Cristiannan Ta Refleha e Gloria di Yehova

“Bendiciona ta boso wowonan, pasobra nan ta mira; y boso horeanan, pasobra nan ta tende.”—MATEO 13:16.

1. Ki pregunta ta bin na nos mente debi na e manera cu e Israelitanan a reacciona riba Moises na Sero Sinai?

E ISRAELITANAN cu a reuni na Sero Sinai tawatin tur motibo pa hala serca Yehova. T’e a libra nan for di Egipto cu un man poderoso. El a percura pa nan necesidadnan, dunando nan cuminda y awa den desierto. Despues, el a duna nan victoria riba un ehersito Amalekita cu a ataca nan. (Exodo 14:26-31; 16:2–17:13) Ora cu e pueblo tawata campa den desierto dilanti di Sero Sinai, strena cu lamper a spanta nan asina tanto cu nan tawata tembla. Mas despues, nan a mira Moises baha for di Sero Sinai, y su cara tawata refleha e gloria di Yehova. Sinembargo, en bes di reacciona cu admiracion y aprecio, nan a hala leu. “Nan tawatin miedo di yega serca [Moises].” (Exodo 19:10-19; 34:30) Dicon nan tawatin miedo di mira un refleho di e gloria di Yehova, esun cu a haci asina tanto cos pa nan?

2. Dicon e Israelitanan lo tawatin miedo ora cu nan a mira e gloria di Dios cu Moises a refleha?

² Probablemente, e miedo di e Israelitanan na e ocasion aki pa un gran parti tawatin di aber cu loke a sosode mas prome. Yehova a disiplina nan ora cu nan deliberadamente a desobedec’e door di traha un bishe di oro. (Exodo 32:4, 35) Nan a siña for di  Yehova su disiplina y a apreci’e? No, mayoria di nan no. Na final di su bida Moises a menciona e incidente di e bishe di oro hunto cu otro ocasionnan cu e Israelitanan a desobedece Yehova. El a bisa e pueblo: “Boso a rebela contra e ordo di SEÑOR boso Dios; boso no a ker’e ni a scucha su bos. Boso tawata rebelde contra SEÑOR for di dia cu mi a conoce boso.”—Deuteronomio 9:15-24.

3. Ki ora Moises tawata tapa su cara?

³ Pero wak con Moises a reacciona riba e miedo cu e Israelitanan a demostra. E relato ta bisa: “Ora Moises a caba di papia cu nan, el a pone un velo dilanti di su cara. Ma ki ora cu Moises tawata bai dilanti di SEÑOR [den e tabernakel] pa papia cu ne, e tawata kita e velo te ora cu e tawata sali. Y ki ora cu e tawata sali y tawata papia cu e yiunan di Israel loke cu el a wordo ordena, e yiunan di Israel tawata mira cara di Moises, cu e cutis di Moises su cara tawata briya. Asina Moises tawata bolbe pone e velo dilanti di su cara te ora cu e tawata bai paden pa papia cu SEÑOR.” (Exodo 34:33-35) Dicon Moises tawata tapa su cara tin biaha? Kico nos por siña for di esaki? Contesta riba e preguntanan aki por yuda nos evalua nos propio relacion cu Yehova.

Oportunidadnan Perdi

4. Segun apostel Pablo, kico e echo cu Moises a bisti e velo a nifica?

⁴ Apostel Pablo a splica cu e echo cu Moises tawata bisti un velo tawatin di aber cu e mente y e condicion di curason di e Israelitanan mes. Pablo a skirbi: “E yiunan di Israel no por a fiha nan bista riba cara di Moises pa motibo di e gloria di su cara ... Nan mente a wordo endureci.” (2 Corintionan 3:7, 14) Ki un situacion tristo! E Israelitanan tawata Yehova su pueblo scohi, y e tawata kier pa nan hala serca dje. (Exodo 19:4-6) Sinembargo, nan no kier a fiha nan bista riba e refleho di e gloria di Dios. En bes di bira nan curason y nan mente na Yehova den debocion y amor, den un sentido nan a rechasa Yehova.

5, 6. (a) Ki paralelo tawatin entre e Hudiunan di prome siglo y e Israelitanan di tempo di Moises? (b) Ki contraste tawatin entre hende cu a scucha Hesus y esnan cu no a scuch’e?

