E Palabra di Yehova Ta Prospera den “e Tera di Aguila”

“E TERA di Aguila.” Asina Albanesnan ta yama nan pais den nan idioma. E pais aki, cu su costa na Lama Adriatico, ta situa riba e Peninsula di Balkan, meimei di Grecia y ex Yugoslavia. Aunke tin hopi teoria tocante origen di e Albanesnan, mayoria historiado ta di acuerdo cu e Albanesnan y nan idioma a bini for di e Iliriconan di antiguedad, kende nan cultura, segun The Encyclopædia Britannica, ta bai bek te na aña 2000 prome cu nos era.

E bunitesa natural di Albania ta extende for di e area yen di sero den nort pa e beachnan extenso di santo blanco den sur na Lama Adriatico. Ma e bunitesa di mas grandi ta sinta den su hendenan. Nan ta cariñoso y hospitalario, energico y expresivo, hende cu ta siña lihe y cu ta expresa nan opinionnan cu hopi fervor y gestonan bibo.

Bishita di un Misionero Renombra

Sin duda, e personalidad atractivo di e hendenan y e bunita panorama di e pais a capta atencion di un biahero unico hopi siglo pasa. Rond di aña 56 di nos era, apostel Pablo, kende  a realisa hopi biahe, a skirbi: “Te na Ilirico mi a predica e evangelio di Cristo completamente.” (Romanonan 15:19) E parti sur di Ilirico ta coresponde cu loke awe ta e parti meimei y nort di Albania. Pablo a skirbi su carta for di Corinto, Grecia y sur di Ilirico. E echo cu el a skirbi con el a predica cabalmente y yega “te na Ilirico” ta indica cu sea el a yega te na e frontera di Ilirico of el a drenta den e region mes. Sea cual sea, e lo a predica den loke awe ta sur Albania. Pues, nos por bisa cu e prome persona cu a predica tocante e Reino di Dios na Albania tawata Pablo.

Siglonan a pasa. Imperionan a lanta y cai. Varios potencia stranhero a bini y bai for di e skina chikito aki di Europa te ora Albania a bira un estado independiente na 1912. Rond di un decada despues, Albania a bolbe tende tocante Yehova su Reino.

Un Comienso Excitante den Tempo Moderno

Den añanan 20 di siglo pasa, algun imigrante Albanes na Merca cu tawata asocia cu e Studiantenan Internacional di Bijbel, manera Testigonan di Yehova tawata conoci e tempo ei, a regresa Albania pa comparti loke nan a siña. Den nan tawatin Nasho Idrizi. Algun hende a reacciona bon na e mensahe. Pa duna atencion na e interes aki cu tawata aumenta, na 1924 a asigna e oficina di Rumania pa supervisa e trabou di predica na Albania.

Un di e personanan cu a siña tocante Yehova na Albania den e añanan ei tawata Thanas Duli (Athan Doulis). El a corda cu “na 1925 tawatin tres congregacion organisa na Albania, y tambe Studiantenan di Bijbel isola y personanan interesa aki y aya den henter e pais. E amor cu a existi entre nan tawata na contraste grandi cu ... e hendenan rond di nan!” *

E falta di bon caminda a pone cu tawata sumamente dificil pa bai di un luga pa otro. Pero, publicadonan celoso a acepta e reto. Por ehempel, na e costa sur na Vlorë, Areti Pina a batisa na 1928 tempo cu e tawatin 18 aña. E tawata predica na pia, subiendo y bahando seronan yen di baranca, cu Bijbel den su man. E tawata pertenece na un congregacion fuerte na Vlorë na cuminsamento di añanan ’30.

Na 1930, e sucursal na Atenas, Grecia, tawata dirigi e trabou di predica na Albania. Na  1932, un superintendente biahero di Grecia a bishita Albania pa anima y fortalece e rumannan. E tempo ei mayoria di e personanan cu a siña e berdad di Bijbel tawatin e speransa celestial. Nan reputacion como personanan limpi y recto a pone cu nan a gana respet profundo di hende tur caminda. E actividad di e rumannan fiel aki a duna hopi fruta. Den cada un di e dos añanan, 1935 y 1936, nan a laga mas o menos 6.500 literatura biblico na Albania.

Riba un dia, den e centro di Vlorë, Nasho Idrizi a toca un di e discursonan di J. F. Rutherford riba un tocadisco. E hendenan a sera nan negoshinan pa bin scucha Ruman Idrizi traduci e discurso na Albanes. E celo di e prome maestronan incansabel di Bijbel ei a ser bendiciona. Pa 1940 tawatin 50 Testigo na Albania.

Un Pais Ateo

Na 1939, e fasistanan di Italia a ocupa e pais. A revoca e reconocemento legal di Testigonan di Yehova, y a prohibi nan trabou di predica. Pronto despues, trupanan Aleman a invadi e pais. Ora Segundo Guera Mundial a caba, a lanta un lider militar carismatico cu tawata yama Enver Hoxha. Su Partido Comunista a gana e eleccionnan di 1946, y el a bira prome minister. Nan a yama e añanan cu a sigui e tempo di liberacion, pero eseinan a nifica net lo contrario pa Yehova su pueblo.

