Cultiva Berdadero Humildad
Cultiva Berdadero Humildad
“Bo ta salba un pueblo humilde.”—2 SAMUEL 22:28, BPK.
1, 2. Kico hopi gobernante di mundo tawatin en comun?
E PIRAMIDANAN di Egipto ta duna evidencia di e hombernan cu un tempo a goberna e pais ei. Otronan cu a laga nan marca den historia tawata Senakerib di Asiria, Alehandro e Grandi di Grecia y Julio Cesar di Roma. Tur e gobernantenan ei tawatin algo en comun. Nan no tawata conoci como hombernan cu a desplega berdadero humildad.—Mateo 20:25, 26.
2 Bo ta kere cu cualkier un di nan tawatin e custumber di haci esfuerso den su reino pa haya e ciudadanonan humilde cu tawatin mester di consuelo? Bo ta kere cu nan lo tawata bishita ciudadanonan abati den nan casnan modesto pa lanta nan animo? Claro cu no! Nan actitud pa cu criaturanan humano di condicion humilde ta hopi diferente for di esun di e Gobernante Supremo di universo, Yehova Dios!
E Ehempel di Mas Grandi di Humildad
3. Con e Gobernante Supremo ta trata su subditonan humano?
3 Yehova su gloria y grandesa ta inscudriñabel, pero “[su] wowo ... ta move bai bin door di henter tera, pa e por sostene fuertemente esnan cu nan curason ta completamente di dje.” (2 Cronicanan 16:9) Y kico Yehova ta haci ora e haya hende humilde cu ta rindie adoracion pero cu ta abati pa motibo di varios prueba? Den un sentido, e “ta biba” cu hende asina pa medio di su spirito santo “pa rebiba spirito di e hende kibra y pa rebiba curason di e humilde.” (Isaias 57:15) Den e forma ei su adoradonan rebiba ta mihor prepara pa sigui sirbie cu un curason gososo. Esta un Dios humilde!
4, 5. (a) Con e salmista a mira Dios su manera di goberna? (b) Kico e echo cu Dios ta “humilia su mes” pa e “lanta hende pober for di stof” ta nifica?
4 Ningun otro persona den universo a humilia su mes na e mesun grado cu e Señor Soberano pa por yuda hende pecado. E salmista a skirbi: “SEÑOR ta halsa riba tur nacion; su gloria ta mas halto cu e shelonan. Ken ta manera SEÑOR nos Dios, kende ta sinta riba trono den haltura, kende ta humilia su mes pa mira e cosnan cu ta den shelo y riba tera? E ta lanta hende pober for di stof, y ta lanta esnan den necesidad for di e luga di benta sushi.”—Salmo 113:4-7.
5 Tuma nota di e palabranan “humilia su mes.” Mustra humildad por encera baha na nivel di un persona cu tin un nivel social mas abou of baha for di bo posicion of dignidad pa trata un persona cu tin un posicion inferior. Pues, loke Bijbel ta declara na Salmo 113:6 ta nifica cu Dios ta humilia su mes of ta baha na nivel di hende pa trata cu nan. Esei ta pinta un bunita cuadro di nos Dios humilde cu ta duna atencion amoroso na e necesidadnan di su adoradonan humano imperfecto.—2 Samuel 22:36.
Dicon Hesus Tawata Humilde
6. Kico tawata Yehova su acto di mas grandi di humildad?
6 E acto di mas grandi di humildad y amor cu Dios a efectua ta ora el a manda su Yiu primogenito stima nace riba tera y crece como hende pa salba humanidad. (Huan 3:16) Hesus a siña nos e berdad tocante su Tata celestial y despues a entrega su bida humano perfecto pa kita “pica di mundo.” (Huan 1:29; 18:37) Hesus, como un refleho perfecto di su Tata, incluso di Su humildad, tawata dispuesto pa haci loke Dios a pidie. Esei tawata e ehempel di mas grandi di humildad y amor cu un criatura di Dios a yega di pone. No ta tur hende a aprecia Hesus su humildad. Su enemigonan a consider’e asta como e hende ‘di rango mas abou.’ (Daniel 4:17, NW) Apostel Pablo si a realisa cu su rumannan di fe mester imita Hesus y pesei nan mester ta humilde den nan trato cu otro.—1 Corintionan 11:1; Filipensenan 2:3, 4.
7, 8. (a) Con Hesus a siña pa ta humilde? (b) Ki invitacion Hesus a extende na hende cu por a bira su disipel?
