Cana cu Dios den e Tempo Turbulento Aki

“Enok a cana cu Dios, y e no tawat’ei mas, pasobra Dios a tum’e.”—GENESIS 5:24.

1. Menciona algun rasgo di nos tempo cu ta hacie trabahoso.

TEMPO turbulento! E expresion aki ta un bon descripcion di e añanan di intrankilidad y violencia cu humanidad ta pasando aden desde cu e Reino Mesianico a keda estableci na aña 1914. Durante tur e tempo aki, hende ta bibando den loke Bijbel ta yama e “ultimo dianan.” Calamidadnan manera hamber, malesa, temblor y guera a asota humanidad na un escala sin precedente. (2 Timoteo 3:1; Revelacion 6:1-8) E adoradonan di Yehova tambe a wordo afecta. Te na cierto grado, nos tur tin cu lucha cu e dificultadnan y incertidumbre di e mundo djawe. Presionnan economico, intrankilidad politico, criminalidad y malesa ta entre e cosnan cu ta haci bida hopi dificil.

2. Ki retonan sirbidonan di Yehova a confronta?

² Ademas, hopi sirbido di Yehova a soporta ola tras ola di persecucion intenso segun cu Satanas a sigui haci guera contra esnan cu ta “warda e mandamentonan di Dios y tin e [“trabou di duna”, NW] testimonio di Hesucristo.” (Revelacion 12:17) Y aunke ta berdad cu no ta nos tur a sufri persecucion severo directamente, tur cristian berdadero tin cu lucha contra Satanas e Diabel y e spirito cu e ta fomenta den humanidad. (Efesionan 2:2; 6:12) Nos mester ta constantemente alerta pa e spirito ei no influencia nos, ya cu nos ta top’e na trabou, na scol y na cualkier otro luga caminda nos ta den contacto estrecho cu personanan cu no tin ningun interes den adoracion puro.

Cana cu Dios, No cu e Paganonan

3, 4. Den ki manera cristiannan ta distinto for di mundo?

³ Si nos wak bek den prome siglo, e cristiannan tambe a lucha duro contra e spirito di e mundo aki, y esei a haci nan hopi distinto for  di e hendenan pafo di e congregacion cristian. Pablo a describi e diferencia ora el a skirbi: “Esaki mi ta bisa anto y ta afirma hunto cu Señor, pa boso no cana mas mescos cu e paganonan tambe ta cana, den e banidad di nan mente, siendo tapa cu scuridad den nan comprondemento, exclui di e bida di Dios pa motibo di e ignorancia cu ta den nan, pa motibo di e duresa di nan curason; y nan, perdiendo tur heful, a entrega nan mes na sensualidad pa, cu golosidad, nan practica tur clase di impuresa.”—Efesionan 4:17-19.

⁴ E palabranan ei ta splica bon cla e scuridad spiritual y moral profundo di e mundo aki, tanto den tempo di Pablo como den nos tempo. Mescos cu den prome siglo, cristiannan awe no ta sigui ‘cana manera e paganonan.’ Mas bien nan tin e maraviyoso privilegio di por cana cu Dios. Ta berdad cu algun persona kisas ta cuestiona si ta rasonabel pa bisa cu un simpel hende imperfecto por cana cu Yehova. Sinembargo, Bijbel ta mustra cu nan por. Ademas, Yehova ta spera esei di nan. Den siglo 8 prome cu nos era, profeta Mikeas a skirbi e siguiente palabranan inspira: “[Yehova] a bisa bo, o hende, loke ta bon; y kico SEÑOR ta exigi di bo, si no ta pa haci husticia, pa stima misericordia, y pa cana humildemente cu bo Dios?”—Mikeas 6:8.

Con y Pakico Nos Mester Cana cu Dios?

5. Con un hende imperfecto por cana cu Dios?

⁵ Con nos por cana cu e Dios todopoderoso y invisibel? Claro cu nos no por cana cu Yehova den e mesun sentido cu nos ta cana cu otro hende. Den Bijbel e expresion “cana” por nifica “sigui un cierto proceder.” * Cu esaki na mente, nos ta compronde cu un persona cu ta cana cu Dios ta sigui un rumbo di bida cu Dios a describi y cu ta agrada Dios. Un proceder asina ta haci nos distinto for di mayoria hende rond di nos. Sinembargo, esei ta e unico escohencia corecto pa un cristian. Dicon? Tin hopi motibo.

