Laga Yehova Su “Palabra” Proteha Bo

NA AÑA 490 prome cu nos era na e bataya historico di Maraton, entre 10 mil pa 20 mil solda di Atenas a confronta un ehersito di Persia hopi mas superior. Un tactica clave di e Griegonan tawata e asina yama falanx, esta, un barera di solda cu a marcha pega pega riba otro. Nan escudonan tawata serca serca di otro y a forma un muraya casi impenetrabel, un muraya yen di lansa su tras. E falanx a duna e soldanan di Atenas un victoria famoso riba e forsanan hopi mas superior di Persia.

Cristiannan berdadero ta den un guera spiritual. Nan ta lucha contra enemigonan poderoso, e gobernantenan invisibel di e mal sistema di cosnan aki, describi den Bijbel como “e forsanan mundial di e scuridad aki, ... e forsanan spiritual di maldad den e luganan celestial.” (Efesionan 6:12; 1 Huan 5:19) Dios su pueblo ta sigui victorioso, pero no riba nan mes forsa. Tur merito ta bai pa Yehova, kende ta proteha nan y instrui nan, manera Salmo 18:30 ta declara: “E palabra di SEÑOR ta proba [“refina”, NW]; e ta un escudo pa tur esnan cu ta tuma refugio den dje.”

Si, pa medio di su “palabra” refina, cu nos ta haya den e Scritura Santo, Yehova ta proteha su sirbidonan leal di daño spiritual. (Salmo 19:7-11; 119:93) Relaciona cu e sabiduria cu e Palabra di Dios ta manifesta, Salomon a skirbi: “No bandona sabiduria, y e lo warda bo; stim’e, y e lo cuida bo.” (Proverbionan 4:6; Eclesiastes 7:12) Con sabiduria divino por proteha nos di daño? Considera e ehempel di antiguo Israel.

Un Pueblo Proteha Door di Sabiduria Divino

E Lei di Yehova a proteha y guia e Israelitanan den tur aspecto di bida. Por ehempel, e reglanan di dieta, higiena y cuarentena a spar nan di hopi di e malesanan cu a asota otro nacionnan. Ta te despues cu hende a descubri bacteria den siglo 19, ciencia a cuminsa yega na e nivel di e Lei di Dios. E leinan tocante  pocesion di tereno, derecho di cumpra bek, exoneracion di debe y cobramento di interes a trece beneficionan social den Israel door di promove un sosiedad stabil y un economia husto. (Deuteronomio 7:12, 15; 15:4, 5) E Lei di Yehova asta a yuda conserva e tereno di Israel den bon condicion! (Exodo 23:10, 11) Mandamentonan cu a prohibi adoracion falso a duna e pueblo proteccion spiritual; protehando nan di opresion di demoño, di sacrificio di yiu y di hopi otro maldad, fuera di e practica degradante di buig dilanti imagennan sin bida.—Exodo 20:3-5; Salmo 115:4-8.

Ta bisto cu e “palabra” di Yehova no a resulta di ta “un palabra bashi” pa Israel; mas bien el a nifica bida y a prolonga e dianan di tur cu a obedec’e. (Deuteronomio 32:47) Mescos ta e caso awe cu personanan cu ta cumpli cu Yehova su palabranan sabi, apesar cu cristiannan no ta bou di e aliansa di Lei mas. (Galationan 3:24, 25; Hebreonan 8:8) De echo, en bes di un codigo di lei, cristiannan tin un variedad grandi di principio biblico pa guia nan y proteha nan.

Un Pueblo Proteha Door di Principio

Leinan por tin un aplicacion limita y por ta algo temporal. Sinembargo, principionan biblico, siendo cu nan ta berdadnan fundamental, por lo general tin un aplicacion amplio y permanente. Por ehempel, considera e principio na Santiago 3:17 cu ta bisa en parte: “E sabiduria di ariba primeramente ta puro, despues pacifico.” Con e berdad fundamental ei por sirbi como un escudo of proteccion pa e pueblo di Dios awe?

Ser puro kiermen ser moralmente limpi. Pues, hende cu ta balora puresa ta haci esfuerso pa no solamente evita inmoralidad sino asta e cosnan cu ta hiba na dje, entre otro, fantasianan sexual y pornografia. (Mateo 5:28) Di igual manera, parehanan cu ta enamora di otro y cu a tuma e principio di Santiago 3:17 na pecho ta evita actonan intimo cu lo por pone nan perde nan dominio propio. Como cu nan ta ser guia pa principio, nan lo no cai den e tentacion di pensa cu tanten cu nan no echt kibra e lei di Dios, nan conducta lo tin Yehova su aprobacion; nan sa cu e pensamento ei lo haci nan impuro. Nan sa cu Yehova “ta wak curason” y cu e ta actua di acuerdo cu esei. (1 Samuel 16:7; 2 Cronicanan 16:9) E personanan sabi ei ta proteha nan carni di e tantisimo malesanan transmiti sexualmente cu ta reina awe y tambe ta conserva nan bienestar mental y emocional.

