Ki Clase di Educacion Por Duna Bo Exito den Bida?

BO A yega di haya bo den asina tanto problema cu bo a sinti como si fuera bo ta hogando den un remolino di awa? Djis imagina cuanto lo bo a sufri si bo a comete un fayo ora di trata cu un of mas di e problemanan ei! Ni un hende no a nace cu e capasidad pa resolve tur problema, esta, pa semper tuma e decisionnan di mas sabi. Pesei educacion ta necesario. Unda bo por haya un educacion cu ta prepara bo pa trata cu e problemanan di bida?

Hopi hende, chikito y grandi, ta haya cu siñansa escolar ta sumamente importante. Algun experto ta asta bisa cu nan “ta kere firmemente cu hamas lo bo por haya un [bon] trabou sin cu bo caba universidad.” Pero tin algun necesidad humano cu bo no por satisface cu solamente logronan material. Por ehempel, un estudio universitario ta yuda bo ser un bon mayor, casa of amigo? Al contrario, hende respeta pa nan logronan academico por desaroya caracteristicanan di personalidad cu ta indeseabel, of por fracasa den nan bida di famia of asta comete suicidio.

Algun ta acudi na religion pa haya guia, como un fuente di educacion, pero nan ta keda decepciona pa motibo cu nan no ta haya yudansa practico pa enfrenta e dificultadnan di bida. Tuma por ehempel loke Emilia * di Mexico a bisa: “Diessinco aña pasa mi a sinti cu ami cu mi casa simplemente no por a biba hunto mas. Tur ora bai nos tawata pleita. Mi no por a stop e di bebe. Hopi bes mi tawatin cu sali bai laga mi yiunan chikito so na cas pa busca mi casa. Mi tawata emocionalmente agota. Varios biaha mi a bai misa en busca di algo cu lo por a yuda mi haya un solucion. Aunke nan tawata uza Bijbel de bes en cuando, nunca mi a tende un conseho cu a trata spesificamente cu mi situacion; ningun hende no a acerca mi tampoco pa bisa mi kico mi tawatin cu haci. Sinta den misa un rato y ripiti un par di oracion no a satisface mi.” Kisas otronan ta keda desilusiona ora nan mira con nan mes lidernan spiritual ta hiba un bida leu for di ehemplar. Door di esei, hopi di nan ta perde confiansa den religion como un fuente di educacion pa logra exito den bida.

Pesei, kisas bo ta puntra bo mes: ‘Ki clase di educacion mi mester tin pa mi por tin exito den bida?’ Cristianismo berdadero tin contesta pa e pregunta importante aki? E siguiente articulo lo bai amplia riba esaki.

[Nota]