“Keda Vigila”—E Ora di Huicio A Yega!

E informacion den e articulo di estudio aki ta basa riba e foyeto Keda Vigila! presenta na e congresonan di districto cu a ser teni rond mundo durante 2004/2005.

“Keda vigila ... pasobra boso no sa riba ki dia boso Señor ta bini.”—MATEO 24:42, NW.

1, 2. Cu kico Hesus a compara su binida?

KICO lo bo haci si bo sa cu tin un ladron ta cana rond pa busca moda di horta den casnan den bo bicindario? Lo bo keda alerta y vigila pa bo por proteha bo sernan keri y bo cosnan di balor. Un ladron no ta manda carta pa anuncia ki dia e ta bin, toch? Al contrario, e ta bin keto keto y na e ora cu menos bo ta spera.

² Na mas cu un ocasion, Hesus a uza e manera cu un ladron ta kibra y drenta como ilustracion. (Lucas 10:30; Huan 10:10) Relaciona cu susesonan cu lo a tuma luga durante e tempo di fin y cu lo a hiba na su yegada pa ehecuta huicio, Hesus a duna e spiertamento aki: “Pesei, keda vigila, pasobra boso no sa riba ki dia boso Señor ta bini. Pero sabi un cos, cu si e doño di cas tawata sa den ki warda e ladron tawata pa bini, e lo a keda lanta y lo no a permitie kibra y drenta su cas.” (Mateo 24:42, 43, NW) Pues Hesus a compara su binida cu bishita inespera di un ladron.

3, 4. (a) Kico haci caso di e spiertamento di Hesus tocante su binida ta encera? (b) Ki preguntanan ta surgi?

³ E ilustracion tawata apropiado, pasobra e dia exacto di Hesus su binida lo no tawata conoci. Mas prome, den e mesun profecia, Hesus a bisa: “Di e dia y e ora ei ningun hende no sa, ni e angelnan di shelo tampoco, ni e Yiu, sino e Tata so.” (Mateo 24:36) Pesei, Hesus a urgi su oyentenan: “Sea prepara.” (Mateo 24:44) Esnan cu ta haci caso di Hesus su spiertamento lo ta cla y prepara, comportando nan mes na un manera apropiado, ki ora cu e bini pa ehecuta e huicio di Yehova.

⁴ Ta surgi algun pregunta importante: E spiertamento di Hesus ta solamente pa hende di mundo, of cristiannan berdadero tambe mester “keda vigila”? Pakico ta urgente pa nos “keda vigila”, y kico esaki ta encera?

Spiertamento pa Ken?

5. Con nos por sa cu e spiertamento pa “keda vigila” ta dirigi na cristiannan berdadero?

⁵ Un cos ta sigur, pa hende di mundo cu no kier tende e spiertamento di e benidero calamidad, e binida di Señor lo ta mescos cu un ladron. (2 Pedro 3:3-7) Sinembargo, kico di cristiannan berdadero? Apostel Pablo a skirbi su rumannan den fe: “Boso mes sa masha bon cu e dia di Señor lo bin mescos cu un ladron den anochi.” (1 Tesalonicensenan 5:2) No tin duda den nos mente cu “e dia di Señor lo bini.” Pero esei ta nifica cu nos no mester keda vigila? Tuma nota cu ta na su disipelnan Hesus a bisa: “E Yiu di Hende lo bin na un ora cu boso no ta pensa.” (Mateo 24:44) Mas prome, ora Hesus a urgi su disipelnan pa sigui busca e Reino, el a spierta nan: “Sea prepara, pasobra e Yiu di Hende lo bin na un ora cu boso no ta pensa.” (Lucas 12:31, 40) No ta bisto anto cu Hesus tawatin su siguidonan na mente ora el a duna e spiertamento pa “keda vigila”?

6. Pakico nos mester “keda vigila”?

 ⁶ Pakico nos mester “keda vigila” y “prepara”? Hesus a splica: “Lo tin dos homber den cunucu; un lo wordo tuma y e otro lo wordo laga atras. Dos mohe lo ta mula na molina; un lo wordo tuma y e otro lo wordo laga atras.” (Mateo 24:40, 41) Esnan cu ta prepara lo “wordo tuma” of salba, ora e mundo malbado ser destrui. Otronan lo wordo “laga atras” pa destruccion pasobra nan a sigui nan propio estilo di bida egoista. Entre esakinan lo por tin hende cu un tempo tawata conoce e berdad pero cu no a keda vigila.

