Bo Consenshi Ta Bon Entrena?

ABO a yega di bisa, “mi curason ta bisa mi cu e no ta bon”, of, “mi no por haci loke bo ta manda mi haci; algo den mi ta bisa mi cu e no ta bon”? Esei tawata e “bos” di bo consenshi, e sentido interno di bon y malo, cu ta sea despensa bo of acusa bo. Si, nos tur a nace cu un consenshi.

Maske hende ta aleha for di Dios, toch e tin e capasidad general pa distingui bon for di malo. Esei ta pasobra hende a ser crea den imagen di Dios, pues te na cierto grado e ta refleha e cualidadnan di Dios manera sabiduria y husticia. (Genesis 1:26, 27) Relaciona cu esaki, apostel Pablo a skirbi bou di inspiracion divino: “Ora paganonan, kendenan no tin lei, di naturalesa ta haci e cosnan di lei, esakinan, aunke nan no tin lei, ta un lei pa nan mes, door cu nan ta mustra e obra di lei cu ta skirbi den nan curason, nan consenshi dunando testimonio, y nan pensamentonan acusando of defendiendo nan.” *—Romanonan 2:14, 15.

E don moral aki, hereda for di e prome homber, Adam, ta fungi como un “lei”, of regla di conducta, den hende di tur rasa y nacionalidad. Ta trata aki di e capasidad pa analisa nos mes y husga nos mes. (Romanonan 9:1) For di momento cu Adam cu Eva a kibra e lei di Dios, nan a manifesta e facultad aki door di bai sconde. (Genesis 3:7, 8) Un otro ehempel di con e consenshi ta traha ta e manera cu rei David a reacciona ora el a realisa cu el a peca door di a haci un censo. Bijbel ta bisa cu “David su curason a cuminsa golpi’e.”—2 Samuel 24:1-10, NW.

E capasidad pa wak nos mes y husga nos conducta por motiva nos pa dal e paso importante di repenti den e forma cu ta agrada Dios. David a skirbi: “Mientras cu mi a keda keto, mi curpa a para caba na nada door di mi kehamento henter dia. Mi a admiti mi pica na bo, y mi inikidad mi no a sconde; mi a bisa: ‘Lo mi confesa mi transgresionnan na SEÑOR’; y bo a pordona e culpa di mi pica.” (Salmo 32:3, 5) Pues, un consenshi cu ta traha por pone e pecado acudi bek na Dios, y yud’e reconoce cu e mester di e pordon di Dios y sigui Su camindanan.—Salmo 51:1-4, 9, 13-15.

Tambe nos consenshi ta duna nos spiertamento of guia ora nos tin cu tuma un decision moral. Kisas ta e aspecto aki di consenshi a duna Yosef (Hose) e presentimento cu tawata malo y moralmente inaceptabel pa comete adulterio—un pica contra Dios. Ta despues Yehova a inclui un lei spesifico contra adulterio den e Dies Mandamento cu el a duna Israel. (Genesis 39:1-9; Exodo 20:14) Ta obvio anto cu nos por saca mucho mas beneficio ora nos consenshi ta entrena pa guia nos y no djis pa husga nos. Bo consenshi ta traha den e manera ei?

 Con pa Train Nos Consenshi pa Tuma Bon Decision

Aunke nos a hereda e facultad di consenshi, lamentablemente e don aki ta deficiente. Maske humanidad a haya un cuminsamento perfecto, “tur [hende] a peca y ta falta e gloria di Dios.” (Romanonan 3:23) Debi cu pica y imperfeccion a contamina nos, kisas nos consenshi no ta un bon guia mas y podise e no ta traha completamente mas manera tawata e intencion original. (Romanonan 7:18-23) Ademas, factornan externo por afecta nos consenshi. Nos educacion, nos custumbernan local, nos creencianan y e ambiente den cua nos ta biba por influenci’e. Claro cu e inmoralidad y e degeneracion di normanan den e mundo aki no por ta e norma di un bon consenshi.

Pesei, un cristian mester haya e yudansa adicional di e normanan firme y husto haya den Bijbel, e Palabra di Dios. Esakinan por guia nos consenshi pa evalua asuntonan corectamente y rectifica nan. (2 Timoteo 3:16) Ora nos consenshi ta entrena segun e normanan di Dios, e ta den mihor condicion pa yuda nos evita accionnan cu ta perhudica nos moralmente y ta capasita nos pa “discerni loke ta bon y loke ta malo.” (Hebreonan 5:14) Sin e normanan di Dios, kisas nos consenshi no ta spierta nos mes ora nos ta desvia bai den un mal rumbo. Bijbel ta bisa: “Tin un caminda cu ta parce bon den bista di hende, ma su fin ta e caminda di morto.”—Proverbionan 16:25; 17:20.

Den algun area di bida, e Palabra di Dios ta duna guia y instruccion spesifico, y ta bon pa nos sigui nan. Di otro banda, tin hopi situacion pa cua no tin instruccion spesifico den Bijbel. Esakinan por tin di aber cu entre otro e tipo di trabou, cuido medico, recreo, paña di bisti y areglo personal cu nos ta scohe. No ta facil pa sa kico pa haci den cada caso y tuma e decision corecto. Pa e motibo ei nos mester tin e actitud di David, kende a pidi den oracion: “Haci mi conoce bo camindanan, o SEÑOR; siña mi bo bereanan. Guia mi den bo berdad y siña mi, pasobra ta abo ta e Dios di mi salbacion.” (Salmo 25:4, 5) Mas mihor nos compronde e pensamento- y camindanan di Dios, mas mihor nos lo por evalua nos circunstancianan cu exactitud y tuma decision cu un consenshi limpi.

