E Palabra di Yehova Ta Bibo

Puntonan Sobresaliente di e Buki di Prome Cronicanan

A PASA rond di 77 aña desde cu e Hudiunan a regresa nan patria for di exilio na Babilonia. E tempel cu gobernado Zorobabel a reconstrui a existi pa 55 aña caba. E motibo principal pakico e Hudiunan a regresa tawata pa restaura adoracion berdadero na Herusalem. Ma e pueblo no tawatin celo pa e adoracion di Yehova. Nan tawatin mester di hopi estimulo, y esei ta exactamente loke e buki biblico di Prome Cronicanan a ofrece.

Cu excepcion di e registronan genealogico, Prome Cronicanan ta abarca un periodo di mas o menos 40 aña, for di e morto di rei Saul te na e morto di rei David. Esun cu lo a skirbi e buki aki na aña 460 prome cu nos era ta e sacerdote Esdras. Prome Cronicanan ta di interes pa nos pasobra e ta duna nos un bon bista di e adoracion cu a tuma luga na e tempel y tambe e ta contene detayenan di e liña di desendencia cu a hiba na e Mesias. Como parti di e Palabra inspira di Dios, su mensahe ta fortifica nos fe y ta yuda nos compronde Bijbel mihor.—Hebreonan 4:12.

UN REGISTRO SIGNIFICATIVO DI NOMBER

(1 Cronicanan 1:1–9:44)

E registronan genealogico detaya cu Esdras a compila tawata necesario pa por lo menos tres motibo: pa garantisa cu ta hombernan autorisa so a sirbi como sacerdote, pa a yuda determina e herencia di tribu y pa a conserva e registro di e liña di desendencia cu a hiba na e Mesias. E registro ta bai bek den pasado di e Hudiunan y ta yega te na e prome homber. Di Adam pa Noe a pasa dies generacion, y di Noe pa Abraham tambe a pasa dies generacion. Despues cu e relato menciona e yiu hombernan di Ismael, e yiu hombernan di Abraham su concubina Ketura y e yiu hombernan di Esau, e ta enfoca riba e liña di desendencia di e 12 yiu hombernan di Israel.—1 Cronicanan 2:1.

Esdras ta duna un relato extenso di e desendientenan di Huda pasobra ta nan a produci e liña real di rei David. Di Abraham pa David a pasa 14 generacion y di David pa e deportacion pa Babilonia tambe a pasa 14 generacion. (1 Cronicanan 1:27, 34; 2:1-15; 3:1-17; Mateo 1:17) Despues Esdras ta menciona e desendientenan di e tribunan na banda oost di Riu Yordan, sigui pa e liña di desendencia di e yiu hombernan di Levi. (1 Cronicanan 5:1-24; 6:1) Despues ta bini un resumen di algun di e otro tribunan cu a keda parti west di Riu Yordan y di e liña di Benjamin en detaye. (1 Cronicanan 8:1) E nombernan di e prome habitantenan di Herusalem cu a bini bek for di nan cautiverio na Babilonia tambe ta ser menciona.—1 Cronicanan 9:1-16.

Contesta Riba Pregunta Biblico:

1:18—Ken tawata tata di Sala—Cainan of Arfaksad? (Lucas 3:35, 36) Arfaksad tawata tata di Sala. (Genesis 10:24; 11:12) Probablemente  e expresion “Cainan” na Lucas 3:36 ta un deformacion di e palabra “Caldeo.” Si esei ta e caso, anto e texto original lo a bisa, “yiu homber di e Caldeo Arfaksad.” Tambe ta existi e posibilidad cu e nombernan Cainan y Arfaksad ta referi na e mesun persona. Algo cu nos no por pasa por halto ta e echo cu e expresion “yiu homber di Cainan” no ta aparece den algun manuscrito.

2:15—David tawata e di shete yiu di Yese (Isai)? No. Yese tawatin ocho yiu homber, y David tawata esun di mas chikito. (1 Samuel 16:10, 11; 17:12) Tur cos ta mustra cu un di e yiu hombernan di Yese a muri sin cu e tawatin yiu. Unabes e yiu ei lo no tawatin ningun influencia riba e registronan genealogico, Esdras a omiti su nomber.

