Cana pa Medio di Fe, No pa Medio di Bista!

“Nos ta cana pa medio di fe, no pa medio di bista.”—2 CORINTIONAN 5:7.

1. Kico ta mustra cu apostel Pablo a cana pa medio di fe, no pa medio di bista?

TAWATA aña 55 di nos era. Un 20 aña asina a pasa desde cu e homber cu e tempo ei tawata yama Saulo, un persiguido di cristiannan, a acepta cristianismo. El a bira conoci como apostel Pablo y e no a laga e tempo cu a pasa mengua su fe den Dios. Maske e no por a mira e realidadnan di shelo cu su wowonan literal, toch e tawatin un fe firme. Pesei ora el a skirbi e cristiannan ungi, esta, personanan cu tawatin e speransa celestial, el a bisa nan: “Nos ta cana pa medio di fe, no pa medio di bista.”—2 Corintionan 5:7.

2, 3. (a) Con nos ta demostra cu nos ta canando pa medio di fe? (b) Kico ta nifica cana pa medio di bista?

² Pa nos cana pa medio di fe nos mester tin pleno confiansa den Dios su capasidad pa dirigi nos bida. Nos mester tin e conviccion completo cu e realmente sa kico ta beneficia nos mas. (Salmo 119:66) Segun cu nos ta tuma decision den bida y actua conforme cu nan, nos ta tene cuenta cu e “realidadnan cu nos no ta mira.” (Hebreonan 11:1, The New English Bible) Esakinan ta inclui e promesa di “shelonan nobo y un tera nobo.” (2 Pedro 3:13) Di otro banda, cana pa medio di bista ta nifica hiba un bida cu ta enfoca unicamente riba loke nos wowo ta mira. Esaki ta peligroso pasobra e por pone cu nos ta ignora e boluntad di Dios completamente.—Salmo 81:12; Eclesiastes 11:9.

³ Sea cu nos ta di e “tou chikito” cu tin e yamada celestial, of di e “otro carnenan” cu tin e speransa di biba riba tera, cada un di nos mester tuma na pecho e spiertamento pa cana pa medio di fe y no pa medio di bista. (Lucas 12:32; Huan 10:16) Laga nos mira con siguimento di e conseho inspira aki lo proteha nos pa nos no bira victima di “e placernan pasahero di pica”, pa nos no cai den e trampa di materialismo y core e peliger di perde for di bista cu e fin di e sistema di cosnan aki ta serca. Tambe nos lo analisa e peligernan di cana pa medio di bista.—Hebreonan 11:25.

Rechasa “e Placernan Pasahero di Pica”

4. Kico Moises a opta p’e, y dicon?

⁴ Imagina bo ki tipo di bida Moises, yiu di Amram, lo por tawatin. El a lanta den e yiunan di e famia real di Egipto di antiguedad, y lo e por a yega na poder, rikesa y prominencia. Moises lo por a rasona: ‘Mi a haya un bon educacion den e sabiduria prestigioso di Egipto, y mi ta poderoso den palabra y accion. Si mi keda den e famia real, lo mi por uza mi posicion pa yuda mi rumannan Hebreo oprimi!’ (Echonan 7:22) Na luga di esei, Moises a prefera di “sufri maltrato hunto cu e pueblo di Dios.” Dicon? Kico a impulsa Moises pa bira lomba pa tur loke Egipto tawatin di ofrece? Bijbel ta contesta: “Pa medio di fe [Moises] a bai for di Egipto, sin tene miedo di e furia di rei; pasobra el a keda firme, como si fuera e tawata mira Esun cu ta invisibel.” (Hebreonan 11:24-27) E fe cu Moises tawatin den Yehova su recompensa garantisa pa hende husto a yud’e resisti pica y un bida di luho cu su placernan pasahero.

5. Con e ehempel di Moises ta anima nos?

 ⁵ Hopi bes nos tambe tin cu tuma decisionnan dificil riba asuntonan manera: ‘Mi mester stop cu cierto practicanan of custumbernan cu no ta cuadra completamente cu principionan di Bijbel? Mi mester acepta un trabou cu ta mustra beneficioso den sentido material pero cu por stroba mi progreso spiritual?’ E ehempel di Moises ta anima nos pa no tuma decision cu ta refleha e falta di perspicasia di e mundo aki; mas bien nos mester tin fe den e sabiduria di largo alcanse di “Esun cu ta invisibel”—Yehova Dios. Mescos cu Moises, laga nos balora nos amistad cu Yehova mas cu cualkier cos cu e mundo aki por ofrece.

6, 7. (a) Con Esau a mustra cu el a prefera di cana pa medio di bista? (b) Ki spiertamento nos ta haya den e caso di Esau?