Pesei, ora nos haya nos cu un pregunta of un decision, na prome luga nos tin cu medita riba e principionan di Bijbel cu lo por ta aplicabel. Algun di esakinan por ta:  respet pa mayor y cabes di famia (Colosensenan 3:18, 20); honrades den tur cos (Hebreonan 13:18); odia maldad (Salmo 97:10); busca pas (Romanonan 14:19); obediencia na autoridadnan estableci (Mateo 22:21; Romanonan 13:1-7); debocion exclusivo na Dios (Mateo 4:10); no ser parti di mundo (Huan 17:14); evita mal asociacion (1 Corintionan 15:33); modestia den bistimento y areglo personal (1 Timoteo 2:9, 10); y no pone otro hende trompica (Filipensenan 1:10, NW). Ora nos identifica e principio biblico en cuestion, esei por fortalece nos consenshi y yuda nos tuma e decision corecto.

Scucha Bo Consenshi

Pa nos consenshi por ta un yudansa pa nos, nos tin cu haci caso di dje. Ta unicamente ora nos responde mesora na e impulsonan di nos consenshi biblicamente entrena, nos ta beneficia di dje. Nos por compara e consenshi entrena cu e lusnan di advertencia di dashboard di un auto. Supone cu e lus cu ta indica cu ta falta azeta sende. Kico lo pasa si nos no tuma medida mesora y sigui core e auto? Nos por causa daño serio na e motor. Mescos tambe, nos consenshi, of bos interno, por alerta nos cu un cierto rumbo of accion ta robes. Ora nos compara nos norma- y balornan biblico cu algo cu nos a haci of ta pensa di haci, un lus di advertencia ta sende, mescos cu e lus di dashboard. Si nos haci caso di e spiertamento, esei no solamente lo yuda nos evita e mal consecuencianan di e accion incorecto sino tambe yuda nos consenshi sigui traha na e manera corecto.

Kico lo sosode si nos scohe pa ignora e spiertamento? Cu tempo, e consenshi por cria cayo y perde heful. Nos por compara e efecto di ignora e consenshi constantemente cu kimamento di nos cuero cu un hero cayente. E cicatris cu no tin nervio mas ta perde heful. (1 Timoteo 4:2) Un consenshi asina no ta reacciona mas ora nos comete pica, ni e no ta spierta nos pa evita di bolbe comete e mesun pica. Un consenshi cu a cria cayo ta ignora normanan di Bijbel di bon y malo y pesei e ta un consenshi deficiente, contamina. Esun cu tin un consenshi asina a ‘perde tur heful [moral]’ y a aleha for di Dios. (Efesionan 4:17-19; Tito 1:15) Ki un resultado tragico!

“Mantene un Bon Consenshi”

Si nos kier mantene un bon consenshi nos tin cu haci esfuerso constante. Apostel Pablo a declara: “Mi ta eherce mi mes continuamente pa mi no ser conciente di a comete ningun pica contra Dios ni contra hende.” (Echonan 24:16, NW) Como cristian, constantemente  Pablo tawata analisa y corigi su proceder pa haci sigur cu e no a comete ningun pica contra Dios. Pablo tawata sa cu finalmente ta Dios lo determina si loke nos haci ta bon of malo. (Romanonan 14:10-12; 1 Corintionan 4:4) Pablo a bisa: “Tur cos ta habri y bisto dilanti di wowo di esun cu nos tin di aber cu ne.”—Hebreonan 4:13.

Pablo a haci mencion tambe di no comete pica contra hende. Un bon ehempel di esaki ta su conseho na e cristiannan di Corinto relaciona cu “comemento di cosnan sacrifica na idolo.” Su punto tawata cu asta ora un cierto accion riba su mes kisas no ta cuestionabel for di e punto di bista di e Palabra di Dios, ta masha importante pa tene cuenta cu consenshi di otro hende. Si nos no haci esaki nos por ‘destrui nos rumannan [spiritualmente] pa kende Cristo a muri.’ Tambe nos por ruina nos propio relacion cu Dios.—1 Corintionan 8:4, 11-13; 10:23, 24.

Pues, sigui entrena bo consenshi y mantene un bon consenshi. Ora bo ta tuma decision, busca e guia di Dios. (Santiago 1:5) Studia e Palabra di Dios, y laga su principionan moldea bo mente y curason. (Proverbionan 2:3-5) Ora surgi asuntonan serio, consulta cu cristiannan maduro pa haci sigur cu bo tin e comprondemento corecto di e principionan biblico envolvi. (Proverbionan 12:15; Romanonan 14:1; Galationan 6:5) Considera ki efecto bo decision lo tin riba bo consenshi, ki efecto lo e tin riba otronan, y riba tur cos, ki efecto lo e tin riba bo relacion cu Yehova.—1 Timoteo 1:5, 18, 19.

Nos consenshi ta un don maraviyoso di nos amoroso Tata celestial, Yehova Dios. Door di uz’e na harmonia cu e boluntad di Esun cu a duna nos e, nos lo hala mas serca nos Creador. Segun cu nos ta haci esfuerso pa “mantene un bon consenshi” den tur loke nos ta haci, ta keda mas y mas bisto cu nos ta traha den imagen di Dios.—1 Pedro 3:16; Colosensenan 3:10.

[Nota]

[Plachi na pagina 13]

Bo consenshi ta entrena pa guia bo y no djis pa husga bo?

[Plachi na pagina 14]

Si nos kier tin un consenshi bon entrena nos tin cu siña y aplica principionan di Bijbel

[Plachi na pagina 15]

No ignora e spiertamentonan di bo consenshi