7 Pablo a enfatisa e ehempel sobresaliente di Hesus door di skirbi: “Laga tin den boso e actitud aki cu tawatin tambe den Cristo Hesus, kende, aunke cu e tawata existi den e forma di Dios, no a considera igualdad cu Dios algo pa tene na dje, ma a bandona su mes gloria, tumando forma di un sirbido, siendo traha den e semehansa di hende. Y hayando su mes den condicion di hende, el a humilia su mes door di bira obedecido te na morto” riba un staca di tormento.—Filipensenan 2:5-8.
8 Kisas bo ta puntra bo mes: ‘Con Hesus a siña pa ta humilde?’ Esei ta un beneficio maraviyoso cu el a saca como resultado di su asociacion intimo cu su Tata celestial pa un tempo hopi largo, durante cua el a sirbi como Dios su “trahado experto” den e creacion di tur cos. (Proverbionan 8:30) Despues di e rebelion den Eden, e Primogenito di Dios por a observa e manera humilde cu su Tata a trata cu hende pecado. Pesei, tempo cu Hesus tawata riba tera, el a refleha e humildad di su Tata y a extende e siguiente invitacion na hende: “Tuma mi yugo riba boso, y siña di mi, pasobra mi ta manso y humilde di curason; y boso lo haya sosiego pa boso alma.”—Mateo 11:29; Huan 14:9.
9. (a) Kico Hesus a haya asina interesante tocante mucha? (b) Uzando un mucha chikito, ki les Hesus a siña su siguidonan?
9 Pa motibo cu Hesus tawata berdaderamente humilde, mucha chikito no tawatin miedo di dje. Mas bien, nan a sinti nan atrai na dje. Y Hesus di su parti, a mustra cariño na e muchanan y a presta atencion na nan. (Marco 10:13-16) Kico Hesus a haya asina interesante tocante mucha? Sin duda nan tawatin cualidadnan deseabel cu algun di su disipelnan adulto no a desplega tur ora. Ta un echo estableci cu mucha chikito ta mira hende grandi como superior na nan. Bo por mira esaki na e cantidad di preguntanan cu nan ta haci. Si, compara cu hopi adulto, ta mas facil pa siña mucha, y nan no tin mes tanto tendencia pa sinti nan orguyoso. Na un ocasion, Hesus a mustra riba un mucha chikito y a bisa Su siguidonan: “Si boso no comberti y bira manera mucha, boso lo no drenta e reino di shelo.” Anto el a agrega: “Esun anto cu humilia su mes manera e mucha aki ta esun di mas grandi den e reino di shelo.” (Mateo 18:3, 4) Hesus a declara e regla: “Ken cu halsa su mes lo wordo humilia, y ken cu humilia su mes lo wordo halsa.”—Lucas 14:11; 18:14; Mateo 23:12.
10. Ki preguntanan nos lo considera?
10 E berdad ei ta lanta preguntanan importante. Pa nos por haya bida eterno nos mester cultiva entre otro berdadero humildad, pero pakico tin biaha ta dificil pa cristiannan ta humilde? Pakico ta un reto pa nos guli nos orguyo manda abou, na moda di papia, y reacciona cu humildad ora nos haya nos cu prueba? Y kico lo yuda nos logra cultiva berdadero humildad?—Santiago 4:6, 10.
Pakico Ta Dificil pa Ta Humilde
11. Pakico no ta un sorpresa cu nos ta lucha pa ta humilde?
11 Si bo ta luchando pa ta humilde, bo no ta so den e lucha aki. Na 1920, e revista aki a papia tocante e conseho di Bijbel cu hende mester ta humilde. El a bisa: “Pues ora nos mira cuanto balor Señor ta duna na humildad, tur su berdadero disipelnan mester sinti nan anima pa cultiva e cualidad aki tur dia.” Pero despues e revista a reconoce francamente: “Y toch, cu tur e conseho biblico aki, imperfeccion di hende ta pone cu esnan cu ta bira sirbido di Señor y cu ta dicidi di core e careda aki, aparentemente ta haya nan enfrenta cu mas problema y cu mas contratiempo den e asunto aki cu den cualkier otro.” Esei ta resalta un di e motibonan pakico cristiannan berdadero tin cu lucha pa nan ta humilde; como hende pecado nos ta anhela pa ricibi un gloria inapropiado. Esei ta pasobra nos ta desendiente di un pareha pecaminoso, Adam cu Eva, kendenan a cede na nan anhelonan egoista.—Romanonan 5:12.
12, 13. (a) Con e mundo aki ta stroba un cristian pa ta humilde? (b) Ken ta haci nos lucha pa cultiva humildad asta mas dificil?