Gradualmente, e gobierno a cuminsa bira menos tolerante pa cu religion. Na harmonia cu nan posicion neutral como cristian, Testigonan di Yehova na Albania a nenga di carga arma y mete den politica. (Isaias 2:2-4; Huan 15:17-19) Door di esei, hopi di nan a ser encarsela, sin cuminda of e necesidadnan basico di bida. Den hopi caso, nan ruman mohenan spiritual cu no a bai sera, tawata laba nan paña y cushna pa nan.

Sin Miedo Apesar di Persecucion

Den cuminsamento di añanan ’40, Frosina Xheka, e tempo ei un teenager cu tawata biba den un pueblo banda di Përmet, a tende loke su ruman hombernan carnal mas bieu tawata siñando for di un Testigo sapate cu yama Nasho Dori. * Autoridadnan tawata birando mas stricto cu Testigonan di Yehova, pero pa disgusto di su mayornan, Frosina su fe a bira mas fuerte. “Nan tawata sconde mi sapatonan y bati mi si mi a bai un reunion cristian. Nan a purba casa mi cu un incredulo. Ora mi a nenga, nan a saca mi for di cas. Sneu tawata cai riba e dia ei. Nasho Dori a pidi Ruman Gole Flloko na Gjirokastër pa yuda mi. Nan a haci areglo pa mi bai biba serca dje cu su famia. Mi ruman hombernan tawata den prizon pa dos aña pa motibo di nan posicion neutral. Despues cu nan a sali liber, mi a muda bai Vlorë pa biba serca nan.

Polisnan a purba obliga mi participa den actividadnan  politico, pero mi a nenga. Nan a aresta mi, hiba mi den un cuarto y a rondona mi. Un di nan a menasa mi: ‘Bo no sa kico nos por haci cu bo?’ Mi a contest’e: ‘Boso por haci solamente loke Yehova permiti boso haci.’ El a responde mi rabia: ‘Bo mester ta loco! Bai djaki!’”

E mesun spirito leal ei a caracterisa e rumannan Albanes atrabes di e añanan ei. Pa 1957 nan a alcansa un maximo di 75 publicado di Reino. Na cuminsamento di añanan ’60, e sede di Testigonan di Yehova a haci areglo pa John Marks, un imigrante Albanes na Merca, bishita Tiranë pa yuda organisa e obra cristian. * Pero un poco despues Luçi Xheka, Mihal Sveci, Leonidha Pope y otro rumannan den posicionnan di responsabilidad a ser manda campamento di trabou forsa.

Lus na Final di e Tunnel

Prome cu 1967 Albania tawata contra tur religion. Despues no a tolera nan mas. Ni pastonan catolico, ni ortodox ni moslem no por a haci nan ceremonianan mas. Autoridadnan a sera misa- y moskeenan of a comberti nan den sala di deporte, museo of plasa. Ningun hende no tawatin mag di tin un Bijbel, ni bisa publicamente cu nan ta kere den Dios.

Tawata practicamente imposibel pa predica y tene reunion. E Testigonan, riba nan mes, a haci nan best pa sirbi Yehova, apesar cu nan tawata isola for di otro. Den e añanan ’60 pa ’80, e cantidad di Testigo a baha considerablemente. Pero e poco cu a keda tawata spiritualmente fuerte.

Na cabamento di añanan ’80 tawatin masha poco cambio politico na Albania. Paña y cuminda tawata scars. E pueblo no tawata felis. E reformanan cu a afecta Europa Oriental a alcansa Albania na cuminsamento di añanan ’90. Despues di 45 aña di e regimen dictatorial, un gobierno nobo a permiti libertad religioso atrobe.

Bou di direccion di e Cuerpo Gobernante di Testigonan di Yehova, e sucursalnan na Austria y Grecia a cuminsa tuma contacto mesora cu e rumannan Albanes. Rumannan Griego cu tawata sa Albanes a trece algun literatura biblico resien traduci na Tiranë y Berat. Ora e rumannan local cu tawata plama anteriormente a topa e Testigonan di afo pa prome bes den hopi aña, nan curason a yena cu goso.

Pioneronan Celoso di Otro Pais Ta Encabesa e Obra

Na cuminsamento di 1992, e Cuerpo Gobernante a haci areglo pa Michael cu Linda DiGregorio, un pareha misionero cu antecedente Albanes, muda bai Albania. Nan a busca drechi di e rumannan fiel di edad y a yuda nan bini hunto atrobe como parti di un famia spiritual internacional. Un grupo di 16 pionero special diligente, of evangelisado di tempo completo, di Italia, a yega na november, hunto cu cuater pionero Griego. Pa yuda nan siña Albanes, a organisa un curso di idioma.

