Pregunta di Lector

Den antiguo Israel, kico e lus milagroso cu tin biaha nan tawata yama Shekina y cu a aparece den e Santisimo di e tabernakel y e tempel a nifica?

Yehova, e Tata amoroso y Protector di su pueblo, a manifesta su presencia notablemente den Israel. Un manera cu el a haci esei tawata pa medio di un nubia resplandeciente cu tawata hopi liga cu su luga di adoracion.

E lus extraordinario ei a representa Yehova su presencia invisibel. El a aparece den e Santisimo di tanto e tabernakel como di e tempel cu Salomon a traha. No ta asina si cu e lus milagroso ei a nifica cu Yehova tawata fisicamente presente einan. Ningun edificio cu hende traha por contene e Creador. (2 Cronicanan 6:18; Echonan 17:24) E resplandor sobrenatural aki den e santuario di Dios por a duna e sumo sacerdote—y mediante dje tur e Israelitanan—e confiansa cu Yehova su presencia a sirbi como un proteccion pa nan, y cu e lo a percura pa nan necesidadnan.

Despues di e periodo cu Bijbel a ser skirbi, nan a yama e lus aki Shekina (shekhi·náh) na Arameo, un palabra cu ta nifica “locual ta biba” of “e morada.” Bo no ta haya e expresion aki den Bijbel, pero si den e traduccionnan Arameo di e Scritura Hebreo, conoci tambe como e Targum.

Ora Yehova a duna Moises instruccion relaciona cu construccion di e tabernakel, el a bis’e: “Bo mester pone e propiciatorio [“tapa”, NW] riba e Arca, y pone e testimonio cu lo mi duna bo den e Arca. Y einan lo mi reuni cu bo, y for di ariba di e propiciatorio, for di meimei di e dos kerubinnan cu tin riba e arca di testimonio, lo mi papia cu bo.” (Exodo 25:21, 22) E Arca menciona tawata un caha cubri cu oro den e Santisimo. Tawatin dos kerubin di oro riba e tapa di e Arca.

For di unda Yehova lo a papia? El a duna e contesta ora el a bisa Moises: “Lo mi aparece den e nubia riba e propiciatorio [tapa].” (Levitico 16:2) E nubia aki tawata colga riba e Arca sagrado entre e dos kerubinnan di oro. Bijbel no ta revela con halto e nubia ei tawata ni con halto riba e kerubinnan el a extende.

E nubia briyante aki a ilumina e Santisimo. De echo, e tawata e unico fuente di iluminacion den e compartimento ei. E sumo sacerdote por a probecha di e lus aki ora el a drenta e cuarto mas interior ei riba e Dia di Expiacion. Ei e tawata den e presencia di Yehova.

E lus milagroso aki tin un ke otro nificacion pa cristiannan? Apostel Huan a mira den un vision un stad den cua “lo no tin anochi.” E stad ei ta Herusalem Nobo, y e ta consisti di cristiannan ungi resusita pa goberna cu Hesus. E lus di e stad simbolico aki no ta bini di solo of luna. Ta e gloria di Yehova Dios ta ilumina e organisacion aki directamente, mescos cu e nubia di Shekina a ilumina e Santisimo. Ademas, e Lamchi, Hesucristo, ta e “lampi” di e stad. Y e “stad” aki, na su turno, ta manda su lus spiritual y aprobacion riba hende rescata for di tur nacion como un guia pa nan.—Revelacion 21:22-25.

Pa motibo cu Yehova su adoradonan ta ricibi bendicionnan abundante for di ariba, nan por ta sigur cu Yehova ta nan Wardador y Tata cariñoso.