12 Un otro motibo pakico kisas ta dificil pa desplega humildad ta cu nos ta biba den un mundo cu ta stimula hende pa purba di ta superior na otronan. Un di e metanan comun di e mundo aki ta anhelo pa satisface “e deseo di carni [pecaminoso] y e deseo di wowo y e orguyo di bida.” (1 Huan 2:16) En bes di laga e deseonan mundano ei domina nan, Hesus su disipelnan mester mantene nan wowo simpel y enfoca riba hacimento di e boluntad di Dios.—Mateo 6:22-24, 31-33; 1 Huan 2:17.
13 Un di tres motibo pakico ta dificil pa cultiva y desplega humildad ta cu esun cu a origina e actitud di un curason halsa, Satanas e Diabel, ta gobernando e mundo aki. (2 Corintionan 4:4; 1 Timoteo 3:6) Satanas ta fomenta su mal caracteristicanan. Por ehempel, el a busca manera di pone Hesus ador’e a cambio di “tur e reinonan di mundo y nan gloria.” Pero Hesus, humilde manera semper, a rechasa e oferta di e Diabel mesora. (Mateo 4:8, 10) Di mes manera, Satanas ta tenta cristiannan pa busca gloria pa nan mes. En bes di esei, cristiannan humilde ta trata pa sigui e ehempel di Hesus door di duna honor y alabansa na Dios.—Marco 10:17, 18.
Cultiva y Desplega Berdadero Humildad
14. Kico ta “humildad falso”?
14 Den apostel Pablo su carta na e Colosensenan, el a spierta nan contra hende cu ta fingi di ta humilde djis pa impresiona otronan. Pablo a describi esaki como un “humildad falso.” Esnan cu ta djis fingi cu nan ta humilde no ta hende spiritual. Mas bien, nan ta desplega un actitud “hincha” [NW] cu orguyo cu ta reda nan. (Colosensenan 2:18, 23) Hesus a mustra riba algun ehempel di e humildad falso ei. El a condena e farizeonan pa nan oracionnan haci den publico y pa e manera cu nan a yuna cu cara tristo y fingi djis pa hende mira nan. Na contraste, pa nos oracionnan personal por tin balor den bista di Dios, nan mester ta expresa cu humildad.—Mateo 6:5, 6, 16.
15. (a) Kico nos por haci pa cultiva humildad di mente? (b) Menciona algun bon ehempel di humildad.
15 Algo cu por yuda cristiannan cultiva berdadero humildad di mente ta ora nan ta enfoca riba e mihor ehempelnan di humildad: Yehova Dios y Hesucristo. Pa logra esaki, cristiannan mester tin un estudio regular di Bijbel y di e material di estudio cu “e esclabo fiel y prudente” ta percura. (Mateo 24:45) Un estudio asina ta masha importante pa superintendentenan cristian, “pa [nan] curason no halsa su mes riba [nan] rumannan.” (Deuteronomio 17:19, 20, NW; 1 Pedro 5:1-3) Medita riba e varios ehempelnan di personanan cu a ser bendiciona pa nan actitud humilde, manera Rut, Ana, Elisabet y hopi otro mas. (Rut 1:16, 17; 1 Samuel 1:11, 20; Lucas 1:41-43) Pensa tambe riba e tantisimo ehempelnan excelente di hombernan prominente cu a keda humilde den sirbishi di Yehova manera David, Yosias, Huan Bautista y apostel Pablo. (2 Cronicanan 34:1, 2, 19, 26-28; Salmo 131:1; Huan 1:26, 27; 3:26-30; Echonan 21:20-26; 1 Corintionan 15:9) Y kico di e tantisimo ehempelnan actual di humildad cu nos ta haya den e congregacion cristian? Ora cristiannan berdadero reflexiona riba e ehempelnan aki, nan lo ser yuda pa cultiva “humildad pa cu otro.”—1 Pedro 5:5.
16. Con e ministerio cristian ta yuda nos pa ta humilde?
16 Un otro cos cu por yuda nos pa ta humilde ta participacion regular den e ministerio cristian. Humildad mental por yuda nos ser mas efectivo ora nos ta acerca e hendenan cu nos topa den e trabou di cas pa cas y na otro luga. Esaki ta specialmente e caso ora doñonan di cas na prome instante reacciona cu apatia of cu mal manera riba e mensahe di Reino. Hopi bes nan ta cuestiona nos creencianan, y humildad por yuda e cristian sigui contesta pregunta “cu un genio suave y respet profundo.” (1 Pedro 3:15, NW) Sirbidonan humilde di Dios a muda bai teritorionan nobo y a yuda hende di diferente cultura y nivel di bida. Cu humildad e sirbidonan ei lo tin cu enfrenta e reto di siña un idioma nobo pa nan por duna mas yudansa na e hendenan cu nan kier papia cu ne tocante e bon nobo. Nan merece nos elogio!—Mateo 28:19, 20.
