Rechasa Pensamento Robes!

TEMPO cu e patriarca Job tawata pasando den dificultad, el a ricibi bishita di su tres amigonan Elifaz, Bildad y Zofar. Nan a bin pa expresa nan duele y pa consol’e. (Job 2:11) Esun cu tawatin mas bos y talbes esun di mas edad den nan tres tawata Elifaz. E tawata e prome cu a tuma palabra y e tawata esun cu a papia mas. Ki tipo di pensamento Elifaz a refleha den su tres discursonan?

Cordando un experencia sobrenatural cu Elifaz a yega di haya, el a bisa: “Un spirito a pasa dilanti di mi cara; cabei di mi cuero a reis. El a keda para, ma mi no por a discerni su aparencia; un figura tawata dilanti di mi wowo; tawatin silencio, e ora ei mi a tende un bos.” (Job 4:15, 16) Ki tipo di spirito a influencia e pensamento di Elifaz? E tono critico di e palabranan cu a sigui ta mustra cu e spirito sigur no tawata un di e angelnan husto di Dios. (Job 4:17, 18) Tawata trata aki di un spirito malbado. Sino, dicon Yehova a reprende Elifaz y su dos amigonan pa e mentiranan cu nan a papia? (Job 42:7) Si, Elifaz a haya su mes bou di influencia di demoño. Su comentarionan a refleha un pensamento malbado.

Ki ideanan nos por deduci for di e declaracionnan di Elifaz? Pakico ta importante pa nos tene cuidou cu pensamento robes? Y ki medida nos por tuma pa rechas’e?

‘E No Ta Pone Confiansa den Su Sirbidonan’

Den tur e tres discursonan, Elifaz a presenta e idea cu Dios ta asina exigente cu nada cu su sirbidonan haci no ta bon p’e. Elifaz a bisa Job: “E no ta pone confiansa ni sikiera den su sirbidonan, y e ta culpa su angelnan di eror.” (Job 4:18) Despues, papiando di Dios atrobe, Elifaz a bisa: “E no ta pone confiansa den su santonan, y e shelonan no ta puro den su bista.” (Job 15:15) Y el a puntra: “Ki probecho esei lo duna e Todopoderoso, cu bo ta husto?” (Job 22:3) Bildad tawata di acuerdo cu e punto di bista aki, pasobra el a declara: “Si ni luna no tin splendor, ni e streyanan no ta puro den [Dios] su bista.”—Job 25:5.

Nos mester tene cuidou pa no laga e tipo di pensamento ei influencia nos. E por pone nos pensa cu Dios ta demasiado exigente. E punto di bista aki ta afecta hustamente nos relacion cu Yehova. Ademas, si nos sucumbi na e tipo di rasonamento aki, con nos lo reacciona ora nos haya disiplina necesario? En bes di acepta e coreccion humildemente, nos curason por “bira raso contra SEÑOR”, y nos por bai carga rencor contra dje. (Proverbionan 19:3) Esei si lo ta spiritualmente desastroso!

 “Kico Hende Por Haci Cu Ta Resulta Util pa Dios?”

Un otro opinion estrechamente liga cu e idea cu Dios ta demasiado exigente ta cu hende ta inutil p’e. Den Elifaz su di tres discurso e ta lansa e pregunta: “Kico hende por haci cu ta resulta util pa Dios? Job, bo ta kere cu asta e hende di mas sabi por ta util pa Dios?” (Job 22:2, BPK) Elifaz tawata insinuando cu den bista di Dios hende no ta sirbi pa nada. Den e mesun liña di pensamento, Bildad a pretende: “Con anto un hende [“mortal”, NW] por ta husto dilanti di Dios? Of con esun cu a nace di mohe por ta puro?” (Job 25:4) Segun e rasonamento ei, con Job, un simpel homber mortal, por tribi di kere cu e tin un posicion husto dilanti Dios?

Awe algun hende ta tormenta nan mes cu sintimentonan negativo tocante nan mes. Talbes e manera cu nan a ser cria, e presionnan di bida cu nan mester a wanta, of e echo cu nan ta victima di odio racial of etnico a contribui na e sintimentonan aki. Pero Satanas y su demoñonan tambe tin placer den intimida hende. Si nan por influencia un persona pa pon’e sinti cu nada cu e haci no ta bon pa Dios Todopoderoso, e por cai mas lihe den desanimacion. Cu tempo, un persona asina por drif bai y asta aleha for di e Dios bibo.—Hebreonan 2:1; 3:12.

Edad avansa y problema cu salud ta pone limitacionnan riba nos. Loke nos ta haci aworaki den sirbishi di Reino por parce casi nada na comparacion cu loke nos tawata haci tempo cu nos tawata mas jong, mas saludabel y mas fuerte. Ta masha importante pa reconoce cu Satanas y su demoñonan kier pa nos sinti cu nada cu nos haci no ta bon pa Dios! Nos tin cu rechasa e pensamento ei.

Con pa Rechasa Pensamento Negativo

Apesar di e sufrimento cu Satanas e Diabel a trece riba dje, Job a bisa: “Te na mi morto lo mi no bandona mi integridad.” (Job 27:5) Pa motibo cu Job a stima Dios, e tawata determina pa mantene su integridad apesar di tur cos, y e no a laga nada cambia esei. Den esaki tin un clave pa rechasa pensamento negativo. Nos mester haya un bon comprondemento di e amor di Dios y cultiva un aprecio di curason pa esei. Tambe nos tin cu profundisa nos amor p’e. Nos ta logra esaki pa medio di un estudio regular di e Palabra di Dios y medita hunto cu oracion riba loke nos ta siña.

