova a balor’e como un persona. Mescos cu Pablo, nos tambe mester siña mira e rescate como un regalo personal for di Dios. Yehova no solamente ta un Salbador poderoso sino tambe Esun cu amorosamente ta recompensa hende.

Tene Cuidou cu e “Trampanan” di Satanas

15-17. (a) Con Diabel ta probecha di sintimentonan negativo? (b) Ki animacion nos por saca for di e experencia di Job?

¹⁵ Kisas toch bo ta haya cu ta dificil pa kere cu e consuelonan inspira cu tin den e Palabra di Dios realmente ta aplica na bo. Podise bo ta sinti cu e recompensa di biba pa semper den Dios su mundo nobo ta algo cu otro hende por alcansa, pero cu abo simplemente no ta digno di esei. Si ta asina bo ta sinti, kico bo por haci?

¹⁶ Sin duda bo conoce Pablo su conseho na e Efesionan: “Bisti e armadura completo di Dios, pa boso por para firme contra e trampanan di Diabel.” (Efesionan 6:11) Ora nos pensa riba e trampanan di Satanas, kisas mesora nos ta pensa riba cosnan manera materialismo y inmoralidad, y esei ta na su luga. E tentacionnan aki a coi un parti grandi di e pueblo di Dios den trampa tanto den tempo antiguo como den nos tempo actual. Sinembargo, nos no mester pasa por halto di un otro trampa di Satanas—su esfuerso pa combence hende cu Yehova Dios no stima nan.

¹⁷ Diabel ta bon den probecha di e sintimentonan ei den su intento pa kita hende for di Dios. Corda e palabranan cu Bildad a bisa Job: “Con anto un hende por ta husto dilanti di Dios? Of con esun cu a nace di mohe por ta puro? Si ni luna no tin splendor, ni e streyanan no ta puro den su bista, cuanto menos hende cu ta bichi y yiu di hende cu ta bichi!”  (Job 25:4-6; Huan 8:44) Bo por imagina con e palabranan ei lo mester a kibra Job? Pues no laga Satanas descurasha abo. Di otro banda, sea alerta pa e trampanan di Satanas di manera cu lo bo tin e curashi y resistencia pa lucha asta mas duro pa haci loke ta corecto. (2 Corintionan 2:11) Pa loke ta Job, maske Yehova tawatin cu corigie, El a recompensa su perseverancia door di dun’e bek dobel di tur loke el a perde.—Job 42:10.

Yehova “Ta Mas Grandi cu Nos Curason”

18, 19. Con Dios ta “mas grandi cu nos curason”, y den ki sentido e “sa tur cos”?

¹⁸ Ta berdad cu por ta dificil pa controla sintimentonan di desanimacion si esakinan ta profundamente hancra. Sinembargo, Yehova su spirito por yuda bo “basha e baluartenan abou ... cu ta wordo lanta contra e conocemento di Dios.” (2 Corintionan 10:4, 5) Ora cu pensamentonan negativo ta menasa di hoga bo, reflexiona riba e palabranan di apostel Huan: “Na esaki nos lo sa cu nos ta di e berdad, y lo sigura nos curason dilanti di dje, den kico cu nos curason condena nos; pasobra Dios ta mas grandi cu nos curason y sa tur cos.”—1 Huan 3:19, 20.

¹⁹ Kico e frase “Dios ta mas grandi cu nos curason” kiermen? Tin biaha nos curason por condena nos, specialmente ora nos bira hopi conciente di nos imperfeccionnan y faltanan. Of por ta debi na nos criansa, nos ta demasiado inclina na pensa negativo di nos mes, como si fuera nada cu nos haci lo por ta aceptabel pa Yehova. E palabranan di apostel Huan ta sigura nos cu Yehova ta mas grandi cu esei! E ta mira mas leu cu nos erornan y ta ripara nos berdadero potencial. Tambe e sa nos motivacionnan y intencionnan. David a skirbi: “E sa di kico nos ta traha; e ta corda cu ta stof nos ta.” (Salmo 103:14) Si, Yehova conoce nos mas miho cu nos conoce nos mes!

“Un Corona di Bunitesa” y “un Diadema Real”

20. Kico Isaias su profecia di restauracion ta revela tocante e manera cu Yehova ta mira su sirbidonan?

²⁰ Pa medio di profeta Isaias, Yehova a duna su pueblo di antiguedad e speransa di ser restaura. Ora cu nan lo tawata den exilio na Babilonia, e consuelo y garantia aki lo tawata net loke e exiliadonan desanima aki tawatin mester! Mirando den futuro na e tempo ora cu nan lo regresa nan tera, Yehova a declara: “Lo bo ta un corona di bunitesa den e man di SEÑOR, y un diadema real den e man di bo Dios.” (Isaias 62:3) Cu e palabranan aki, Yehova a bisti su pueblo cu dignidad y splendor. El a haci e mesun cos cu su nacion di Israel spiritual awe. Ta como si fuera el a tene nan na halto pa tur hende admira nan.

21. Con bo por haya e confiansa cu Yehova lo recompensa bo fiel perseverancia?

²¹ Aunke e profecia aki ta cumpli principalmente riba e unginan, e ta ilustra e dignidad cu Yehova ta otorga na tur persona cu ta sirbie. Pues, ora sintimentonan di duda ta afligi bo, corda cu maske bo ta imperfecto, bo por ta pa Yehova mesun balioso cu “un corona di bunitesa” y “un diadema real.” Pesei sigui haci Yehova su curason contento door di busca sinseramente pa haci su boluntad. (Proverbionan 27:11) Haciendo asina, bo por tin e confiansa cu Yehova lo recompensa bo fiel perseverancia!

[Nota]

Bo Ta Corda?

• Den ki sentido nos ta un “propiedad special” pa Yehova?

• Dicon ta importante pa mira Yehova como Esun cu ta recompensa?

• Pa cua “trampanan” di Satanas nos mester ta alerta?

• Den ki manera Dios “ta mas grandi cu nos curason”?

[Preguntanan di Estudio]

[Plachi na pagina 26]

Pablo

[Plachi na pagina 26]

Elias

[Plachi na pagina 26]

Ana

[Plachi na pagina 28]

E Palabra di Dios tin un abundancia di pensamentonan consolador