⁵ Den e aspecto aki, nos ta haya un paralelo den e prome siglo di nos era. Pa tempo cu Pablo a comberti na cristianismo, e aliansa nobo a remplasa e aliansa di Lei y tawatin como mediado e Moises Mayor, Hesucristo. Tanto cu palabra como cu echo, Hesus a refleha e gloria di Yehova perfectamente. Relaciona cu Hesus resusita, Pablo a skirbi: “E ta e resplandor di [Dios] su gloria y e representacion exacto di su naturalesa.” (Hebreonan 1:3) Ki un oportunidad magnifico e Hudiunan tawatin! Nan por a scucha e palabranan di bida eterno serca e propio Yiu di Dios! Lamentablemente, mayoria di esnan cu Hesus a predica na dje no a scucha. Relaciona cu nan, Hesus a cita Yehova su profecia duna mediante Isaias: “Curason di e pueblo aki a bira insensitivo, y cu nan horea apenas nan ta tende, y nan a sera nan wowo, pa nan no mira cu nan wowo, y tende cu nan horea, y compronde cu nan curason y comberti, y ami cura nan.”—Mateo 13:15; Isaias 6:9, 10.

⁶ Tawatin un contraste skerpi entre e Hudiunan y e disipelnan di Hesus. El a bisa di su disipelnan: “Bendiciona ta boso wowonan, pasobra nan ta mira; y boso horeanan, pasobra nan ta tende.” (Mateo 13:16) Cristiannan berdadero ta anhela pa conoce Yehova y sirbie. Pa nan ta un placer pa cumpli cu su boluntad manera Bijbel ta describie. Como resultado, cristiannan ungi ta refleha e gloria di Yehova den nan ministerio di e aliansa nobo, y e otro carnenan tambe ta haci mescos.—2 Corintionan 3:6, 18, NW.

 Dicon e Bon Nobo Ta Tapa cu Velo

7. Dicon no ta un sorpresa cu mayoria hende ta rechasa e bon nobo?

⁷ Manera nos a mira, tanto den tempo di Hesus como den tempo di Moises, mayoria Israelita a rechasa e oportunidad unico cu tawatin nan dilanti. Ta mescos den nos tempo. Mayoria hende ta rechasa e bon nobo cu nos ta predica. Esaki no ta sorprende nos. Pablo a skirbi: “Si nos evangelio ta tapa cu velo, e ta tapa pa esnan cu ta bai perdi, den kende nan caso e dios di e mundo aki a ciega mente di esnan cu no ta kere.” (2 Corintionan 4:3, 4) Fuera di Satanas su esfuerso pa sconde e bon nobo, tin hopi hende cu nan mes ta tapa nan cara pasobra nan no kier mira.

8. Den ki manera hopi hende ta ciega door di ignorancia, y con nos por evita di ser afecta den e mesun manera?

⁸ Hopi hende su bista ta ciega door di ignorancia. Bijbel ta bisa cu e nacionnan ta “tapa cu scuridad den nan comprondemento, exclui di e bida di Dios pa motibo di e ignorancia cu ta den nan.” (Efesionan 4:18) Pablo tawata un homber versa den e Lei, pero prome cu el a bira un cristian, e tawata asina ciega door di ignorancia cu el a persigui e congregacion di Dios. (1 Corintionan 15:9) Sinembargo, Yehova a revela e berdad na dje. Pablo a splica: “Ta hustamente pa e motibo aki mi a haya misericordia, pa asina den mi, como esun di prome, Hesucristo por a demostra su pasenshi perfecto, como un ehempel pa esnan cu lo a kere den dje pa bida eterno.” (1 Timoteo 1:16) Mescos cu Pablo, tin hopi hende cu un tempo tawata opone e berdad di Dios pero cu awor ta sirbi Dios. Esaki ta un bon motibo pa nos sigui duna testimonio asta na hende cu ta opone nos. Mientrastanto, door di sigui studia e Palabra di Dios cu regularidad y capta su sentido, nos por evita di haci cosnan robes debi na ignorancia, cosnan cu ta trece Yehova su desaprobacion.

9, 10. (a) Con e Hudiunan di prome siglo a demostra cu nan no tawata kier siña y cu nan puntonan di bista tawata inflexibel? (b) Tin un paralelo di esaki den cristiandad awe? Splica.

