Sigui Cana Manera Hesucristo A Cana

“Esun cu bisa cu e ta permanece den [Dios] mester cana na mesun manera cu [Hesus] a cana.”—1 HUAN 2:6.

1, 2. Kico ta nifica fiha bo wowo riba Hesus?

APOSTEL Pablo a skirbi: “Cu perseverancia laga nos core e careda cu ta poni nos dilanti, fihando nos wowo riba Hesus, e autor y cumplido [“Agente Principal y Perfeccionador”, NW] di fe.” (Hebreonan 12:1, 2) Si nos kier hiba un bida fiel, nos tin cu fiha nos wowo riba Hesucristo.

² E palabra di e idioma original pa ‘fiha bo wowo’, manera e ta aparece den e Scritura Griego Cristian, ta nifica “dirigi bo atencion sin distraicion”, “kita bo bista for di un cos pa wak un otro”, “consentra bo bista riba.” Un buki di consulta ta remarca: “Na momento cu e coredo Griego den e stadion kita su atencion for di e pista y e meta cu e ta coriendo duro pa alcansa, y bira wak e multitudnan para na banda, su velosidad ta baha. Mescos ta pasa cu cristiannan.” Distraicionnan por stroba nos progreso spiritual. Nos mester fiha nos bista riba Hesucristo. Y kico nos ta busca den e Agente Principal? E expresion Griego traduci como “agente principal” ta nifica “lider principal, esun cu ta hiba delantera den tur cos y di e forma ei pone e ehempel.” Fiha nos wowo riba Hesus kiermen sigui su ehempel.

3, 4. (a) Pa nos cana manera Hesucristo a cana, kico nos tin cu haci? (b) Ki preguntanan merece nos atencion?

³ “Esun cu bisa cu e ta permanece den [Dios] mester cana na mesun manera cu [Hesus] a cana”, segun Bijbel. (1 Huan 2:6) Nos mester keda den union cu Dios door di warda Hesus su mandamentonan mescos cu el a warda esnan di su Tata.—Huan 15:10.

⁴ Pesei, pa nos cana manera Hesus a cana, nos tin cu fiha nos atencion riba dje como e Lider Principal y tambe sigui su pasonan cu sumo cuidou. E preguntanan importante pa considera relaciona cu esaki ta: Con Cristo ta guia nos awe? Segun cu nos ta imita su manera di cana, ki efecto esei mester tin riba nos? Kico ta e beneficionan di pega na e patronchi cu Hesucristo a establece?

Con Cristo Ta Dirigi Su Siguidonan

5. Prome cu Hesus a subi na shelo, kico el a priminti su siguidonan?

⁵ Prome cu Hesucristo resusita a subi na shelo el a aparece na su disipelnan y a encarga nan cu un trabou importante. El a bisa nan: “Bai y haci tur e nacionnan disipel di mi.” Na e ocasion ei  tambe e Lider Principal a priminti nan cu lo e ta cu nan segun cu nan ta cumpli cu e encargo aki, bisando: “Mi ta cu boso semper, te na fin di mundo.” (Mateo 28:19, 20) Den ki sentido Hesucristo ta hunto cu su siguidonan den e tempo aki di fin di mundo?

6, 7. Con Hesus ta dirigi nos pa medio di spirito santo?

⁶ Hesus a bisa: “Esun cu lo yuda boso, esta spirito santo cu Tata lo manda den mi nomber, lo siña boso tur cos y recorda boso tur loke ami a bisa boso.” (Huan 14:26, BPK) E spirito santo, manda den nomber di Hesus, ta guia nos y ta fortalece nos awe. E ta ilumina nos spiritualmente y ta yuda nos compronde “asta e profundidadnan di Dios.” (1 Corintionan 2:10) Ademas, e cualidadnan cu ta agrada Dios, esta, “amor, goso, pas, pasenshi, cariño, bondad, fieldad, mansedumbre, dominio propio” ta “fruta di e spirito.” (Galationan 5:22, 23) Cu yudansa di spirito santo, nos por cultiva e cualidadnan aki.

⁷ Segun cu nos ta studia e Scritura y haci esfuerso pa aplica loke nos ta siña, Yehova su spirito ta yuda nos haya mas sabiduria, discernimento, comprondemento, conocemento, huicio y discrecion. (Proverbionan 2:1-11) Ademas, spirito santo ta yuda nos wanta tentacion y prueba. (1 Corintionan 10:13; 2 Corintionan 4:7; Filipensenan 4:13, NW) Bijbel ta anima cristiannan pa ‘purifica nan mes di tur impuresa di carni y spirito, y asina perfecciona nan santidad.’ (2 Corintionan 7:1) Nos por echt biba segun Dios su rekisito di santidad, of limpiesa, sin yudansa di spirito santo? Un di e medionan cu Hesus ta uza pa guia nos awe ta spirito santo, locual Yehova Dios a autorisa su Yiu pa uza.—Mateo 28:18.

