Pregunta di Lector

Computer y video game cu ta violento por afecta un persona su relacion cu Yehova?

Rei David di Israel di antiguedad a skirbi: “SEÑOR ta test hende husto y pecado. Di henter su curason e ta odia esnan cu ta gusta violencia.” (Salmo 11:5, BPK) Na e idioma original, e palabra pa “odia” por nifica ser un enemigo. Pesei, tur hende cu ta stima violencia ta haci nan mes enemigo di Dios. Pues, e pregunta cu nos tin cu considera ta: Nos por ta cultivando un amor pa violencia door di hunga cierto computer of video game?

Computer of video game violento ta glorifica uzo di arma. Hopi bes nan ta train esun cu ta hunga nan den e arte di guera. E revista The Economist a declara: “Militarnan di Merca ta depende hopi mas tanto riba computer game como medionan di entrenamento. Bo por cumpra algun di e weganan cu e militarnan ta uza den cualkier negoshi comercial cu ta bende e tipo di weganan aki.”

Ta berdad cu personanan cu ta hunga computer of video game violento no ta haci daño na hende real. Pero kico e forma di entretenimento aki ta indica di loke por ta sosodiendo cu nan curason? (Mateo 5:21, 22; Lucas 6:45) Kico lo bo pensa di un persona cu ta gusta hinca, tira, manca y mata hende imaginario? Kico si e persona aki ta pasa hopi ora tur siman satisfaciendo e fantasianan violento aki, te cu e ta casi bira adicto na e weganan ei? A lo menos lo bo yega na e conclusion cu e ta cultivando un amor pa violencia, mescos cu un persona cu ta wak pornografia ta cultiva deseonan inmoral.—Mateo 5:27-29.

Con intenso Yehova ta odia un persona cu ta stima violencia? David a bisa cu Yehova ta odi’e “di henter su curason.” Den tempo di Noe, Yehova a demostra con intenso e ta odia esnan cu ta stima violencia. Yehova a bisa Noe: “E fin di tur carni a bin mi dilanti, pasobra tera ta yen di violencia pa nan motibo; y mira, mi ta bai destrui nan hunto cu tera.” (Genesis 6:13) E Dios berdadero a destrui un mundo di humanidad completo pa motibo di nan camindanan violento. El a preserva solamente Noe y su famia—ocho persona cu no a stima violencia.—2 Pedro 2:5.

Hende cu kier ta amigo di Yehova ta “bati nan spadanan traha ploeg cu nan, y nan lo bati nan lansanan traha sker-pa-snui cu nan.” En bes di siña stima violencia, nan no ta siña of “train pa guera” mas. (Isaias 2:4) Pa nos keda amigo di Dios y no bira su enemigo, nos tin cu ‘aparta nos mes di maldad y haci bon.’ Nos tin cu “busca pas y siguie.”—1 Pedro 3:11.

Awor, kico si nos ta un persona cu ya ta hunga computer of video game violento? E ora ei nos mester tin e determinacion firme pa agrada Yehova y stop di practica loke e ta odia. Un cos sigur cu nos tin cu haci ta pidi Dios pa su spirito santo yuda nos pa nos stop cu e practica aki cu ta perhudica nos spiritualmente. Nos por stop cu ne si nos permiti cualidadnan manera pas, bondad y dominio propio yuda nos hiba un bida cu ta mas na harmonia cu e camindanan di Yehova.—Lucas 11:13; Galationan 5:22, 23.