Interpretacion di Señal Ta un Asunto Serio!

“Na prome instante mi a pensa cu ta djis un tiki dolor di cabes nos yiu homber Andreas tawatin. Pero el a perde apetit y tawatin keintura halto. Su dolor di cabes a bira piyo, y mi a cuminsa precupa. Ora mi casa a bini cas, nos a bai docter cu Andreas. E docter a check e sintomanan y mesora el a manda Andreas hospital. E problema tawata mas serio cu un dolor di cabes. Andreas tawatin meningitis. El a haya tratamento y no a dura masha cu e tawata bon di salud atrobe.”—Gertrud, un mama na Alemania.

PROBABLEMENTE hopi mayor a yega di pasa den e experencia di Gertrud. Nan ta observa cierto señalnan cu ta indica cu nan yiu lo por ta malo. Aunke no ta tur malesa ta serio, mayornan no por permiti nan mes e luho di ignora sintomanan di malesa cu nan yiunan ta manifesta. Si un mayor dal e pasonan necesario ora e observa e señalnan, esaki por haci un diferencia grandi. Pues, e ta un asunto serio.

Esaki ta cierto tambe den asuntonan cu no tin di aber cu nos salud. Un bon ehempel di esaki ta e desaster di tsunami cu a tuma luga na december 2004 den areanan rond di Oceano Indico. Organisacionnan gubernamental na luganan manera Australia y Hawai a detecta e temblor fuerte den e parti nort di Sumatra y a premira e posibel consecuencianan desastroso cu esaki lo por tawatin. Sinembargo, no tawatin ningun sistema organisa pa e hendenan cu tawata den e zona di peliger haya spiertamento te pa nan reacciona riba esaki. Como resultado di esei mas cu 220.000 hende a perde nan bida.

Señalnan Hopi Mas Importante

Tempo Hesucristo tawata riba tera, el a duna su oyentenan un les den observa señal y actua di acuerdo cu nan. E tawata papia di algo hopi mas importante. Bijbel ta informa: “E farizeonan y saduceonan a bin, y pa pon’e na prueba nan a pidie pa mustra nan un señal for di shelo. Ma el a contesta y a bisa nan: ‘Ora bira tardi boso ta bisa: “Ta bai tin bon tempo, pasobra shelo ta cora.” Y mainta: “Awe ta bai tin mal tempo, pasobra shelo ta cora y tur tapa cu  nubia scur.” Boso sa con pa distingui [of, “interpreta”, NW] e aspecto di shelo, ma boso no por distingui [of, “interpreta”, NW] e señalnan di e temponan?’”—Mateo 16:1-3.

Door di menciona “e señalnan di e temponan”, Hesus a indica cu su oyentenan Hudiu den e prome siglo mester tawata conciente di e urgencia di e tempo cu nan tawata biba aden. E sistema di cosnan Hudiu tawata serca di bai experencia un catastrofe cu lo a afecta nan tur. Un par di dia prome cu Hesus su morto, el a papia cu su disipelnan tocante un otro señal: e señal di su presencia. Loke el a bisa nan na e ocasion ei ta di vital importancia pa tur hende awe.