7. E echo cu nos no sa ki dia e fin lo yega ta permiti nos haci kico?

⁷ E echo cu nos no sa e dia exacto di e fin di e sistema bieu aki ta duna nos e oportunidad di demostra cu nos ta sirbi Dios cu un motibo puro. Con asina? Por parce cu e fin ta tarda hopi pa yega. Lamentablemente, algun cristian cu ta pensa asina a laga nan celo pa e sirbishi di Yehova fria. Sinembargo, ora nos a dedica nos bida na Yehova, nos a presenta nos mes na dje pa sirbie sin reserva. Hende cu conoce Yehova sa cu un manifestacion di celo na ultimo ora lo no impresion’e. E ta mira loke tin den nos curason.—1 Samuel 16:7.

8. Con amor pa Yehova ta motiva nos pa keda vigila?

⁸ Pa motibo di nos gran amor pa Yehova, nos mayor delicia ta pa haci su boluntad. (Salmo 40:8; Mateo 26:39) Y nos kier sirbi Yehova pa semper. E speransa ei no ta bira menos precioso djis pasobra nos tin cu warda un tiki mas di loke nos a verwacht. Mas importante ainda, nos ta keda vigila pasobra nos ta spera ansiosamente pa mira kico e dia di Yehova lo nifica pa realisacion di su proposito. Nos deseo sinsero pa agrada Dios lo motiva nos pa aplica e conseho di su Palabra y pone su Reino na prome luga den nos bida. (Mateo 6:33; 1 Huan 5:3) Laga nos considera ki influencia nos estado di alerta tin riba e decisionnan cu nos ta tuma y e manera cu nos ta hiba nos bida diario.

Den Ki Rumbo Bo Bida Ta Bayendo?

9. Pakico ta urgente pa hende di e mundo aki lanta ariba y compronde e nificacion di nos tempo?

⁹ Awe hopi hende ta conciente cu problemanan serio y susesonan spantoso a bira noticia di tur dia, y kisas nan no ta contento cu e rumbo cu nan propio bida ta bayendo. Pero nan sa realmente kico ta e nificacion di e condicionnan di mundo? Nan ta realisa cu nos ta bibando den e “conclusion di e sistema di cosnan”? (Mateo 24:3, NW) Nan ta reconoce cu e actitudnan egoista, violento y asta malbado cu ta reina actualmente ta identifica nos tempo como “e ultimo dianan”? (2 Timoteo 3:1-5) Ta urgente pa nan lanta ariba y compronde e nificacion di tur esaki y mira den ki rumbo nan bida ta bayendo.

10. Kico nos tin cu haci pa nos tin sigur cu nos ta keda vigila?

¹⁰ Kico di nos? Tur dia nos ta haya nos ta tuma decision relaciona cu nos trabou, nos salud, nos famia y nos adoracion. Nos sa kico Bijbel ta bisa y nos ta haci esfuerso pa aplic’e. Pesei, ta bon pa nos puntra nos mes: ‘Mi ta laga e precupacionnan di bida kita mi for di mi rumbo? Mi ta laga e filosofia- y manera di pensa di mundo determina kico mi ta scohe p’e?’ (Lucas 21:34-36; Colosensenan 2:8) Nos tin cu sigui demostra cu nos ta confia den Yehova cu henter nos curason y no depende riba nos mes comprondemento. (Proverbionan 3:5) Den e manera ei nos lo keda cu un ‘gara [firme] riba e berdadero bida’, esta, bida eterno den Dios su mundo nobo.—1 Timoteo 6:12, 19.

11-13. Kico nos por siña for di e ehempelnan di loke a sosode (a) den e dianan di Noe? (b) den e dianan di Lot?

¹¹ Bijbel ta contene hopi ehempel cu ta sirbi como spiertamento cu por yuda nos keda  vigila. Considera loke a sosode den tempo di Noe. Hopi tempo adelanta Dios a laga duna un spiertamento. Pero fuera di Noe y su famia, e hendenan no a haci caso. (2 Pedro 2:5) Relaciona cu esaki, Hesus a bisa: “Mescos cu den e dianan ei cu tawata prome cu e diluvio, nan tawata come y bebe, nan tawata casa y duna pa casa, te dia cu Noe a bai den e arca, y nan no a compronde te ora cu e diluvio a bin y a bai cu nan tur, asina e binida di e Yiu di Hende lo ta.” (Mateo 24:37-39) Kico nos por siña for di esei? Si cualkier un di nos ta laga precupacionnan di mundo—asta e actividadnan normal di bida—stroba nos den nos actividadnan spiritual cu Dios ta curasha nos pa mantene na prome luga, nos tin cu pensa seriamente riba nos situacion.—Romanonan 14:17.