8, 9. Con Cristo ta uza “e esclabo fiel y prudente” pa dirigi e congregacion?

⁸ Considera un otro manera den cua Cristo ta dirigi e congregacion djawe. Papiando di su presencia y di fin di mundo, Hesus a bisa: “Ken anto ta e esclabo fiel y prudente cu su shon a laga encarga cu su cas pa duna nan nan cuminda na su debido tempo? Bendiciona ta e esclabo ei, cu su shon ta haya ta haci asina ora cu e bin. Di berdad mi ta bisa boso cu e lo lag’e keda na encargo di tur su propiedadnan.”—Mateo 24:3, 45-47.

⁹ E “shon” ta Hesucristo. E “esclabo” ta e grupo di cristiannan ungi riba tera. E clase di esclabo aki a haya e encargo pa cuida Hesus su interesnan riba tera y pa percura alimento spiritual na su debido tempo. Un grupo chikito di superintendente capas for di entre e “esclabo fiel y prudente” colectivo ta forma e Cuerpo Gobernante, y nan ta sirbi como representante di e clase di esclabo. Nan ta dirigi e obra mundial di predica e Reino y e suministro di alimento spiritual na ora. Pues Cristo ta dirigi e congregacion pa medio di e “esclabo fiel y prudente” ungi cu spirito y su Cuerpo Gobernante.

10. Ki actitud nos mester tin pa cu e ancianonan, y dicon?

¹⁰ Un otro manifestacion di e liderato di Cristo ta e ‘donnan den hende’, esta, anciano of superintendente cristian. El a duna esakinan “pa ekipa e santonan pa e trabou di sirbishi, pa edifica e curpa di Cristo.” (Efesionan 4:8, 11, 12) En conexion cu nan, Hebreonan 13:7 ta bisa: “Corda riba esnan cu a guia boso, cu a papia e palabra di Dios cu boso; y considerando e resultado di nan conducta, imita nan fe.” E ancianonan ta hiba delantera den e congregacion. Ya cu nan ta imita Cristo Hesus, nan fe ta bira algo digno pa imita. (1 Corintionan 11:1) Nos por mustra nos gratitud pa e areglo di anciano door di ta obediente y sumiso na e ‘donnan den hende’ aki.—Hebreonan 13:17.

11. Ki medio Cristo ta uza pa dirigi su siguidonan awe, y kico ta nifica cana manera el a cana?

¹¹ Si, Hesucristo ta dirigi su siguidonan  awe pa medio di spirito santo, “e esclabo fiel y prudente” y ancianonan di congregacion. Pa nos por cana manera Cristo a cana nos tin cu compronde su manera di dirigi nos, anto somete nos mes na esei. Tambe nos tin cu imita su manera di cana. Apostel Pedro a skirbi: “Boso a wordo yama pa e proposito aki, como cu Cristo tambe a sufri pa boso, lagando un ehempel pa boso, pa boso sigui den su pasonan.” (1 Pedro 2:21) Ki efecto siguimento di e ehempel perfecto di Hesus mester tin riba nos?

Sea Rasonabel Ora di Eherce Autoridad

12. Ki aspecto di Cristo su ehempel ta di interes particular pa e ancianonan di e congregacion?

¹² Aunke Hesus a ricibi mas autoridad cu cualkier otro hende for di su Tata, e tawata rasonabel den e manera cu el a eherce esaki. Tur miembro di e congregacion—specialmente ancianonan—mester “laga tur hende sa cu [nan] ta rasonabel.” (Filipensenan 4:5; 1 Timoteo 3:2, 3, NW) Siendo cu ancianonan tin cierto autoridad den e congregacion, ta esencial pa nan sigui e pasonan di Cristo ora nan ta eherce e autoridad aki.

13, 14. Con ancianonan por imita Cristo ora nan ta anima otro hende pa sirbi Dios?

¹³ Hesus a tene cuenta cu e limitacionnan di su disipelnan. E no a exigi mas di loke nan por a duna. (Huan 16:12) Sin pone presion riba nan, Hesus a anima su siguidonan pa “haci tur esfuerso” pa cumpli cu e boluntad di Dios. (Lucas 13:24) El a haci esaki door di guia nan y motiva nan. Mescos tambe, awe ancianonan cristian no ta forsa otro hende pa sirbi Dios door di laga nan sinti nan culpabel si nan no ta haciendo esei. Mas bien, nan ta anima nan pa sirbi Yehova motiva pa amor pa Dios, pa Hesus y pa nan prohimo.—Mateo 22:37-39.

