Pregunta di Lector

Ki base tin pa bisa cu frasenan cu ta menciona esun “kende so tin inmortalidad” y esun “kende ningun hende no a mira ni por mira” ta referi na Hesus y no na Yehova Dios?

Apostel Pablo a skirbi: “Cual [aparicion] e lo manifesta na su debido tempo—Esun, kende ta e bendiciona y e unico Soberano, e Rei di reinan, y Señor di señornan; kende so tin inmortalidad y ta biba den e lus inaccesibel; kende ningun hende no a mira ni por mira.”—1 Timoteo 6:15, 16.

Comentaristanan biblico por lo general ta rasona: ‘Con e frasenan ei—manera por ehempel esun “kende so tin inmortalidad”, e “unico Soberano” y esun “kende ningun hende no a mira ni por mira”—por ta señala na un otro persona cu no ta e Todopoderoso?’ Ta cierto cu por uza e expresionnan ei pa describi Yehova. Sinembargo, e contexto ta indica cu na 1 Timoteo 6:15 y 16, Pablo tawata referi spesificamente na Hesus.

Na fin di versiculo 14, Pablo ta menciona “e aparicion di nos Señor Hesucristo.” (1 Timoteo 6:14) Pesei ora Pablo ta skirbi den versiculo 15 “cual [“aparicion”, NW] e lo manifesta na su debido tempo”, e ta referi na un aparicion di Hesus, no di Yehova Dios. Ken anto ta e “unico Soberano”? Ta parce rasonabel pa conclui cu Hesus ta e Soberano cu Pablo ta referi na dje. Dicon? E contexto ta duna di compronde cu Pablo ta comparando Hesus cu gobernantenan humano. Hesus di berdad ta, manera Pablo a skirbi, “Rei di reinan [humano], y Señor di señornan [humano].” * Si, compara cu nan, Hesus ta e “unico Soberano.” Na Hesus a wordo duna “dominio, gloria y un reino, pa tur pueblo, nacion y hende di tur idioma por sirbie.” (Daniel 7:14) Ningun soberano humano por bisa di tin derecho riba esei!

Kico di e frase “kende so tin inmortalidad”? Atrobe, ta un comparacion ta ser haci entre Hesus y reinan humano. Ningun gobernante terenal por bisa cu el a haya inmortalidad, pero Hesus si por bisa esei. Pablo a skirbi: “Sabiendo cu Cristo, siendo lanta for di e mortonan, lo no muri nunca mas; morto no tin dominio mas riba dje.” (Romanonan 6:9) Pues, Hesus ta e prome persona describi den Bijbel cu a haya e don di inmortalidad. Si, tempo cu Pablo a skirbi su carta, Hesus tawata e unico cu a alcansa bida indestructibel.

Nos mester tene na mente tambe cu lo tawata robes pa Pablo bisa cu Yehova Dios so tawatin inmortalidad, ya cu Hesus tambe tawata inmortal ora cu Pablo a skirbi e palabranan ei. Pero Pablo por a bisa cu Hesus so tawata inmortal na comparacion cu gobernantenan humano.

Ademas, ta definitivamente berdad cu despues di Hesus su resureccion y subimento na shelo, e por ser describi como esun cu “ningun hende no a mira ni por mira.” Ta cierto cu Hesus su disipelnan ungi lo a mir’e despues cu nan mes a muri y haya resureccion pa shelo como criaturanan spiritual. (Huan 17:24) Pero ningun hende riba tera lo a mira Hesus den su estado glorifica. Pues, di berdad por wordo bisa cu desde Hesus su resureccion y subimento na shelo, en realidad “ningun hende” no a mira Hesus.

Ta berdad cu na prome bista por parce como si fuera e descripcionnan cu tin na 1 Timoteo 6:15 y 16 lo por ta aplica na Dios. Pero e contexto di e palabranan di Pablo—hunto cu e evidencia di otro textonan biblico—ta mustra cu Pablo tawata referi na Hesus.

[Nota]