E bida di tur dia no tawata facil pa e pioneronan stranhero aki. Coriente tawata bai cada rato. Winter tawata friu y humedo. E hendenan tawata para den rei pa oranan largo pa haya cuminda y otro necesidadnan di bida. Pero e problema di mas grandi cu e rumannan a enfrenta tawata con pa haya edificionan suficiente grandi pa acomoda e gran cantidad di  hende interesa cu tawata respondiendo na e berdad!

E pioneronan cu a lucha pa papia Albanes a bin descubri cu un idioma ta djis un medio pa logra algo. Un maestro versa den Bijbel a bisa nan: “Nos no tin nodi conhuga verbo perfectamente pa produci un sonrisa di cariño of pa brasa nos rumannan. E Albanesnan lo reacciona mas lihe riba boso palabranan for di curason, cu riba gramatica perfecto. No precupa, nan lo compronde.”

Despues di e prome curso di idioma, e pioneronan a cuminsa traha na Berat, Durres, Gjirokastër, Shkodër, Tiranë y Vlorë. Pronto congregacionnan a lanta manera padestul den e stadnan ei. Areti Pina, e tempo ei cu su 80 y pico aña y kebranto di salud, tawata biba ainda na Vlorë. A manda dos pionero special aya pa predica hunto cu Areti. E hendenan a keda asombra con e Testigonan di otro pais tawata papia Albanes: “Si nos kier siña algo, e misioneronan di otro religionnan ta pone nos siña Ingles of Italiano. Boso si mester tin un amor genuino pa nos y un mensahe importante pasobra boso a tuma e molester di siña Albanes!” Areti a termina su bida riba tera fielmente na januari 1994, activo den e trabou di predica te den e ultimo luna di su bida. E celo cu tanto e como e pioneronan a demostra a wordo bendiciona. Na 1995 a reestablece un congregacion na Vlorë. Awe, tin tres congregacion progresivo cu ta hopi activo den e trabou di predica den e stad portuario ei.

Na tur parti di e pais hende tawata sufri di hamber spiritual y tawatin masha poco prehuicio religioso. Nan tawata acepta y lesa ansiosamente cualkier literatura biblico cu nan a haya di e Testigonan. Hopi hoben a cuminsa studia Bijbel y ta progresando rapidamente.

Mas cu 90 congregacion y grupo den henter e pais ta sigui “wordo fortifica den fe, y [ta] bira cada dia mas hopi.” (Echonan 16:5) Ainda e 3.513 Testigonan na Albania tin hopi trabou. Na maart 2005, 10.144 persona a asisti na e Conmemoracion di e morto di Cristo. Combersacionnan cu hende hospitalario den e trabou di predica a produci mas cu 6.000 estudio di Bijbel. Claramente, miles di hende lo beneficia di e Traduccion di Mundo Nobo resien publica na Albanes. En berdad, Yehova su palabra ta prospera den “e Tera di Aguila” na Su honor y alabansa.

[Nota]

[Cuadro na pagina 20]

CONFLICTO ETNICO TA DISPARCE NA KOSOVO!

Kosovo a bira un nomber conoci na cabamento di añanan ’90 tempo cu disputanan encuanto teritorio y odio etnico cu raiz profundo a hiba na guera y intervencion internacional.

Durante e guera na Balkan, hopi Testigo mester a hui bai na paisnan biciña. Despues cu e guera a caba, un grupo chikito di nan a regresa Kosovo, cla pa pone man na obra. Pioneronan special di Albania y Italia a ofrece pa muda bai Kosovo pa yuda e 2.350.000 habitantenan einan. Aworaki tin cuater congregacion y seis grupo activo, un total di rond di 130 publicado, ta sirbiendo Yehova den e teritorio aki.

Den lente di 2003 e rumannan a tene un dia special di asamblea na Priština y tawatin 252 persona presente. Den nan tawatin personanan cu antecedente Albanes, Aleman, gitano, Italiano y Serbio. Na fin di e discurso di bautismo, e orado a haci dos pregunta. Tres persona a lanta para pa contesta cu un ‘si’: un Albanes di un grupo etnico, un gitano y un Serbio.

Despues cu esnan presente a tende e expresionnan simultaneo “Va!”, “Da!” y “Po!” for di e tres candidatonan di bautismo aki, tur hende a cuminsa bati man masha duro. E candidatonan a brasa otro. Nan a haya e contesta pa e problemanan etnico profundo cu a asota nan pais.

[Mapa na pagina 17]

(Pa e texto den su formato completo , wak e publicacion)

Lama Mediteraneo

ITALIA

ALBANIA

GRECIA

[Plachi na pagina 18]

Testigonan hoben ta imita e celo di esnan di mas edad

[Plachi na pagina 18]

Areti Pina a sirbi Yehova fielmente for di 1928 te na su morto na 1994

[Plachi na pagina 19]

E prome grupo di pionero di otro pais cu a asisti na un curso di idioma

[Reconocemento pa Potret na pagina 16]

Aguila: © Brian K. Wheeler/VIREO