Riba Lama di Galilea

UN RELATO registra na Marco 4:35-41 ta informa cu Hesus y su disipelnan a subi un boto pa crusa Lama di Galilea. Nos ta lesa: “A lanta un tempestad di biento fuerte, y e olanan tawata dal den e boto, di tal manera cu ya e boto a cuminsa yena. Y e [Hesus] tawata na soño riba e cusinchi patras den e boto.”

Esaki ta e unico caminda cu e palabra Griego pa “cusinchi” ta aparece den Bijbel. Pesei eruditonan no sa kico exactamente e palabra aki, manera e ta para einan, ta nifica. Mayoria Bijbel ta traducie como “cusinchi.” Pero ki tipo di cusinchi e tawata? E echo cu Marco a uza e articulo defini e (e cusinchi) ta indica cu e cusinchi tawata parti di e ekipo di e boto. Un boto descubri den cercania di Lama di Galilea na 1986 a revela un posibel manera cu nos por compronde e palabra Griego aki cu Marco a uza.

Investigacionnan ta mustra cu e boto di 26 pia tawata un boto di bela y di rema. Nan tawata pisca cu ne y riba su dek patras e tawatin un reda grandi y pisa. Nan ta calcula cu e restonan di e boto aki por ta di entre aña 100 prome cu nos era pa aña 70 di nos era y kisas ta representa e tipo di boto cu Hesus y su disipelnan a uza. Shelley Wachsmann, kende tawata envolvi den excavacion di e boto, a skirbi e buki The Sea of Galilee Boat—An Extraordinary 2000 Year Old Discovery (E Boto di Lama di Galilea—Un Descubrimento Extraordinario di 2000 Aña Bieu). Segun su teoria, e “cusinchi” cu Hesus a drumi ariba tawata un saco di santo cu a sirbi como balast. Un piscado di Jaffa cu ta experto den piscamento cu reda a bisa: “Tempo mi tawata jong, e botonan cu mi tawata traha ariba den Lama Mediteraneo semper tawatin un of dos saco di santo a bordo. . . . Nan tawata fungi como balast. Pero ora nos no tawata uza nan, nos tawata warda nan patras den e boto bou di e dek. Anto si un di nos tawata cansa, nos por a lastra bai bou di e dek, uza e saco di santo como un cusinchi y tira un cabes.”

Hopi erudito ta kere cu loke Marco kier a bisa ta cu Hesus a drumi riba un saco di santo di balast patras bou di e dek, e parti di e boto cu a brinda e miho proteccion durante un tormenta. Sea cual sea e forma cu e cusinchi ei tawatin exactamente, e punto mas importante ta loke a sosode despues di esei. Cu e respaldo y poder di Dios, Hesus a calma e lama bruto causa door di e tormenta. E disipelnan mes a puntra: “Ta ken esaki ta anto, cu asta biento y lama ta obedec’e?”