Tene Cuidou pa Bo Curason No Bira Halsa

“Dios ta opone esnan halsa.”—SANTIAGO 4:6, NW.

1. Duna un ehempel di sintimento apropiado di orguyo.

BO A yega di pasa den un experencia cu a yena bo cu orguyo? Mayoria di nos a yega di haya e dushi sensacion ei. E echo cu nos por sinti cierto orguyo no ta nada malo. Por ehempel, ora un pareha cristian wak raport di nan yiu mohe cu ta mustra su bon conducta y trabou duro na scol, probablemente nan lo sinti nan masha satisfecho cu su logronan. Apostel Pablo y su compañeronan a sinti nan orguyoso di un congregacion nobo cu nan a yuda lanta, pasobra e rumannan a soporta persecucion fielmente.—1 Tesalonicensenan 1:1, 6; 2:19, 20; 2 Tesalonicensenan 1:1, 4.

2. Pakico sintimento di orguyo por lo general ta indeseabel?

² For di e ehempelnan anterior, nos ta mira cu orguyo por nifica e goso cu un hende ta sinti pa motibo di un accion of algo cu e ta posee. Pero, hopi bes orguyo ta indica un autoestima inapropiado, un sintimento di superioridad pa motibo di habilidad, aparencia, rikesa of rango, y cu frecuencia e ta keda manifesta pa medio di un actitud arogante. E tipo di orguyo ei ta algo cu definitivamente nos como cristian mester tene cuidou cu ne. Dicon? Pasobra nos tin e tendencia natural pa ta egoista; esei ta algo cu nos a hereda for di nos antepasado Adam. (Genesis 8:21) Door di esei, facilmente nos curason por pone nos sinti un orguyo pa motibonan incorecto. Por ehempel, cristiannan mester evita di sinti nan orguyoso pa motibo di nan rasa, rikesa, educacion, habilidadnan natural of prestacion na trabou na comparacion cu otro hende. E sintimento di orguyo cu ta lanta pa motibo di e cosnan ei ta inapropiado y ta desagrada Yehova.—Yeremias 9:23; Echonan 10:34, 35; 1 Corintionan 4:7; Galationan 5:26; 6:3, 4.

3. Kico ta un curason halsa, y kico Hesus a bisa tocante dje?

³ Tin un motibo mas pakico nos tin cu rechasa orguyo inapropiado. Si nos laga e sintimento ei crece den nos curason, e por desaroya y bira un forma di orguyo masha repugnante—un curason halsa. Kico esei ta nifica? Ademas di sinti su mes superior, e hende cu tin un curason halsa ta menosprecia otro hende cu e ta mira como inferior. (Lucas 18:9; Huan 7:47-49) Hesus a menciona un actitud ‘halsa’ [NW] of arogante hunto cu otro mal caracteristicanan cu ta sali “for di curason” y cu ta “contamina hende.” (Marco 7:20-23) Cristiannan por mira con esencial ta pa evita di desaroya un curason halsa.

4. Con un analisis di ehempelnan biblico tocante hende cu tawatin un curason halsa por yuda nos?

 ⁴ Un analisis di algun relato di Bijbel tocante hende cu tawatin un curason halsa por yuda bo evita e actitud ei. E ora ei lo bo ta den un mihor posicion pa detecta sintimentonan inapropiado di orguyo cu lo por ta biba den bo of cu lo por desaroya cu tempo. Esaki lo yuda bo rechasa pensamento- of sintimentonan cu por pone bo bira halsa. Como resultado, lo bo no sufri e consecuencianan desfaborabel ora Dios cumpli cu loke el a spierta di dje: “Lo mi kita for di meimei di boso esnan cu ta alegra cu orguyo, y nunca mas lo bo ta soberbe riba mi sero santo.”—Sofonias 3:11.

Dios Ta Actua Contra Hende cu Curason Halsa

5, 6. Con Farao a mustra un curason halsa, y cu ki resultado?

⁵ E manera cu Yehova a actua contra gobernantenan poderoso manera Farao por duna bo un idea tambe con Yehova ta mira hende cu ta halsa nan mes. Tawata bisto cu Farao tawatin un curason halsa. El a mira su mes como un dios cu hende mester a adora, pesei el a desprecia su esclabonan, e Israelitanan. Wak con el a reacciona ora a pidie pa laga Israel bai den desierto pa “tene un fiesta” pa Yehova. El a contesta cu un aire di arogancia: “Ta ken ta [“Yehova”, NW] cu mi mester obedece su bos y laga Israel bai?”—Exodo 5:1, 2.