3:17—Pakico Lucas 3:27 ta bisa cu Salatiel, yiu homber di Jeconias, ta yiu di Neri? Jeconias tawata tata di Salatiel. Sinembargo, aparentemente Neri a duna Salatiel su yiu mohe como esposa. Lucas a referi na Neri su yerno como Neri su yiu homber mescos cu el a haci den e caso di Hose, bisando cu Hose ta yiu homber di Eli, tata di Maria.—Lucas 3:23.

3:17-19—Kico Zorobabel, Pedaias y Salatiel tawata di otro? Zorobabel tawata yiu homber di Pedaias, kende tawata un ruman homber di Salatiel. Sinembargo, tin biaha Bijbel ta yama Zorobabel yiu di Salatiel. (Mateo 1:12; Lucas 3:27) Esei probablemente ta debi cu Pedaias a muri y Salatiel a cria Zorobabel. Of por ta tambe cu Salatiel a muri sin laga yiu atras; pesei Pedaias a casa cu biuda di Salatiel, y Zorobabel a nace como prome yiu di e union ei.—Deuteronomio 25:5-10.

5:1, 2—Kico e echo cu Yosef (Hose) a haya e derecho di primogenito a nifica p’e? Esei a nifica cu Yosef a ricibi un porcion dobel di e herencia. (Deuteronomio 21:17) Asina el a bira tata di dos tribu—Efrain y Manases. Cada un di e otro yiu hombernan di Israel tawata tata di un tribu so.

Les pa Nos:

1:1–9:44. E genealogia di hende real ta proba cu henter e areglo di adoracion berdadero ta basa, no riba mito, sino riba echo.

4:9, 10. Yehova a contesta e oracion ferviente di Jabes pa den un esfera pacifico haci su teritorio mas grandi pa esaki por a acomoda mas hende temeroso di Dios. Nos tambe tin cu pidi Yehova di curason den oracion pa mas aumento segun cu nos ta participa cu entusiasmo den e obra di haci disipel.

5:10, 18-22. Den e dianan di rei Saul, e tribunan oost di Riu Yordan a derota e hagarenonan aunke e ultimonan aki tawata dos bes mas tanto cu e tribunan. Esaki ta debi cu e hombernan balente di e tribunan aki a confia den Yehova y a acudi na dje pa yudansa. Laga nos tene pleno confiansa den Yehova segun cu nos ta hiba nos guera spiritual contra enemigonan cu ta mucho mas tanto cu nos.—Efesionan 6:10-17.

9:26, 27. E wardadonan di porta Levita tawatin un funcion di hopi confiansa. A encarga nan cu e yabi di entrada pa e areanan santo di e tempel. Nan a demostra cu nan tawata confiabel den e trabou di habri e portanan tur dia. Nos a haya e encargo serio pa bai serca e hendenan den nos teritorio y yuda nan bini pa adora Yehova. Awor, nos no mester demostra di ta mes confiabel cu e wardadonan di porta Levita?

 DAVID A REINA COMO REI

(1 Cronicanan 10:1–29:30)

E relato ta cuminsa cu e historia di rei Saul y su tres yiu hombernan cu a muri den bataya contra e Filisteonan na Sero Gilboa. David, yiu di Yese, a ser haci rei riba e tribu di Huda. Hombernan for di tur tribu a bini Hebron y a hacie rei riba henter Israel. (1 Cronicanan 11:1-3) Pronto despues di esei, el a captura Herusalem. Despues, e Israelitanan a trece e arca di pacto Herusalem “cu grito y cu zonido di cacho, cu ... harpa y salterio [“instrumento di cuerde”, NW].”—1 Cronicanan 15:28.

David a expresa su deseo pa construi un cas pa e Dios berdadero. Aunke Yehova a reserva e honor ei pa Salomon, el a sera un pacto cu David pa un Reino. Durante David su campaña contra e enemigonan di Israel, Yehova a dun’e un victoria tras di otro. Un censo ilegal a resulta den morto di 70.000 Israelita. Despues cu David a ricibi instruccion di un angel pa traha un altar pa Yehova, el a cumpra un luga for di un Jebuseo cu yama Ornan. David a cuminsa haci “preparacionnan amplio” pa construccion di un cas “sumamente magnifico” pa Yehova na e sitio ei. (1 Cronicanan 22:5) David a organisa sirbishinan Levitico, describi aki den Prome Cronicanan cu mas detaye cu den cualkier otro caminda den e Scritura. E rei y e pueblo a duna contribucionnan generoso pa e tempel. Despues di un reinado di 40 aña, David a muri “yen [“satisfecho”, NW] di dia, rikesa y honor; y su yiu homber Salomon a [cuminsa] reina na su luga.”—1 Cronicanan 29:28.

