Storia di Bida

Mi A Persevera Como un Solda di Cristo

SEGUN E RELATO DI YURII KAPTOLA

“Awor mi ta combenci cu di berdad bo tin fe!” E palabranan ei a bini for di e hende cu menos mi a pensa—un oficial den e ehersito Sovietico—y nan a duna mi un empuhe net na ora. Mi tawatin un sentencia di hopi aña den prizon ta warda mi y mi a pidi Yehova fervientemente pa e sostene mi. Mi tawatin cu enfrenta un lucha largo cu a exigi perseverancia y determinacion.

MI A nace dia 19 di october 1962 y mi a lanta den e parti west di Ucrania. Den e mesun aña ei, mi tata, kende tambe tawata yama Yurii, a bin den contacto cu Testigonan di Yehova. No a dura mucho cu el a bira e prome persona den nos pueblo cu a adora Yehova. Oficialnan cu tawata contra Testigonan di Yehova a tuma nota di su actividadnan.

Sinembargo, mayoria di nos biciñanan a respeta mi mayornan pa nan cualidadnan cristian y interes den otro hende. Mi mayornan a probecha di tur oportunidad pa inculca den ami cu mi tres ruman mohenan un amor pa Dios for di un edad hopi jong, y esaki a yuda mi deal cu e cantidad di problemanan cu mi a haya mi aden na scol. Un di e problemanan ei a surgi ora cu cada alumno mester a bisti un badge cu ta identific’e como un di Lenin Su Yiunan di October. Pa motibo di mi neutralidad cristian, mi no a bisti e badge y pesei tawata bisto cu mi tawata diferente.—Huan 6:15; 17:16.

Despues, ora mi tawata den derde klas, tur alumno mester a join un organisacion comunista pa hobennan cu tawata yama Pioneronan  Hoben. Un dia nan a hiba nos klas na e cura di scol pa e ceremonia di instalacion. Mi tawatin hopi miedo, pensando cu nan lo a bai haci bofon di mi y zundra mi. Tur mucha cu excepcion di mi a trece nan lenso cora nobo for di cas cu ta identifica nan como Pioneronan Hoben, y e muchanan a para den un rei largo dilanti e cabes di scol, e maestronan y e muchanan den klasnan mas halto. Ora nan a manda e ultimonan aki mara e lenso rond di nos garganta, mi a sak mi cabes y wak abou, sperando cu ni un hende lo no a presta atencion na mi.

Hiba na Prizonnan Aisla

Tempo mi tawatin 18 aña nan a sentencia mi na tres aña di prizon pa motibo cu mi a mantene neutralidad cristian. (Isaias 2:4) E prome aña mi a bai e prizon di Trudovoye, un stad den e Districto di Vinnitskaya di Ucrania. Einan mi a topa rond di 30 otro Testigo di Yehova. Nan a manda nos dos dos bai traha na diferente post militar, pasobra e autoridadnan no tawata kier pa nos tawatin contacto cu otro.

Na augustus 1982, nan a manda ami cu Eduard—un otro Testigo—hunto cu un grupo di otro preso cu trein (den wagon di prizon) pa e Seronan Ural den nort. Ocho dia largo nos mester a soporta un calor teribel y keda tur gepak riba otro te ora nos a yega e Prizon di Solikamsk, den e Districto di Permskaya. Nan a pone ami cu Eduard cada un den un cel. Dos siman despues, nan a hiba mi Vels, mas panort den e region di Krasnovishersky.

Nos transporte a yega meianochi, y tawata hopi scur. Apesar di e scuridad, un oficial a ordena nos grupo pa crusa un riu den boto. Nos no por a mira ni e riu, corda e boto! Asina mes, nos a keda fula rond te ora nos a bin dal den e boto, y aunke nos tawatin yen di miedo, nos a logra crusa e riu. Unabes na otro banda di e riu, nos a sigui cana den direccion di un lus visibel riba un sero eibanda, caminda nos a haya un par di tent. Esakinan mester a bira nos cas nobo. Ami a bai biba den un tent relativamente grandi hunto cu mas o menos 30 otro preso. Durante winter, nos tawatin cu soporta temperaturanan cu tin biaha tawata baha te na 40 grado Celsius bou di cero, y e tent no a ofrece mucho comodidad. E trabou principal di e presonan tawata di kap palo, pero ami tawata construi hut pa preso.