Ademas, segun Santiago 3:17, sabiduria divino ta “pacifico.” Manera nos sa, Satanas ta purba aleha nos for di Yehova door di sembra un spirito di violencia den nos curason. E ta haci esei entre otro mediante literatura, pelicula, musica y computer game dudoso; tin di e weganan aki ta laga e hungadonan imagina nan mes con nan ta comete brutalidad y matansanan increibel! (Salmo 11:5) E creciente ola di crimennan violento ta duna prueba cu Satanas tin exito. Relaciona cu e tipo di crimennan ei, algun aña pasa e corant Australiano The Sydney Morning Herald a cita Robert Ressler, e homber cu a bin cu e expresion “serial killer” (asesino multiple). Ressler a bisa cu e asesinonan cu el a entrevista den decada di 1970 a ser stimula door di material pornografico cu “ta nada na comparacion cu esnan di awendia.” Pesei Ressler a expresa cu e ta mira “un futuro scur, un siglo nobo den cua asesinonan multiple lo multiplica.”

En berdad, apenas algun luna despues cu e noticia ei a sali publica, un pistolero a mata 16 mucha chikito y nan maestra na un scol preparatorio na Dunblane, Escocia, prome cu el a mata su curpa. E siguiente luna un otro pistolero loco a masacra 32 hende den e pueblo trankil di Port Arthur, na Tasmania, Australia. Den añanan resien, Merca a keda sagudi pa varios masacre na scol, locual a pone e Mericanonan puntra: Dicon? Na juni 2001, Japon a alcansa titularnan di noticia mundial ora cu un homber loco a drenta den un scol y hinca 8 mucha di klas uno y klas dos mata y corta 15 otro hende. Un cos ta sigur, kisas no ta facil pa bisa  mesora kico ta e motibonan, pero mas y mas experto ta mira violencia den medionan di comunicacion como un factor cu ta contribui na esei. E columnista Australiano Phillip Adams a skirbi: “Si un propaganda di 60 seconde por aumenta benta enormemente, no bisa mi cu un pelicula multimiyonario di dos ora largo no ta cambia hende su actitud.” Loke a hala hopi atencion ta cu den e cas di e pistolero di Port Arthur, polis a confisca 2.000 video violento y pornografico.

Hende cu ta pega na principionan biblico ta proteha nan mente y curason di tur forma di entretenimento cu ta fomenta un pasion pa violencia. Pues, nan no ta habri un tapijt di ‘bonbini’ pa “e spirito di mundo” den nan pensamento y deseonan. Mas bien, nan ta ser “siña door di e spirito [di Dios]”, y nan ta haci esfuerso pa cultiva un amor pa su fruta cu ta inclui pas. (1 Corintionan 2:12, 13; Galationan 5:22, 23) Nan ta cultiva e amor aki door di estudio regular di Bijbel, oracion y meditacion edificante. Nan ta evita tambe di asocia cu personanan cu tin inclinacion violento, y ta scohe mas bien pa asocia cu esnan cu, mescos cu nan, ta anhela pa Yehova su mundo nobo di pas yega. (Salmo 1:1-3; Proverbionan 16:29) Si, sabiduria divino ta duna nos un bon proteccion!

Laga Yehova Su “Palabra” Warda Bo Curason

Ora Satanas a tenta Hesus den desierto, Hesus a rechas’e door di cita e Palabra di Dios cu exactitud. (Lucas 4:1-13) Sinembargo, Hesus no a djis pusta cu Diabel pa wak ken ta mas sabi. Door di basa su defensa riba e Scritura, Hesus a papia di curason, y ta pesei e strategia di Diabel cu a funciona asina bon den Eden, a fracasa den caso di Hesus. Satanas su trampanan lo fracasa serca nos tambe si nos yena nos curason cu e palabranan di Yehova. Nada lo por ta mas importante, pasobra curason “ta e fuente di bida.”—Proverbionan 4:23.

Ademas, nos tin cu sigui warda nos curason, sin slek ni un momento. Ora Satanas a fracasa den desierto, e no a stop di pone Hesus na prueba. (Lucas 4:13) Asina tambe lo e persisti cu nos door di purba varios strategia pa kibra nos integridad. (Revelacion 12:17) Pesei, laga nos imita Hesus door di cultiva un amor profundo pa e Palabra di Dios, y alabes pidiendo sin stop den oracion pa haya spirito santo y sabiduria. (1 Tesalonicensenan 5:17; Hebreonan 5:7) Yehova di su parti ta priminti cu tur cu busca refugio den dje lo no sufri daño spiritual.—Salmo 91:1-10; Proverbionan 1:33.

