‘Morto Ta Traga pa Semper’

IMAGINA cu bo ta lesa un corant cu e titular ariba menciona, en bes di lesa tocante un mucha mohe chikito cu a mata curpa. Claro cu ningun corant por a yega di haci un declaracion asina. Pero e palabranan ariba menciona si ta aparece den un buki cu ta miles di aña bieu, esta, Bijbel.

E Scritura ta splica bon cla kico ta morto. Ademas, Bijbel ta revela no solamente pakico nos ta muri sino e ta splica tambe den ki condicion e mortonan ta y ta ofrece speransa pa nos sernan keri cu a muri. Finalmente, e ta papia di un tempo glorioso ora lo ta posibel pa duna e informe: ‘Morto ta traga pa semper.’—Isaias 25:8; 1 Corintionan 15:54.

Bijbel ta uza palabra cla, no misterioso, pa splica kico ta morto. Por ehempel, na varios ocasion e ta compara morto cu “soño”, y e ta describi hende morto como si fuera nan ta ‘drumi den morto.’ (Salmo 13:3; Huan 11:11-14) Morto ta ser identifica tambe como un “enemigo.” (1 Corintionan 15:26) Mas importante ainda, Bijbel ta yuda nos compronde pakico morto ta manera un soño, dicon hende ta muri y con e enemigo aki lo ser derota finalmente.

Pakico Nos Ta Muri?

E prome buki di Bijbel ta conta con Dios a traha e prome homber Adam y a pon’e den un paradijs cu a bira su hogar. (Genesis 2:7, 15) For di ora Adam a cuminsa biba, Dios a dun’e algun trabou, y tambe un prohibicion stricto. Relaciona cu un cierto palo den e hofi di  Eden, Dios a bis’e: “No come [di dje] pasobra e dia cu bo come di dje, lo bo muri sigur.” * (Genesis 2:17) Pues, Adam a compronde cu morto no tawata algo inevitabel. Morto tawata un consecuencia directo di violacion di un lei di Dios.

Lamentablemente, Adam cu su esposa Eva a desobedece Dios. Nan a scohe pa ignora e boluntad di nan Creador, y nan a sufri e consecuencianan. Ora Dios a informa nan di e resultado di nan pica, el a bisa: “Stof bo ta, y na stof lo bo bolbe.” (Genesis 3:19) Nan a haya un defecto grandi—imperfeccion. Nan imperfeccion, of estado di pica, lo a hiba na nan morto.

E defecto aki—pica—a ser pasa tambe pa Adam cu Eva su yiunan, henter e rasa humano. Den un sentido, e tawata manera un enfermedad hereditario. Adam a perde no solamente e oportunidad di hiba un bida liber di e castigo di morto, sino tambe el a pasa imperfeccion pa su yiunan. E famia humano a bira esclabo di pica. Bijbel ta declara: “Pesei, mescos cu door di un hende pica a drenta den mundo, y morto door di pica, y asina morto a pasa pa tur hende, pasobra tur a peca.”—Romanonan 5:12.

“Pica A Drenta den Mundo”

E defecto hereditario aki, of pica, no ta algo cu nos por mira bou di un microscop. “Pica” ta referi na un deficiencia moral y spiritual cu nos prome mayornan a pasa pa nos, y e tin su consecuencianan fisico. Sinembargo, Bijbel ta revela cu Dios a percura un solucion. Apostel Pablo a splica: “Pago di pica ta morto, ma e don di gracia di Dios ta bida eterno den Cristo Hesus, nos Señor.” (Romanonan 6:23) Den su prome carta na e Corintionan, Pablo a agrega un garantia cu el a considera hopi importante: “Mescos cu den Adam tur ta muri, asina tambe tur lo wordo haci bibo den Cristo.”—1 Corintionan 15:22.