⁶ Despues cu Farao a experencia seis plaga, Yehova a bisa Moises pa puntra e gobernante Egipcio: “Ainda bo ta halsa bo mes contra mi pueblo door di no laga nan bai”? (Exodo 9:17) E ora ei Moises a anuncia e di shete plaga—hagel cu a ruina e tera. Despues di e di dies plaga Farao a laga e Israelitanan sali liber, ma el a cambia di idea y a sali nan tras. Finalmente, Farao y su ehersito a keda atrapa den Lama Cora. Imagina kico lo mester a pasa den nan mente ora e awanan a sera riba nan! Kico tawata e resultado di Farao su arogancia? Su tropanan elite a bisa: “Laga nos hui pa Israel, pasobra [“Yehova”, NW] ta bringa pa nan contra e Egipcionan.”—Exodo 14:25.

7. Con gobernantenan di Babilonia a mustra cu nan tawatin curason halsa?

⁷ Otro gobernantenan arogante, cu tawatin curason halsa, tambe a sufri humiliacion na man di Yehova. Un di nan tawata Senakerib, rei di Asiria. (Isaias 36:1-4, 20; 37:36-38) Cu tempo, e Babilonionan a derota Asiria, pero dos rei di Babilonia cu tawatin curason halsa tambe a ser humilia. Corda riba e fiesta cu rei Belsasar a tene durante cua e cu su invitadonan real a bebe biña for di e copanan saca for di e tempel di Yehova, pa alaba e diosnan di Babilonia. Diripiente e dedenan di un man a aparece y a skirbi un mensahe riba muraya. Ora a puntra profeta Daniel pa splica kico e palabranan misterioso a nifica, el a recorda Belsasar: “E Dios Haltisimo a duna bo tata Nabucodonosor soberania ... Ma ora su curason a halsa ..., el a wordo baha for di su trono real, y su gloria a wordo kita for di dje ... Abo, su yiu homber Belsasar, no a humilia bo curason, aunke cu bo tawata sa tur esaki.” (Daniel 5:3, 18, 20, 22) E mesun anochi ei, e ehersito di Medopersia a derota Babilonia y mata Belsasar.—Daniel 5:30, 31.

8. Con Yehova a trata cu varios hende arogante cu tawatin curason halsa?

⁸ Pensa tambe riba otro hombernan arogante cu tawatin curason halsa y cu a desprecia e pueblo di Yehova: Goliat, e gigante Filisteo, Haman e prome minister Perso, rei Herodes Agripa, kende a goberna e provincia di Hudea. Pa motibo di nan arogancia e tres hombernan ei a muri un morto humiyante na man di Dios. (1 Samuel 17:42-51; Ester 3:5, 6; 7:10; Echonan 12:1-3, 21-23) E manera cu Yehova a trata cu e hombernan ei ta confirma e berdad aki: “Orguyo ta bin prome cu destruccion, y un spirito arogante prome cu caida.” (Proverbionan 16:18) En berdad, no tin duda cu “Dios ta opone esnan halsa.”—Santiago 4:6, NW.

9. Con e reinan di Tiro a resulta di ta traidonan?

⁹ Na contraste cu e gobernantenan di Egipto,  Asiria y Babilonia cu tawatin curason halsa, e rei di Tiro un tempo a duna yudansa na e pueblo di Dios. Durante e reinado di David y di Salomon, e rei aki a percura hombernan habil di ofishi y material pa e edificionan real y pa e tempel di Dios. (2 Samuel 5:11; 2 Cronicanan 2:11-16) Lamentablemente, despues e reinan di Tiro a bira contra e pueblo di Yehova. Kico a causa esei?—Salmo 83:3-7; Joel 3:4-6; Amos 1:9, 10.

“Bo Curason A Bira Halsa”

10, 11. (a) Cu ken nos por compara e reinan di Tiro? (b) Kico a cambia e actitud di Tiro pa cu Israel?

¹⁰ Yehova a inspira su profeta Ezekiel pa desenmascara y condena Tiro su dinastia di reinan. E mensahe ei dirigi na e “rei di Tiro” ta contene expresionnan cu ta cuadra cu tanto e dinastia di Tiro como e traido original, Satanas, kende ‘no a para [firme] den e berdad.’ (Ezekiel 28:12; Huan 8:44) Un tempo Satanas tawata un criatura spiritual leal den Yehova su organisacion di yiunan celestial. Yehova Dios a duna un indicacion mediante Ezekiel kico ta e motibo basico cu tanto e dinastia di Tiro como Satanas a bira lomba pa Dios:

