Menonitanan Ta Busca e Berdad di Bijbel

UN MAINTA den november 2000, algun misionero Testigo di Yehova na Bolivia a wak pafo door di bentana di nan casita y a mira un grupo di homber cu mohe simpel bisti para tur nervioso na porta. Ora e misioneronan a habri porta, e prome palabranan di e bishitantenan tawata: “Nos kier haya e berdad di Bijbel.” E bishitantenan tawata menonita. E hombernan tawatin overall bisti, y e mohenan tawatin lantera (schort) color scur, y nan tawata papia un dialecto Aleman cu otro. Nan cara tawata tur spanta. Nan tawata wak henter ora si hende no a sigui nan. Sinembargo, for di ora nan tawata subi trapi pa drenta e cas, un di e yoncumannan di: “Mi kier conoce e hendenan cu ta uza e nomber di Dios.”

Unabes paden, e bishitantenan a cuminsa relaha ora cu a sirbi nan poco refresco. Nan a bin di leu, di un colonia di cunukero isola. Einan, nan tawatin seis aña ta ricibi e revista Toren di Vigilancia via post. Nan a puntra: “Nos a lesa cu lo tin un paradijs riba tera. Ta berdad?” E Testigonan a mustra nan e contesta cu Bijbel ta duna. (Isaias 11:9; Lucas 23:43; 2 Pedro 3:7, 13; Revelacion 21:3, 4) “Boso a wak!” un cunukero a bisa e otronan. “Ta berdad. Lo tin un paradijs riba tera.” Un tras di otro nan a bisa: “Mi kier sa cu nos a haya e berdad.”

Ken e menonitanan ta? Kico nan ta kere? Pa contesta e preguntanan aki, nos tin cu bai bek na siglo 16.

Ken e Menonitanan Ta?

Durante siglo 16, e aumento rapido den traduccion y imprenta di Bijbel den e idiomanan comun di Europa a stimula einan un interes nobo den estudio di Bijbel. Martin Luther y otro reformadonan a rechasa hopi siñansa di Iglesia Catolico. Sinembargo, e iglesianan protestant resien forma a keda cu hopi practica cu no ta biblico. Por ehempel, mayoria hende tawata haya cu mester batisa tur yiu resien naci den iglesia. Sinembargo, algun hende cu tawata studia Bijbel en busca di e berdad a bin realisa cu un persona ta bira miembro di e congregacion cristian solamente door di tuma un decision basa riba conocemento prome cu e batisa. (Mateo 28:19, 20) Predicadonan celoso cu tawatin e creencia aki a cuminsa bishita stad- y pueblitonan pa siña hende tocante Bijbel y pa  batisa adultonan. Pesei hende a yama nan anabaptista, cu ta nifica “esnan cu ta batisa pa di dos biaha.”

Un persona cu a acudi na e anabaptistanan den su buskeda di e berdad tawata Menno Simons, un pasto catolico di e pueblito di Witmarsum den parti nort di Hulanda. Pa aña 1536 el a kibra tur laso cu iglesia y a bira un homber cu ta wordo persigui. Na aña 1542 e propio emperado di e Imperio Romano Santo, Karel V, a priminti un recompensa di 100 florin pa e aresto di Menno. Apesar di esei, Menno a forma congregacionnan cu algun di e anabaptistanan. Poco tempo despues nan a cuminsa yama e cu su siguidonan menonitanan.

Menonitanan Awe

Den transcurso di tempo, persecucion a pone miles di menonita di West Europa muda bai Norte America. Ei, nan tawatin oportunidad pa sigui cu nan buskeda di e berdad y plama nan mensahe na hopi otro hende. Pero e celo ardiente di nan antepasadonan pa haci un estudio progresivo di Bijbel y pa e predicacion publico a bai casi completamente perdi. Mayoria menonita a pega na cierto siñansanan cu ta contrario na Bijbel, manera Trinidad, inmortalidad di alma humano y fierno di candela. (Eclesiastes 9:5; Ezekiel 18:4; Marco 12:29) Awendia, e menonitanan su esfuerso como misionero tin e tendencia di enfoca mas riba servicionan medico y social cu riba evangelismo.

Segun calculo tin awor rond di 1.300.000 menonita ta biba den 65 pais. Sinembargo, e menonitanan di awendia ta lamenta e falta di union cu tin den nan, mescos cu Menno Simons a lamenta esei siglonan prome. Durante Prome Guera Mundial, diferencianan di opinion relaciona cu e conflictonan di mundo a causa division masha grandi den nan. Hopi menonita na Norte America a nenga servicio militar riba base biblico. Pero e buki An Introduction to Mennonite History (Un Introduccion di Historia Menonita) ta bisa: “Pa aña 1914, rechaso di servicio militar tawata principalmente un cos di pasado pa e iglesianan menonita na West Europa.” Awe, te na cierto grado algun grupo menonita a adopta custumbernan moderno. Otronan ainda ta sera nan pañanan cu hak en bes di uza boton y ta kere cu hende homber no mag di feita nan barba.