⁶ Awor wak e contraste entre Moises y Esau, yiu di e patriarca Isaak. Esau a prefera satisfaccion inmediato. (Genesis 25:30-34) E ‘no a aprecia cosnan sagrado’ sino a regala su derechonan como primogenito “a cambio di un solo cuminda.” (Hebreonan 12:16, NW) E no a pensa mes con su decision pa bende su derecho di primogenito lo a afecta su relacion cu Yehova y ki influencia su accion lo tawatin riba su yiunan. E tawata falta vision spiritual. Esau a sera su wowonan pa e promesanan precioso di Dios y a considera nan como di poco balor. El a cana pa medio di bista, no pa medio di fe.

⁷ E caso di Esau ta un spiertamento pa nos awe. (1 Corintionan 10:11) Ora nos tin cu tuma decision, sea grandi of chikito, nos no mester laga e idea di e mundo di Satanas di cu ‘bo mester haya loke bo kier, anto awor’, engaña nos. Ta bon pa nos puntra nos mes: ‘Mi decisionnan ta manifesta cierto tendencianan manera esnan di Esau? Den mi afan pa haya loke mi kier awor, mi ta pushando interesnan spiritual na di dos luga? Mi decisionnan ta poniendo mi amistad cu Dios y mi futuro recompensa na peliger? Ki tipo di ehempel mi ta poniendo pa otro hende?’ Si nos decisionnan ta refleha aprecio pa cosnan sagrado, Yehova lo bendiciona nos.—Proverbionan 10:22.

Evita e Trampa di Materialismo

8. Ki spiertamento e cristiannan di Laodicea a ricibi, y pakico esei ta di interes pa nos?

⁸ Den un revelacion na apostel Huan na fin di e prome siglo, Hesucristo glorifica a entrega un mensahe na e congregacion situa na Laodicea, Asia Menor. Tawata un mensahe di spiertamento contra materialismo. Aunke e cristiannan di Laodicea tawata rico den sentido material, spiritualmente si nan tawata bankroet. En bes di sigui cana pa medio di fe, nan a laga pocesionnan material ciega nan vision spiritual. (Revelacion 3:14-18) Materialismo tin un efecto similar awe. E ta debilita nos fe y ta pone nos stop di ‘core e careda pa bida cu perseverancia.’ (Hebreonan 12:1) Si nos no tene cuidou, e “placernan di bida” por sofoca actividadnan spiritual asina tanto te cu nan ta keda completamente “hoga.”—Lucas 8:14.

9. Si nos ta keda contento cu loke nos tin y gradicido pa alimento spiritual, con esei ta proteha nos?

 ⁹ Un factor clave pa nos proteccion spiritual ta pa keda contento cu loke nos tin, en bes di haci pleno uzo di e mundo aki y core tras di rikesa material. (1 Corintionan 7:31; 1 Timoteo 6:6-8) Ora nos ta cana pa medio di fe y no pa medio di bista, nos ta haya goso den e paradijs spiritual actual. Segun cu nos ta tuma alimento spiritual nutritivo, nos no ta sinti nos impulsa pa “dal grito di goso cu un curason contento”? (Isaias 65:13, 14) Ademas, ta un placer di por asocia cu personanan cu ta manifesta e fruta di spirito di Dios. (Galationan 5:22, 23) Ta sumamente importante pa nos haya satisfaccion y refrescamento den Yehova su provisionnan spiritual!

10. Ta bon pa nos haci nos mes ki pregunta?

¹⁰ Ta bon pa nos haci nos mes algun pregunta: ‘Con importante cos material ta pa mi? Mi ta uzando e pocesionnan material cu mi tin pa hiba un bida di placer of pa promove adoracion berdadero? Kico ta duna mi e mayor satisfaccion? Esei ta estudio di Bijbel y asociacion na reunionnan cristian, of ora mi por pasa un fin di siman liber di responsabilidad cristian? Mi ta dedica hopi fin di siman na recreo en bes di uza e tempo ei pa sirbishi di veld y otro actividadnan en conexion cu adoracion puro?’ Cana pa medio di fe ta nifica keda ocupa den e obra di Reino, cu pleno confiansa den e promesanan di Yehova.—1 Corintionan 15:58.

No Perde e Fin for di Bista

11. Con cana pa medio di fe ta yuda nos pa no perde e fin for di bista?

¹¹ Cana pa medio di fe ta yuda nos evita e punto di bista carnal cu e fin ta leu ainda of cu e no ta bini mes. Distinto di e personanan skeptico cu ta haci chercha di profecia di Bijbel, nos si ta discerni con susesonan di mundo ta cumpli cu loke e Palabra di Dios a profetisa pa nos tempo. (2 Pedro 3:3, 4) Por ehempel, e actitud y comportacion di hende en general no ta duna prueba cu nos ta bibando den “e ultimo dianan”? (2 Timoteo 3:1-5) Cu wowo di fe, nos ta mira cu e susesonan actual di mundo no ta djis historia cu ta ripiti su mes. Mas bien, nan ta forma “e señal di [Cristo su] binida y di e fin di tempo.”—Mateo 24:1-14.