Alimento Spiritual Ta Yega Nos Comunidad Isola

Ami tawata e unico Testigo den e comunidad ei; pero Yehova no a bandona mi. Un dia a yega un pakete di mi mama, kende tawata biba ainda na west Ucrania. Ora un guardia a habri e pakete, e prome cos cu el a mira tawata un Bijbel chikito. El a coh’e y cuminsa blader den dje. Mi a purba pensa ta kico mi por a bisa pa evita cu e lo a confisca e tesoro spiritual aki. Diripiente e guardia a puntra: “Kico esaki ta?” Prome cu mi por a pensa riba un contesta, un inspector cu tawata para eibanda a contesta: “Aha, ta un diccionario esei ta.” Mi a keda keto. (Eclesiastes 3:7) E inspector a rista e resto di e pakete y despues a entrega mi e hunto cu e Bijbel precioso. Mi a keda asina contento cu mi a dun’e algun noot for di mi pakete. Ora mi a ricibi e pakete aki, mi tawata sa cu Yehova no a lubida mi. El a saca su man generosamente y a percura pa mi necesidadnan spiritual.—Hebreonan 13:5.

Mi A Predica sin Stop

Un par di luna despues, mi a keda sorprendi ora mi a ricibi un carta di un ruman cristian cu tawata sera den un prizon mas o menos 400 kilometer leu. El a pidi mi pa busca contacto cu un homber cu a mustra interes den Bijbel y cu kisas awor ta den mi campamento. No tawata sabi pa skirbi un carta indiscreto asina, ya cu autoridadnan tawata rista nos cartanan. Pues no tawata  un sorpresa cu un di e oficialnan a manda yama mi den su oficina y a spierta mi seriamente pa mi no predica. Anto el a ordena mi pa firma un documento cu a declara cu lo mi stop di papia cu otro hende tocante mi fe. Mi a contest’e cu mi no ta compronde pakico mi mester firma un declaracion asina, ya cu tur hende sa caba cu mi ta un Testigo di Yehova. Mi a puntr’e cu si otro preso kier a sa dicon mi ta sera, kico mi mester a bisa nan? (Echonan 4:20) E oficial a realisa cu e no por a intimida mi, pues el a dicidi di core cu mi. Nan a manda mi un otro campamento.

Nan a transferi mi na e pueblito di Vaya, 200 kilometer leu. Ei mi superiornan a respeta mi posicion cristian y a asigna mi na trabounan no militar—prome como carpinte, despues como electricien. Pero e trabounan aki a trece otro retonan. Na un ocasion, nan a bisa mi pa cohe mi hermentnan y bai na e club di e pueblo. Ora mi a yega, e soldanan a keda contento di mira mi. Nan tawatin problema pa pone e lusnan cu a dorna varios di e emblemanan militar funciona na drechi. Nan tawata kier pa mi yuda drecha nan pasobra nan tawata preparando pa e celebracion anual di Dia di Ehersito Cora. Despues cu mi a haci oracion y pensa bon kico mi mester a haci, mi a bisa nan cu mi no por a haci e tipo di trabou ei. Mi a duna nan mi hermentnan y sali bai. Nan a denuncia mi na e subdirector, y pa mi sorpresa e homber a scucha e kehonan contra mi y contesta: “Mi ta respet’e pa esei. E ta un homber di principio.”

Animacion for di un Fuente Cu Mi No A Spera

Dia 8 di juni 1984, despues di a pasa exactamente tres aña sera, mi a sali liber. Ora mi a regresa Ucrania, mi tawatin cu inscribi den milicia como un ex preso. E oficialnan a bisa mi cu nan lo a bolbe hiba mi dilanti corte despues di seis luna y cu lo tawata mihor pa mi bandona e districto completamente. Pues mi a bandona Ucrania y cu tempo mi a haya trabou na Letonia. Pa un tempo mi por a predica y asocia cu e grupo chikito di Testigo cu tawata biba den e capital Riga y rond di dje. Sinembargo, despues di apenas un aña, nan a yama mi atrobe pa servicio militar. Na e oficina di inscripcion, mi a bisa e oficial cu ya caba anteriormente mi a nenga di drenta servicio militar. El a grita mi: “Bo sa realmente kico bo ta haciendo? Mi tin gana di sa kico bo ta bai bisa e luitenant colonel!”

