Ken Poncio Pilato Tawata?

“TE AWE tin hopi speculacion rond di e figura historico cu yama Pilato, un homber dificil pa combence y cu tawatin hopi menosprecio pa otro hende. Algun hende ta consider’e un santo, pa otronan e ta e representacion di debilidad humano, un bon ehempel di un politico cu ta dispuesto pa sacrifica un solo hende pa por mantene stabilidad.”—Pontius Pilate, di Ann Wroe.

Sea bo tambe tin un di e puntonan di bista ei of no, en berdad Poncio Pilato a traha un nomber pa su mes debi na e manera cu el a trata Hesucristo. Ken Pilato tawata? Kico nos sa di dje? Un mihor comprondemento di su posicion lo yuda nos compronde e susesonan sumamente importante cu a yega di tuma luga riba tera.

Posicion, Tarea y Poder

E emperado Romano Tiberio a nombra Pilato como gobernado di e provincia di Hudea na aña 26 di nos era. E prefectonan ei (alto funcionarionan) tawata hombernan di e asina yama orden di cabayeria—e clase noble di rango mas abou, contrario na e aristocratnan di senado. Probablemente Pilato a join e ehersito como un comandante militar di rango abou; durante e varios misionnan cu el a hiba a cabo el a subi di rango; y despues el a ser nombra como gobernado prome cu e tawatin 30 aña di edad.

Ora Pilato tawata na uniform, e tawata bisti un tunica di cuero y un corasa di metal. Ora e tawata den publico e tawata bisti un toga blanco cu un rand biña. Probablemente e tawatin cabei cortico y tawata completamente feita. Aunke algun hende ta kere cu el a bini di Spaña, su nomber ta indica cu e tawata pertenece na e tribu di Pontii—e noblenan Samnita di sur Italia.

Por lo general nan tawata manda e prefectonan di e rango di Pilato na teritorionan cu no ta civilisa. E Romanonan a considera Hudea un luga asina. Ademas di mantene orden, Pilato tawata supervisa e cobramento di belasting indirect y e belasting pa cabes. E cortenan Hudiu mes tawata encarga cu e maneho diario di casonan hudicial, pero e delitonan pa cua tawatin castigo di morto tawata wordo manda pa e gobernado, kende tawata e autoridad supremo di husticia.

Cu un personal chikito di escriba, asistent y mensahero, Pilato cu su esposa a biba den e stad portuario di Cesarea. Pilato tawatin e mando riba cinco trupa di infanteria di 500 pa 1.000 homber cada un y tambe un trupa di solda riba cabai (cabayeria) cu probablemente a consisti di 500 hende. Regularmente su soldanan tawata ehecuta kibradonan di lei. Den tempo di pas, ehecucionnan tawata tuma luga despues di huicionan informal, pero durante un lantamento, nan tawata mata e rebeldenan mesora y na gran cantidad. Por ehempel, e Romanonan a ehecuta 6.000 esclabo pa caba cu un rebelion cu Spartacus a conduci. Si a surgi dificultad na Hudea,  normalmente e gobernado por a acudi na e legado imperial (gobernado) na Siria, kende tawatin un legion grandi di solda na su encargo. Sinembargo, durante gran parti di Pilato su periodo di gobernacion, e legado tawata ausente, y Pilato tawatin cu caba cu disturbionan rapidamente.

E gobernadonan tawata comunica regularmente cu e emperado. Asuntonan cu tawatin di aber cu su dignidad of cualkier peliger pa autoridad Romano mester a ser raporta na e emperado despues di cua tawata emiti ordennan imperial. Kisas un gobernado tawata ansioso pa duna e emperado su propio version di susesonan den su provincia prome cu otro hende por a bai entrega keho contra dje. Cu e problemanan cu tawata desaroyando na Hudea, e precupacionnan ei tawata masha real pa Pilato.

Ademas di e relatonan di Evangelio, e historiadonan Flavio Yosefo y Filo ta e fuentenan principal di informacion riba Pilato. E historiado Romano Tacito tambe a declara cu Pilato a ehecuta Christus, for di kende cristiannan a haya nan nomber.

Hudiunan Proboca na Rabia

Yosefo ta bisa cu gobernadonan Romano a tene cuenta cu e obhecion cu Hudiunan tawatin contra trahamento di imagen, pesei nan a evita di trece emblema cu cara di emperado na Herusalem. Pa motibo cu Pilato si no a tene cuenta cu esei, Hudiunan rabia a core bai Cesarea pa entrega keho contra dje. Pa cinco dia largo, Pilato no a haci nada. Riba e di seis dia, el a manda su trupanan rondona e Hudiunan cu tawata protesta y a menasa di ehecuta nan si nan no a plama bai. Ora e Hudiunan a bisa cu nan lo a prefera di muri en bes di viola nan Lei, Pilato a cede y a duna ordo pa kita e imagennan.

Pilato tawata capas pa uza forsa. Yosefo ta papia di un incidente den cua e prefecto a cuminsa construi un acuaducto pa transporta awa pa Herusalem y a uza e fondonan di e caha di placa di tempel pa financia e proyecto. Pilato no a djis pone man riba e placa, pasobra e tawata sa cu lo tawata un sacrilegio pa plunder e tempel y cu esei lo a pone Hudiunan rabia pidi Tiberio pa manda yam’e bek. Pues tur cos ta mustra cu Pilato a haya cooperacion di e autoridadnan di tempel. Por a uza fondonan dedica, yama “corban”, legitimamente pa financia obranan publico pa beneficio di e stad. Pero miles di Hudiu a bini hunto pa expresa nan indignacion.