6, 7. Dicon cana cu Dios ta e mihor caminda pa sigui?

⁶ Na prome luga, Yehova ta nos Creador, e Fuente di nos bida, y Esun cu ta percura tur loke nos tin mester pa keda na bida. (Revelacion 4:11) Pues, ta e so tin derecho di bisa nos con pa cana. Ademas, cana cu Dios ta e estilo di bida di mas beneficioso cu nos por hiba. Yehova a haci provision pa esnan cu ta cana cu ne haya pordon pa nan picanan, y e ta ofrece nan e speransa di bida eterno. Tambe nos amoroso Tata celestial ta duna conseho sabi cu ta yuda esnan cu ta cana cu ne haci nan bida un exito for di awor, apesar cu nan ta imperfecto y ta biba den un mundo cu ta bou di control di Satanas. (Huan 3:16; 2 Timoteo 3:15, 16; 1 Huan 1:8; 2:25; 5:19) Un motibo mas pa cana cu Dios ta pasobra e echo cu nos ta dispuesto pa haci esei ta contribui na pas y unidad di e congregacion.—Colosensenan 3:15, 16.

⁷ Por ultimo, y mas importante, ora nos ta cana cu Dios, nos ta mustra na ki banda nos ta para relaciona cu e gran cuestion cu a lanta aya den e hofi di Eden, esta, e cuestion di soberania. (Genesis 3:1-6) Nos ta demostra na e bida cu nos ta hiba cu nos ta para totalmente na banda di Yehova, y sin miedo nos ta proclama cu ta e so ta e Soberano legitimo. (Salmo 83:18) Di e manera ei nos ta actua na harmonia cu nos oracion pa Dios su nomber sea santifica y pa su boluntad sosode. (Mateo 6:9, 10) Esta sabi esnan cu scohe pa cana cu Dios ta! Nan por tin sigur cu nan ta riba e bon caminda, pasobra Yehova ta e ‘unico sabi.’ E no ta faya nunca.—Romanonan 16:27.

8. Con e tempo di Enok y Noe tawata paresido na nos tempo?

⁸ Pero con ta posibel pa biba manera cristiannan lo mester biba ora cu e situacion den mundo ta asina turbulento y mayoria hende no ta interesa den sirbi Yehova? Nos ta haya e contesta ora nos considera hombernan fiel di  pasado cu a mantene nan integridad durante tempo masha dificil. Dos di nan tawata Enok cu Noe. Ambos a biba den tempo hopi paresido na nos tempo. Maldad tawata reina tur caminda. Den tempo di Noe e tera tawata yen di violencia y inmoralidad. Sinembargo, Enok cu Noe a resisti e spirito di e mundo di nan tempo y a cana cu Yehova. Con nan a logra haci esei? Pa contesta e pregunta ei nos lo trata den e articulo aki e ehempel di Enok. Den e siguiente articulo nos lo considera Noe.

Enok A Cana cu Dios den Tempo Turbulento

9. Ki informacion nos tin tocante Enok?

⁹ Enok tawata e prome persona cu segun e Scritura a cana cu Dios. Bijbel ta bisa: “Enok a cana 300 aña cu Dios despues cu el a engendra Matusalen.” (Genesis 5:22) Anto despues di menciona e largura di Enok su bida—cu na comparacion cu di nos tawata largo, pero cu pa e tempo ei tawata cortico—e registro ta bisa: “Enok a cana cu Dios, y e no tawat’ei mas, pasobra Dios a tum’e.” (Genesis 5:24) Evidentemente, Yehova a traslada Enok for di e mundo di hende bibo pa pon’e drumi den morto prome cu opositornan por a pone man riba dje. (Hebreonan 11:5, 13) Fuera di e versiculonan cortico ei, tin masha tiki referencia na Enok den Bijbel. No obstante, for di e informacion cu nos tin y for di otro indicacionnan, nos tin bon motibo pa bisa cu Enok su tempo tawata turbulento.

10, 11. (a) Con corupcion a plama despues di e rebelion di Adam cu Eva? (b) Ki mensahe profetico Enok a predica, y ki reaccion sigur el a topa cu ne?

