“Nan Por A Sali Liber Mesora”

GENEVIÈVE DE GAULLE, un subrina di Charles de Gaulle, expresidente di Francia, a conoce Testigonan di Yehova personalmente den e campo di consentracion nazi na Ravensbrück, nort Alemania. El a skirbi e palabranan menciona ariba den un carta na augustus 1945.

E presonan di e campo di consentracion na Auschwitz, Polonia, a ser libera dia 27 di januari 1945. Desde 1996, tur aña nan ta conmemora riba e fecha aki e victimanan di Hitler su Tercer Reich.

Durante un discurso oficial di conmemoracion dia 27 di januari 2003, presidente di e Parlamento di Estado di Baden-Württemberg, Peter Straub, a comenta: “Tur e personanan cu a sufri persecucion pa motibo di nan creencianan religioso of politico y cu a prefera di muri en bes di somete nan mes [na e regimen nazi] ta merece nos gran respet, un respet cu ta dificil pa describi. Testigonan di Yehova tawata e unico religion cu a nenga completamente di cede na e exigencianan di e regimen di Hitler: Nan no a hisa man pa haci e saludo di Hitler. Nan a nenga di hura lealtad na ‘Führer y Estado’, mescos cu nan a nenga di cumpli cu servicio militar y di labor. Y nan yiunan no a join e Movemento Hubenil di Hitler.”

Hesucristo a bisa di su siguidonan: “Nan no ta [parti] di mundo, mescos cu ami no ta [parti] di mundo.” (Huan 17:16) Pesei, e posicion di Testigonan di Yehova tawata basa puramente riba motibonan religioso. Straub a continua: “Testigonan di Yehova, kendenan tawatin cu bisti un triangulo biña riba nan paña como preso di campo di consentracion, tawata e uniconan cu por a pone fin na nan martirio. Tur loke nan tawatin cu haci ta djis firma un declaracion den cua nan ta nenga nan fe.”

E gran mayoria di Testigonan no a pensa mes riba e posibilidad di nenga nan fe. Pa motibo di esei, mas o menos 1.200 di nan a muri durante e periodo nazi. Dosshentisetenta a ser ehecuta pa motibo di nan principionan. No ta cu boca so nan a cumpli cu e palabranan: “Nos mester obedece Dios mas cu hende.”—Echonan 5:29.

Manera presidente di e Parlamento di Estado di Noordrijn-Westfalen, Ulrich Schmidt, a bisa, Testigonan di Yehova no tawata un grupo di hende extraordinario. Referiendo na su discurso, e foyeto Landtag Intern a yama nan “hende comun y coriente cu, siguiendo nan consenshi, a para firme pa nan creencianan religioso, a demostra curashi como ciudadano y a opone e ideologia [nazi] pa motibo di nan conviccion cristian.” Nos por ta sigur cu tur esnan cu ta pega lealmente na Yehova Dios bou di circunstancianan dificil ta alegra su curason. Proverbionan 27:11 ta bisa: “Sea sabi, mi yiu, y haci mi curason contento, pa mi por contesta esun cu reprocha mi.”

[Reconocemento pa Portret na pagina 30]

Pa cortesia di United States Holocaust Memorial Museum