⁹ Hopi hende no por compronde asuntonan spiritual claramente pasobra nan no kier siña y nan tin puntonan di bista inflexibel. Hopi Hudiu a rechasa Hesus y su siñansanan pasobra nan a pega di un manera cabesura na e Lei di Moises. Claro cu tawatin excepcion. Por ehempel, despues cu Hesus a resusita, “un cantidad grandi di e sacerdotenan tawata bira obedecido na e fe.” (Echonan 6:7) Sinembargo, relaciona cu mayoria di e Hudiunan, Pablo a skirbi: “Te dia djawe, ki ora cu Moises wordo lesa, tin un velo riba nan curason.” (2 Corintionan 3:15) Probablemente Pablo tawata sa loke Hesus a bisa anteriormente na e lidernan religioso Hudiu: “Boso ta scudriña e Scrituranan,  pasobra boso ta kere cu ta den nan boso tin bida eterno; y ta esakinan ta duna testimonio di mi.” (Huan 5:39) E Scrituranan cu nan tawata analisa asina cuidadosamente lo mester a yuda nan ripara cu Hesus tawata e Mesias. Sinembargo, e Hudiunan tawatin nan propio ideanan, y ni sikiera e Yiu di Dios y e milagernan cu el a haci no por a combence nan pa pensa otro manera.

¹⁰ Esaki tambe ta e caso cu hopi hende den cristiandad awe. Mescos cu e Hudiunan di prome siglo, “nan tin un celo pa Dios, ma no segun conocemento.” (Romanonan 10:2) Aunke algun di nan ta studia Bijbel, nan no kier kere loke e ta bisa. Nan ta nenga di acepta cu Yehova ta siña su pueblo mediante su esclabo fiel y prudente di cristiannan ungi. (Mateo 24:45) Pero nos si ta compronde cu ta Yehova ta siñando su pueblo y cu e comprondemento di Dios su berdad semper tawata na un manera progresivo. (Proverbionan 4:18) Door di permiti Yehova siña nos, nos ta ser bendiciona cu e conocemento di su boluntad y proposito.

11. Ki papel e actitud di kere loke bo tin gana di kere a hunga den sconde e berdad?

¹¹ Otro hende ta ciega pasobra nan ta kere solamente loke nan tin gana di kere. Bijbel a profetisa cu algun hende lo haci bofon di e pueblo di Dios y di e mensahe cu nan ta proclama relaciona cu Hesus su presencia. Apostel Pedro a skirbi: “Di nan mes boluntad nan no kier acepta e echo aki”, esta, cu Dios a trece un diluvio riba e mundo den tempo di Noe. (2 Pedro 3:3-6) Di manera similar, hopi hende cu ta afirma di ta cristian ta reconoce mesora cu Yehova ta mustra misericordia, bondad y cu e ta pordona; sinembargo nan ta ignora of rechasa e echo cu Dios no ta laga di castiga e culpabel. (Exodo 34:6, 7) Cristiannan berdadero ta haci esfuerso sinsero pa compronde kico Bijbel ta siña realmente.

12. Con hende a ser ciega door di tradicion?

¹² Hopi baido di misa ta ciega door di tradicion. Hesus a bisa lidernan religioso den su tempo: “Boso a haci e palabra di Dios bira inefectivo pa causa di boso tradicion.” (Mateo 15:6) Cu celo e Hudiunan a restaura adoracion puro despues cu nan a regresa for di exilio na Babilonia, sinembargo e sacerdotenan si a bira orguyoso y husto den nan mes bista. Fiestanan religioso a bira puro formalidad, sin ningun berdadero respet pa Dios. (Malakias 1:6-8) Pa tempo di Hesus, e escriba- y farizeonan a agrega cantidad di tradicion na e Lei di Moises. Hesus a desenmascara e hombernan ei como hipocrita pasobra nan a perde for di bista e principionan husto riba cua e Lei tawata basa. (Mateo 23:23, 24) Cristiannan berdadero tin cu tene cuidou pa nan no laga tradicionnan religioso cu hende a bin cu ne desvia nan for di adoracion puro.

“Mira Esun Cu Ta Invisibel”

13. Menciona dos manera cu Moises a mira un parti di e gloria di Dios.

¹³ Moises a pidi pa mira e gloria di Dios ora e tawata riba e sero, y el a mira e resplandor cu a keda atras despues cu Yehova su gloria a pasa. Ora cu e tawata bai den e tabernakel e no tawata bisti velo. Moises tawata un homber di fe profundo cu tawatin e deseo di haci e boluntad di Dios. Aunke el a haya e privilegio di mira un parti di Yehova su gloria den vision, ya prome cu esei caba el a  mira Dios den un sentido, esta, cu wowo di fe. Bijbel ta bisa cu Moises “a keda firme, como si fuera e tawata mira Esun cu ta invisibel.” (Hebreonan 11:27; Exodo 34:5-7) Anto el a refleha e gloria di Dios no simplemente mediante e briyo cu pa un tempo tawata sali di su cara sino tambe mediante su esfuersonan pa yuda e Israelitanan siña conoce Yehova y sirbie.

