Yehova Lo No Bandona Bo Nunca

E CRISTIANNAN na Hudea a haya nan cu oposicion feros, y nan tawatin cu lucha cu e punto di bista materialista di e hendenan rond di nan. Pa anima nan, apostel Pablo a cita e palabranan cu Yehova a dirigi na e Israelitanan ora nan a drenta e Tera Priminti. Pablo a skirbi: “Nunca lo mi no bandona bo, y nunca lo mi no laga bo desampara.” (Hebreonan 13:5; Deuteronomio 31:6) Sin duda, e promesa aki a fortalece e cristiannan Hebreo di prome siglo.

E mesun promesa aki mester fortifica nos pa enfrenta e ansiedadnan cu bida den e “temponan trabahoso” aki ta trece cu ne. (2 Timoteo 3:1) Si nos confia den Yehova y actua di acuerdo cu esei, lo e sostene nos asta den e circunstancianan di mas dificil. Pa mira con Yehova por cumpli cu e promesa aki, laga nos considera e ehempel di ora un hende perde su trabou diripiente.

Confronta cu Cambionan Diripiente

E cantidad di hende desemplea ta creciendo rond mundo. Segun un revista Polaco, desempleo ta ser considera como “un di e problemanan socioeconomico di mas dificil.” Nacionnan industrialisa no ta un excepcion. Por ehempel, na 2004, asta entre e miembronan di e Organisacion pa Cooperacion y Desaroyo Economico, desempleo a “aumenta na mas cu 32 miyon hende, alcansando un nivel mas halto cu durante e Gran Depresion di añanan 30 di siglo pasa.” Na Polonia, e Oficina Central di Estadistica a indica cu na december 2003 tawatin tres miyon hende desemplea, cu “ta representa 18 porshento di ciudadano cu tin edad pa traha.” Un fuente a bisa cu desempleo entre e poblacion Africano na Sur Africa a alcansa 47,8 porshento na 2002!

Hopi hende, incluso sirbidonan di Yehova, ta core peliger di perde trabou of haya retiro inesperadamente. Cualkier un di nos por haya nos cu “tempo y suseso imprevisto.” (Eclesiastes 9:11, NW) Nos por haya nos ta expresa e palabranan di e salmista David: “E angustianan di mi curason ta aumenta.” (Salmo 25:17) Lo bo por enfrenta e circunstancianan desfaborabel ei? Nan lo por afecta bo bienestar emocional, spiritual y material. Si  bo perde trabou, lo bo por logra lanta bek riba pia?

Con pa Trata cu e Stress Emocional

“Ta mas doloroso ora un homber perde trabou” pasobra por lo general ta nan ta e kostwinner di famia, segun e psicologo Janusz Wietrzyński. El a bisa cu esaki por pone e homber pasa den cambionan drastico di emocion, di rabia pa resignacion. Un tata cu a haya retiro por perde su dignidad y cuminsa “pleita cu su famia.”

Adam, un tata cristian di dos yiu, a splica con el a sinti ora el a perde su trabou: “Mi a bira un hende cu ta cla pa irita; tur cos tawata molestia mi. Asta anochi tur loke mi tawata soña ta tocante trabou y con pa percura pa mi yiunan y casa, kende tambe a haya su retiro diripiente.” Ora Ryszard cu Mariola, un pareha casa cu un yiu, a perde nan fuente di entrada, ainda nan tawata pagando un fiansa grandi na banco. E esposa a conta: “Mi tawatin un precupacion constante; mi consenshi tawata bisa mi cu nos a comete un fayo di busca e fiansa ei. Tur ora mi tawata pensa cu ta mi falta.” Den situacionnan asina nos por rabia facilmente, bira ansha of amarga, y nos emocionnan por caba cu nos. Pesei con nos por controla e emocionnan negativo cu por lanta den nos?