¹¹ “Bo tawata na Eden, e hofi di Dios; bo tawata dorna cu tur sorto di piedra precioso ... Bo tawata ungi como e kerubin wardado ... Bo tawata perfecto den bo camindanan for di e dia cu bo a wordo crea, te na e momento cu inhusticia a wordo haya den bo. Pa motibo di bo negoshamento extenso bo a yena cu violencia, y bo a peca. Pesei [lo mi] ... destrui bo, o kerubin wardado ... Bo curason a bira orguyoso [“halsa”, NW] pa motibo di bo bunitesa; bo a corumpi bo sabiduria pa motibo di bo splendor.” (Ezekiel 28:13-17) Si, un actitud halsa y arogante a impulsa e reinan di Tiro pa bira violento contra e pueblo di Yehova. Tiro a bira un centro comercial sumamente prospero y famoso pa su bunita obranan. (Isaias 23:8, 9) E reinan di Tiro a bira masha arogante y nan a cuminsa oprimi e pueblo di Dios.

12. Kico a pone Satanas bira desleal, y kico el a sigui haci?

¹² Di igual manera, un tempo e criatura spiritual cu a bira Satanas tawatin e sabiduria necesario pa cumpli cu cualkier asignacion cu Dios tawatin p’e. En bes di ta gradicido pa esei, el a bira “orguyoso” y a cuminsa menosprecia Dios su manera di goberna. (1 Timoteo 3:6) El a bira asina halsa cu el a cuminsa anhela e adoracion di Adam cu Eva. E mal deseo aki a bira fertil y a duna lus na pica. (Santiago 1:14, 15) Satanas a seduci Eva pa come e fruta di e unico palo cu Dios a prohibi. Anto, uzando Eva, Satanas a pone Adam tambe come di e fruta prohibi. (Genesis 3:1-6) Di e forma ei e prome pareha humano a rechasa e derecho di Dios di goberna riba nan y, de echo, nan a bira adorado di Satanas. Satanas su arogancia no tin limite. El a purba seduci tur criatura inteligente den shelo y riba tera, incluso Hesucristo, pa ador’e y asina rechasa e soberania di Yehova.—Mateo 4:8-10; Revelacion 12:3, 4, 9.

13. Na kico un curason halsa a hiba?

 ¹³ Pues bo por mira cu e prome persona cu a desaroya un curason halsa ta Satanas; esei ta e causa basico di pica, sufrimento y degeneracion den e mundo djawe. Como “dios di e mundo aki”, Satanas ta sigui promove sintimento inapropiado di orguyo y arogancia. (2 Corintionan 4:4) E sa cu no a ked’e mucho tempo mas, pesei e ta hiba un guera contra cristiannan berdadero. Su meta ta pa aleha nan for di Dios, pa nan bira stimado di nan mes, bromado y arogante. Bijbel a profetisa cu e caracteristicanan egoista ei lo reina den e “ultimo dianan” aki.—2 Timoteo 3:1, 2; Revelacion 12:12, 17.

14. A base di ki regla Yehova ta trata cu su criaturanan inteligente?

¹⁴ Hesucristo, di su parti, a expone e fruta putri causa pa Satanas su arogancia. Na por lo menos tres ocasion y den presencia di enemigonan cu tawata husto den nan mes bista, Hesus a splica a base di ki regla Yehova ta trata cu humanidad: “Ken cu halsa su mes lo wordo humilia, y esun cu humilia su mes lo wordo halsa.”—Lucas 14:11; 18:14; Mateo 23:12.

Tene Cuidou pa Bo Curason No Bira Halsa

15, 16. Kico a pone Agar su curason bira halsa?

¹⁵ Kisas bo a nota cu e ehempelnan menciona anteriormente di hende arogante cu tawatin un spirito halsa tawatin di aber cu hombernan prominente. Esei ta nifica cu hende comun y coriente no tin e tendencia di bira halsa? Claro cu no. Tuma por ehempel un incidente cu a tuma luga den e famia di Abraham. E patriarca no tawatin yiu pa bira su heredero, y su esposa, Sara, ya caba a pasa e edad di haya yiu. Den e tempo ei tawatin e custumber pa un homber den e situacion di Abraham tuma un di dos esposa y haya yiu cu ne. Dios a tolera e matrimonionan ei pasobra ainda no tawata su tempo pa reestablece su norma original di matrimonio entre adoradonan berdadero.—Mateo 19:3-9.

¹⁶ Riba insistencia di su casa, Abraham a bai di acuerdo pa produci un potencial heredero pa medio di Sara su cria Egipcio, Agar. Como esposa secundario di Abraham, Agar a sali na estado. Lo e mester tawata profundamente gradicido pa su posicion di honor. Pero, en bes di esei, el a laga su curason bira halsa. E relato di Bijbel ta bisa: “Ora cu el a mira cu el a sali na estado, [Sarai] a keda desprecia den su bista.” E actitud ei a causa asina tanto conflicto den famia di Abraham te cu Sara a core cu Agar. Pero tawatin un solucion pa e problema. E angel di Dios a conseha Agar: “Bai bek serca [Sarai], y somete bo mes na su autoridad.”  (Genesis 16:4, 9) Aparentemente, Agar a sigui e conseho aki, el a cambia su actitud pa cu Sara y a bira antepasado di hopi hende.