¹⁰ Considera por ehempel con lihe corupcion a plama den e rasa humano despues cu Adam a peca. Bijbel ta conta nos cu Adam su yiu primogenito, Cain, a bira e prome hende asesino ora cu el a mata su ruman homber Abel. (Genesis 4:8-10) Despues di Abel su morto violento, Adam cu Eva a haya un otro yiu homber cu nan a yama Set. Nos ta lesa di dje: “Pa Set tambe a nace un yiu homber, y el a dun’e e nomber Enos. E ora ei hende a cuminsa invoca e nomber di SEÑOR.” (Genesis 4:25, 26) Lamentablemente, e manera di ‘invoca e nomber di Yehova’ tawata den un manera apostata. * Hopi aña despues cu Enos a nace,  un desendiente di Cain cu yama Lamek a compone un cantica pa su dos esposanan anunciando cu el a mata un mucha homber cu a herid’e. Tambe el a spierta: “Si Cain a wordo venga shete bes, anto Lamek setenta bes shete.”—Genesis 4:10, 19, 23, 24.

¹¹ E echonan breve ei cu a wordo menciona ta indica cu e corupcion cu Satanas a introduci den e hofi di Eden a pone maldad plama rapidamente entre e desendientenan di Adam. Den un mundo asina, Enok tawata un profeta di Yehova kende su palabranan poderoso y inspira ta resona te awe. Hudas ta informa cu Enok a profetisa: “Mira, Señor a bin cu hopi miles di su santonan, pa ehecuta huicio contra tur, y pa condena tur e hendenan impio [malbado] pa tur nan echonan di impiedad cu nan a comete den impiedad, y pa tur e cosnan duro cu pecadonan impio a papia contra dje.” (Hudas 14, 15) E palabranan ei lo haya nan cumplimento final na Armagedon. (Revelacion 16:14, 16) Pero nos por tin sigur cu asta den tempo di Enok tawatin hopi ‘pecado malbado’ cu a tende Enok su profecia cu disgusto. Tawata masha amoroso di Yehova su parti cu el a kita e profeta for di nan alcanse!

Kico A Fortalece Enok pa Cana cu Dios?

12. Kico a haci Enok distinto for di e hendenan di su tempo?

¹² Aya den e hofi di Eden, Adam cu Eva a scucha Satanas, y Adam a rebela contra Yehova. (Genesis 3:1-6) Nan yiu Abel a sigui un caminda diferente, y Yehova su aprobacion tawata riba dje. (Genesis 4:3, 4) Desafortunadamente, mayoria di Adam su desendientenan no tawata manera Abel. Sinembargo, Enok cu a nace cientos di aña despues si tawata asina. Kico tawata e diferencia entre Enok y mayoria di e otro desendientenan di Adam? Apostel Pablo a contesta e pregunta ei ora el a skirbi: “Pa medio di fe Enok a wordo traslada pa e no mira morto; y e no a wordo haya, pasobra Dios a traslad’e; pasobra el a obtene e testimonio cu prome cu el a wordo traslada, e tawata agrada Dios.” (Hebreonan 11:5) Enok tawata parti di “un nubia asina grandi di testigonan [precristian]”, kendenan tawata ehempelnan excelente di fe. (Hebreonan 12:1) Ta fe a yuda Enok persevera y alabes mantene un conducta corecto durante un bida cu a pasa riba 300 aña, mas cu tres biaha e duracion di bida di mayoria di nos awe!

13. Ki clase di fe Enok tawatin?

¹³ Pablo a describi e fe di Enok y di otro testigonan ora cu el a skirbi: “Fe ta e siguransa di cosnan cu hende ta spera, e conviccion di cosnan cu hende no ta mira.” (Hebreonan 11:1) Si, fe ta spera cos cu conviccion, basa riba siguransa cu loke nos ta spera lo ser realisa. Nos speransa ta asina fuerte cu e ta influencia e loke nos ta considera como lo mas importante den bida. E clase di fe ei a capasita Enok pa cana cu Dios aunke e mundo rond di dje no a cana cu Dios.

