Yudansa pa Trata cu Nos Emocionnan

TA PARCE cu emocionnan negativo ta domina bo de bes en cuando? Bo ta rabia, sinti bo tristo of frustra lihe? Bo sa sinti cu ansiedadnan di bida ta caba cu bo? Kico lo por yuda?

Reaccionnan emocional ta un parti integral di bida humano. Ora nos tin nan bon controla, nan ta haci bida interesante. Sinembargo, Bijbel ta admiti cu “opresion ta haci un hende sabi bira loco.” (Eclesiastes 7:7) Ta ken no ta ser afecta emocionalmente door di loke ta sosode rond di dje, den un mundo yen di violencia y accidente? Sinembargo, e Scritura ta bisa tambe: “No tin nada mihor pa hende cu gosa den su actividadnan.” (Eclesiastes 3:22) Pesei, pa haci bida mas placentero, nos tin cu siña alegra nos mes door di cultiva emocionnan positivo. Con nos por cultiva emocionnan beneficioso y frena esnan negativo?

Door di tuma medidanan practico hopi bes nos por mengua e intensidad di nos emocionnan negativo. Por ehempel, ora nos ta angustia pa motibo di asuntonan cu no ta den nos man, lo no ta mihor pa nos cambia nos rutina of ambiente en bes di sinta carga nos mente cu precupacion? Loke podise por trece un poco alivio y duna nos un grado di felicidad ta dal un caminata trankil, scucha musica trankilisante, haci ehercicio vigoroso of haci un acto di bondad pa un persona den necesidad.—Echonan 20:35.

Sinembargo, e mihor manera pa deshaci di pensamentonan negativo ta door di pone nos confiansa den e Creador. Ora pensamentonan negativo ta persisti, nos tin cu haci oracion y ‘tira tur nos precupacion riba Dios.’ (1 Pedro 5:6, 7) Bijbel ta duna nos e garantia aki: “SEÑOR ta serca di e hende di curason kibra ... Hopi ta e afliccionnan di e husto, ma SEÑOR ta libr’e for di nan tur.” (Salmo 34:18, 19) Con nos por tin e confiansa cu Dios ta ‘Esun cu lo yuda nos y libra nos’? (Salmo 40:17) Nos por haya e confiansa ei door di studia Bijbel y reflexiona riba e ehempelnan bibo cu ta refleha Dios su interes personal den e bienestar di su sirbidonan.