17, 18. Pakico nos tur tin cu tene cuidou pa no desaroya un curason halsa?

¹⁷ E caso di Agar ta ilustra cu ora situacion drecha pa un hende, su curason por bira halsa. E les cu nos por siña for di esei ta cu asta un cristian cu a sirbi Dios cu un curason puro por bira halsa ora e haya rikesa of autoridad. E actitud ei por desaroya tambe ora otro hende elogi’e pa su exito, sabiduria of habilidad. Si, un cristian mester tene cuidou pa e no desaroya un curason halsa. Esei ta conta specialmente ora e logra cierto exito of haya mas responsabilidad.

¹⁸ E motibo di mas importante pa evita un curason halsa ta e manera cu Dios ta mira e caracteristica aki. Su Palabra ta declara: “Un mirada orguyoso, un curason halsa, y e lampi di e malbado ta pica.” (Proverbionan 21:4) Ta interesante pa nota cu Bijbel ta spierta particularmente cristiannan “cu ta rico den e mundo actual” pa nan no ta “soberbe”, of halsa. (1 Timoteo 6:17; Deuteronomio 8:11-17) Cristiannan cu no ta rico mester evita di tin un wowo ‘envidioso’, y nan mester corda cu tur hende, sea rico of pober, por desaroya un curason halsa.—Marco 7:21-23; Santiago 4:5, NW.

19. Den ki manera Uzias a daña tur e bon cu el a haci?

¹⁹ Un curason halsa hunto cu otro mal caracteristicanan por ruina un bon relacion cu Yehova. Tuma por ehempel e prome parti di rei Uzias su reinado: “El a haci bon den bista di SEÑOR ... Y el a sigui busca Dios ... ; y tanten cu el a busca SEÑOR, Dios a hacie prospera.” (2 Cronicanan 26:4, 5) Pero lamentablemente rei Uzias a daña tur e bon cu el a haci pasobra “su curason a bira asina orguyoso cu el a actua corumpi.” El a bira asina arogante cu el a drenta e tempel y a ofrece sencia. Ora e sacerdotenan a spiert’e pa e no comete e acto soberbe aki, Uzias ‘a rabia masha.’ Como resultado, Yehova a dal e cu lepra, y el a muri como un homber desaproba pa Dios.—2 Cronicanan 26:16-21.

20. (a) Con rei Ezekias a hera daña tur e bon cu el a haci? (b) Kico nos lo considera den e siguiente articulo?

²⁰ Di otro banda, wak e ehempel di rei Ezekias. Na un ocasion, e rei a hera daña tur e bon cu el a haci pasobra el a bira “orguyoso.” Afortunadamente, “Ezekias a humilia e orguyo di su curason” y a recobra e aprobacion di Dios. (2 Cronicanan 32:25, 26) Ripara cu loke a cura e curason halsa di Ezekias tawata humildad. Si, humildad ta net lo contrario di un curason halsa. Pesei, den e siguiente articulo, nos lo considera con nos por cultiva y mantene humildad cristian.

21. Kico cristiannan humilde por anhela?

²¹ Pero, laga nos no lubida tur e mal fruta cu arogancia y un curason halsa a produci.  Siendo cu “Dios ta opone hende halsa”, laga nos ta firmemente determina pa rechasa sintimento di orguyo inapropiado. Segun cu nos ta haci esfuerso pa ta cristiannan humilde, nos por anhela pa sobrevivi e gran dia di Dios, ora hende cu curason halsa y nan fruta lo ser elimina for di tera. E ora ei, “e orguyo di hende lo wordo humilia, y e arogancia di hende lo wordo rebaha; y SEÑOR so lo wordo halsa den e dia ei.”—Isaias 2:17.

Puntonan pa Medita Ariba

• Con lo bo describi un persona halsa?

• Con e actitud di un curason halsa a origina?

• Kico ta pone un hende su curason bira halsa?

• Pakico nos tin cu tene cuidou pa nos curason no bira halsa?

[Preguntanan di Estudio]

[Plachi na pagina 23]

E curason halsa di Farao a causa su humiliacion

[Plachi na pagina 24]

Ora situacion a drecha pa Agar, su curason a bira halsa

[Plachi na pagina 25]

Ezekias a humilia su mes y a recobra e aprobacion di Dios