El a cana bai cu mi na un cuarto na e di dos piso caminda e luitenant colonel tawata sinta tras di un mesa largo. Esaki a scucha cu sumo atencion segun cu mi a splica mi posicion y despues el a bisa mi cu ainda mi tawatin tempo pa bolbe pensa riba mi decision prome cu mi enfrenta e comite encarga cu inscripcion di miembro. Ora nos a sali for di e oficina di e luitenant colonel, e oficial cu a grita mi na prome instante a confesa: “Awor si mi ta combenci cu di berdad bo tin fe!” Dia mi a presenta dilanti un comite militar, mi a ripiti mi posicion neutral y nan a laga mi bai.

 Durante e tempo ei, mi a biba den un pension. Un anochi mi a tende un hende bati pocopoco na porta. Mi a habri e porta y a topa un homber bisti cu bachi y cu un tas den man. El a introduci su mes, bisando: “Mi ta di Siguridad di Estado. Mi sa cu actualmente bo ta den dificultad y cu nan ta bai husga bo den corte.” Mi a contesta: “Si, esei ta corecto.” E homber a continua: “Si bo ta dispuesto pa coopera cu nos, nos por yuda bo.” Mi di: “No, esei no ta posibel. Lo mi keda leal na mi creencianan cristian.” Sin haci ningun esfuerso mas pa combence mi, el a bai.

Bek den Prizon, Bek den Predicacion

Dia 26 di augustus 1986, e Corte Nacional di Riga a sentencia mi na cuater aña di trabou forsa, y nan a hiba mi na e Prizon Central di Riga. Nan a hinca mi den un cel grandi hunto cu 40 otro preso, y mi a purba predica na cada preso den e cel ei. Algun a bisa cu nan ta kere den Dios; otronan a djis hari mi. Mi a ripara cu e hombernan tawata parti den grupo, y despues di dos siman e cabesantenan di e gruponan aki a bisa mi cu mi no tawatin mag di predica, ya cu mi no tawata cumpli cu nan leinan no skirbi. Mi a splica nan cu mi tawata encarsela pa net e motibo ei, esta, pa motibo cu mi ta obedece otro leinan.

Mi a sigui predica discretamente, y ora mi a haya algun persona cu tawatin inclinacion spiritual, mi a logra studia Bijbel cu cuater di nan. Durante nos estudionan, nan tawata skirbi e siñansanan basico di Bijbel den un buki di nota. Un par di luna despues, nan a manda mi un campamento di alta siguridad na Valmiera, caminda mi a traha como electricien. Ei mi a haya chens di studia Bijbel cu un otro electricien cu cuater aña despues a bira Testigo di Yehova.

Dia 24 di maart 1988, nan a saca mi for di e campamento di alta siguridad y hiba mi na un otro den un comunidad eibanda mes. Esei si tawata un berdadero bendicion, ya cu ei mi a haya mas libertad. Nan a manda mi pa traha na varios sitio di construccion, y constantemente mi tawata busca oportunidad pa predica. Frecuentemente, mi tawata pafo di e campamento, predicando te anochi laat, pero nunca mi a haya mi cu dificultad ora mi a yega e campamento bek.

Yehova a bendiciona mi esfuersonan. Den e area ei tawata biba un par di Testigo, pero den e stad mes tawatin un so, Vilma Krūmin̗a—un ruman mohe di edad. Ami cu ruman Krūmin̗a a cuminsa conduci hopi estudio di Bijbel cu hobennan. De bes en cuando, rumannan tawata bini for di Riga pa traha den sirbishi hunto cu nos y algun pionero regular a bini asta for di Leningrad (awor St. Petersburg). Cu yudansa di Yehova, nos a cuminsa varios estudio di Bijbel, y pronto mi a drenta e sirbishi di pionero, dedicando 90 ora pa luna na e trabou di predica.

