Bo Ta Reconoce e Señal di Hesus Su Presencia?

NINGUN hende no kier ta hopi malo ni haya nan diripiente den un desaster. Pa evita e calamidadnan ei, un persona sabi ta tuma nota di señalnan cu ta indica peliger y ta actua di acuerdo cu esakinan. Hesucristo a describi un cierto señal cu nos mester reconoce. E señal cu el a papia di dje lo tawatin un impacto rond mundo y lo a afecta humanidad completo, incluyendo abo y bo famia.

Hesus a papia di e Reino di Dios cu lo elimina maldad y haci e tera un paradijs. Su disipelnan tawata curioso pa sa tocante e asunto aki y nan tawata kier sa na ki tempo e Reino ei lo a bini. Nan a puntr’e: “Kico lo ta e señal di bo binida [“presencia”, NW] y di e fin di tempo?”—Mateo 24:3.

Hesus tawata sa cu despues di su morto y resureccion, hopi aña lo a pasa prome cu lo el a ser entronisa den shelo como e Rei Mesianico pa goberna riba humanidad. Siendo cu Hesus su entronisacion lo tawata invisibel pa hende, el a duna un señal cu lo a yuda su siguidonan reconoce su “presencia” y tambe “e fin di tempo.” E señal aki ta consisti di varios rasgo cu hunto ta identifica e tempo di Hesus su presencia.

E escritornan di e Evangelio, esta, Mateo, Marco y Lucas, cada un, a registra Hesus su contesta cuidadosamente. (Mateo, capitulo 24 y 25; Marco, capitulo 13; Lucas, capitulo 21) Tin otro escritornan di Bijbel cu a agrega detayenan na e señal. (2 Timoteo 3:1-5; 2 Pedro 3:3, 4; Revelacion 6:1-8; 11:18) Nos no tin suficiente espacio den e articulo aki pa analisa tur e detayenan, pero nos lo considera cinco caracteristica clave cu ta forma parti di e señal cu Hesus a menciona. Lo bo ripara cu e consideracion aki ta significativo y importante pa abo personalmente.—Wak e cuadro na pagina 6.

“Cambio Cu A Trece un Era Nobo”

“Nacion lo lanta contra nacion, y reino contra reino.” (Mateo 24:7) E revista Aleman Der Spiegel ta informa cu prome cu 1914 hende “a kere den un futuro maraviyoso cu mas libertad,  progreso y prosperidad.” Pero e aña ei tur cos a cambia. “E guera cu a cuminsa na augustus 1914 y termina na november 1918 tawata un suseso dramatico. El a trece un cambio historico, el a separa un era bieu for di un era nobo”, segun e revista GEO. Mas cu 60 miyon solda for di cinco continente a participa den e conflicto salbahe ei. Un averahe di mas o menos 6.000 solda tawata ser mata tur dia. Desde e tempo ei, historiadonan di tur generacion y di tur ideologia politico a mira “e añanan 1914 pa 1918 como añanan di cambio cu a trece un era nobo.”

Prome Guera Mundial a trece cambionan permanente pa sosiedad humano y a dirigi humanidad den e ultimo dianan di e sistema di cosnan aki. E resto di e siglo ei tawata caracterisa pa mas guera, conflictonan arma y terorismo. Y cosnan no a bira mihor durante e prome añanan di e siglo actual. Ademas di guera, mas rasgo di e señal a bira visibel.

Hamber, Pest y Temblor

“Lo tin hamber.” (Mateo 24:7) Durante e prome guera mundial, hamber a asota Europa, y for di e tempo ei scarsedad di cuminda a sigui afecta humanidad. Relaciona cu Rusia y Ucrania na 1933, historiado Alan Bullock a skirbi cu “multitudnan grandi di hende morto di hamber tawata cana dual rond e pais ... Hendenan tawata hopia cadavernan canto di caminda.” Na 1943 e periodista T. H. White tawata testigo di e hamber cu tawatin den e provincia Chines di Henan. El a skirbi: “Ora tin scarsedad di cuminda, casi tur cos ta bira comibel pa hende; cosnan cu nan ta garna, come y comberti den energia pa e curpa. Pero ta solamente hende cu ta na rand di morto por hinca den nan cabes pa come algo cu te asina leu no tawata comibel.” Ta tristo pa bisa cu hamber na Africa a bira algo casi normal durante e ultimo decadanan aki. Aunke e tera ta produci suficiente cuminda pa tur hende, e Organisacion di Nacionnan Uni pa Cuminda y Agricultura ta calcula cu 840 miyon hende rond mundo no tin casi nada di come.

