Storia di Bida

Yehova Ta Recompensa Ricamente Esnan Cu Sigui Su Caminda

SEGUN RELATO DI ROMUALD STAWSKI

Ora cu segundo guera mundial a cuminsa na september 1939, tawatin batayanan intenso den parti nort di Polonia. Como un mucha homber caweta di nuebe aña, mi a bai tira un bista na un campo di bataya den bicindario. Loke mi a mira tawata spantoso, cadavernan benta tur caminda riba suela, y tawatin un huma sofocante den aire. Aunke mi mayor precupacion tawata con pa yega cas bek sano y salvo, algun pregunta a lanta den mi mente: “Dicon Dios ta permiti cosnan teribel asina sosode? Na ken su banda e ta?”

CASI na final di guera, e regimen Aleman a cuminsa forsa mucha hombernan traha pa nan. Ken cu a tribi di nenga hacie, nan a horc’e na un palo of un brug cu un borchi riba su pecho cu a bisa “traido” of “saboteador.” Nos pueblo, Gdynia, tawata situa entre dos ehersito opositor. Ora cu nos tawata sali pafo di e pueblo pa bai coi awa, bala y bom tawata skeiro riba nos cabes. Den un di e biahanan ei mi ruman homber chikito Henryk a keda mortalmente herida. Debi na e condicionnan teribel, mi mama a muda nos pa un bodega pa nos por ta safe. Einan mi ruman homber di dos aña, Eugeniusz, a muri di difteria.

Mi a bolbe puntra mi mes: “Unda Dios ta? Dicon e ta permiti tur e sufrimento aki?” Aunke mi tawata un catolico deboto y a bai misa cu regularidad, mi no a haya contesta.

Mi Ta Acepta e Berdad

Contesta riba mi preguntanan a bin di un fuente inespera. Guera a caba na 1945, y na principio di 1947 un Testigo di Yehova a bishita nos cas na Gdynia. Mi mama a papia cu e  Testigo, y mi a tende algun di e cosnan cu el a bisa. Nan a parce logico, pesei nos a acepta e invitacion pa asisti na un reunion cristian. Apenas un luna despues, aunke mi no tawata compronde ainda tur cos di e berdad cu tawatin den Bijbel, mi a join un grupo local di Testigo y a bai predica na otro hende tocante un miho mundo, liber di guera y atrocidad. Esaki a duna mi hopi goso.

Na september 1947, mi a batisa na un asamblea di sircuito na Sopot. Den luna di mei di e siguiente aña, mi a cuminsa den e sirbishi di pionero regular, dedicando mayor parti di mi tempo na predica e mensahe di Bijbel na otro hende. Clero local a opone nos trabou amargamente y a instiga violencia contra nos. Un biaha, un multitud rabia a ataca nos, tira nos cu piedra y bati nos severamente. Na un otro ocasion monhanan local y miembronan di clero a urgi un grupo di hende pa ataca nos. Nos a busca refugio den un warda di polis, pero e grupo a rondona e edificio, y a menasa di bati nos. Finalmente refuerso policial a yega, y nos a sali for di einan fuertemente escolta.

E tempo ei no tawatin un congregacion den nos area. Tawatin biaha cu nos a pasa anochi den mondi den aire liber. Nos tawata felis cu nos por a cumpli cu e trabou di predica apesar di e condicionnan cu a reina. Awe, tin congregacionnan fuerte den e area ei.

Sirbishi di Betel y Aresto

Na 1949 mi a haya invitacion pa sirbi na e Cas di Betel na Łódź. Ki un gran privilegio tawata pa sirbi na un luga asina! Lamentablemente, mi estadia einan no a dura largo. Na juni 1950, un luna prome cu nos obra a keda oficialmente prohibi, autoridadnan a aresta mi hunto cu otro ruman hombernan na Betel. Nan a hiba mi prizon y como resultado, mi mester a confronta un interogacion cruel.