12. Con e palabranan di Hesus registra na Lucas 21:20 y 21 a cumpli den e prome siglo?

¹² Considera un suseso cu a tuma luga den e prome siglo di nos era cu tin un paralelo den nos tempo. Tempo cu Hesucristo tawata riba tera, el a spierta su siguidonan: “Ora boso mira Herusalem rondona door di ehersitonan, reconoce anto cu su desolacion ta serca. E ora ei laga esnan cu ta na Hudea hui bai na e seronan, y laga esnan cu ta meimei di e stad  sali bai.” (Lucas 21:20, 21) E profecia aki a cumpli ora cu e ehersito Romano bou di mando di Cestio Galo a sitia Herusalem na aña 66 di nos era. Pero e ehersito a retira abruptamente, locual tawata e señal y e oportunidad pa e cristiannan einan “hui bai na e seronan.” Na aña 70 di nos era, e ehersito Romano a regresa, ataca e stad di Herusalem y a destrui su tempel. Yosefo ta informa cu mas cu un miyon Hudiu a muri, y 97.000 a ser hiba como cautivo. E huicio di Dios a bini riba e sistema di cosnan Hudiu ei. Esnan cu a cana pa medio di fe y a haci caso di e spiertamento di Hesus a scapa e calamidad.

13, 14. (a) Kico lo tuma luga pronto? (b) Pakico nos mester ta alerta pa loke ta cumplimento di profecia di Bijbel?

¹³ Algo similar ta serca di tuma luga den nos tempo. Miembronan di Nacionnan Uni lo ta envolvi den ehecucion di huicio divino. Mescos cu e proposito di e ehersito Romano di e prome siglo tawata pa mantene e Pax Romana (Pas Romano), asina Nacionnan Uni djawe ta sirbiendo supuestamente como un instrumento pa mantene pas. Aunke e ehersito Romano a purba garantisa un siguridad relativo atrabes di e mundo conoci di e tempo ei, ta net e forsanan militar aki a destrui Herusalem. Awe tambe ta mescos; profecia di Bijbel ta indica cu e potencianan militar den Nacionnan Uni lo mira religion como un estorbo y lo tuma accion pa destrui e Herusalem moderno, esta, cristiandad, y tambe e resto di Babilonia e Grandi. (Revelacion 17:12-17) Si, henter e imperio mundial di religion falso lo topa pronto cu su destruccion.

¹⁴ E destruccion di religion falso lo marca cuminsamento di e tribulacion grandi. Den e parti final di e tribulacion grandi, e sobra elementonan di e mundo malbado aki lo ser destrui. (Mateo 24:29, 30; Revelacion 16:14, 16) Cana pa medio di fe ta mantene nos mes alerta pa loke ta cumplimento di profecia di Bijbel. Nos no ta bai tras di e engaño cu Dios lo uza organisacionnan di hende manera Nacionnan Uni pa trece berdadero pas y siguridad. Pues, anto, nos forma di biba no mester duna muestra cu nos tin e conviccion cu “e gran dia di SEÑOR ta serca”?—Sofonias 1:14.

Kico Ta e Peliger di Cana pa Medio di Bista?

15. Apesar cu e nacion di Israel a mira con Dios a bendiciona nan, den ki trampa nan a cai?

¹⁵ E experencianan di Israel di antiguedad ta ilustra e peligernan di cana pa medio di bista ya cu esei lo debilita bo fe. Apesar cu e Israelitanan tawata testigo di e dies plaganan cu a humilia e diosnan falso di Egipto y despues a experencia e liberacion espectacular atrabes di Lama Cora, toch nan a desobedece Dios door di traha un bishe di oro y cuminsa ador’e. Nan a perde pasenshi y a cansa di warda riba Moises, kende “a tarda pa baha for di e sero.” (Exodo 32:1-4) Debi na nan falta di pasenshi, nan a bai adora un dios falso cu nan por a mira. Nan canamento pa medio di bista a ofende Yehova y esei a hiba na e ehecucion di “mas o menos tres mil homber.” (Exodo 32:25-29) Ta masha tristo ora un adorado di Yehova awe tuma decisionnan cu ta indica un falta di confiansa den Yehova y den su capasidad pa cumpli cu su promesanan!