Ta obvio anto cu Hesucristo ta hunga un papel importante den eliminacion di pica y morto. El a bisa cu el a bini na tera “pa duna su bida como prijs di rescate pa hopi.” (Mateo 20:28) E situacion ta comparabel cu un secuestro, den cua e persona secuestra por haya su libertad solamente a cambio di un suma di placa. Den e caso aki, e rescate cu por libra nos di pica y morto ta Hesus su bida humano perfecto. *—Echonan 10:39-43.

Pa percura e rescate, Dios a manda Hesus na tera pa sacrifica su bida. “Dios a stima mundo asina tanto, cu el a duna su Yiu unigenito, pa ken cu kere den dje ... tin bida eterno.” (Huan 3:16) Prome cu Cristo a entrega su bida como un sacrificio, el a “duna testimonio di e berdad.” (Huan 18:37) Y durante su ministerio publico, el a probecha di cierto ocasionnan pa revela e berdad tocante morto.

“E Mucha Mohe ... Ta na Soño”

Tempo cu Hesus tawata riba tera, e tawata sa kico ta morto. El a sinti e tristesa di mira hende rond di dje muri, y e tawata plenamente conciente cu e mes lo a muri un morto  prematuro. (Mateo 17:22, 23) Aparentemente, algun luna prome cu Hesus a ser ehecuta, su amigo intimo, Lazaro, a muri. E suseso ei ta yuda nos compronde con Hesus a mira morto.

Un poco despues cu Hesus a ricibi e noticia di morto di Lazaro, el a bisa: “Nos amigo Lazaro a pega soño, ma mi ta bai pa mi lant’e for di soño.” E disipelnan a asumi cu si Lazaro a pega soño, lo e bira bon. Pesei Hesus a bisa nan francamente: “Lazaro a muri.” (Huan 11:11-14) Obviamente, Hesus a mira morto manera un soño. Kisas ta dificil pa nos compronde kico ta morto, pero nos sa si kico ta un soño. Durante un bon sosiego di anochi, nos no ta conciente mes cu tempo ta pasa ni kico ta sosode rond di nos pasobra nos ta temporalmente inconciente. Esei ta exactamente e manera cu Bijbel ta splica e condicion di morto. Eclesiastes 9:5 ta bisa: “E mortonan no sa nada.”

Un otro motibo pakico Hesus a compara morto cu un soño ta pasobra cu poder di Dios un hende por lanta for di morto. Na un ocasion, Hesus a bishita cas di un famia afligi pa motibo cu nan yiu mohe chikito a caba di fayece. Hesus a bisa: “E mucha mohe no a muri, ma ta na soño e ta.” E ora ei el a acerca e mucha mohe morto y coh’e na su man y e mucha “a lanta.” Cu otro palabra, el a lanta for di morto.—Mateo 9:24, 25.

Hesus a lanta su amigo Lazaro tambe for di morto. Pero prome cu el a haci e milager ei, el a consola Marta, ruman mohe di Lazaro, door di bis’e: “Bo ruman homber lo lanta.” Marta a contesta yen di confiansa: “Mi sa cu e lo lanta den e resureccion riba e ultimo dia.” (Huan 11:23, 24) Evidentemente e tawatin e speransa cu algun dia tur sirbido di Dios lo ser resusita.

Kico resureccion ta encera exactamente? E palabra Griego pa “resureccion” (a·ná·sta·sis) kiermen literalmente “lanta para.” E ta nifica lanta for di morto. Kisas e ta zona increibel pa algun hende, pero despues cu Hesus a bisa cu e mortonan lo tende su bos, e di: “No straña boso di esaki.” (Huan 5:28) E resureccionnan cu Hesus mes a haci riba tera ta duna nos confiansa den e promesa di Bijbel cu e mortonan cu ta den memoria di Dios lo lanta for di nan “soño” largo. Revelacion 20:13 ta profetisa: “Lama a entrega e mortonan cu tawata den dje, y morto y Hades [graf comun di humanidad] a entrega e mortonan cu tawata den nan.”