Pilato a laga su trupanan mescla den e multitud y el a duna nan ordo pa no uza spada sino pa bati esnan cu ta protesta cu klop. Aparentemente e kier a controla e multitud sin proboca un masacre. Ta parce cu esaki a surti efecto, aunke algun a muri si. Algun persona cu a informa Hesus cu Pilato a mescla sanger di e Galileonan cu nan sacrificionan, kisas lo tawata referiendo na e incidente aki.—Lucas 13:1.

“Kico Ta Berdad?”

Loke ta haci Pilato un figura notorio ta su investigacion di e acusacionnan cu e sacerdotenan principal y ancianonan Hudiu a lansa contra Hesus, esta cu e tawata bisa cu e ta Rei. Ora Pilato a tende di Hesus su mision pa duna testimonio di e berdad, e no a haya cu e preso a representa ningun peliger pa Roma. El a puntra “Kico ta berdad?” obviamente cu e pensamento cu e berdad tawata un concepto asina dificil pa compronde cu no tawatin nodi presta mucho atencion na dje. Na ki conclusion el a yega? “Mi no ta haya ningun culpa den e homber aki.”—Huan 18:37, 38; Lucas 23:4.

 Esei lo mester a pone fin na e huicio contra Hesus, pero e Hudiunan a insisti cu e tawata causando un lantamento den e nacion. E sacerdotenan principal a entrega Hesus na autoridadnan pa motibo di envidia, y Pilato tawata sa esei. E tawata sa tambe cu si el a libra Hesus esei lo a causa problema, algo cu e kier a evita. Tawatin suficiente problema caba, pasobra Barabas hunto cu algun hende mas tawata encarsela pa motibo di rebelion y asesinato. (Marco 15:7, 10; Lucas 23:2) Ademas, e disputanan anterior cu Pilato tawatin cu e Hudiunan a daña su reputacion serca Tiberio, y Tiberio tawata conoci como un homber cu tawata actua cu man duro contra gobernadonan incompetente. Pero, lo tawata un señal di debilidad pa cede na e Hudiunan. Pues Pilato tawata den un dilema.

Ora Pilato a tende di unda Hesus tawata, el a purba pasa e caso pa Herodes Antipas, gobernado di districto di Galilea. Ma ora e plan ei a fracasa, Pilato a purba laga e hendenan cu a bini hunto pafo di su palacio pidi libertad di Hesus, segun e custumber di libra un preso riba e dia di Pasco Hudiu. E multitud a grita pa libra Barabas.—Lucas 23:5-19.

Kisas Pilato a desea di haci loke ta corecto, pero tambe e kier a mantene su posicion y complace e multitud. Al fin y al cabo, el a considera su carera mas importante cu su consenshi y husticia. El a pidi poco awa, a laba man y bisa cu e ta inocente pa loke ta trata e morto cu el a caba di aproba. * Aunke Pilato a haya cu Hesus tawata inocente, el a laga sut’e y a permiti e soldanan haci mofa di dje, dal e y scupie.—Mateo 27:24-31.

Pilato a haci un intento final pa libra Hesus, pero e multitud a grita cu si el a haci esei, lo e no tawata amigo di Cesar. (Huan 19:12) Ora Pilato a tende esei, el a cede. Un erudito a bisa tocante e decision di Pilato: “E solucion tawata facil: ehecuta e homber. Tur loke por a bai perdi tawata e bida di un Hudiu aparentemente insignificante; lo tawata bobo pa laga un problema desaroya pa motibo di dje.”

Kico A Para di Pilato?

E ultimo incidente registra den e carera di Pilato tawata un otro conflicto. Yosefo ta bisa cu un gran cantidad di Samaritano arma a reuni riba Sero Gerizim cu e speransa di descubri tesoronan cu Moises supuestamente a dera einan. Pilato a interveni, y su trupanan a mata varios Samaritano. E Samaritanonan a bai keha Pilato serca su superior, Lucio Vitelio, gobernado di Siria. No ta mucho cla si Vitelio a pensa cu Pilato a bai demasiado leu of no. Loke si Yosefo ta bisa ta cu Vitelio a ordena Pilato pa bai Roma pa e duna cuenta na e emperado pa su accionnan. Sinembargo, Tiberio a muri prome cu Pilato a yega.

Un fuente ta bisa cu “na e haltura ei Pilato ta pasa di historia pa leyenda.” Pero hopi hende a purba completa e detayenan cu falta. Tin hende ta bisa cu Pilato a bira un cristian. E Etiopenan “cristian” a hacie un “santo.” Eusebio, kende a skirbi na cabamento di siglo 3 y cuminsamento di siglo 4, tawata e prome di hopi hende cu a bisa cu Pilato, mescos cu Hudas Iscariot, a comete suicidio. Sinembargo, ni un hende no sa realmente kico a pasa cu Pilato.

Aunke cu Pilato por tawata cabesura, y a trata hende na un forma seco y cu man duro, el a ocupa su funcion dies aña largo, mientras cu mayoria prefecto di Hudea a keda pa hopi menos tempo. Pesei, for di un punto di bista Romano, Pilato tawata competente. Nan a yam’e un cobarde kende den un forma reprochabel a laga tortura y mata Hesus pa scapa su cara. Otronan ta di opinion cu Pilato su deber no tawata asina tanto pa defende husticia, sino pa promove pas y interesnan Romano.

Tempo di Pilato cosnan tawata hopi diferente compara cu awor. Pero ningun hues lo ta husto si e condena un homber cu e mes a haya ta inocente. Si no tawata pa su encuentro cu Hesus, Poncio Pilato lo tawata djis un nomber mas den buki di historia.

[Nota]

[Plachi na pagina 11]

Na Cesarea a haya e inscripcion aki cu ta identifica Poncio Pilato como prefecto di Hudea