E Palabra di Dios Ta Proteha e Congregacion

Satanas no por stroba e “multitud grandi” profetisa di sobrevivi e gran tribulacion. (Revelacion 7:9, 14) Sinembargo, toch e ta purba di tur manera pa corumpi cristiannan pa por lo menos algun di nan perde Yehova su aprobacion. E strategia aki a funciona den antiguo Israel y a hiba na e morto di 24.000 persona na drempel di e Tera Priminti. (Numbernan 25:1-9) Claro cu cristiannan cu comete eror y mustra berdadero arepentimento ta ricibi yudansa amoroso pa asina nan por recupera spiritualmente. Pero pecadonan cu no arepenti ta pone na peliger e bienestar moral y spiritual di otro cristiannan, manera tawata e caso cu Zimri di pasado. (Numbernan 25:14) Nan ta expone no solamente nan mes na daño sino tambe nan compañeronan, mescos cu den caso di e soldanan den un falanx cu benta nan escudo un banda.

Pesei Bijbel ta manda: “No asocia cu ningun hende cu ta ruman pa nomber, si e ta un hende inmoral, of golos pa placa, of un adorado di dios falso, of un blasfemado, of un burache, of un estafado—pa ni come mes hunto cu un hende asina. . . . Saca e homber malbado for di meimei di boso.” (1 Corintionan 5:11, 13) Bo no ta di acuerdo cu e “palabra” sabi aki ta yuda proteha e puresa moral y spiritual di e congregacion cristian?

Na contraste skerpi, hopi di e iglesianan di cristiandad y tambe apostatanan ta considera e partinan di Bijbel cu ta bai contra di puntonan di bista moderno y liberal di moralidad como  ouderwets. Pesei nan ta hustifica tur forma di pica grave, asta den clero. (2 Timoteo 4:3, 4) Sinembargo, tuma nota cu Proverbionan 30:5 tambe ta bisa cu Yehova su “palabra” ta manera un escudo, pero den versiculo 6 ta sigui e mandamento: “No añadi na [Dios] su palabranan, pa e no reprende bo y bo wordo proba di ta un gañado.” Si, hende cu ta interferi cu Bijbel of purba cambi’e ta en realidad gañadonan spiritual, anto e gañadonan di mas culpabel cu tur! (Mateo 15:6-9) Pues, laga nos ta realmente gradicido cu nos ta parti di un organisacion cu tin respet profundo pa e Palabra di Dios.

Proteha Door di “un Holo Dushi”

Como cu e pueblo di Dios ta pega na Bijbel y ta comparti su mensahe consolador cu otro hende, nan ta manda un “holo dushi” di bida, un holo manera di sencia cu ta agrada Yehova. Pero pa personanan inhusto, e cargadonan di e mensahe ei ta manda, segun e traduccion di Beibel na papiamentu koriente, “un holo stinki y mortal.” Si, e sentido figurativo di hole di hende malbado ta asina troci door di Satanas su sistema di cosnan cu nan ta sinti nan incomodo of asta agresivo den presencia di esnan cu ta manda e “holo dushi di Cristo.” Di otro banda, esnan cu yen di entusiasmo ta plama e bon nobo ta bira ‘un holo dushi di Cristo meimei di esnan cu ta wordo salba.’ (2 Corintionan 2:14-16) E personanan ei di curason honrado hopi bes ta sinti nan disgusta pa e hipocresia y mentiranan religioso cu ta caracterisa religion falso. Pesei, ora nos habri e Palabra di Dios y comparti e mensahe di Reino cu nan, nan ta sinti nan atrai na Cristo y nan kier siña mas.—Huan 6:44.

Pues no sinti bo descurasha ora cu algun hende ta reacciona negativo riba e mensahe di Reino. Mas bien, mira e “holo dushi di Cristo” como un forma di proteccion spiritual cu ta core cu hopi persona cu por representa un peliger pa e luga spiritual cu e pueblo di Dios ta biba aden, mientras cu e ta atrae esnan di bon curason.—Isaias 35:8, 9.

Debi cu e soldanan Griego na Maraton a marcha pega pega riba otro y a gara nan escudo cu tur nan forsa, nan a gana e bataya apesar di tawatin un desbentaha grandi. Di igual manera, Yehova su Testigonan leal ta haya e garantia cu nan lo tin un victoria completo den nan guera spiritual, pasobra esei ta nan “herencia.” (Isaias 54:17) Pesei laga cada un di nos sigui busca refugio den Yehova door di tene “duro na e palabra di bida.”—Filipensenan 2:16.

[Plachi na pagina 31]

‘E sabiduria di ariba ta puro, despues pacifico’