17. Ki responsabilidadnan cristian ta rekeri humildad?
17 Hopi ruman ta cumpliendo humildemente cu nan debernan cristian, poniendo interes di otronan riba esnan di nan mes. Por ehempel, pa un tata cristian saca tempo for di su asuntonan personal pa prepara y dirigi un estudio di Bijbel eficas cu su yiunan, e mester ta humilde. Humildad ta yuda yiunan tambe pa, maske nan mayornan ta imperfecto, honra nan y obedece nan. (Efesionan 6:1-4) Esposanan cu tin casa no creyente y cu ta purba gana nan casa pa medio di nan “conducta puro y respetuoso”, ta haya nan hopi bes den situacionnan cu ta rekeri humildad. (1 Pedro 3:1, 2) Humildad y amor sin egoismo ta birtudnan di hopi balor tambe ora nos ta percura amorosamente pa e necesidadnan di nos mayornan enfermo of di edad avansa.—1 Timoteo 5:4.
Humildad Ta Resolve Problema
18. Con humildad por yuda nos resolve problema?
18 Tur hende cu ta sirbi Dios ta imperfecto. (Santiago 3:2) De bes en cuando por surgi un desacuerdo entre dos cristian. Kisas un di nan tin un motibo valido pa keha contra e otro. Por lo general, por resolve e situacionnan ei door di aplica e conseho aki: ‘Boso soporta otro y pordona otro, si un di boso tin un keho contra un otro; mescos cu SEÑOR a pordona boso, asina boso tambe mester haci.’ (Colosensenan 3:13) Nos tin cu admiti si cu no ta facil pa sigui e conseho aki, pero humildad lo yuda bo pon’e na practica.
19. Kico nos mester corda ora nos ta papia cu un persona cu a haci nos daño?
19 Tin biaha un cristian por pensa cu e motibo valido cu e tin pa keha ta mucho serio pa pas’e por halto. E ora ei humildad lo yud’e acerca e persona cu supuestamente a hacie daño cu e meta pa restaura pas. (Mateo 18:15) Un di e motibonan pakico tin biaha problema no sa caba entre dos cristian ta cu un di nan of podise tur dos ta mucho orguyoso pa admiti nan falta. Of kisas esun cu ta tuma e iniciativa pa acerca e otro ta haci esei cu un tono arogante. Di otro banda, un actitud berdaderamente humilde lo contribui grandemente pa resolve hopi desacuerdo.
20, 21. Kico ta un di e yudansanan di mas grandi pa ta humilde?
20 Un paso clave pa desaroya humildad ta pa pidi Dios su yudansa y spirito. Pero corda, “Dios ... ta duna gracia [incluso su spirito santo] na e humildenan.” (Santiago 4:6) Pues si bo tin un desacuerdo cu un otro ruman di fe, pidi Yehova yuda bo admiti humildemente cualkier culpa menor of mayor di bo parti. Si ta abo ta e victima y esun cu a haci bo daño pidi despensa di curason, pordon’e humildemente. Si bo ta haya cu esaki ta dificil pa haci, pidi Yehova den oracion pa e yuda bo elimina cualkier rastro di un curason halsa.
21 Ora nos ta compronde e cantidad di beneficionan cu humildad ta trece cu ne, esei mester motiva nos pa cultiva y mantene e cualidad precioso aki. Pa logra esei, nos tin ehempelnan maraviyoso den Yehova Dios y Hesucristo! Nunca lubida e garantia divino: “E recompensa di humildad y e temor di SEÑOR ta rikesa, honor y bida.”—Proverbionan 22:4.
Puntonan pa Medita Ariba
• Ken ta e mihor ehempelnan di humildad?
• Pakico ta dificil pa cultiva humildad?
• Kico por yuda nos pa ta humilde?
• Pakico ta asina importante pa keda humilde?
[Preguntanan di Estudio]
[Plachi na pagina 26]
Hesus tawata berdaderamente humilde
[Plachi na pagina 28]
Mundo ta stimula hende pa purba di ta superior na otro
[Reconocemento]
Potret di OMS di L. Almasi/K. Hemzǒ
[Plachi na pagina 29]
Humildad ta yuda nos acerca e hendenan den sirbishi
[Plachinan na pagina 30]
Hopi bes nos por resolve un desacuerdo door di ta humilde y pas’e por halto den un spirito di amor
[Plachinan na pagina 31]
Cristiannan ta mustra humildad den hopi manera