Dia 7 di april 1990, e Corte di Pueblo na Valmiera a atende mi caso. Ora e huicio a cuminsa, mi a reconoce e fiscal. Tawata trata aki di un yoncuman cu ken mi a yega di papia tocante Bijbel! El a reconoce mi y a smile pero no a bisa nada. Ainda mi ta corda loke e hues a bisa mi na e huicio riba e dia ei: “Yurii, e decision pa encarsela bo cuater aña pasa tawata ilegal. Nan no mester a condena bo.” Diripiente mi tawata un homber liber!

Un Solda di Cristo

Na juni 1990, mi mester a bolbe inscribi na e oficina di inscripcion pa mi por a haya permit di residencia na Riga. Mi a drenta e mesun oficina cu e mesun mesa largo caminda cuater aña prome mi a bisa e luitenant colonel cu lo mi no drenta servicio militar. E biaha aki, el a lanta para pa cuminda mi, duna mi man, y bisa mi: “Ta un berguensa cu  bo tawatin cu pasa door di tur e cosnan aki. Despensa mi cu cosnan a bai asina.”

Mi a contest’e: “Mi ta un solda di Cristo, y mi tin cu cumpli cu mi encargo. Cu yudansa di Bijbel, abo tambe por disfruta di loke Cristo a priminti su siguidonan—un bida felis y un futuro eterno.” (2 Timoteo 2:3, 4) E colonel a contesta: “No mucho tempo pasa mi a cumpra un Bijbel y awor mi ta lesand’e.” Mi tawatin e buki Bo por biba pa semper den Paradijs riba tera hunto cu mi. * Mi a habrie na e capitulo cu ta splica e señal di e ultimo dianan y a mustr’e con profecia di Bijbel ta relaciona cu nos tempo. Cu aprecio profundo e colonel a duna mi man atrobe y a desea mi exito den mi trabou.

Den e tempo ei e cunucu na Letonia tawata cla pa wordo cosecha. (Huan 4:35) Na 1991, mi a cuminsa sirbi como anciano di congregacion. Tawatin solamente dos anciano nombra den henter e pais! Un aña despues, e unico congregacion na Letonia a parti den dos—un di abla Leton y e otro di abla Ruso. Ami tawatin e privilegio di sirbi e congregacion Ruso. E crecemento tawata asina rapido cu e siguiente aña nos congregacion a parti den tres! Ora mi wak bek, ta bisto cu ta Yehova mes tawata dirigiendo su carnenan na su organisacion.

Na 1998, nan a nombra mi como pionero special na Jelgava, un pueblo cu ta keda 40 kilometer suitwest di Riga. E mesun aña ei mi a bira un di e prome rumannan di Letonia cu a ser invita pa asisti na e Scol di Entrenamento Ministerial conduci den e idioma Ruso na Solnechnoye, banda di St. Petersburg, Rusia. Na e scol ei mi a bin mira e importancia pa tin un actitud amoroso pa asina mi por tin exito den e ministerio. Loke a impresiona mi specialmente, mucho mas cu e cosnan cu nos a siña na e scol, tawata e amor y atencion cu e famia di Betel y e instructornan di e scol tawatin pa nos.

Mi a alcansa un otro logro importante den mi bida na 2001 ora mi a casa cu Karina, un dushi ruman mohe cristian. Karina a join mi den e sirbishi di pionero special, y tur dia ora mi mira mi casa yega cas for di sirbishi di veld cu cara contento, e ta un estimulo pa mi. En berdad, ta un goso grandi pa sirbi Yehova. E experencianan dificil bou di e regimen comunista a siña mi confia den dje completamente. Ningun sacrificio ta demasiado grandi pa esun cu ta desea di mantene amistad cu Yehova y sostene su soberania. E echo cu mi por a yuda otro hende siña tocante Yehova a duna mi proposito den bida. Tawata un gran honor pa mi por a sirbi Yehova “manera un bon solda di Cristo.”—2 Timoteo 2:3.

[Nota]

[Plachi na pagina 10]

Nan a sentencia mi na cuater aña di trabou forsa y a sera mi den e Prizon Central di Riga

[Plachi na pagina 12]

Den sirbishi hunto cu Karina