¹⁴ Hesus no a haci mal uzo di e autoridad confia na dje door di controla bida di hende. Tampoco e no a fiha normanan inalcansabel ni establece yen di regla. Su sistema tawata pa motiva otro hende door di alcansa nan curason cu e principionan tras di e leinan duna mediante Moises. (Mateo 5:27, 28) Ancianonan tin cu imita Hesucristo door di no establece reglanan arbitrario ni insisti riba nan opinionnan personal. Den asuntonan di bistimento y areglo personal of recreo y diberticion, ancianonan ta purba alcansa curason door di uza principionan di e Palabra di Dios, manera esnan na Mikeas 6:8, 1 Corintionan 10:31-33 y 1 Timoteo 2:9, 10.

Mustra Consideracion y Pordona

15. Con Hesus a reacciona riba e fayonan di su disipelnan?

¹⁵ Cristo a laga un ehempel pa nos sigui den e manera cu el a trata cu e fayonan di su disipelnan. Tuma por ehempel dos incidente cu a tuma luga riba e ultimo anochi di su bida riba tera como hende. Despues cu nan a yega Getsemani, Hesus a “hiba Pedro y Santiago y Huan hunto cu ne” y a bisa nan pa ‘keda vigila.’ Anto “el a bai un poco mas leu for di nan, y a tira su curpa abou na suela, y a haci oracion.” Ora el a bini bek, el “a haya nan ta drumi.” Con Hesus a reacciona? El a bisa: “E spirito ta boluntario, ma e carni ta debil.” (Marco 14:32-38) En bes di rous Pedro, Santiago y Huan, el a mustra  consideracion! Riba e mesun anochi ei, Pedro a nenga Hesus tres bes. (Marco 14:66-72) Con Hesus a trata Pedro despues di esei? “Señor a resusita y a aparece na Simon [Pedro].” (Lucas 24:34) Bijbel ta bisa cu “el a aparece na Cefas, despues na e diesdosnan.” (1 Corintionan 15:5) En bes di carga rencor, Hesus a pordona e apostel arepenti y a fortalec’e. Cu tempo, Hesus a confia Pedro cu responsabilidadnan grandi.—Echonan 2:14; 8:14-17; 10:44, 45.

16. Con nos por cana manera Hesus a cana ora nos rumannan di fe faya cu nos of trata nos malo?

¹⁶ Ora nos rumannan di fe faya cu nos of trata nos malo pa motibo di imperfeccion humano, nos tambe no mester mustra consideracion y pordona mescos cu Hesus? Pedro a urgi su rumannan di fe: “Boso tur sea di acuerdo cu otro, teniendo compasion cu otro, stimando manera ruman, y sea misericordioso y humilde den spirito, no pagando malo cu malo of insulto cu insulto, ma mas bien dunando un bendicion.” (1 Pedro 3:8, 9) Kico nos lo haci ora un otro persona no trata nos manera Hesus lo a trata nos, por ehempel, door di no mustra consideracion of pordona? Asta e ora ei nos si mester purba imita Hesus y reacciona manera e lo a reacciona.—1 Huan 3:16.

Pone Interesnan di Reino na Prome Luga

17. Kico ta mustra cu Hesus a pone hacimento di e boluntad di Dios na prome luga den su bida?

¹⁷ Tin un manera mas cu nos tin cu cana manera Hesucristo a cana. Algo cu a ocupa un luga hopi importante den e bida di Hesus ta e obra di declara e bon nobo di e Reino di Dios. Despues cu Hesus a predica na un señora Samaritano banda di e stad di Sicar na Samaria, el a bisa su disipelnan: “Mi cuminda ta pa haci e boluntad di esun cu a manda mi, y pa cumpli cu su trabou.” (Huan 4:34) Hacimento di e boluntad di su Tata a sostene Hesus; p’e e tawata mescos cu cuminda cu ta nutri, satisface y refresca. No tin nada cu por duna nos bida mas nificacion y satisfaccion cu imita Hesus door di keda enfoca riba hacimento di Dios su boluntad.