16. Con aparencia di otro hende a afecta e Israelitanan?

¹⁶ Otro cos cu a afecta e Israelitanan na un  manera negativo tawata e aparencia di nan enemigonan. Cana pa medio di bista a pone nan tembla dilanti nan. (Numbernan 13:28, 32; Deuteronomio 1:28) Tambe nan a cuminsa desafia e autoridad cu Moises a ricibi di Dios y keha tocante loke nan a pasa aden. Debi na e falta di fe aki, nan a prefera Egipto cu su influencia di demoño, en bes di e Tera Priminti. (Numbernan 14:1-4; Salmo 106:24) Ora Yehova a mira e gran falta di respet cu su pueblo a mustra pa nan Rei invisibel, lo e mester a sinti su mes sumamente ofendi!

17. Kico a pone e Israelitanan rechasa e guia di Yehova den tempo di Samuel?

¹⁷ Den e tempo di profeta Samuel, e nacion faboreci di Israel a bolbe cai den e trampa di cana pa medio di bista. E pueblo a cuminsa desea un rei cu nan por a mira. Maske Yehova a demostra cu e tawata nan Rei, esaki no tawata suficiente pa pone nan cana pa medio di fe. (1 Samuel 8:4-9) Nan a comete e bobedad di rechasa e guia impecabel di Yehova y a prefera di ta manera e nacionnan rond di nan, y door di esei nan a perhudica nan mes.—1 Samuel 8:19, 20.

18. Ki les nos por siña tocante e peligernan di cana pa medio di bista?

¹⁸ Como Yehova su sirbidonan di e tempo actual, nos ta aprecia nos bon relacion cu Dios. Nos ta ansioso pa siña y aplica den nos bida lesnan balioso for di susesonan di pasado. (Romanonan 15:4) Ora e Israelitanan a cana pa medio di bista, nan a lubida cu Dios tawata dirigi nan via Moises. Si nos no paga tino, nos tambe por lubida cu Yehova Dios y e Moises Mayor, Hesucristo, ta dirigiendo e congregacion cristian djawe. (Revelacion 1:12-16) Nos tin cu tene cuidou pa no mira e parti di Yehova su organisacion aki riba tera for di un punto di bista humano. Esei lo por pone nos cuminsa keha y perde aprecio pa Yehova su representantenan y tambe pa e alimento spiritual cu “e esclabo fiel y prudente” ta percura.—Mateo 24:45.

Sea Determina pa Cana pa Medio di Fe

19, 20. Kico bo ta determina pa haci, y pakico?

¹⁹ Bijbel ta declara: “Nos lucha no ta contra carni y sanger, sino contra e gobernantenan, contra e podernan, contra e forsanan mundial di e scuridad aki, contra e forsanan spiritual di maldad den e luganan celestial.” (Efesionan 6:12) Nos enemigo principal ta Satanas e Diabel. Su meta ta pa caba cu nos fe den Yehova. Lo e no laga di recori na cualkier medio cu por pone nos desvia for di nos determinacion pa sirbi Dios. (1 Pedro 5:8) Kico lo proteha nos di wordo engaña pa e aparencia di e mundo di Satanas? Cana pa medio di fe, no pa medio di bista! Confiansa den Yehova su promesanan lo salvaguardia nos di ‘naufragio encuanto nos fe.’ (1 Timoteo 1:19) Si, laga nos anto ta determina pa sigui cana pa medio di fe, sigur di Yehova su bendicion. Y laga nos sigui pidi den oracion cu nos por scapa di tur e cosnan cu ta bai tuma luga den futuro cercano.—Lucas 21:36.

²⁰ Segun cu nos ta cana pa medio di fe y no pa medio di bista, nos tin un Ehempel magnifico pa mira ariba. Bijbel ta declara: “Cristo tambe a sufri pa boso, lagando un ehempel pa boso, pa boso sigui den su pasonan.” (1 Pedro 2:21) E siguiente articulo lo splica con nos por sigui cana manera el a cana.

Bo Ta Corda?

• Kico bo a siña for di e ehempelnan di Moises y Esau tocante cana pa medio di fe, no pa medio di bista?

• Kico ta un factor clave pa evita materialismo?

• Con cana pa medio di fe ta yuda nos evita e punto di bista cu e fin ta leu ainda?

• Pakico ta peligroso pa cana pa medio di bista?

[Preguntanan di Estudio]

[Plachi na pagina 17]

Moises a cana pa medio di fe

[Plachi na pagina 18]

Recreo ta stroba bo hopi biaha di ocupa bo mes cu actividadnan teocratico?

[Plachi na pagina 20]

Ora bo ta presta atencion na e Palabra di Dios, con esei ta proteha bo?