Contesta Riba Pregunta Biblico:

11:11—Pakico e cantidad di hende mata ta 300 y no 800 manera e ta ser menciona den e relato paralelo na 2 Samuel 23:8? E cabesante di David su tres hombernan di mas balente tawata Jasobeam of Joseb-basebet. E otro dos hombernan poderoso tawata Eleazar y Sama. (2 Samuel 23:8-11) E motibo pa e diferencia den e dos relatonan ta sinta den e echo cu probablemente nan ta referi na dos diferente hazaña realisa door di e mesun persona.

11:20, 21—Kico tawata Abisai su posicion na comparacion cu e tres hombernan principal poderoso di David? Abisai no tawata un di e tres hombernan poderoso cu a sirbi David. Sinembargo, manera 2 Samuel 23:18 y 19 ta trece dilanti, e tawata e cabesante di 30 guerero y tawata mas honra cu nan tur. Abisai tawatin e mesun reputacion cu e tres hombernan principal poderoso pasobra el a realisa un acto poderoso paresido na esun di Jasobeam.

12:8—Den ki sentido e caranan di e guereronan Gadita tawata manera “cara di leon”? E hombernan balente aki a tuma parti pa David den e desierto. Nan cabei a crece bira largo, y e boshi di cabei ei a duna nan un aspecto feros, manera di leon.

13:5—Kico ta e “Sihor di Egipto”? Siendo cu “Sihor” ta nifica basicamente “riu” na Hebreo, algun hende ta pensa cu e expresion aki ta referi na un taki di Riu Nilo. Nan ta pensa cu “e Riu di Egipto” menciona na Numbernan 34:5 tambe ta referi na e mesun “riu.” Sinembargo, na Numbernan 34:5 a uza un otro palabra Hebreo cu por wordo traduci mas corectamente como “roi.” Pesei, aparentemente e “Sihor di Egipto” ta “e roi di Egipto”—un ravijn largo cu ta marca e frontera suitwest di e Tera Priminti.—Numbernan 34:2, 5; Genesis 15:18.

16:30—Kico nos tin cu compronde for di e  palabra “tembla” dilanti Yehova? Na Hebreo e expresion traduci como “tembla” ta nifica literalmente “haya dolornan severo” y aki e ta ser uza figurativamente pa transmiti e idea di temor respetuoso y respet profundo pa Yehova.

16:1, 37-40; 21:29, 30; 22:19—Ki areglo pa adoracion tawata na vigor na Israel for di e tempo cu e Arca a ser hiba Herusalem te dia e tempel a ser construi? Dia David a trece e Arca Herusalem y a pon’e den e tent cu el a laga traha, pa hopi aña e Arca no tawata den e tabernakel. Despues cu a hiba e Arca Herusalem, el a keda den e tent einan. E tabernakel tawata na Gabaon, caminda e sumo sacerdote Sadok y su rumannan a efectua e sacrificionan prescribi den e Lei. E areglo aki a continua te dia a caba di traha e tempel di Herusalem. Ora e tempel tawata cla, a trece e tabernakel for di Gabaon pa Herusalem, y a pone e Arca den e Santisimo di e tempel.—1 Reinan 8:4, 6.

Les pa Nos:

13:11. En bes di rabia y culpa Yehova ora nos intentonan fracasa, nos mester analisa e situacion y purba mira kico a causa e fayo. Sin duda, David a haci esei. El a siña for di su fayo y despues a logra trece e Arca Herusalem, uzando e metodo corecto. *

14:10, 13-16; 22:17-19. Prome cu nos haci cualkier cos cu por afecta nos spiritualmente, semper nos mester acerca Yehova den oracion y busca su guia.

