Morto Su Efecto Devastador

“MUCHA DI SEIS AÑA TA COMETE SUICIDIO.” E titular impactante aki a referi na e morto tragico di un mucha mohe cu yama Jackie. Su mama a caba di muri di un malesa incurabel. Prome cu Jackie a bula dilanti di un trein, el a bisa su rumannan cu e kier a ‘bira un angel pa e ta hunto cu su mama.’

Ian tawatin 18 aña ora el a roga su pasto pa splic’e pakico Ian su tata a muri di cancer. E pasto a bis’e cu door cu su tata tawata un bon hende, Dios tawata kier pa e ta den shelo. Despues cu Ian a tende e splicacion ei, el a dicidi cu e no kier a conoce un Dios cruel asina. Pa Ian, bida no tawatin mucho sentido mas, y el a dicidi di cuminsa core tras di placer. Pesei el a cuminsa bebe, uza droga y hiba un bida inmoral. Asina su bida a cuminsa bai for di control.

“E Bibonan Sa Cu Nan Lo Muri”

E dos incidentenan lamentabel aki ta ilustra con devastador morto por ta, specialmente ora e presenta onverwacht. Anto toch tur hende ta conciente di e echo aki cu Bijbel ta declara: “E bibonan sa cu nan lo muri.” (Eclesiastes 9:5) Pero hopi ta prefera di ignora e realidad cruel ei. Kico di abo? Bida ta exigi asina tanto tempo y atencion di nos cu kisas nos no kier pensa mes cu algun dia—aparentemente leu den futuro—nos tin cu muri.

The World Book Encyclopedia ta bisa cu “mayoria hende tin miedo di muri y ta purba evita di pensa riba dje.” Sinembargo, un accidente serio of un enfermedad peligroso por confronta nos diripiente cu e realidad di morto. Of talbes e entiero di un amigo of un famia ta recorda nos amargamente di loke ta warda tur hende.

Toch, den tur e tristesa cu tin na un entiero, hopi bes bo ta tende hende bisa: “Bida mester sigui.” Y esei ta berdad. Bida ta parce di pasa bai asina rapido cu masha lihe hende ta cuminsa experencia e problemanan relaciona cu biehes. Na e haltura ei, morto no ta un cos di leu den futuro mas. A yega e tempo pa asisti na demasiado entiero y sufri e perdida di hopi amigo bieu. Pa hopi hende di edad, e pregunta inkietante cu ta pasa den nan mente ta: “Ki dia ta mi beurt?”

E Gran Pregunta

Aunke ni un hende no ta nenga cu morto ta algo sigur, ta keda si un pregunta grandi encuanto kico ta pasa despues di morto. E tantisimo splicacionnan contradictorio por pone hende cu tin nan dudanan mira henter e asunto como un debate sin sentido tocante loke ta desconoci. E persona realista por conclui cu siendo cu “ta un biaha so bo ta biba”, bo tin cu disfruta di e bon cosnan di bida mas tanto posibel.

 Di otro banda, tin hende ta nenga di kere cu morto ta fin di tur cos. Sinembargo, nan no tin un idea cla encuanto kico ta bini despues. Algun ta asumi cu bida lo sigui den un luga di felicidad eterno, mientras cu otronan ta pensa cu algun dia nan lo bolbe biba, talbes como un persona distinto.

Casi semper e famianan cu keda atras ta puntra nan mes: “Unda e mortonan ta?” Hopi aña pasa, miembronan di un team di futbol tawata riba caminda pa un evento deportivo ora cu diripiente un truck a bin dal den nan minibus y pone e bus bolter baha for di caminda. Cinco miembro di e team a muri. For di e dia di e accidente aki, e mama di un di e victimanan ei casi no por a hiba un bida normal mas. El a keda puntra su mes unda su yiu ta. E tawata bai regularmente na graf di su yiu pa papia cu ne oranan largo na bos halto. El a lamenta: “Mi no por caba di kere cu no tin nada despues di morto, pero mi no ta sigur.”

Ta bon cla anto cu e manera cu nos ta mira morto tin su efecto riba nos bida awor. En bista di e manera cu hende ta reacciona riba e tragedia di morto, ta surgi varios pregunta. Pensa con lo bo contesta nan. Nos mester djis lubida riba morto y consentra riba bida? Nos mester laga e realidad di cu algun dia nos lo muri stroba nos di disfruta di bida? E famianan cu a keda atras semper tin cu keda puntra nan mes unda nan ser keri cu a muri ta? Morto tin cu keda un misterio?