¹² Pensa tambe riba e dianan di Lot. E stad Sodoma, caminda Lot y su famia a bai biba, tawata prospero den sentido material pero sumamente inmoral. Yehova a manda su angelnan pa destrui e stad. E angelnan a pura Lot y su famia pa hui for di Sodoma y no wak patras. Encurasha pa e angelnan, en berdad nan a bandona e stad. Pero e casa di Lot evidentemente no por a stop di pensa riba su cas na Sodoma. El a desobedece e ordo pa no wak patras y esei a cost’e su bida. (Genesis 19:15-26) Hesus a spierta nos tocante nos futuro: “Corda riba Lot su esposa.” Nos ta haci caso di e spiertamento ei?—Lucas 17:32.

¹³ E hendenan cu a tuma spiertamento divino na pecho a sobrevivi. Esei tawata cierto den e caso di Noe y su famia y di Lot y su yiu mohenan. (2 Pedro 2:9) Segun cu nos ta medita riba e spiertamento cu tin den e ehempelnan aki, e mensahe di liberacion cu nan ta contene pa amantenan di husticia tambe ta un animacion pa nos. Esei ta yena nos curason cu e speransa sigur cu Dios lo cumpli cu su promesa di trece “shelonan nobo y un tera nobo, den cua ta biba husticia.”—2 Pedro 3:13.

‘E Ora di Huicio A Yega’!

14, 15. (a) Kico “e ora” di huicio ta inclui? (b) Kico ta encera “teme Dios y dun’e gloria”?

¹⁴ Segun cu nos ta keda vigila, kico nos por spera? E buki di Revelacion ta describi na un manera progresivo con e proposito di Dios lo cumpli. Si nos kier ta prepara, ta importante pa nos actua na harmonia cu loke e ta bisa. E profecia ta describi na un manera bibo e susesonan cu lo tuma luga den “e dia di Señor”, cu a cuminsa ora Cristo a ser entronisa den shelo na aña 1914. (Revelacion 1:10) Revelacion ta hala nos atencion na un angel cu a haya e encargo pa declara e bon noticia of “evangelio eterno.” E ta proclama na bos halto: “Teme Dios y dun’e gloria, pasobra e ora di su huicio a yega.” (Revelacion 14:6, 7) “E ora” di huicio ei ta encera un periodo cortico cu ta inclui tanto e proclamacion como e ehecucion di e huicionan describi den e profecia ei. Nos ta bibando den e periodo ei actualmente.

¹⁵ Aworaki, prome cu e ora di huicio termina, e angel ta urgi nos: “Teme Dios y dun’e gloria.” Kico esaki ta encera? Temor apropiado di Dios mester pone nos aleha for di maldad. (Proverbionan 8:13) Si nos ta honra  Dios, nos lo scuch’e cu respet profundo. Nos lo no ta asina ocupa cu otro cos cu nos no tin tempo pa lesa su Palabra, Bijbel, cu regularidad. Nos lo no minimisa su conseho pa asisti na reunionnan cristian. (Hebreonan 10:24, 25) Nos lo aprecia e privilegio di por proclama e bon noticia di e Reino Mesianico di Dios, y lo hacie cu entusiasmo. Nos lo pone nos confiansa den Yehova na tur momento y cu henter nos curason. (Salmo 62:8) Como cu nos ta reconoce cu Yehova ta e Soberano Universal, nos ta honr’e door di somete nos mes na dje di buena gana como e Soberano di nos bida. Abo di berdad ta teme Dios y dun’e gloria den tur e maneranan ei?

16. Pakico nos por bisa cu e huicio contra Babilonia e Grandi menciona na Revelacion 14:8 a cumpli caba?

¹⁶ Revelacion capitulo 14 ta sigui describi mas suseso cu mester tuma luga den e ora di huicio. Babilonia e Grandi, e imperio mundial di religion falso, ta wordo menciona prome: “Un otro angel, un di dos, a sigui, bisando: ‘El a cai! Ata e gran Babilonia a cai.’” (Revelacion 14:8) Si, for di e punto di bista di Dios, Babilonia e Grandi a cai caba. Na 1919, e sirbidonan ungi di Yehova a ser libra for di e sclabitud na doctrina- y practicanan babilonico, cuanan a domina pueblo- y nacionnan pa miles di aña. (Revelacion 17:1, 5) Djei padilanti, nan por a dedica nan mes na promove adoracion berdadero. Desde e tempo ei, e predicacion mundial di e bon nobo di e Reino di Dios ta tumando luga.—Mateo 24:14.