Como cu mi tata tawata traha riba un barco cu regularmente a nabega pa New York, e polisnan cu a conduci e investigacion a purba pone mi admiti cu mi tata tawata spiona pa Merca. Mi tawatin cu soporta interogacionnan cruel. Ademas, cuater polis pareu a purba pone mi testifica contra Ruman Wilhelm Scheider, kende e tempo ei tawata supervisa nos actividad na Polonia. Nan a bati mi na mi hilchi cu palo diki. Na dado momento cu mi tawata benta riba vloer ta sangra, mi a sinti cu mi no por a soporta mas y mi a sclama: “Yehova, yuda mi!” Esei a sorprende mi persiguidonan y nan a stop di bati mi. Den un par di minuut, nan a pega soño. Mi a sinti un alivio y a recupera mi fortalesa. Esaki a combence mi cu Yehova amorosamente ta reacciona ora cu su sirbidonan dedica sclama na dje. E experencia ei a fortalece mi fe y a siña mi pone mi pleno confiansa den Dios.

E raport final di e investigacion tawatin testimonio falso cu supuestamente mi a duna. Ora mi a protesta, un polis a bisa mi: “Lo bo splica esei den corte!” Pero un compañero di cel amabel a conseha mi pa no precupa ya cu un fiscal militar tawatin cu verifica e raport final, anto esei lo a duna mi chens di refuta e testimonio falso. Y berdad, asina a sosode.

Trabou di Sircuito y Atrobe den Prizon

Mi a sali liber na januari 1951. Un luna despues, mi a cuminsa sirbi como  superintendente biahero. Apesar di e prohibicion, mi tawata traha hunto cu otro ruman hombernan pa fortalece e congregacionnan y yuda compañeronan Testigo cu tawata plama debi na e actividad di servicionan di siguridad. Nos tawata curasha e rumannan pa sigui den e ministerio. Añanan despues, e rumannan aki cu curashi a apoya e superintendentenan biahero y a efectua e trabou di imprimi y distribui literatura biblico clandestinamente.

Un dia den april 1951, despues di a asisti na un reunion cristian, funcionarionan di siguridad cu tawata vigila mi, a aresta mi riba caya. Como cu mi a nenga di contesta nan preguntanan, nan a hiba mi un prizon na Bydgoszcz y a cuminsa interoga mi e mesun anochi. Nan a manda mi para contra un muraya durante seis dia y seis anochi, sin come ni bebe y den huma diki di sigaria di e funcionarionan. Nan a bati mi cu klop y kima mi cu sigaria. Ora mi bai leu, nan tawata basha awa riba mi y reanuda e interogacion. Mi a roga Yehova pa duna mi forsa pa wanta, y el a sostene mi.

Mi estadia den e prizon Bydgoszcz tawatin su banda bon. Einan mi por a comparti e berdad di Bijbel cu hende cu di otro manera nos lo no por a alcansa. Anto di berdad tawatin hopi oportunidad pa duna testimonio. Debi na e situacion deplorabel y hopi biaha desesperante di e prizoneronan, nan a habri nan horea y curason mesora pa tende e bon nobo.

Dos Cambio Importante

Poco despues cu mi a sali liber na 1952, mi a topa Nela, un ruman mohe pionero celoso. Prome e tawata traha pionero den e parti suit di Polonia. Despues el a bai traha den loke nos a yama un “panaderia”, pero cu en realidad tawata un luga secreto caminda tawata imprimi nos literatura. Esei tawata un trabou pisa, cu a rekeri pa keda alerta y cu un actitud di sacrificio propio. Nos a casa na 1954, y nos a sigui den sirbishi di tempo completo te ora cu nos yiu mohe, Lidia, a nace. E ora ei nos a dicidi cu pa mi por a sigui den e trabou biahero, Nela lo a stop cu su sirbishi di tempo completo, keda cas y cuida nos yiu mohe.