18. Ki bendicion mayornan ta ricibi ora nan anima nan yiunan pa sigui e sirbishi di tempo completo?

¹⁸ Ora mayornan ta anima nan yiunan pa cuminsa e sirbishi di tempo completo, tanto nan como nan yiunan ta ricibi hopi bendicion. Un tata a anima su dos yiu hombernan morocho for di tempo cu nan tawata chikito pa pone e meta di traha pionero. Despues cu e morochonan a caba nan educacion seglar, nan a bira pionero. Pensando bek riba e goso cu e tata aki a experencia como resultado di esei, el a skirbi: “Nos yiunan no a desapunta nos. Nos por bisa cu un curason gradicido: ‘Yiunan ta un herencia di Yehova.’” (Salmo 127:3) Y con e sirbishi di tempo completo ta beneficia e yiunan? Un mama di cinco yiu a bisa: “E trabou di pionero a yuda tur mi yiunan desaroya un relacion mucho mas intimo cu Yehova, a mehora nan custumbernan di estudio personal, a yuda nan siña maneha nan tempo na un manera sabi y a yuda nan siña pone cosnan spiritual na prome luga den nan bida. Aunke nan tur tawatin cu haci hopi ahuste, ningun di nan tin duele di e rumbo cu nan a scohe den bida.”

19. Ki plannan pa futuro ta sabi pa hobennan considera?

 ¹⁹ Hobennan, kico ta boso plannan pa futuro? Boso ta busca pa sobresali den un of otro carera profesional? Of boso ta trahando riba un carera den e sirbishi di tempo completo? Pablo ta anima boso pa “mira bon con boso ta cana, no manera hende bobo, ma manera hende sabi, haciendo bon uzo di boso tempo, pasobra e dianan ta malo.” Anto e ta agrega: “Pesei anto, no sea bobo, ma compronde kico ta e boluntad di Señor.”—Efesionan 5:15-17.

Sea Leal

20, 21. Den ki sentido Hesus tawata leal, y con nos por imita su lealtad?

²⁰ Pa nos cana manera Hesus a cana, nos tin cu imita su lealtad. En conexion cu Hesus su lealtad, Bijbel ta declara: “Aunke cu e tawata existi den e forma di Dios, [e] no a considera igualdad cu Dios algo pa tene na dje, ma a bandona su mes gloria, tumando forma di un sirbido, siendo traha den e semehansa di hende. Y hayando su mes den condicion di hende, el a humilia su mes door di bira obedecido te na morto”, si, morto na un staca di tormento. Hesus a sostene e soberania di Yehova lealmente door di somete su mes na e boluntad di Dios p’e. El a bira obedecido te na morto na un staca di tormento. Nos mester tin e mesun “actitud” aki y somete nos mes lealmente pa haci e boluntad di Dios.—Filipensenan 2:5-8.

²¹ Hesus tawata fiel tambe na su apostelnan. Apesar di nan debilidad- y imperfeccionnan, Hesus a stima nan “te na fin.” (Huan 13:1) Di igual manera, nos no mester laga e imperfeccionnan di nos rumannan pone nos adopta un actitud critico.

Pega na e Ehempel Cu Hesus A Establece

22, 23. Kico ta e beneficionan di pega na e ehempel cu Hesus a establece?

²² Claro cu como hende imperfecto, nos no por cana precis den e pasonan di nos Ehempel perfecto. Sinembargo, loke si nos por haci ta sigui su pasonan cu sumo cuidou. Pa nos haci esei nos tin cu compronde y somete nos na Cristo su manera di dirigi y pega na e ehempel cu el a pone.

²³ Como imitado di Cristo nos ta haya hopi bendicion. Nos bida ta haya mas nificacion y satisfaccion pasobra nos ta enfoca riba haci e boluntad di Dios y no esun di nos mes. (Huan 5:30; 6:38) Nos tin un bon consenshi. Nos manera di cana ta bira ehemplar. Hesus a invita tur hende cu tawata cansa y carga pa bini serca dje y haya refrescamento pa nan alma. (Mateo 11:28-30) Ora nos sigui e ehempel di Hesus, nos tambe por refresca otro hende pa medio di nos asociacion. Pesei, laga nos sigui cana manera Hesus a cana.

Bo Ta Corda?

• Con Cristo ta dirigi su siguidonan awe?

• Con ancianonan por sigui e liderato di Cristo ora nan ta eherce e autoridad cu Dios a duna nan?

• Con nos por sigui e ehempel di Hesus ora nos ta trata cu e fayonan di otro hende?

• Con hobennan por pone interesnan di Reino na prome luga?

[Preguntanan di Estudio]

[Plachi na pagina 23]

Ancianonan cristian ta yuda nos sigui e liderato di Cristo

[Plachinan na pagina 24, 25]

Hobennan, ki plan boso ta trahando pa hiba un bida cristian yen di satisfaccion?