17. Kico ta nifica sali for di Babilonia e Grandi?

¹⁷ Pero esei no ta e huicio completo di Dios contra Babilonia e Grandi. Su destruccion final lo yega pronto. (Revelacion 18:21) Cu bon motibo Bijbel ta urgi hende na tur parti: “Sali for di dje [Babilonia e Grandi] ... pa bo no participa den su picanan.” (Revelacion 18:4, 5) Con nos ta sali for di Babilonia e Grandi? Esaki ta encera mas cu djis corta tur laso cu religion falso. E influencia di Babilonia ta presente den hopi celebracion- y custumbernan popular, den e actitud permisivo di mundo pa cu sex, den e popularidad creciente di entretenimento cu ta encera spiritismo, y den hopi cos mas. Pa nos keda vigila, ta masha importante pa tanto den nos accionnan como den e deseonan di nos curason, nos duna prueba cu di berdad nos a separa for di Babilonia e Grandi den tur sentido.

18. En bista di loke Revelacion 14:9 y 10 ta trece dilanti, cristiannan alerta ta tene cuidou pa evita kico?

¹⁸ Revelacion 14:9 y 10 ta siña nos algo mas di ‘e ora di huicio.’ Un otro angel ta bisa: “Si un hende adora e bestia y su imagen, y ricibi un marca na su frenta of na su man, e tambe lo bebe di e biña di e furia di Dios.” Pakico? “E bestia y su imagen” ta simbolisa gobernacion humano cu no ta reconoce Yehova su soberania. Cristiannan alerta ta tene cuidou pa no laga nan mes wordo influencia of marca, sea door di nan  actitud of accion, como hende cu ta esclabo di esnan cu ta nenga di reconoce e soberania supremo di e Dios berdadero, Yehova. Cristiannan sa cu e Reino di Dios ya caba a ser estableci den shelo, cu lo e pone fin na tur gobernacion humano y cu lo e dura pa semper.—Daniel 2:44.

No Perde Bo Sentido di Urgencia!

19, 20. (a) Segun cu nos ta acercando e fin di e ultimo dianan, kico nos por tin sigur cu Satanas lo purba haci? (b) Kico nos mester ta determina pa haci?

¹⁹ Segun cu nos ta acercando e fin di e ultimo dianan, nos lo haya nos cu mas presion y tentacion. Mientras nos ta biba den e sistema bieu aki y ta sufri di nos propio imperfeccion, tin hopi cos cu ta afecta nos, manera problema cu salud, biehes, morto di un ser keri, dolor emocional, decepcion pa motibo di indiferencia pa cu nos esfuersonan pa predica e Palabra di Dios y hopi cos mas. No lubida nunca cu Satanas lo tin masha gana di probecha di e presionnan cu nos ta confronta pa e pone nos entrega—pa stop di predica e bon nobo of pa stop di biba segun e normanan di Dios. (Efesionan 6:11-13) Aworaki no ta ora pa nos perde nos sentido di urgencia relaciona cu e tempo den cua nos ta biba!

²⁰ Hesus tawata sa cu nos lo ta bou di hopi presion pa entrega, pesei el a conseha nos: “Keda vigila ... pasobra boso no sa riba ki dia boso Señor ta bini.” (Mateo 24:42, NW) Laga nos keda semper alerta anto ta den ki tempo nos ta bibando. Laga nos tene cuidou cu e trampanan di Satanas cu lo por pone nos baha man na actividad of bira inactivo. Laga nos ta dicidido pa predica e bon nobo di e Reino di Dios cu asta mas celo y determinacion. En berdad, laga nos mantene nos sentido di urgencia segun cu nos ta haci caso di e spiertamento di Hesus: “Keda vigila.” Asina nos lo trece honor pa Yehova y nos lo ta entre esnan cu ta den fila pa ricibi su bendicionnan eterno.

Con Lo Bo Contesta?

• Con nos por sa cu e spiertamento di Hesus pa “keda vigila” ta dirigi na cristiannan berdadero?

• Ki ehempelnan cu ta sirbi como spiertamento den Bijbel por yuda nos pa “keda vigila”?

• Kico ta e ora di huicio, y kico nos ta ser curasha pa haci prome cu e yega na su fin?

[Preguntanan di Estudio]

[Plachi na pagina 23]

Hesus a compara su binida cu bishita di un ladron

[Plachi na pagina 24]

E destruccion di Babilonia e Grandi ta acercando

[Plachinan na pagina 25]

Laga nos ta dicidido pa predica cu asta mas celo y determinacion