Por ehempel, Huan 3:16 ta bisa: “Dios a stima mundo asina tanto, cu el a duna su Yiu unigenito.” E amor profundo cu Yehova tin pa e mundo di humanidad, y e manera cu el a trata hende den transcurso di tempo ta demostra e amor ei. Ora nos ta medita riba e ehempelnan di pasado, nos mester haya mas aprecio pa Yehova y un amor mas profundo p’e, y esei ta yuda nos rechasa pensamento robes of negativo.

Considera e manera cu Yehova a trata Abraham un poco prome cu el a destrui Sodoma y Gomora. Abraham a puntra Yehova ocho biaha tocante Su huicio. Ningun momento so Yehova a mustra cu e ta irita of fada. Al contrario, su contestanan a trankilisa y consola Abraham. (Genesis 18:22-33) Despues, ora cu Dios a rescata Lot y su famia for di Sodoma, Lot a pidie si e por a hui bai na un stad den bicindario en bes di bai den e seronan. Yehova a contest’e: “Mira, mi ta concede bo e suplica aki tambe, pa no destrui e stad cu bo a papia di dje.” (Genesis 19:18-22) E relatonan aki ta pinta Yehova como un gobernante exigente, sin heful y autoritario? No. Nan ta mustra loke e realmente ta—un Soberano amoroso, bondadoso, misericordioso y comprensivo.

E ehempelnan di Aron, David y Manases di Israel di antiguedad ta contradeci e idea cu Dios ta gusta busca fout den hende y cu ni un hende no ta bon p’e. Aron tawata culpabel di tres fayo serio. El a traha un bishe di oro; hunto cu su ruman mohe Miriam el a critica Moises; y e no a santifica y honra Dios na Meriba. Toch Yehova a mira e bon den dje y a  permitie sigui sirbie como sumo sacerdote te na su morto.—Exodo 32:3, 4; Numbernan 12:1, 2; 20:9-13.

Rei David a comete pica grave durante su reinado. Esakinan a inclui adulterio, traha complot pa laga mata un hende inocente y tene un censo ilegal. Sinembargo, Yehova a tuma nota di David su repentimento y a pega lealmente na e aliansa di Reino door di a permitie sirbi como rei te na su morto.—2 Samuel 12:9; 1 Cronicanan 21:1-7.

Manases, rei di Hudea, a traha altar pa Baal, a pone su yiunan pasa door di candela, a promove spiritismo y a construi altar religioso falso den e pationan di e tempel. Ma despues di su arepentimento sinsero, Yehova a pordon’e, a libr’e for di cautiverio y a dun’e e reinado bek. (2 Cronicanan 33:1-13) E accionnan aki ta bini di un Dios pa kende ni un hende no ta bon? Claro cu no!

E Acusado Falso Mes Ta Culpabel

No mester sorprende nos cu ta Satanas mes ta e personificacion principal di e caracteristicanan cu e ta acusa Yehova di dje. Satanas ta cruel y exigente, y nos por mira esaki bon cla for di e practica di sacrificio di mucha relaciona cu adoracion falso den pasado. E Israelitanan apostata tawata kima nan yiu hombernan y nan yiu mohenan den candela—algo cu no a bin mes den Yehova su pensamento.—Yeremias 7:31.

Ta Satanas ta gusta busca fout den hende, no Yehova. Revelacion 12:10 ta referi na Satanas como “e acusado di nos rumannan, cu ta acusa nan di dia y anochi dilanti di nos Dios.” Di otro banda, e salmista a canta relaciona cu Yehova: “Si abo, SEÑOR, tuma inikidadnan na cuenta, o Señor, ken lo por a keda para? Ma serca bo tin pordon.”—Salmo 130:3, 4.

Ora Lo No Tin Pensamento Robes Mas

Angelnan lo mester a sinti un berdadero alivio ora Satanas e Diabel y su demoñonan a ser saca for di shelo! (Revelacion 12:7-9) Despues di esei, e spiritonan malbado aki no por tawatin ningun efecto mas riba e actividadnan di Yehova su famia di angelnan den shelo.—Daniel 10:13.

E habitantenan di tera lo alegra den futuro cercano. Pronto, un angel cu ta baha for di shelo cu e yabi di abismo y un cadena grandi den su man lo mara Satanas y su demoñonan y tira nan den e abismo di inactividad. (Revelacion 20:1-3) Esta un alivio nos lo haya ora esei sosode!

Mientrastanto, nos tin cu tene cuidou cu pensamento robes. Ki ora cu pensamento robes of negativo gatia drenta nos mente, nos tin cu rechasa nan door di fiha nos mente riba e amor di Yehova. E ora ei ‘e pas di Dios cu ta surpasa tur comprondemento lo warda nos curason y nos mente.’—Filipensenan 4:6, 7.

[Plachi na pagina 26]

Job a rechasa pensamento negativo

[Plachi na pagina 28]

Lot a haya sa cu Yehova ta un Soberano comprensivo