‘Mi Yudansa Ta Bin for di Yehova’

Hopi Hende Ta Acepta Adoracion di Yehova

PROFECIANAN di Bijbel relaciona cu nos tempo a mustra cu hende di tur nacion lo basha bai na e adoracion eleva di Yehova. Por ehempel, mediante profeta Hageo, Yehova Dios a declara: “Lo mi sagudi tur e nacionnan; y nan lo bin cu e rikesa di tur nacion; y lo mi yena e cas aki cu gloria.” (Hageo 2:7) Tanto Isaias como Mikeas a profetisa cu durante nos tempo—“den e ultimo dianan”—nacionnan y pueblonan lo adora Yehova den un forma aceptabel.—Isaias 2:2-4; Mikeas 4:1-4.

E profecianan ei realmente ta cumpliendo awe? E echonan ta papia pa nan mes. Durante e ultimo dies añanan so, mas cu 3.110.000 persona nobo a dedica nan mes na Yehova den mas cu 230 pais. Si, 6 di cada 10 Testigo di Yehova cu ta sirbiendo rond mundo actualmente a batisa durante e ultimo decada. Na 2004, como promedio, cada dos minuut e congregacion cristian a haya un miembro nobo acerca, esta, un sirbido dedica di Dios! *

Mescos cu den e prome siglo, awe ‘un gran cantidad a bira creyente y a comberti na Señor.’ Aunke e aumento di e cantidad riba su mes no ta un prueba di e bendicion di Dios, e ta duna evidencia si cu e “man di Señor” ta cu su pueblo. (Echonan 11:21) Kico ta pone miyones di hende adora Yehova? Y ki efecto e desaroyo aki tin riba bo personalmente?

Hende di Bon Curason Ta Ser Atrai

Hesus a declara den un forma hopi direct: “Ni un hende no por bin serca mi, si no ta e Tata cu a manda mi a hal’e.” (Huan 6:44) Pesei, finalmente, Yehova ta responsabel pa atrae hende cu tin “e disposicion corecto pa bida eterno.” (Echonan 13:48, NW) E spirito di Dios por pone hende realisa cu nan tin un necesidad spiritual. (Mateo 5:3) Un consenshi molestia, un buskeda desespera pa haya speransa of un crisis profundo por pone algun hende busca Dios y asina siña tocante su proposito pa humanidad.—Marco 7:26-30; Lucas 19:2-10.

Hopi hende ta sinti nan atrai na e adoracion di Yehova ya cu e programa di educacion biblico di e congregacion ta yuda nan haya contesta pa preguntanan cu tin nan confundi.

“Si ta existi un Dios, pakico ainda tin tanto inhusticia?” Esei tawata e pregunta cu a tormenta Davide, un narcotraficante na Italia. E no tawata echt interesa den religion, pesei el a haci e pregunta desafiante aki mas bien pa lanta un discusion. El a bisa: “Mi no a kere cu lo mi a bai haya un contesta rasonabel y combencente. Pero e Testigo cu a papia cu mi tawatin hopi pasenshi y a proba tur loke el a bisa uzando Bijbel. E combersacion ei tawatin un efecto profundo riba mi.” Awe, Davide a drecha su bida y ta sirbi Yehova.

 Otronan, den nan afan pa sa kico ta e nificacion y proposito di bida, ta haya e caminda cu ta hiba na e parti terenal di Yehova su organisacion. Un psikiatra na Zagreb, Croacia, cu tawata buscando un terapia pa su mes problemanan emocional, a bishita un colega famoso. Pa su sorpresa, e docter a dun’e e number di telefon di e sucursal di Testigo di Yehova na Zagreb, y tambe e nomber di un Testigo cu e tawata conoce. El a bis’e: “Wak, ami ta kere cu e hendenan aki por yuda bo. Si mi manda bo bai misa, unico cos cu lo bo haya ta estatua sin bida—ni un hende no ta bisa nada y tur cos ta scur. Mi no ta kere cu misa por yuda bo. Mi a manda otro pashent serca Testigonan di Yehova, y mi ta kere cu esei lo ta e mihor cos pa bo tambe.” Gustosamente, e Testigonan a bishit’e y poco despues a cuminsa un estudio di Bijbel cu ne. Despues di un par di siman, e psikiatra ei a declara yen di goso cu conocemento di e proposito di Dios a duna su bida nificacion.—Eclesiastes 12:13.

Hopi hende cu a haya nan cu un crisis personal a ripara cu ta e berdad di Bijbel so por duna berdadero consuelo. Na Grecia, un mucha homber di shete aña a cai for di dak di su scol y muri. Un par di luna despues, dos Testigo a topa su mama y a trata na consol’e door di papia cu ne tocante e speransa di resureccion. (Huan 5:28, 29) Ora e señora a tende esei, el a cuminsa yora. E ruman mohenan a puntr’e: “Si bo kier sa mas tocante Bijbel, ki dia nos por bishita bo?” “Aworaki mes!” el a contesta. E señora a hiba nan su cas y nan a cuminsa un estudio di Bijbel cu ne. Awe, henter su famia ta sirbiendo Yehova.

Bo Ta Haciendo Bo Parti?

E tipo di experencianan aki ta tumando luga rond mundo. Yehova ta recohiendo y ta entrenando un multitud grandi di adoradonan berdadero for di tur nacion. E grupo internacional aki tin e perspectiva di sobrevivi e benidero fin di e mundo malbado aki y sigui biba den un husto mundo nobo.—2 Pedro 3:13.

Como resultado di Yehova su bendicion, no tin nada cu por stroba e trabou di recohemento sin precedente aki di cumpli. (Isaias 55:10, 11; Mateo 24:3, 14) Abo ta participando celosamente den e actividad aki di predica e Reino? Si ta asina, bo por conta cu e respaldo di Dios y bo por ripiti e palabranan aki di e salmista: ‘Mi yudansa ta bin for di Yehova.’—Salmo 121:2.

[Nota]

[Comentario na pagina 9]

“Ni un hende no por bin serca mi, si no ta e Tata cu a manda mi a hal’e.”—HUAN 6:44

[Cuadro na pagina 8]

KEN TA TRAS DI E AUMENTO AKI?

“Si SEÑOR no traha e cas, ta en vano esnan cu ta trah’e ta traha cansa curpa.”—Salmo 127:1.

“Dios a duna crecemento. Asina anto, ni esun cu ta planta ni esun cu ta muha no ta nifica nada, sino Dios, kende ta duna crecemento.” —1 Corintionan 3:6, 7.