Bijbel ta duna conseho practico riba con nos por mantene un actitud positivo. Apostel Pablo a conseha: “No precupa pa nada; ma den tur cos, pa medio di oracion y suplica cu gradicimento, laga boso peticionnan ta conoci dilanti di Dios. Y e pas di Dios, cu ta surpasa tur comprondemento, lo warda boso curason y boso mente den Hesucristo.” (Filipensenan 4:6, 7) Door di acerca Yehova den oracion, nos por haya “e pas di Dios”, un trankilidad mental basa riba nos fe den dje. E casa di Adam, Irena, a bisa: “Den nos oracionnan, nos a conta Yehova tocante nos situacion y con nos lo por a simplifica nos bida asta mas. Mi casa, kende sa ta mas inclina pa precupa, a cuminsa sinti cu un solucion ta na caminda.”

Si abo perde trabou inesperadamente, bo ta den un bon posicion pa aplica e spiertamento cu Hesucristo a duna den e Sermon Riba Sero: “No precupa boso mes pa boso bida, kico boso lo come of kico boso lo bebe; tampoco pa boso curpa, kico boso lo bisti. . . . Ma busca prome e reino di Dios y Su husticia, y tur e cosnan aki lo wordo añadi na boso.” (Mateo 6:25, 33) Pa Ryszard cu Mariola por a deal cu nan emocionnan, nan a aplica e conseho aki. “Semper mi esposo a consola mi y a enfatisa cu Yehova lo no bandona nos”, segun Mariola. Su casa a agrega: “Door di haci oracion hunto continuamente, nos a hala mas serca Dios y mas serca otro, y esei a duna nos e consuelo necesario.”

E spirito santo di Dios tambe lo yuda nos den nos lucha. E dominio propio cu e spirito por produci den nos, por yuda nos keda calmo y trankil. (Galationan 5:22, 23) Kisas no ta facil, pero e ta posibel si, pasobra Hesus a priminti cu e “Tata celestial lo duna e spirito santo na esnan cu pidie.”—Lucas 11:13; 1 Huan 5:14, 15.

 No Neglisha Bo Necesidadnan Spiritual

Un perdida inespera di trabou, na prome instante, por precupa asta e cristian di mas balansa, pero nos no mester neglisha nos necesidadnan spiritual. Tuma por ehempel Moises di 40 aña, kende su bida a cambia completamente ora el a perde su posicion den e aristocracia y mester a bira un wardado di carne, un trabou cu e Egipcionan a desprecia. (Genesis 46:34) Moises tawatin cu ahusta na su circunstancianan nobo. Pa e siguiente 40 añanan, el a laga Yehova molde’e y prepar’e pa e tareanan nobo cu e tawatin su dilanti. (Exodo 2:11-22; Echonan 7:29, 30; Hebreonan 11:24-26) Apesar di e dificultadnan cu el a enfrenta, Moises a mantene su enfoke riba cosnan spiritual, dispuesto pa acepta e entrenamento di Yehova. Nunca laga circunstancianan desfaborabel pone nos perde nos balornan spiritual!

Aunke e perdida di trabou inespera por ta algo traumatico, esei ta un bon oportunidad pa fortalece nos relacion cu Yehova Dios y su pueblo. Esei ta loke Adam, menciona anteriormente, a sinti. El a bisa: “Ora tanto ami como mi casa a perde nos trabou, e idea di stop di bai reunion cristian of baha nos participacion den e trabou di predica no a pasa mes den nos mente. E punto di bista ei a proteha nos pa no bira demasiado precupa pa e dia di mañan.” Ryszard a comparti e opinion ei: “Si no tawata pa e reunionnan y e ministerio, nos lo no por a deal cu e situacion; precupacion lo a caba cu nos sigur. Combersacionnan spiritual cu otro hende ta edificante, pasobra nan ta dirigi nos atencion na nan necesidadnan y no na esnan di nos.”—Filipensenan 2:4.

 Si, en bes di precupa tocante trabou, purba uza e tempo extra pa actividadnan spiritual: haci estudio personal, participa den actividadnan di congregacion of amplia bo ministerio. En bes di hiba un ‘bida di desempleado’, sin nada di haci, lo bo ‘abunda den e trabou di Señor’—algo cu lo resulta den goso tanto pa bo como pa tur persona sinsero cu ta responde na e mensahe di Reino cu bo ta predica.—1 Corintionan 15:58.