14. Con Hesus a mira e gloria di Dios, y kico tawata un goso p’e?

¹⁴ Den shelo, Hesus a mira e gloria di Dios directamente pa masha hopi tempo, asta prome cu creacion di universo. (Proverbionan 8:22, 30) Durante tur e tempo ei Yehova Dios y Hesus a desaroya un amor y cariño profundo pa otro. Yehova Dios a expresa e amor y cariño di mas tierno pa e primogenito aki di tur creacion. Hesus na su turno tambe a expresa su amor y cariño profundo pa Dios, kende ta Esun cu a dun’e bida. (Huan 14:31; 17:24) Nan amor di Tata cu Yiu tawata un amor perfecto. Mescos cu den caso di Moises, pa Hesus tawata un goso di por a refleha e gloria di Yehova den e cosnan cu el a siña hende.

15. Den ki manera cristiannan ta mira e gloria di Dios?

¹⁵ Mescos cu Moises y Hesus, Dios su Testigonan di tempo actual riba tera ta ansioso pa mira e gloria di Yehova. Nan no a rechasa e glorioso bon nobo. Apostel Pablo a skirbi: “Ki ora cu un hende comberti na Señor [pa haci su boluntad] e velo ta wordo kita.” (2 Corintionan 3:16) Nos ta studia e Scritura pasobra nos kier haci Dios su boluntad. Nos ta admira e gloria cu e cara di Hesucristo, Yehova su Yiu y Rei ungi, ta refleha, y nos ta imita su ehempel. Mescos cu Moises y mescos cu Hesus, nos ta bendiciona cu un ministerio, esta, esun di siña otro hende tocante e Dios glorioso cu nos ta adora.

16. Dicon nos ta bendiciona cu nos conoce e berdad?

¹⁶ Hesus a bisa den oracion: “Mi ta alaba bo, o Tata, ... cu bo a sconde e cosnan aki pa sabinan y inteligentenan y a revela nan na mucha chikito.” (Mateo 11:25) Yehova ta laga hende sinsero y humilde di curason siña compronde su propositonan y personalidad. (1 Corintionan 1:26-28) Nos a bin bou di su cuido protectivo, y e ta siña nos pa  beneficia nos mes, pa saca lo miho for di bida. Laga nos probecha di tur oportunidad pa hala serca di Yehova, mustrando aprecio pa e tantisimo provisionnan cu el a percura pa nos siña conoc’e mas intimamente.

17. Con nos por siña conoce Yehova su cualidadnan mas plenamente?

¹⁷ Pablo a skirbi na cristiannan ungi: “Nos cu cara sin velo ta refleha manera spiel e gloria di Yehova [y] ta ser transforma na e mesun imagen di gloria pa gloria.” (2 Corintionan 3:18, NW) Sea cu nos tin e speransa celestial of terenal, mas nos siña conoce Yehova—su cualidadnan y personalidad manera Bijbel ta describi nan—mas nos ta bira mescos cu ne. Si nos medita cu aprecio riba e bida, e ministerio y e siñansanan di Hesucristo, nos lo refleha Yehova su cualidadnan mas plenamente. Ta un gran goso pa sa cu door di haci esei nos por trece alabansa pa nos Dios, kende su gloria nos ta purba di refleha!

Bo Ta Corda?

• Dicon e Israelitanan tawatin miedo di mira e gloria di Dios cu Moises a refleha?

• Den ki maneranan e bon nobo tawata “tapa cu velo” den prome siglo? den nos tempo?

• Con nos ta refleha e gloria di Dios?

[Preguntanan di Estudio]

[Plachi na pagina 19]

E Israelitanan no por a fiha nan bista riba cara di Moises

[Plachinan na pagina 21]

Mescos cu Pablo, tin hopi hende cu un tempo tawata opone Dios su berdad pero cu awor ta sirbi Dios

[Plachinan na pagina 23]

Yehova su sirbidonan ta contento di por refleha Dios su gloria