E mesun aña ei nos mester a tuma un otro decision importante. E rumannan a pidi mi pa sirbi como superintendente di districto den un area cu a abarca un tercera parti di Polonia. Nos a haci oracion tocante e asunto. Mi tawata sa cu ta hopi importante pa fortalece nos rumannan bou di prohibicion. Tawatin hopi aresto ta tuma luga, pues e rumannan tawatin un necesidad grandi di animacion spiritual. Cu e sosten di Nela, mi a acepta e asignacion. Yehova a yuda mi sirbi den e trabou aki pa 38 aña.

Na Encargo di e “Panaderianan”

Den e tempo ei, e superintendente di districto tawata responsabel pa e “panaderianan”, situa den luganan isola. Polis constantemente tawata nos tras, purbando pa descubri nos actividadnan di imprenta y sera nan. Algun biaha nan tawata logra, pero nunca nos tawata falta e cuminda spiritual necesario. Tawata bisto cu Yehova tawata percura pa nos.

Pa un persona haya e invitacion pa haci e  trabou pisa y peligroso di imprenta, e mester tawata leal, alerta, cu un actitud di sacrificio propio y obediente. Ta e cualidadnan ei a haci posibel cu un “panaderia” por a sigui funciona sin problema. Un otro cos dificil tawata pa haya un bon sitio pa haci e imprenta clandestino. Algun sitio a parce apropiado, pero e rumannan no tawata masha discreto. Na otro sitionan, e situacion tawata net contrario. Pero e rumannan tawata dispuesto pa haci sacrificio excepcional. Mi a echt aprecia tur e ruman hombernan y ruman mohenan cu kennan mi tawatin e privilegio di traha.

Defendiendo e Bon Nobo

Durante e añanan dificil ei, nos tawata ser acusa constantemente di ta participa den actividad ilegal y subversivo y hiba dilanti corte. Esaki tawata un problema pasobra nos no tawatin abogado pa defende nos. Algun abogado tawata comprensivo, pero mayoria di nan tawatin miedo di e publicidad y no kier a core e riesgo di haci e autoridadnan malcontento. Sinembargo, Yehova tawata conciente di nos necesidad, y na e debido tempo el a maneha asuntonan pa satisface esei.

Durante un interogacion, polisnan a maltrata Alojzy Prostak, un superintendente biahero di Kraków, asina pisa cu nan mester a hib’e hospital di prizon. Su posicion firme apesar di tortura mental y fisico a pone cu e otro presonan den e hospital a haya respet y admiracion p’e. Un di e presonan ei tawata un abogado cu yama Witold Lis-Olszewski, kende a keda impresiona pa e curashi di Ruman Prostak. El a papia varios biaha cu e ruman y a priminti: “Asina cu mi sali y mi tin mag di reanuda mi trabou, lo mi ta dispuesto pa defende Testigonan di Yehova.” E tawata meen loke el a bisa.

Sr. Olszewski tawatin su propio team di abogado, y nan determinacion pa cumpli cu nan promesa tawata realmente admirabel. Durante e tempo cu e oposicion tawata mas intenso, nan a defende e rumannan den rond di 30 caso pa luna, un pa dia! Como cu sr. Olszewski mester tawata bon informa tocante tur e casonan, mi a haya e asignacion di keda den contacto cu ne. Mi a traha cu ne durante shete aña den e decadanan di 1960 y 1970.

Durante e temporada ei mi a siña hopi tocante e trabou huridico. Hopi biaha mi a observa tratamento di e casonan, e comentarionan di e abogadonan—tanto positivo como negativo—e metodonan di defensa huridico y e testimonio di compañeronan cristian acusa. Tur esaki a resulta hopi util pa yuda nos rumannan, specialmente esnan cu nan a yama pa testifica, pa nan sa kico pa bisa y ki ora pa keda keto dilanti corte.

