Abo Ta “Rico pa cu Dios”?

UN DI e tantisimo parabolanan di Hesucristo cu ta pone bo pensa seriamente ta esun tocante un doño di tereno rico. Den su afan pa sigura su futuro, e doño di tereno a plania pa construi mangasinanan mas grandi. Sinembargo, Hesus a yama e homber di e ilustracion aki “irasonabel, [NW].” (Lucas 12:16-21) Varios traduccion di Bijbel manera Beibel Santu ta asta uza e palabra “bobo.” Dicon un descripcion asina negativo?

Aparentemente e homber rico aki no a tene cuenta cu Dios ora e tawata traha su plannan; ni e no a duna credito na Dios pa e echo cu su tereno tawata productivo. (Mateo 5:45) En bes di esei, el a broma: “Alma, bo tin hopi bienesnan montona pa hopi aña; tuma sosiego, come, bebe y fiesta.” Si, el a pensa cu e resultado di su esfuersonan lo a sirbi como un “muraya halto” cu lo a proteh’e.—Proverbionan 18:11.

Como un spiertamento contra un actitud arogante asina, disipel Santiago a skirbi: “Awor scucha, boso cu ta bisa: ‘Awe of mañan nos lo bai tal y tal stad, y keda un aña ayanan y haci negoshi y saca ganashi.’ Ni sa boso no sa con boso bida lo ta mañan. Boso ta djis un neblina cu ta aparece pa un poco tempo y despues ta disparce.”—Santiago 4:13, 14.

Na harmonia cu e palabranan aki, un bos a bisa e homber rico den e parabola di Hesus: “Abo, bobo! Awenochi mes bo alma lo wordo exigi for di bo; y awor ken lo bira doño di loke bo a prepara?” Mescos cu un neblina cu ta disparce, e homber rico lo muri prome cu e mira su soñonan cumpli. Nos ta capta e les? Hesus a bisa: “Asina ta e hende cu ta montona tesoro pa su mes, y no ta rico pa cu Dios.” Abo ta “rico pa cu Dios”?