Ta Importa Kico Otro Hende Ta Pensa di Nos?

CASI tur hende ta gusta pa otro hende elogia nan. Compliment por pone nos sinti nos bon, ya cu e ta duna nos un sintimento cu nos a logra algo. Aprecio di otronan por asta pone nos desea di mehora nos prestacion. Sinembargo, nos ta sinti completamente diferente ora nos ripara cu algun hende no ta aprecia loke nos ta haci. Un reaccion friu of un critica cu ta refleha desprecio por kibra nos. Loke otro hende ta pensa di nos por tin un efecto profundo riba loke nos ta pensa di nos mes.

No ta bon pa nos ignora loke otro hende ta pensa di nos. Eigenlijk, nos por beneficia ora otro hende ta analisa nos conducta. Ora opinion di otro hende ta basa riba principionan moral halto, nan por beneficia nos y motiva nos pa haci loke ta corecto. (1 Corintionan 10:31-33) Sinembargo, hopi bes opinion publico ta masha inhusto. Pensa por ehempel riba e punto di bista troci cu e sacerdotenan principal y otro hendenan tawatin di Hesucristo ora nan “a cuminsa grita, bisando: ‘Na staca! Na staca cu ne!’” (Lucas 23:13, 21-25, NW) Ora ta trata di punto di bista cu ta basa riba informacion falso of influencia pa envidia of prehuicio, nos mester simplemente ignora nan. Pesei anto, nos tin cu eherce sano huicio y reacciona na un manera sensato riba opinion di otro hende.

Ken Su Opinion Ta Importante?

Nos kier tin aprobacion di hendenan pega cu nos den e adoracion berdadero. Esakinan ta entre otro, miembronan di nos famia cu ta den e berdad y otro rumannan cristian. (Romanonan 15:2; Colosensenan 3:18-21) E amor y respet di compañeronan di fe y e “intercambio di estimulo” entre nan ta nifica masha hopi pa nos. (Romanonan 1:11, 12, NW) ‘Cu humildad nos ta considera otronan mas importante cu nos mes.’ (Filipensenan 2:2-4) Ademas, nos ta haci esfuerso pa nos haya—y balora—e aprobacion di e “lidernan” of esnan cu ta hiba delantera entre nos, esta, e ancianonan den e congregacion.—Hebreonan 13:17.

Ta bon tambe pa nos tin “un bon reputacion serca esnan pafo” di e congregacion. (1 Timoteo 3:7) Nos ta haya un satisfaccion ora nos famianan, compañeronan di trabou y biciñanan cu no ta Testigo, tin respet pa nos! Acaso nos no ta purba haci un bon impresion riba e hendenan cu nos ta predica na dje pa asina nan reacciona faborablemente riba e mensahe di Reino? Si nos tin un bon reputacion den e comunidad como personanan moralmente limpi, recto y honesto, esei ta trece gloria pa Dios. (1 Pedro 2:12) Sinembargo, nunca nos mester compromete principionan biblico pa gana aprobacion di otro hende; ni nos no ta fingi pa impresiona nan. Nos tin cu admiti cu nos no por complace tur hende. Hesus a bisa: “Si boso tawata di mundo, mundo lo a stima loke ta di dje; ma pasobra boso no ta di mundo, ma ami a scohe boso for di den mundo, pesei mundo ta odia boso.” (Huan 15:19) Nos por haci algo pa gana respet di hende cu ta contra nos?

 Gana Respet di Opositornan

Hesus a spierta: “Tur hende lo odia boso pa causa di mi nomber, ma ta esun cu a persevera te na fin lo ta salba.” (Mateo 10:22) E odio aki hopi bes ta resulta den acusacionnan cruel contra nos. Funcionarionan di gobierno bou di influencia di prehuicio kisas ta cataloga nos como personanan “rebelde” of “cu ta lanta contra gobierno.” Opositornan abierto kisas ta pretende cu nos ta un secta problematico cu mester ser censura. (Echonan 28:22) Tin bes nos por contradeci e acusacionnan falso aki. Con asina? Door di sigui e conseho di apostel Pedro: ‘Sea dispuesto pa duna contesta na cada un cu pidi boso pa duna cuenta di e speransa cu tin den boso, sinembargo cu suavidad y reverencia.’ (1 Pedro 3:15) Ademas, nos mester uza “palabra sano cu no por wordo condena, pa e oponente wordo brongosa sin cu e tin nada malo di bisa di nos.”—Tito 2:8.

Mientras nos ta purba limpia nos nomber di reproche, nos no mester desanima of kibra ora hende difama nos inhustamente. Nan a acusa Hesus, e Yiu perfecto di Dios, di blasfemia, rebeldia y asta di spiritismo. (Mateo 9:3; Marco 3:22; Huan 19:12) Nan a difama of calumnia apostel Pablo. (1 Corintionan 4:13) Tanto Hesus como Pablo a ignora e tipo di criticanan ei y a keda ocupa cu nan trabou. (Mateo 15:14) Nan tawata sa cu nunca nan lo por a gana aprobacion di nan enemigonan ya cu “henter mundo ta bou di control di e malbado.” (1 Huan 5:19) Awe nos ta haya nos cu e mesun desafio. Nos no mester laga e mentiranan cu nos opositornan yen di odio ta plama tocante nos, intimida nos.—Mateo 5:11.

Opinionnan Cu Realmente Ta Importa

Loke hende ta pensa di nos ta varia hopi, dependiendo di nan motivacionnan y di loke nan a tende di nos. Tin hende ta aprecia y respeta nos, otronan ta insulta nos y odia nos. Sinembargo, tanten cu nos ta sigui principionan biblico, nos tin tur motibo pa ta felis y na pas.

Apostel Pablo a skirbi: “Tur Scritura ta inspira pa Dios y ta util pa siñansa, pa reprendemento, pa coreccion, pa educa den husticia, pa e hende di Dios por ta perfecto, ekipa pa tur bon obra.” (2 Timoteo 3:16, 17) Nos por gana e aprobacion di Yehova Dios y di su Yiu Hesucristo, door di acepta Dios su Palabra cu aprecio como nos guia den tur cos. Finalmente, e opinionnan cu mas ta importa ta esnan di Yehova y su Yiu. Loke nan ta pensa di nos ta mustra nos berdadero balor. Na final di cuenta, nos bida ta depende di nan aprobacion.—Huan 5:27; Santiago 1:12.

[Comentario na pagina 30]

“Di pafo ta parce cu mi no kier elogio pero di paden mi ta sclama p’e, y esei ta mi berguensa.”—POETA INDIO RABINDRANATH TAGORE

[Plachinan na pagina 31]

Opinionnan di nos compañeronan di fe ta importa

[Reconocemento pa Potret na pagina 30]

Culver Pictures