16:23-29. E adoracion di Yehova mester ta nos prome interes den bida.

18:3. Yehova ta e Cumplidor di su promesanan. Pa medio di David, el a cumpli cu su promesa di duna e desendientenan di Abraham henter e tera di Canan, cu ta extende “for di e riu di Egipto te na e riu grandi, Riu Eufrates.”—Genesis 15:18; 1 Cronicanan 13:5.

21:13-15. Yehova a manda e angel pa stop e plaga pasobra E tawatin duele di mira Su pueblo sufri. En berdad, “su misericordianan ta masha grandi mes.” *

22:5, 9; 29:3-5, 14-16. Aunke David no a haya e encargo pa construi e tempel di Yehova, el a manifesta un spirito generoso. Con bin? Pasobra el a realisa cu tur loke el a yega na dje tawata debi na e bondad di Yehova. E mesun sintimentonan di gratitud mester impulsa nos pa nos tambe tin un spirito generoso.

24:7-18. Dia e angel di Yehova a presenta na Zacarias, tata di Huan Bautista, y anuncia e benidero nacemento di Huan, e areglo di 24 division sacerdotal cu David a institui tawata na vigor. Como miembro di “e division di Abias”, e tempo ei tawata Zacarias su turno pa sirbi na e tempel. (Lucas 1:5, 8, 9) Ta bon cla anto cu adoracion berdadero tin di aber cu personahenan historico, no mitologico. Ora nos ta coopera lealmente cu “e esclabo fiel y prudente” en conexion cu Yehova su adoracion bon organisa awe, nos ta haya hopi bendicion.—Mateo 24:45.

Sirbi Yehova “cu un Alma Gososo”

No ta registronan genealogico so Prome Cronicanan ta contene. E ta relata tambe con David a trece e arca di pacto Herusalem, e ta papia di su gran victorianan, di e preparacion pa construccion di e tempel y con e divisionnan di sirbishi di e sacerdotenan Levita a ser estableci. Sin duda, tur loke Esdras a relata den Prome Cronicanan lo mester a beneficia e Israelitanan, y yuda nan renoba nan celo pa e adoracion di Yehova na e tempel.

David a duna un bon ehempel door di pone e adoracion di Yehova na prome luga den su bida! En bes di busca privilegio special pa su mes, David a busca tur manera pa haci e boluntad di Dios. Nos ta haya un bunita animacion pa aplica su conseho pa sirbi Yehova “cu un curason completo y cu un alma gososo.”—1 Cronicanan 28:9, NW.

[Nota]

[Tabel/Plachi na pagina 8-11]

(Pa e texto den su formato completo , wak e publicacion)

4026 prome cu nos era Adam E generacionnan for di Adam te

Noe (1.056 aña)

130 aña ⇩

 

Set

 

105 ⇩

 

Enos

 

90 ⇩

 

Cainan

 

70 ⇩

 

Mahalaleel

 

65 ⇩

 

Jared

 

162 ⇩

 

Enok

 

65 ⇩

 

Matusalen

 

187 ⇩

 

Lamek

 

182 ⇩

 

2970 prome cu nos era Noe 2970 prome cu nos era NOE a nace

E generacionnan for di Noe te

502 aña ⇩ Abraham (952 aña)

 

Sem

E DILUVIO 2370 prome cu nos era

100 ⇩

 

Arfaksad

 

35 ⇩

 

Sala

 

30 ⇩

 

Heber

 

34 ⇩

 

Peleg

 

30 ⇩

 

Reu

 

32 ⇩

 

Serug

 

30 ⇩

 

Nacor

 

29 ⇩

 

Tare

 

130 ⇩

 

2018 prome cu nos era Abraham 2018 prome cu nos era ABRAHAM a nace

Di Abraham pa David:

100 aña 14 generacion (911 aña)

 

Isaak

 

60 ⇩

 

Yacob

 

c.88 ⇩

 

Huda

 

⇩

 

Fares

 

⇩

 

Hezron

 

⇩

 

Ram

 

⇩

 

Aminadab

 

⇩

 

Nason

 

⇩

 

Salmon

 

⇩

 

Boaz

 

⇩

 

Obed

 

⇩

 

Yese

 

⇩

 

1107 prome cu nos era DAVID a nace