Cumpli cu e Necesidadnan Material di Bo Famia

Sinembargo, nutricion spiritual lo no yena un stoma bashi. Ta bon pa nos corda riba e siguiente principio: “Si un hende no provee pa su mes hendenan, y specialmente pa esnan di su cas, el a nenga e fe y ta piyo cu un incredulo.” (1 Timoteo 5:8) Adam a bisa: “Maske e rumannan den congregacion ta cla pa yuda cu nos necesidadnan fisico, como cristian nos tin un obligacion pa busca trabou.” Nos por conta riba e sosten di Yehova y di su pueblo, pero nos no mester lubida nunca cu nos tin cu tuma iniciativa pa haya un trabou.

Ki iniciativa? Adam a bisa: “No sinta man crusa y warda pa Dios yuda bo, en espera di un milager. Ora bo ta busca trabou, no duda pa identifica bo mes como Testigo di Yehova. Por lo general, doñonan di trabou ta duna balor na esei.” Ryszard a duna e siguiente conseho: “Papia cu ken cu bo conoce tocante oportunidad di trabou, sigui aberigua na instancianan di intermediacion di empleo, lesa avisonan manera: ‘Nos ta busca un hende mohe pa cuida un persona incapasita’; of, ‘Trabou temporal: limpia y cuida cura.’ Sigui busca! No sea mucho selectivo, ni ora bo haya algo ‘cu no ta na bo nivel’ of algo cu no ta cumpli cu bo aspiracionnan.”

Si, ‘Yehova ta yuda nos.’ Lo e “no bandona bo, y nunca lo [e] no laga bo desampara.” (Hebreonan 13:5, 6) Bo no tin nodo di ta demasiado precupa. E salmista David a skirbi: “Pone bo bida den man di SEÑOR, confia den dje; lo e actua.” (Salmo 37:5, BPK) ‘Pone nos bida den man di SEÑOR’ ta nifica confia den Yehova y sigui su caminda, asta ora circunstancianan no ta mustra mucho faborabel pa nos.

Adam cu Irena a logra sostene nan mes door di laba bentana y limpia trapi y door di cremencha ora di cumpra cos. Tambe nan tawata bishita un oficina di intermediacion di empleo regularmente. Irena a bisa: “Yudansa tawata bini net ora nos tawatin mester di dje.” Su esposo a agrega: “Cu tempo nos a bin ripara cu e cosnan cu nos tawata pidi den nos oracionnan no necesariamente tawata cuadra cu e boluntad di Dios. Esaki a siña nos confia den su sabiduria y no actua segun nos mes comprondemento. Ta mihor warda trankil riba e solucion di Dios.”—Santiago 1:4.

Ryszard cu Mariola a tuma varios job pero rond di e mesun tempo ei nan a cuminsa predica den teritorionan caminda tawatin mas necesidad. Ryszard a bisa: “Nos tawata haya trabou net na e momentonan cu nos no tawatin nada di come. Nos a nenga di tuma trabou cu ta paga bon pero cu lo a interferi cu nos responsabilidadnan teocratico. Nos a prefera di spera riba Yehova.” Nan ta kere cu ta Yehova a maniobra cosnan di tal manera cu nan por a huur un apartamento bastante economico y cu finalmente Ryszard a haya un trabou.

Kisas ta duro pa bo perde bo fuente di entrada, pero pakico no mir’e como un oportunidad pa bo experencia personalmente cu Yehova hamas lo bandona bo? Yehova ta percura pa bo. (1 Pedro 5:6, 7) El a priminti pa medio di profeta Isaias: “No desmaya, pasobra mi ta bo Dios. Lo mi fortalece bo, si, lo mi yuda bo.” (Isaias 41:10) Nunca laga un incidente inespera, ni un retiro for di trabou, paralisa bo. Haci tur loke bo por, anto laga e resto den man di Yehova. Spera riba Yehova “den silencio”, esta, sin keha tocante bo situacion den bida. (Lamentacion 3:26) Lo e bendiciona bo ricamente.—Yeremias 17:7.

[Plachi na pagina 9]

Uza e tempo pa actividadnan spiritual

[Plachinan na pagina 10]

Siña economisa, y ora di busca trabou, no sea mucho selectivo