Algun grupo menonita cu tawata determina pa keda separa for di e mundo moderno, a muda bai cu nan comunidad na luganan caminda gobiernonan local ta permiti nan biba sin interferencia. Por ehempel, na Bolivia tin segun calculo 38.000 menonita ta biba den cantidad di colonianan masha aisla, cada un cu otro reglanan di conducta. Algun colonia ta prohibi uzo di vehiculonan di motor, y ta permiti solamente uzo di cabai cu kitoki. Cierto colonianan ta prohibi radio, television y musica. Tin ta asta prohibi e hendenan di siña e idioma di e pais caminda nan ta biba. Un habitante di un colonia a bisa: “E pastonan no ta laga nos siña Spaño pa asina nan por tene nos bou di nan control.” Hopi menonita ta sinti nan oprimi y ta biba cu hopi miedo di ser expulsa for di e comunidad, un idea teribel pa un persona cu nunca a biba pafo di e comunidad menonita.

Con A Sembra un Simiña di e Berdad

Tawata bou di e circunstancianan aki cu un cunukero menonita cu yama Johann a mira un revista Toren di Vigilancia na cas di su biciña. Johann su famia a emigra for di Canada pa Mexico y despues pa Bolivia. Pero Johann semper  a desea di haya yudansa den su buskeda di e berdad di Bijbel. El a pidi pa fia e revista.

Despues, ora cu Johann tawata den stad pa bende su productonan di cunucu, el a acerca un Testigo cu tawata ofrece E Toren di Vigilancia den plasa. E Testigo a dirigie na un misionero di abla Aleman, y poco despues Johann a cuminsa haya E Toren di Vigilancia via post na Aleman. Nan tawata studia cada edicion cuidadosamente y pas’e di famia pa famia den su colonia te ora cu e revista tawata tur gasta. Tawatin biaha cu famianan tawata reuni hunto pa studia un revista Toren di Vigilancia te meianochi, buscando e textonan menciona den e revista. Johann a keda combenci cu Testigonan di Yehova mester ta esnan cu unidamente ta haciendo Dios su boluntad rond mundo. Prome cu Johann a muri, el a bisa su casa y su yiunan: “Sigui lesa semper E Toren di Vigilancia. Lo e yuda boso compronde Bijbel.”

Algun miembro di Johann su famia a cuminsa papia cu nan biciñanan tocante e cosnan cu nan tawata siña for di Bijbel. Nan a conta nan: “E tera lo no ser destrui. Mas bien, Dios lo hacie un paradijs. Y Dios no ta tormenta hende den fierno.” No a tarda hopi cu palabra di e combersacionnan aki a yega na horea di e pastonan di iglesia, kendenan a menasa di expulsa Johann su famia si nan no a stop. Mas despues, durante un combersacion di famia riba e presion cu e ancianonan menonita tawata pone riba nan, un yoncuman a papia francamente. El a bisa: “Mi no sa dicon nos ta keha tocante nos ancianonan di iglesia. Nos tur sa cua ta e religion berdadero, y nos no a haci nada tocante esei.” E palabranan aki a touch curason di e tata di e yoncuman. Poco despues, dies miembro di e famia a sali riba un biahe secreto en busca di Testigonan di Yehova y a bin termina na cas di e misioneronan, manera a wordo menciona den e introduccion.

E siguiente dia, e misioneronan a bai bishita nan amigonan nobo den e colonia. E vehiculo di motor di e misioneronan tawata e unico riba caminda. Segun cu nan tawata core pocopoco pasa kitokinan hala pa cabai, nan a keda fasina di mira e habitantenan local, kendenan tambe tawata fasina di mira nan. Un poco despues nan a sinta na mesa cu dies menonita cu a representa dos famia.

E dia ei, a dura cuater ora pa studia capitulo 1 di e buki Conocimentu cu Ta Hiba na Bida Eterno. * Pa cada paragraf, e cunukeronan a busca mas texto biblico y nan kier a sa si nan tawata compronde e textonan corectamente. Despues di cada pregunta di estudio a sigui un pausa di varios minuut segun cu e cunukeronan a consulta cu otro na e dialecto Aleman prome cu un bosero finalmente a contesta na Spaño pa e grupo. Tawata un dia memorabel, pero un tormenta tawata formando. Nan tawata a punto di confronta prueba, mescos cu a pasa cu Menno Simons tempo cu el a cuminsa cu su buskeda pa e berdad di Bijbel casi cinco siglo pasa.