14. Enok su fe lo por tawata basa riba ki conocemento exacto?

¹⁴ Fe berdadero ta basa riba conocemento exacto. Ki conocemento Enok tawatin? (Romanonan 10:14, 17; 1 Timoteo 2:4) Sin duda, e tawata sa tocante e susesonan den Eden. Probablemente el a tende tambe con bida tawata den e hofi di Eden, y kisas e hofi tawata existi ainda pero tawata prohibi pa hende drenta. (Genesis 3:23, 24) Y e tawata  sa di Dios su proposito pa e desendencia di Adam yena e tera y haci henter e planeta manera e Paradijs original. (Genesis 1:28) Ademas, Enok sigur a aprecia Yehova su promesa di produci un Simiña cu lo a machica Satanas su cabes y drecha tur e mal efectonan cu Satanas su engaño a causa. (Genesis 3:15) De echo, Enok su propio profecia inspira, conserva den e buki di Hudas, tin di aber cu e destruccion di e simiña di Satanas. Siendo cu Enok tawatin fe, nos sa cu el a adora Yehova como esun cu “ta recompensa esnan cu ta busc’e.” (Hebreonan 11:6) Pues, aunke Enok no tawatin tur e conocemento cu nos tin, e tawata sa suficiente pa forma e fundeshi di un fe firme. Cu un fe asina, el a mantene su integridad durante tempo turbulento.

Imita Enok Su Ehempel

15, 16. Con nos por sigui e ehempel di Enok?

¹⁵ Como cu mescos cu Enok, nos tambe kier agrada Yehova durante e tempo turbulento cu ta existi awe, nos ta haci bon di sigui Enok su ehempel. Nos tin cu adkiri conocemento exacto di Yehova y di su proposito y keda cu esei den nos mente. Pero nos mester haci mas. Nos mester laga e conocemento exacto ei dirigi nos rumbo. (Salmo 119:101; 2 Pedro 1:19) Nos mester laga Dios su manera di pensa guia nos, y semper haci esfuerso pa tur loke nos ta pensa y haci agrad’e.

¹⁶ Nos no tin ningun registro di ken mas den tempo di Enok tawata sirbi Yehova, pero claramente Enok tawata o sea e unico of parti di un minoria chikito. Nos tambe ta forma un minoria den mundo, pero esei no ta descurasha nos. Yehova lo sostene nos, sin importa ken por ta contra nos. (Romanonan 8:31) Cu curashi Enok a duna spiertamento tocante e benidero destruccion di hende malbado. Nos tambe tin curashi segun cu nos ta predica “e evangelio aki di e reino” apesar di bofon, oposicion y persecucion. (Mateo 24:14) Enok no a biba mes largo cu hopi di e hendenan di su tempo. No obstante, su speransa no tawata den e mundo ei. Su bista tawata fiha riba algo hopi mas magnifico. (Hebreonan 11:10, 35) Nos tambe tin nos bista fiha riba e cumplimento di Yehova su proposito. Pues, nos no ta haci uzo completo di e mundo aki. (1 Corintionan 7:31) Mas bien, nos ta uza nos fortalesa y recursonan principalmente den Yehova su sirbishi.

17. Ki conocemento nos tin cu Enok no tawatin, pues kico nos mester haci?

¹⁷ Enok tawatin fe cu e Simiña cu Dios a priminti lo a aparece na Yehova su debido tempo. Awor ta haci casi 2.000 aña cu e Simiña ei—Hesucristo—a aparece, provee e rescate y habri e caminda pa tanto nos como e testigonan fiel di pasado manera Enok por hereda bida eterno. E Simiña ei, cu awor ta entronisa como Rei di e Reino di Dios, a saca Satanas for di shelo y bent’e akibou na tera, y nos ta mira tur rond di nos e tribulacion cu esei a causa. (Revelacion 12:12) Si, nos tin hopi mas conocemento disponibel cu Enok tawatin. Pues anto, laga nos tin fe firme mescos cu e tawatin. Laga nos confiansa den cumplimento di Dios su promesanan influencia tur loke nos ta haci. Mescos cu Enok, laga nos cana cu Dios, maske nos ta biba den tempo turbulento.

[Nota]

Con Lo Bo Contesta?

• Kico kiermen cana cu Dios?

• Dicon cana cu Dios ta e mihor caminda pa sigui?

• Kico a capasita Enok pa cana cu Dios apesar di tempo turbulento?

• Con nos por imita Enok?

[Preguntanan di Estudio]

[Plachi na pagina 15]

Pa medio di fe, ‘Enok a sigui cana cu e Dios berdadero’

[Plachi na pagina 17]

Nos ta kere firmemente cu Yehova su promesanan lo ser realisa

[Reconocemento pa Potret na pagina 13]

Mohe, te na punta na man drechi: FAO photo/B. Imevbore; edificio cu ta basha abou: San Hong R-C Picture Company