E mortonan aki lo ser resusita bek na bida pa despues bira bieu y muri atrobe, mescos cu Lazaro? No, esei no ta e proposito di Dios. Bijbel ta sigura nos cu lo yega e dia cu “lo no tin morto mas”, pues ningun hende lo no bira bieu y despues muri.—Revelacion 21:4.

Morto ta un enemigo. Hende tin hopi otro enemigo comun, manera enfermedad y biehes, cuanan tambe ta causa hopi sufrimento. Dios ta priminti di caba cu nan tur, pa finalmente dicta sentencia riba e enemigo di mas grandi di humanidad. “E delaster enemigo cu lo wordo destrui ta morto.”—1 Corintionan 15:26.

Cu e promesa ei cumpli, hende lo disfruta di salud perfecto, sin e mancha di pica y morto.  Mientrastanto, nos por haya consuelo den e conocemento cu nos sernan keri cu aworaki ta morto ta descansando, y si nan ta den e memoria di Dios, na su debido tempo nan lo haya nan resureccion.

Un Comprondemento di Kico Ta Morto Ta Yuda Nos Haya Proposito den Bida

Un comprondemento cla di kico ta morto y di e speransa cu tin pa e mortonan por cambia nos punto di bista di bida. Ian, menciona den e articulo anterior, tawatin 20 y pico aña dia el a haya e splicacion di Bijbel tocante morto. El a bisa: “Semper mi tawatin un speransa leu aya cu mi tata ta un caminda. Pues ora mi a haya sa cu e ta simplemente drumi den morto, na prome instante mi a sinti mi masha tristo.” Sinembargo, ora Ian a lesa di Dios su promesa pa resusita e mortonan, el a keda hopi contento di sa cu e por a mira su tata atrobe. E ta corda: “Pa prome biaha den mi bida, mi a sinti un pas.” Un comprondemento corecto di morto a dun’e un pas mental cu a calma su spirito.

Clive y Brenda a perde nan yiu homber, Steven, di 21 aña den e accidente fatal menciona den e articulo anterior. Aunke nan tawata sa kico Bijbel ta bisa tocante morto, toch e morto repentino di nan yiu a laga nan cu un curason kibra. Al fin y al cabo, morto ta un enemigo, y su pui ta doloroso. Nan conocemento di Bijbel tocante e condicion di e mortonan gradualmente a calma nan dolor. Brenda a bisa: “Nos comprondemento di kico ta morto a permiti nos reanuda nos actividadnan normal di bida cu pas mental. Claro cu no ta pasa un dia cu nos no ta pensa riba e dia cu Steven lo lanta for di su soño profundo.”

“Morto, Unda Bo Pui Ta?”

Claramente, awor cu nos ta compronde den ki condicion e mortonan ta, nos por tin un punto di bista balansa di bida. Morto no mester ta un misterio. Nos por disfruta di bida sin tin nodi tene un miedo insaludabel cu e enemigo aki ta na caminda. Y e echo cu nos sa cu morto no necesariamente ta caba cu nos bida pa semper ta elimina cualkier antoho pa hiba un bida di placer, cu e pensamento cu “bida ta mucho cortico.” E echo cu nos sa tambe cu nos defuntonan stima cu ta den e memoria di Dios ta drumi den morto, sperando un resureccion, por duna nos consuelo y rebiba nos deseo pa sigui biba.

Si, nos por wak futuro cu e confiansa cu Yehova Dios, e Dunador di bida, algun dia lo dera morto pa semper. Lo ta un gran bendicion ora nos tin bon motibo pa puntra: “O morto, unda bo victoria ta? O morto, unda bo pui ta?”—1 Corintionan 15:55.

[Nota]

[Plachi na pagina 5]

E desobediencia di Adam cu Eva a hiba na morto

[Plachi na pagina 6]

Hesus a cohe man di e mucha mohe morto, y el a lanta

[Plachi na pagina 7]

Hopi hende ta warda riba e dia ora nan sernan keri cu a muri lo lanta for di soño, mescos cu Lazaro