Ora cu un huicio tawata den progreso, sr. Olszewski hopi bes a keda drumi na cas di Testigonan di Yehova. Esaki no tawata pasobra e no por a paga un hotel, sino mas bien manera el a bisa un biaha: “Prome cu e huicio, mi kier haya un poco di boso spirito.” Debi na su yudansa, hopi huicio a termina na fabor di e rumannan. El a defende mi varios biaha, y nunca el a acepta ni un depchi di mi. Na un otro ocasion, el a nenga e pago di 30 caso. Dicon? E di: “Mi kier contribui maske ta un tiki cu boso obra.” Pero esei no tawata un montante chikito. E actividad di e team di sr. Olszewski no a scapa atencion di autoridadnan, pero esei toch no a desanim’e di yuda nos.

Ta dificil pa describi e excelente testimonio cu nos rumannan tawata duna durante e huicionan ei. Hopi ruman a bin corte pa observa e huicionan y pa fortalece e rumannan acusa. Durante e temporada cu tawatin e cantidad maximo di huicio, mi a conta te cu 30.000 apoyado asina den un solo aña. Esei sigur tawata un multitud grandi di Testigo!

Un Asignacion Nobo

Pa aña 1989 nan a kita e prohibicion riba nos obra. Tres aña despues e rumannan a traha un sucursal nobo y a dedic’e. Mi a haya e invitacion pa bin einan y traha hunto cu Servicio di Informacion di Hospital, un asignacion cu mi a acepta gustosamente. Nos tawata un team  di tres persona, y nos a sostene nos rumannan cu a confronta e cuestion di sanger y a yuda nan defende nan posicion, basa riba nan consenshi cristian.—Echonan 15:29.

Ami cu mi casa ta hopi gradicido pa e privilegio di por sirbi Yehova den e ministerio publico. Nela semper a apoya mi y anima mi. Semper mi ta masha gradicido cu ki ora cu mi tawata ocupa cu asignacionnan teocratico of cu mi a bai sera, nunca el a keha pasobra mi no tawata na cas. Den temponan dificil, e tawata consola otro hende en bes di cai den otro.

Por ehempel, na 1974, mi a keda aresta hunto cu otro superintendentenan biahero. Algun ruman cu a haya sa esei kier a informa mi casa na un manera suave. Ora nan a mir’e, nan a puntr’e: “Ruman Nela, bo ta prepara pa lo piyo?” Na prome instante, el a paralisa di miedo, pasobra el a kere cu mi a muri. Ora el a haya sa loke realmente a sosode, el a bisa alivia: “E ta na bida! Esaki no ta su prome biaha cu el a bai sera.” E rumannan a conta mi despues cu nan a keda hopi impresiona cu su actitud positivo.

Aunke nos tawatin algun experencia hopi doloroso den pasado, Yehova semper a recompensa nos ricamente pasobra nos a sigui su caminda. Nos ta contento cu nos yiu mohe, Lidia, y su casa, Alfred DeRusha, a resulta di ta un pareha cristian ehemplar. Nan a lanta nan yiu hombernan, Christopher cu Jonathan, pa ta sirbidonan dedica di Dios, locual ta haci nos mas contento ainda. Mi ruman homber, Ryszard, y mi ruman mohe, Urszula, tambe ta cristiannan fiel pa hopi aña.

Yehova nunca a bandona nos, y nos kier sigui sirbie di henter nos curason. Personalmente nos a experencia e berdad di e palabranan di Salmo 37:34: “Spera riba SEÑOR y sigui su caminda, y e lo halsa bo pa hereda e tera.” Nos ta anticipa e tempo ei cu henter nos curason.

[Plachi na pagina 17]

Na un asamblea teni den e hofi di un ruman na Kraków, 1964

[Plachi na pagina 18]

Ami cu mi casa, Nela, y nos yiu mohe, Lidia, 1968

[Plachi na pagina 20]

Hunto cu un mucha homber Testigo prome cu su operacion di curason sin uzo di sanger

[Plachi na pagina 20]

Ami cu Nela, 2002

[Plachi na pagina 20]

Ami cu dr. Wites, ciruhano principal di cirugia di curason pa mucha sin uzo di sanger, na un hospital di Katowice