“Pestilencia ... na varios luga.” (Lucas 21:11) E corant Süddeutsche Zeitung ta informa cu “segun calculo, grip Spaño [malesa di kabouter] a mata entre 20 pa 50 miyon hende na 1918, mas cu e plaga preto of prome guera mundial.” Desde e tempo ei un gran cantidad di hende a sufri di malesanan manera malaria, sende paga, tuberculosis, polio y colera. Y pasma mundo ta mira con AIDS ta plama cu un velosidad alarmante. Awor nos ta confronta e situacion frustrante den cua apesar di progreso asombroso den ciencia medico toch tin  malesa cu hende no por caba cu ne. E situacion contradictorio aki cu te awor hende no por compronde, ta yuda identifica e tempo extraordinario cu nos ta biba aden.

“Temblor.” (Mateo 24:7) Durante e ultimo 100 aña, temblor a kita bida di centenares di miles di hende. Segun un fuente, desde 1914 tawatin un promedio di 18 temblor pa aña cu e poder di causa daño na edificionan y habri tera. Anto rond di un bes pa aña tawatin temblornan mas destructivo cu suficiente forsa pa destrui edificionan completamente. Apesar di avancenan tecnologico, e cantidad di morto ta keda halto pasobra hopi di e stadnan cu ta creciendo rapidamente ta situa den areanan vulnerable pa temblor.

Bon Noticia!

Mayoria di e rasgonan di e señal di e ultimo dianan ta causa angustia. Pero Hesus a papia di bon noticia tambe.

“E evangelio aki di e reino lo wordo predica den henter mundo como un testimonio na tur nacion.” (Mateo 24:14) E trabou cu Hesus mes a cuminsa, esta, e predicacion di e bon nobo di e Reino, lo a yega su culminacion durante e ultimo dianan. Y esaki en berdad ta tumando luga. Testigonan di Yehova ta predica e mensahe di Bijbel y ta educa hende di bon curason pa aplica loke nan ta siña den nan bida diario. Actualmente mas cu seis miyon Testigo ta predica den 235 pais y den mas cu 400 idioma.

Tuma nota cu Hesus no a bisa cu tur actividad di bida lo a stop debi na e situacionnan angustioso di mundo. E no a bisa tampoco cu lo tin un rasgo di e señal cu lo afecta henter mundo. Mas bien, el a profetisa di hopi suseso cu hunto lo a forma un señal cu hende rond mundo lo por identifica.

En bes di enfoca riba susesonan individual, wak si bo no ta mira un patronchi, un señal cu ta consisti di varios rasgo cu ta afecta mundo  completo. Loke ta sosodiendo ta afecta abo y bo famia. Pero kisas bo ta puntra, dicon tin asina poco hende ta ripara esei?

Interes Personal na Prome Luga

“Prohibi pa landa”, “Voltahe Halto”, “Baha Velosidad.” Esakinan ta algun señal y spiertamento cu nos ta mira pero cu hopi bes nos ta ignora. Dicon? Ta facil pa nos wordo influencia door di loke nos ta pensa ta bon pa nos. Por ehempel, kisas nos ta sinti e necesidad di core mas duro cu lei ta permiti, of kisas nos tin masha gana di landa caminda ta prohibi. Pero no ta sabi pa ignora señal.