Nan A Haya Nan cu Prueba pa e Berdad

Un par di dia despues, e ancianonan di iglesia a bin na cas di e famia di Johann cu un ultimatum pa esnan interesa den Testigonan di Yehova: “Nos a tende cu Testigonan di Yehova a bishita boso. Boso mester prohibi nan di bolbe, y si boso no entrega nan literatura pa nos kima nan, nos lo expulsa boso.” Nan a haya apenas un sesion di estudio di Bijbel cu e Testigonan, pues esaki tawata un prueba masha grandi.

 Un di e cabesnan di famia a contesta: “Nos no por haci loke boso ta pidi. E hendenan ei a bin pa siña nos e Bijbel.” Con e ancianonan a reacciona? Nan a expulsa nan pasobra nan a studia Bijbel! Esaki en berdad tawata un sla duro. E garoshi di e fabrica di keshi di e colonia a pasa dilanti di cas di un famia sin recohe nan lechi, y asina a blokia nan unico fuente di entrada. Un cabes di famia a perde su trabou. Na e tienda di e colonia nan a nenga di atende un otro cabes di famia y nan a expulsa su yiu mohe di dies aña for di scol. Biciñanan a rondona un cas pa bai cu e esposa di un di e yoncumannan, declarando cu e mucha mohe no por sigui biba cu su casa expulsa. Apesar di tur esaki, e famianan cu tawata studia Bijbel no a stop di busca e berdad.

E misioneronan a sigui bin tur siman pa conduci e estudio di Bijbel maske esei tawata un careda basta largo. E estudionan ei a fortalece e famianan aki masha! Algun miembro di famia tawata biaha dos ora cu cabai cu kitoki pa nan por ta presente. Tawata un ocasion masha conmovedor ora cu e famianan pa prome bes a pidi un di e misioneronan haci oracion. Den e colonianan aki menonitanan nunca ta haci oracion na bos halto, pues nunca prome nan no a tende un hende haci oracion na nan fabor. Wowo di e hombernan a yena cu awa. Anto bo por imagina nan curiosidad ora cu e misioneronan a bin cu un tape recorder? Musica no tawata permiti nunca den nan colonia. Nan tawata asina contento cu e bunita Melodianan di Reino cu nan a dicidi di canta cantica di Reino despues di cada estudio! Sinembargo, e pregunta a keda: Con nan ta bai sobrevivi den nan circunstancia nobo?

Nan A Haya un Hermandad Amoroso

Siendo exclui for di nan comunidad, e famianan a cuminsa traha nan mes keshi. E misioneronan a yuda nan haya cumprado. Un Testigo di Yehova di hopi tempo na Norte America cu a lanta den un colonia menonita na Sur America a tende di e situacion penoso di e famianan. E tawatin un deseo special pa yuda. Denter di un siman, el a bula bai Bolivia pa bishita nan. Ademas di duna nan hopi animacion spiritual, el a yuda e famianan cumpra nan mes pickup di manera cu nan por a asisti na e reunionnan na e Salon di Reino y tambe transporta nan productonan di cunucu hiba plasa.

Un miembro di un famia a bisa: “Tawata dificil despues cu nan a expulsa nos for di e comunidad. Nos tawata bai Salon di Reino cu caranan tristo, pero nos tawata bolbe bek contento.” En berdad, Testigonan local a yuda nan bon den e situacion dificil cu nan a confronta y a ofrece nan sosten. Algun Testigo a siña Aleman, y varios Testigo di abla Aleman a bin Bolivia for di Europa pa yuda conduci reunionnan cristian na Aleman. Despues di poco tempo, 14 persona di e comunidad menonita tawata predica e bon nobo di Reino na otro hende.

Dia 12 di october 2001, menos cu un aña despues di nan prome bishita na e cas di misionero, 11 di e exanabaptistanan aki a bolbe batisa, e biaha aki como simbolo di nan dedicacion na Yehova. Entretanto, tin mas cu a dal e paso aki di bautismo. Un di nan despues a comenta: “For di dia cu nos a siña e berdad di Bijbel, nos ta sinti nos manera catibo cu a ser poni den libertad.” Un otro a bisa: “Hopi menonita ta keha di e falta di amor cu tin den nan comunidad. Pero Testigonan di Yehova ta mustra interes den otro. Mi ta sinti mi safe meimei di nan.” Si bo ta en busca di un mihor comprondemento di e berdad di Bijbel, bo tambe lo por confronta dificultadnan. Pero si bo busca e yudansa di Yehova y mustra fe y curashi manera e famianan aki a haci, bo tambe lo tin exito y lo haya felicidad.

[Nota]

[Plachi na pagina 25]

Nan a keda contento di haya literatura biblico na Aleman

[Plachi na pagina 26]

Aunke musica semper tawata prohibi, awor nan ta canta despues di cada estudio di Bijbel