Por ehempel, avalanchanan den seronan di Alpen di Austria, Francia, Italia y Suisa sa causa morto di turistanan cu ta ignora e spiertamentonan cu ta urgi nan pa ski solamente riba rutanan sigur. Segun Süddeutsche Zeitung, hopi turista cu ta ignora e spiertamentonan aki tin e regla di conducta: Mester tin risico pa bo pasa pret. Pero lamentablemente, ora hende ignora spiertamento, e resultadonan por ta tragico.

Ki motibo hende tin pa no haci caso di e señal cu Hesus a describi? Podise golosidad tin nan ciega, apatia a haci nan indiferente, insiguridad tin nan paralisa, rutina di bida tin nan completamente ocupa of miedo di perde prestigio tin nan domina. Acaso un di e motibonan aki ta pone cu abo ta ignora e señal di Hesus su presencia? Lo no ta mas sabi pa reconoce e señal y actua di acuerdo cu ne?

Bida den Paradijs Riba Tera

Un cantidad creciente di hende ta haci caso di e señal di Hesus su presencia. Kristian, un yoncuman casa na Alemania, a skirbi: “Tin momentonan dificil. Sin duda nos ta bibando den e ‘ultimo dianan.’” E cu su casa ta dedica hopi tempo papiando cu otro hende tocante e Reino Mesianico. Frank ta biba na e mesun pais. E cu su casa ta anima otro hende cu e bon noticia di Bijbel. Frank a bisa: “Debi na e situacion di mundo, hopi hende ta ansioso pa sa kico tin den futuro. Nos ta purba anima nan cu e profecianan biblico tocante un paradijs riba tera.” Asina Kristian cu Frank ta yuda cumpli cu un rasgo di e señal di Hesus, esta, e predicacion di e evangelio of bon noticia di e Reino.—Mateo 24:14.

Ora e ultimo dianan yega nan culminacion, Hesus lo elimina e sistema bieu aki y e hendenan cu ta apoy’e. E ora ei e Reino Mesianico lo organisa trabounan cu lo comberti e tera aki den e Paradijs cu Bijbel a priminti. Humanidad lo ta liber di malesa y morto, y e mortonan lo ser resusita pa biba riba tera. Esaki ta e futuro maraviyoso cu ta spera hende cu ta reconoce e señal di temponan. Lo no ta sabi di nos parti pa siña mas di e señal y haya sa kico un persona tin cu haci pa e por sobrevivi e fin di e sistema di cosnan aki? Esaki sigur sigur mester ta un asunto di sumo importancia pa tur hende.—Huan 17:3.

[Comentario na pagina 4]

Hesus a profetisa di varios suseso cu hunto lo a forma un señal cu hende rond mundo lo por identifica

[Comentario na pagina 6]

Bo ta mira un patronchi, un señal cu ta consisti di varios rasgo cu ta afecta mundo completo?

[Cuadro/Plachi na pagina 6]

CARACTERISTICANAN DI E ULTIMO DIANAN

Guera manera nunca prome.—Mateo 24:7; Revelacion 6:4

Hamber.—Mateo 24:7; Revelacion 6:5, 6, 8

Pest.—Lucas 21:11; Revelacion 6:8

Aumento di maldad.—Mateo 24:12

Temblor.—Mateo 24:7

Temponan trabahoso.—2 Timoteo 3:1

Amor excesivo pa placa.—2 Timoteo 3:2

Desobediencia na mayornan.—2 Timoteo 3:2

Falta di amor.—2 Timoteo 3:3

Stimado di placer mas cu stimado di Dios.—2 Timoteo 3:4

Sin dominio propio.—2 Timoteo 3:3

Odiado di loke ta bon.—2 Timoteo 3:3

No ta tuma nota di e peliger cu ta menasa.—Mateo 24:39

Bofonadonan ta rechasa prueba di e ultimo dianan.—2 Pedro 3:3, 4

Predicacion mundial di e Reino di Dios.—Mateo 24:14

[Reconocemento pa Potret na pagina 5]

Soldanan di Guera Mundial I: Di e buki The World War —A Pictorial History, 1919; famia pober: AP Photo/Aijaz Rahi; victima di polio: © WHO/P. Virot